Ufọn Emi Ididiade ke Ntak Emi Idude ke Otu An̄wa-Utom

1-2. Ẹtie ediwak owo didie ke idem ke ntak emi mmọ ẹdude ke otu an̄wa-utom?

NDI emeti usen emi ẹkedọhọde fi ke afo omodot ndidi ọkwọrọ eti mbụk? Ama enem fi utọ oro idụhe, tọn̄ọ ke usen oro afo ekedisịne ke akwa udịm mbon emi ẹtuakde ibuot ẹnọ Jehovah ẹnyụn̄ ẹtorode enyịn̄ esie. (Ps. 148:1, 2, 12, 13) Ekeme ndidi kpa usen oro n̄ko ke ọkọtọn̄ọ ndisịne ke ekpri otu emi ẹkotde otu an̄wa-utom. Otu enye oro ikponke; ekeme ndinam ibat ibat owo ẹsịne ke otu enye oro. Utom emi ẹnọde nnyịn inam edi ndikwọrọ eti mbụk Obio Ubọn̄ “ke ofụri isọn̄.” Otu an̄wa-utom edi akpan n̄kpọ kiet emi esin̄wamde nnyịn inam utom oro.​—Matt. 24:14.

² Esitie fi didie ke idem ke ntak emi odude ke otu an̄wa-utom? Sista Wendya ọdọhọ ete: “Ami ndisịne ke otu an̄wa-utom an̄wam mi eti-eti ke n̄kpọ ukwọrọ-ikọ emi. Mmekpep mbufa usụn̄ ndikwọrọ ikọ nnyụn̄ n̄kpep n̄kpọ nto mbon en̄wen. Ẹn̄wam mi ndiọn̄ọ se n̄kpanamde man n̄kpere Jehovah nnyụn̄ n̄keme ndinanam mme n̄kpọ oro, mmonyụn̄ nnyene ediwak ufan emi ẹdide ufan nsinsi. Kpukpru emi ẹdi ufọn emi ndiade ke ntak emi ndude ke otu an̄wa-utom.” Brọda Rich ọdọhọ eke esie ete: “Nda ami ndidi esenyịn otu an̄wa-utom nte ata akpan utom. Ndusụk mme asuanetop ẹsidian ubọk ẹn̄wam owo ana baptism. Edi ke ata ediwak isua, esenyịn otu an̄wa-utom enyene nsio nsio ifet ndika iso n̄n̄wam owo oro etetịm ekpere Jehovah onyụn̄ etetịm edi eti asan̄a-utom Jehovah.” Sista Dinah ọdọhọ ete: “Enem mi eti-eti ndidu ke otu an̄wa-utom! Nda mbon otu an̄wa-utom mi nte mbonubon mi.”

3. Nso ke idineme ke ibuotikọ emi?

³ Akpa n̄kpọ emi idibemde iso ineme ke ibuotikọ emi edi utom esenyịn otu an̄wa-utom ye udiana esie, iyonyụn̄ ikụt nte mmọ ẹsisede ẹban̄a mbon emi ẹdemede ẹdọn̄ ke otu an̄wa-utom mmọ. Ekem iyeneme nte nnyịn owo kiet kiet ikemede ndin̄wam mbon otu an̄wa-utom nnyịn. Akpatre n̄kpọ emi idinemede edi ufọn emi ikemede ndidia ke ntak emi idude ke otu an̄wa-utom.

ESENYỊN OTU AN̄WA-UTOM YE UDIANA ESIE

4. (a) Nso idi akpan utom esenyịn otu an̄wa-utom? (b) Didie ke esenyịn otu an̄wa-utom esise aban̄a mbon emi ẹdude ke otu esie? (Se ekebe emi “Se Ikemede Ndin̄wam Esenyịn Otu An̄wa-Utom.”)

⁴ Esenyịn otu an̄wa-utom edi ebiowob emi otu mbiowo ẹmekde yak an̄wam mbon otu an̄wa-utom esie ẹtetịm ẹkpere Jehovah ẹnyụn̄ ẹtetịm ẹdiọn̄ọ ndikwọrọ ikọ nnyụn̄ n̄kpep mme owo n̄kpọ. Didie ke enye esinam oro? Akpa, enye esinen̄ede ekere aban̄a owo kiet kiet emi ẹdemede ẹsịn ke otu an̄wa-utom esie. (N̄ke 27:23) Enye esidiọn̄ọ nte n̄kpọ etiede ye mbon otu esie, ese aban̄a mmọ, esinyụn̄ eneme nneme ye mmọ ke ubọk ke ubọk. Enye ndinam mme n̄kpọ oro esin̄wam enye ada Ikọ Abasi ọsọn̄ọ mmọ idem, ọdọn̄ mmọ esịt, onyụn̄ ananam n̄kpọ an̄wam mmọ. (N̄ke 12:25; Isa. 32:2; Jas. 2:15-17) Ọyọhọ iba, enye esin̄wam asuanetop kiet kiet enen̄ede esịn idem ọkwọrọ ikọ. Ke n̄kpọ ukwọrọ-ikọ enye ada iso, akpan akpan ke utịt urua, inyụn̄ idaha ukwọrọ-ikọ ibre mbre. Enye esinyụn̄ awak ndisan̄a ye mme asuanetop kiet kiet man etịn̄ ikọ ọsọn̄ọ mmọ idem, onyụn̄ ekpep mmọ nte mmọ ẹkpekwọrọde ikọ ẹnyụn̄ ẹkpepde owo n̄kpọ yak etetịm ọfọn. Enye esikụt ete ke udiana esie m̀mê asuanetop en̄wen emi etịmde odot ese aban̄a otu an̄wa-utom esie ke ini enye mîdụhe, kpa ye emi oro mîsiwakke nditịbe. Ọyọhọ ita, enye esin̄wam nditọ-ete irenowo emi ẹnade baptism ẹnam n̄kpọ emi edin̄wamde mmọ ẹdot ndinam mme utom ke esop. (1 Tim. 3:1) Enye esitoro mbon otu an̄wa-utom esie, ada Ikọ Abasi ọnọ mmọ item, onyụn̄ esiwak ndikpep nditọ-ete irenowo ẹnam n̄kpọ emi edin̄wamde mmọ ẹdot ndidi mme asan̄a-utom unamutom ye mbiowo. Sia utom esenyịn otu an̄wa-utom edide ata akpan utom, otu mbiowo ẹsimek mbiowo emi ẹtịmde ẹdot ẹnam utom oro.

5. Nso idi mme mfịna emi ndusụk mme esenyịn otu an̄wa-utom ẹsinyenede?

⁵ Esenyịn otu an̄wa-utom ekeme ndinyene ediwak mfịna nte enye osụk esede aban̄a mbon emi ẹdude ke otu esie. Da Jörg emi edide esenyịn otu an̄wa-utom ke Germany ke uwụtn̄kpọ. Ukem nte ediwak mbiowo, idịghe utom kiet kpọt ke ana enye ese aban̄a ke esop. Enye ọdọhọ ete: “Ndidi nnam emi, nnam oko idịghe ifia ubọk kiet. Ke ntak oro, esisọn̄ mi ndikot kpukpru mbon emi ẹdude ke otu an̄wa-utom mi nte n̄kebierede ndisinam.” Brọda Abel emi edide ebiowo onyụn̄ otode Uganda edi isua 70 enye ọdọhọ ete: “Ke esop nnyịn, mbiowo ye mme asan̄a-utom unamutom ẹdi ifan̄ kpọt. Ke ntak oro, mme asuanetop emi ẹdude ke otu an̄wa-utom ẹwak. Oro esinam ọsọn̄ mi ndika n̄kese mme asuanetop kiet kiet ke otu an̄wa-utom mi adan̄a ediwak ini nte n̄kpamade ndikese man nsọn̄ọ mmọ idem.” Ndien Obed emi edide ebiowo onyụn̄ otode Suriname ọdọhọ eke esie ete: “Mmesima ndikpep mbon en̄wen se ẹkpenamde. Edi ndinọ owo ukpep esiyom ini ye odudu, udûnyụn̄ ukwe utịp idaha idaha-oro. Ke ntak oro, ndinọ owo ukpep edi akpa n̄kpọ emi nsinụkde nnịm.” Nso ikeme ndin̄wam mbiowo emi ẹnyenede ukem mfịna emi ye mme mfịna en̄wen ntre?

6. Edieke mme asuanetop mîwakke ke otu an̄wa-utom, didie ke oro ekeme ndin̄wam esenyịn otu an̄wa-utom ese aban̄a mbon emi ẹdude ke otu esie?

⁶ Edieke usụn̄ odude, ikpanaha mme asuanetop ẹwak ke otu an̄wa-utom man mme esenyịn otu an̄wa-utom ẹkeme ndinen̄ede ndiọn̄ọ kpukpru mbon emi ẹdude ke otu an̄wa-utom mmọ ẹnyụn̄ ẹn̄wam mmọ ẹka iso ẹkpere Jehovah. Ẹkpenam nso edieke mbiowo mîwakke ke esop? Utu ke ndinam yak mme asuanetop ẹwak ke otu an̄wa-utom tutu esenyịn an̄wa-utom ikemeke ndinen̄ede nnam kpukpru utom esie nte akpanade anam, otu mbiowo ẹkeme ndimek asan̄a-utom unamutom ese aban̄a otu an̄wa-utom kan̄a. Edieke mme asuanetop mîwakke ke mme otu an̄wa-utom, mme esenyịn otu an̄wa-utom ẹyekeme ndinen̄ede nse mban̄a nditọ-ete mmọ irenowo ye iban. Enye oro akam edi ata akpan n̄kpọ ke utom emi ẹnọde mmọ do.

7. Ke mme esop emi mbiowo mîwakke, nso ke mme esenyịn otu an̄wa-utom ẹkeme ndinam man mmọ ẹkụt ẹte ke ẹnen̄ede ẹse ẹban̄a kpukpru owo ke otu an̄wa-utom? (1 Peter 5:2) (Se ndise n̄ko.)

⁷ Edieke afo edide esenyịn otu an̄wa-utom ke esop emi mbiowo mîwakke, yak ofụri ekikere fo esịne ke ndikpep udiana fo se enye akpanamde man an̄wam fi ese aban̄a otu-erọn̄ Abasi. (Kot 1 Peter 5:2.) Sinọ udiana fo ndusụk utom yak anam. Ke uwụtn̄kpọ, ke ini ke ini sidọhọ enye ada nditọ-ete ke otu an̄wa-utom fo usụn̄ ke ukwọrọ-ikọ. Sitie ye enye bọn̄ akam ẹnyụn̄ ẹneme nte mmọ ẹnamde n̄kpọ Abasi. Ke ini akade ndisọn̄ọ nditọ-ete idem, siwak ndisan̄a ye udiana fo nyụn̄ teme enye se enye akpanamde mbemiso ẹkade ye ke ẹma ẹkenyọn̄. Nte ini akade, udiana fo ekeme ndidot ndidi esenyịn otu an̄wa-utom. (2 Tim. 2:2) Emekeme n̄ko ndidọhọ nditọ-ete eken emi ẹsọn̄de idem ke esop ẹn̄wam ẹkpep mbon en̄wen nte ẹkpekwọrọde ikọ. Mme asiakusụn̄ ye nditọ-ete eken emi ẹnen̄erede ediọn̄ọ ukwọrọ-ikọ ẹkeme ndisan̄a ye mbufa mme asuanetop ye mme asuanetop emi mînen̄ekede idiọn̄ọ ndikwọrọ ikọ. Ndien mme asuanetop emi ẹnen̄erede ẹma Abasi ẹnyụn̄ ẹdiọn̄ọde ndikwọrọ ikọ ẹkeme ndin̄wam mbon emi esisọn̄de mmọ nditọn̄ọ nneme Ikọ Abasi, ndifiak n̄ka n̄kese mbon emi mmọ ẹkekwọrọde ikọ ẹnọ, m̀mê ndikpep owo Bible. Idaha-emi ẹyak ineme usụn̄ ita emi nnyịn owo kiet kiet ikemede ndin̄wam otu an̄wa-utom nnyịn.

TIENE N̄WAM OTU AN̄WA-UTOM MBUFO

8. Didie ke ikeme nditiene n̄n̄wam otu an̄wa-utom nnyịn? (Rome 1:12)

⁸ Sitiene mbon otu an̄wa-utom mbufo ka ukwọrọ-ikọ. Ke ini etienede nditọ-ete aka ukwọrọ-ikọ, afo ‘eyesịn udọn̄ ọnọ’ mmọ, mmọ ẹyenyụn̄ ‘ẹsịn udọn̄ ẹnọ’ fi. (Kot Rome 1:12.) Ẹkpesan̄a ke otu ẹkwọrọ ikọ, idem idinen̄ekede inyek fi ndikwọrọ ikọ nnọ mme owo, n̄kpọ idinyụn̄ inamke fi ke ndusụk itie emi ẹdụkde ẹkwọrọ ikọ. Ekpedi utom fo isiyakke esiwak nditiene mbon otu an̄wa-utom mbufo ọkwọrọ ikọ, ndi emekeme ndikpe ete-utom fo ubọk yak okpụhọ ini ye usen utom fo? Se enye edinyịmede ndinam nnọ fi ekeme ndikpa fi idem. (Neh. 2:4-6) Ekpedi udọn̄ọ m̀mê usọn̄ anam ọsọn̄ fi nditiene mbon otu an̄wa-utom mbufo n̄kwọrọ ikọ, neme ye esenyịn otu an̄wa-utom mbufo. Enye ekeme ndinam ndutịm yak ada Intanet etiene nditọ-ete eken ewet leta ọkwọrọ ikọ mîdịghe okokot owo ke fon ọkwọrọ ikọ. Ekpedi ukponke owo unyụn̄ udọn̄ọke, edi esisụk ọsọn̄ fi ndika ukwọrọ-ikọ kpukpru ini, diomi kpukpru urua ndisisan̄a ye owo ke otu an̄wa-utom mbufo. Ekeme ndiyom afiak ese se afo adade ke akpan n̄kpọ mîdịghe okpụhọde nte adade ini fo anam n̄kpọ. (Rome 12:11; Col. 4:5) Kpukpru se anamde man esisan̄a ye mbon otu an̄wa-utom mbufo ọkwọrọ ikọ kpukpru ini itakke-tak. Bọn̄ akam nọ Jehovah. Enye ekeme ndin̄wam fi ‘enyịme’ ndinam se isụk itịn̄de emi onyụn̄ an̄wam fi ‘ananam.’​—Phil. 2:13.

9. Didie ke ikeme ndinam yak enenem mbon otu an̄wa-utom nnyịn ke idem, onyụn̄ etie nte idi nditọ-eka? (Rome 12:13)

⁹ Ma ndikama owo esen. Edieke ‘imade ndikama isenowo’ iyanam enenem nditọ-ete emi ẹdude ke otu an̄wa-utom nnyịn ke idem, edinyụn̄ itie nte idi nditọ-eka. (Kot Rome 12:13.) Ndi imekeme ndiyak otu an̄wa-utom ẹboho ke ufọk nnyịn ẹnịm mbono an̄wa-utom? Ke ndusụk esop, nsio nsio otu an̄wa-utom ẹsikama etịn̄ikọ emi otode-to edi esen. Esidi otu enye emi ẹkpekama isan̄ enye emi, isan̄ en̄wen otu en̄wen ẹkama. Otu kiet ẹma ẹkama, nditọ-ete ke otu oro ẹkeme ndika ebiet emi mmọ ẹdibohode ẹketie kiet ẹdia udia ẹnyụn̄ ẹsọn̄ọ kiet eken idem ekpededi etịn̄ikọ oro ikemeke nditiene n̄ka itie oro. Sarah emi edide akpan asiakusụn̄ ọdọhọ ete: “Ndikama owo esen esinyek mi idem, ntre nsinam n̄kpri n̄kpri n̄kpọ nda n̄kama owo esen. Nsidomo ndinen̄ede ndiọn̄ọ mme owo utu ke ndifịna idem mban̄a se ẹdiade ye se ẹn̄wọn̄de.” Ima idu ye mbon otu an̄wa-utom nnyịn nte nditọ-eka, inam enenem mmọ ke idem, inyụn̄ isima ndikama mme owo esen, iyetetịm ikpere Jehovah ye kiet eken.​—Neh. 8:10; Utom 20:35.

10. Nso ke ikeme ndinam edieke iyomde ndinen̄ede ndiọn̄ọ ndikwọrọ ikọ nnyụn̄ n̄kpep owo Bible ọfọn? (Mme N̄ke 1:5; 27:17) (Se ndise n̄ko.)

¹⁰ Dọhọ owo an̄wam fi. Adan̄a nte inen̄erede idiọn̄ọ ndikwọrọ ikọ nnyụn̄ n̄kpep owo Bible, ntre ke edinen̄ede inem nnyịn ndisan̄a ye mbon otu an̄wa-utom nnyịn n̄kwọrọ ikọ. Ndi enyene se akpanamde man ọdiọn̄ọ ndikwọrọ ikọ nnyụn̄ n̄kpep owo Bible yak ọfọn akan nte ekesinamde. Edieke edide ntre, dọhọ owo an̄wam fi. Emekeme ndidọhọ asiakusụn̄ m̀mê asuanetop emi enen̄erede ọdiọn̄ọ ndikwọrọ ikọ ke otu an̄wa-utom mbufo. (Kot Mme N̄ke 1:5; 27:17.) Ekpedi aduak ndinen̄ede ndiọn̄ọ ndikwọrọ ikọ ọfọn mîdịghe ndikpep owo Bible ọfọn, neme ye esenyịn otu an̄wa-utom mbufo, enye ekeme ndin̄wam fi. Omonyụn̄ ekeme ndidọhọ mbon en̄wen ẹn̄wam fi. Se Sista Heather akanamde edi oro. Kpa ye emi enye edide owo o-bụt, enye ọdọhọ ete: “Mma ndọhọ asiakusụn̄ kiet an̄wam mi ndiọn̄ọ se n̄kpanamde mma mfiak n̄ka mbịne mbon emi n̄kọkwọrọde ikọ nnọ. Enye ama ọfọn uwem eti-eti, ama esinyụn̄ awak ndidiomi ndisan̄a ye ami n̄kwọrọ ikọ. Enye ama akam an̄wam mi ntọn̄ọ ndikpep Bible ye kiet ke otu mbon emi n̄kọkwọrọde ikọ nnọ, oro n̄kafiakde n̄ka mbịne. Esịt enen̄ede enem mi nte n̄kọdọhọde sista oro an̄wam mi sia ukwọrọ-ikọ afiak enem mi idaha-emi.” Imenen̄ede ikụt ke ediwak usụn̄ odu emi ikemede nditiene n̄n̄wam mbon otu an̄wa-utom nnyịn.

UFỌN EMI AFO EKEMEDE NDIDIA SIA ODUDE KE OTU AN̄WA-UTOM

11-12. Didie ke mbon otu an̄wa-utom mbufo ẹkeme ndin̄wam fi etetịm ekpere Jehovah onyụn̄ etetịm edi eti Christian? Nọ uwụtn̄kpọ.

¹¹ Mmọ ẹsin̄wam nnyịn itetịm ikpere Jehovah. Nnyịn owo kiet kiet imekeme nditetịm n̄kpere Jehovah ke ntak oro idude ke otu an̄wa-utom. Ke uwụtn̄kpọ, ẹsida Bible ẹsọn̄ọ mbon oro Jehovah ẹnen̄erede ama, oro edi mme ebe-akpa, nditọ-akpa, ye mbon oro ẹma ẹkesọn̄ idem ke nnennen ini. (1 Thess. 2:8; Jas. 1:27) Imesinyụn̄ ikpep nte ikemede ndikwọrọ etop Obio Ubọn̄ ke nsio nsio usụn̄ ye nte ikemede nditetịm n̄kpep mme owo Ikọ Abasi. Ẹsin̄wam mme brọda emi ẹma ẹkena baptism ẹnyụn̄ ẹnịmde eti uwụtn̄kpọ ẹdot ndikama mme utom en̄wen ke esop.​—1 Tim. 3:10.

¹² Kere nte Wendy oro ima iketetịn̄ iban̄a akadiade ufọn ke ntak emi enye odude ke otu an̄wa-utom. Enye ọdọhọ ete: “Ete mi ikoyomke ikpep akpanikọ, ntre ediwak ini eka mi ikesikemeke nditiene mbon otu an̄wa-utom mmọ n̄ka ukwọrọ-ikọ ke utịturua. Edi ẹma ẹsiyak mi n̄ka, mma nsinyụn̄ n̄ka. Akamba sista kiet emi edide asiakusụn̄ ama emen mi adian idem onyụn̄ an̄wam mi ndiọn̄ọ nsio nsio usụn̄ emi n̄kpọkwọrọde ikọ ye nte n̄kemede ndinam mme n̄kpọ eken ke esop. Ke nteti ediwak ini emi esenyịn otu an̄wa-utom nnyịn akadade Bible ọnọ mi nti item emi osụk an̄wamde mi tutu emi.”

13. Tịn̄ ndusụk usụn̄ emi mbon otu an̄wa-utom nnyịn ẹkemede ndisọn̄ọ nnyịn idem nnyụn̄ ndọn̄ nnyịn esịt. (Se n̄ko ndise.)

¹³ Mmọ ẹsisọn̄ọ nnyịn idem ẹnyụn̄ ẹdọn̄ nnyịn esịt. Imesinen̄ede ikpere mbon emi ẹdude ke otu an̄wa-utom nnyịn ima ikwọrọ ikọ “ọtọkiet” ye mmọ. (Phil. 1:27) Mbon emi ẹdude ke otu an̄wa-utom mînen̄ekede iwak, oro ekeme n̄ko ndinam enen̄ede emem utom ọnọ mbon o-bụt m̀mê mbon emi idem esinyekde mmọ ẹma ẹdu ke otu-owo ẹnen̄ede ẹkpere nditọ-ete ẹnyụn̄ ẹdi ufan mmọ. (2 Cor. 6:13) Mme ufan ntre isitọhọ nnyịn edem ke isọn̄ ke ini nnanenyịn, utọ nte ke ini idọn̄ọde, ke ini esịt etịmerede nnyịn, m̀mê ke ini ifụhọde n̄kpa owo nnyịn. (1 Thess. 5:14) Imenen̄ede ikụt ke iyoyom nti ufan ke ini akwa ukụt. (Matt. 24:21) Ekeme ndinam mme mfịna oro ẹsịmde nnyịn ikụreke, edi nnyịn ndidiọn̄ọ ke nditọ-ete nnyịn oro ẹmade nnyịn ẹnyụn̄ ẹn̄wamde nnyịn iditọhọ nnyịn edem ke isọn̄ ekeme ndinam afiak emem nnyịn utom ndiyọ.​—N̄ke 17:17.

14. Didie ke mbon otu an̄wa-utom nnyịn ẹsin̄wam nnyịn ke ini afanikọn̄ m̀mê ke ini n̄kpọ emi owo mîdorike enyịn etịbede?

¹⁴ Mmọ ẹsinanam n̄kpọ ẹn̄wam nnyịn. Udọn̄ọ akpatara asuana, ekpedi se ẹsọsọp ẹmen nnyịn ẹka ufọk-ibọk, ikan̄, mmọn̄ m̀mê oyobio abiat n̄kpọ nnyịn, ukọbọ, mîdịghe nsọn̄ọn̄kpọ anam okụk iwọrọke n̄kpọ aba, mbon otu an̄wa-utom nnyịn ẹsisọsọp ẹnam n̄kpọ man ẹn̄wam nnyịn. Ke uwụtn̄kpọ ke esop kiet kiet, Kọmiti Utom Esop ye mme esenyịn otu an̄wa-utom ẹsinam ndutịm ndin̄wam mbon oro ẹyomde san̄asan̄a un̄wam. Mme esenyịn otu an̄wa-utom ẹsida iso ke ndidiọn̄ọ ebiet emi ubon kiet kiet ke otu an̄wa-utom mmọ ẹdude, ẹnyụn̄ ẹyom usụn̄ ẹdiọn̄ọ se inanade mmọ ke ebe oro, esịnede ibọk, udia, mmọn̄, itie udakibuot, ye ọfọn̄ man ẹkụt ẹte ke nditọ-ete oro ẹnyene se mmọ ẹyomde. N̄kpọ ama etịbe, mbon otu an̄wa-utom nnyịn iditreke ndinanam n̄kpọ n̄n̄wam nnyịn nnyụn̄ nnen̄ede nse mban̄a nnyịn!

15. Nso isinam kpukpru nnyịn emi idude ke esop Jehovah idiana kiet?

¹⁵ Imetetịn̄ ke esop Jehovah okpon eti-eti. Ke ikpehe n̄kan̄ eke heaven, mme angel emi ẹdude ẹdi ke miliọn ke miliọn​—akam ekeme ndidi ediwak biliọn. Ke ikpehe n̄kan̄ eke isọn̄, mme owo emi ẹdude ẹkan miliọn usụkkiet ndien edi eyo esiere, ke ẹtọt ẹka. (Zech. 8:23; Edi. 5:11) Kpukpru mme andituak ibuot nnọ Jehovah ke ẹdiana kiet ẹkwọrọ eti mbụk Obio Ubọn̄ Abasi! (Edi. 14:6, 7) Ẹyak inen̄ede idia ufọn otu an̄wa-utom sia ndutịm oro an̄wam nnyịn itoro Jehovah ke ofụri esịt.​—Ps. 111:1.