Ntak Emi Mme Owo Mîkemeke Ndidu ke Emem ye Kiet Eken?​—Nso ke Bible Etịn̄?

Mme andikara ererimbot emi ye nsio nsio n̄ka ke ofụri ererimbot ikemeke ndinam emem odu. Mfịn, afai enen̄ede ọsọn̄ ubọk ke ererimbot emi akan nte akanam edide tọn̄ọ ẹken̄wana ọyọhọ ekọn̄ ererimbot iba. N̄kpọ nte owo biliọn iba, oro edi n̄kpọ nte owo 25 ke otu owo 100 ke ofụri ererimbot ẹdu ke mme ebiet oro afai emi enen̄erede ọsọn̄ ubọk.

Ntak emi mme owo mîkemeke ndinam emem odu? Nso ke Bible etịn̄?

Se ntak ita oro mme owo mîkemeke ndinam emem odu mi

1. 1. Mme owo ẹsinyene mme edu emi esinamde ọsọn̄ mmọ ndidu ke emem ye kiet eken. Bible ama etetịn̄ ke eyo nnyịn emi, ke “mme owo ẹyedi mme ama idem, mme ama okụk, ẹtan̄ idem, ẹseri iseri, . . . inyeneke nsọn̄ọnda, . . . inyịmeke ndidụk ediomi ekededi, . . . ẹnana mfara ke idem, ẹtie obom obom, . . . ẹsọn̄ ibuot, ẹkohode idem.”​—2 Timothy 3:2-4.

2. 2. Mme owo, edide owo kiet kiet m̀mê nte otu ikemeke ndikọk mfịna mmọ, edieke Jehovaha Abasi emi okobotde mmọ mîn̄wamke mmọ. Bible anam idiọn̄ọ ke “ikam isịneke ke ubọk owo eke asan̄ade ndinen̄ede ikpatisan̄ esiemmọ.”​—Jeremiah 10:23.

3. 3. Ererimbot emi esịne ke idak Satan kpa Devil, emi ọsọn̄de odudu etieti onyụn̄ edide ete ibak. Enye ke onyụn̄ ‘ada kpukpru mme andidụn̄ isọn̄ otụn usụn̄.’ (Ediyarade 12:9) Adan̄a nte ‘ofụri ererimbot esịnede ke idak odudu andidiọk,’ ekọn̄ ye en̄wan iditreke.​—1 John 5:19.

Anie ekeme ndinam emem odu?

Bible anam idiọn̄ọ ke Abasi kpọt edinam emem odu, idịghe owo.

• “‘Koro ami mmọfiọk ekikere oro ami n̄kerede mban̄a mbufo,’ uyo Jehovah edi emi, ‘ekikere emem, idịghe eke afanikọn̄, man nnọ mbufo ini iso ye idotenyịn.’”​—Jeremiah 29:11.

Didie ke Abasi edinam se enye ọn̄wọn̄ọde oro? “Abasi emi ọnọde emem ayanuak Satan.” (Rome 16:20) Abasi edida ukara esie eke heaven, emi Bible okotde “Obio Ubọn̄ Abasi,” inam emem odu ke ofụri isọn̄. (Luke 4:43) Ke ini Jesus Christ, emi edide Edidem Obio Ubọn̄ oro edikarade, ẹyekpep mme owo ndidu ke emem.​—Isaiah 9:6, 7.

• Edieke oyomde ndidiọn̄ọ n̄kpọ en̄wen, kot ibuotikọ emi “Nso ke Obio Ubọn̄ Abasi Edinam?”