Ibat Unam Ikọt Enen̄ede Osụhọde ke Isua 50 Oro Ebede—Nso ke Bible Etịn̄?

Ke October 9, 2024, mbon World Wildlife Fund ẹma ẹtịn̄ nte se mme owo ẹnamde afịnade mme unam ikọt. Mbụk emi anam mme owo ẹnen̄ede ẹfụhọ. Se mmọ ẹketịn̄de emi owut ke “ibat unam ikọt enen̄ede osụhọde ke se ikande isua 50 oro ebede, oro edi, ọtọn̄ọde ke 1970-2020.” Mbụk oro odụri nnyịn utọn̄ ete: “Idịghe ikọ n̄kpon inua, edieke idọhọde ke se iditịbe ke ufan̄ isua ition ke iso ke ẹdida ibiere nte uwem editiede ke Isọn̄.”

Mbụk emi enen̄ede akpa ediwak owo idem. Imenen̄de ima ererimbot nnyịn, isinyụn̄ inemke nnyịn ndikụt se mme owo ẹnamde mme unam ikọt. Se inamde etie nnyịn ke idem ntre edi ke Abasi okoyom nnyịn ise iban̄a mme unam.—Genesis 1:27, 28; Mme N̄ke 12:10.

Ntre, imekeme n̄kere ‘Ndi iyekeme ndise mban̄a mme unam ikọt? Nso ke Bible etịn̄?’

Se iditịbede ke ini iso

Kpa ye ofụri se inamde man n̄kpọ okûnam mme unam, Abasi kpọt edikpeme mmọ. Bible ke Ediyarade 11:18, ama etetịn̄ ke Abasi ‘oyosobo mbon oro ẹbiatde isọn̄.’ Ufanikọ Bible oro ekpep nnyịn n̄kpọ iba:

1. Abasi idiyakke mme owo ẹsobo isọn̄ emi ofụri ofụri.
2. Abasi ọyọsọp anam n̄kpọ. Isan̄a didie idiọn̄ọ? Akananam mme owo inamke n̄kpọ emi edisobode mme unam ikọt nte ẹnamde idahaemi.

Nso ke Abasi edinam man mfịna emi etre? Enye edida ukara esie eke heaven, m̀mê Obio Ubọn esie, ikara isọn̄ emi. (Matthew 6:10) Ukara oro eyekpep mme owo nte mmọ ẹkpesede ẹban̄a ẹnyụn̄ ẹkpemede mme unam ikọt.—Isaiah 11:9.