Ntak Emi Usua Okponde Ntem?​—Se Bible Etịn̄de

Se mme owo ẹsitịn̄de ke ntak usua, afai, ye en̄wan obio ye obio ẹyọyọhọ mbụk n̄kpọntịbe.

• Mbụk n̄kpọntịbe, The New York Times, eke November 15, 2023, ọkọdọhọ: “Akpaka Intanet, se mme owo ẹtịn̄de emi owụtde ke mmọ ẹsua mbon en̄wen, awak idahaemi akan akpa. En̄wan Israel ye Gaza ye se mbon emi ẹmade afai ye usua ẹnamde anam etie ntre.”

• Ke November 3, 2023, Dennis Francis, president United Nations ọkọdọhọ ete: “Tọn̄ọ October 7, afai, ye se mme owo ẹtịn̄de emi owụtde ke mmọ ẹsua mbon en̄wen enen̄ede awak akan akpa.”

Se mme owo ẹtịn̄de emi owụtde ke mmọ ẹsua mbon en̄wen, afai, ye ekọn̄ idịghe obufa n̄kpọ. Bible akam etịn̄ aban̄a mbon emi ikọ mmọ eketiede nte ndiket idan̄, ye mbon emi ẹmade ekọn̄ ye afai. (Psalm 64:3; 120:7; 140:1) Edi Bible ama etịn̄ n̄ko ke nte mme owo ẹsuade mbon en̄wen mfịn enyene se adade aban̄a.

Usua​—Idiọn̄ọ utịt ini

Bible etịn̄ ntak iba emi anamde mme owo ẹnen̄ede ẹsua owo mfịn.

1. 1. Bible ama etetịn̄ ke “ima ediwak owo eyebịt.” (Matthew 24:12) Utu ke mme owo ndima idemmọ, mmọ ẹdikam inanam n̄kpọ emi edidade usua idi.​—2 Timothy 3:1-5.

2. 2. Satan emi edide ọbọn̄ ibak edi ntak emi usua okponde ntem ke ererimbot. Bible ọdọhọ ke “ofụri ererimbot esịne ke idak odudu andidiọk.”​—1 John 5:19; Ediyarade 12:9, 12.

Edi, Bible etịn̄ n̄ko ke idibịghike, ke Abasi eyetre kpukpru se isinamde mme owo ẹsua idemmọ. Nso en̄wen ke enye edinam? Enye eyetre ofụri ufen oro mme owo ẹsibọde ke ntak usua. Kop se Bible etịn̄de mi:

• Abasi “ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. N̄kani n̄kpọ ẹma ẹbe ẹfep.”​—Ediyarade 21:4.