Se Akpanamde Man Okop Inemesịt Kpa ye Se Iwọrọde Fi​—Nso ke Bible Etịn̄?

Ke eyo nnyịn emi owo mîdiọn̄ọke se n̄kpọn̄ edimande mi, idụhe eke ekemede ndidiọn̄ọ se idiwọrọde imọ n̄kpọn̄. Edi, nte inamde n̄kpọ ke ini n̄kpọ etịbede ọnọ nnyịn edinam ikop inemesịt m̀mê ikûkop, idịghe se itịbede oro. Bible ọdọhọ ke mbon ‘inemesịt ẹsidadia usọrọ kpukpru ini’ kpa ye se iwọrọde mmọ. (Mme N̄ke 15:15) Nso ke ikpanam man ika iso ikop inemesịt? Mme item Bible emi ẹkeme ndin̄wam fi.

Yọ editịmede esịt

Bible ọdọhọ ete: “Editịmede esịt ayanam esịt ofụhọ, edi eti ikọ anam esịt adara.”​—Mme N̄ke 12:25.

• Bible ekeme ndin̄wam fi okûnen̄ede utịmede esịt. Okpoyom ndidiọn̄ọ nte Bible ekemede ndinam oro, mbọk kot ibuotikọ emi “Se Bible Etịn̄de Aban̄a Editịmede Esịt.”

Nam se mîdiyakke fi okop ndobo

Bible ọdọhọ ete: “Ata ufan amama ufan kpukpru ini, onyụn̄ edi eyeneka emi amanade ọnọ ini nnanenyịn.”​—Mme N̄ke 17:17.

• Bible ọdọn̄ọ nti item emi ẹkemede ndin̄wam fi enyene nti ufan ndien emi idiyakke fi enen̄ede okop ndobo. Kot ibuotikọ emi “Ndinyene Ufan Idiyakke Okop Ndobo​—Nte Bible Ekemede Ndin̄wam.”

Ma Abasi ye mbọhọ-idụn̄ fo

Bible ọdọhọ ete: “Afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo. . . . Afo enyene ndima mbọhọidụn̄ fo nte idemfo.”a​—Matthew 22:37-39.

• Ndisibọn̄ akam ekeme ndin̄wam nnyịn inen̄ede ima Abasi. Okpoyom ndidiọn̄ọ n̄kpọ en̄wen en̄wen, mbọk kot ibuotikọ emi “Ndi Abasi Esikop Akam Nnyịn?”

• Isiwụt ke imama mbon en̄wen ke ini inamde n̄kpọ ye mmọ nte Jesus ọkọdọhọde inam. Mbọk kot ibuotikọ emi “What Is the Golden Rule?” man ọdiọn̄ọ n̄kpọ en̄wen en̄wen.

Emekeme ndikpep n̄kpọ en̄wen mban̄a nte Bible ekemede ndin̄wam fi okop inemesit kpa ye se iwọrọde fi. Man anam emi, dọhọ Ntiense Jehovah esidineme ikọ Abasi ye afo. Edi ke mfọn.