Unọ Ikọ Ntiense Otu Ada Idatesịt Edi
1 Ke ini okosiode mbet 70 ọdọn̄ ẹkekwọrọ ikọ, Jesus ama eteme mmọ se ẹditịn̄de, adian mmọ ẹsan̄a iba iba, onyụn̄ eteme mmọ efakutom oro mmọ ẹdinamde utom. Emi ama etịp esịn ke idatesịt oro mmọ ẹkenyenede. (Luke 10:1-17) Kpasụk ntre mfịn, unọ ikọ ntiense otu an̄wam ke ndisịn udọn̄ nnọ ikọt Abasi nnyụn̄ ntịm mmọ idem nnọ utom ukwọrọikọ.
2 Mbiowo Ẹda Usụn̄: Mbiowo ẹnyene akpan utom ndin̄wam kpukpru owo ẹbuana kpukpru ini ke utom ukwọrọikọ. Esenyịn utom esida usụn̄ ke ndinam ndutịm nnọ utom ukwọrọikọ ufọturua. Esenyịn ukpepn̄kpọ n̄wed kiet kiet enyene ndinam ndutịm utom ukwọrọikọ nnọ otu esie, akpan akpan ke utịturua. Ke ini ofụri esop ẹsopde idem ndika an̄wautom, utọ nte ke ini ẹkụrede Ukpepn̄kpọ Enyọn̄-Ukpeme, esenyịn ukpepn̄kpọ n̄wed kiet kiet ekpenyene ndise mban̄a otu esie.
3 “Ke Nde ye ke Ido Nte Eyede”: Owo oro ẹdọhọde enịm mbono an̄wautom ekpenyene nditọn̄ọ ke ini nnyụn̄ n̄kụre ke minit 10 m̀mê 15. Ọfọn enye adian mme owo onyụn̄ ọnọ efakutom oro edinamde utom (ibọhọke esenyịn ukpepn̄kpọ n̄wed ayanam emi nte ẹkebemde iso ẹtịn̄) mbemiso eberide ke akam. Emi ayakpan mme asuanetop ndiboho ọtọkiet ke efakutom, emi ekemede ndinam utom nnyịn okûnyene uku. Emi n̄ko odu ke n̄kemuyo ye item Paul emi: “Ẹnam kpukpru n̄kpọ ke nde ye ke ido nte eyede.” (1 Cor. 14:40) Kpukpru mbon oro ẹdụkde mbono emi ẹkpenyene nditịp nsịn ke ndutịm emi ndikụt unen ebe ke ndika ke eti ini, ndibere ọyọhọ ọyọhọ ye owo emi adade usụn̄ nnyụn̄ ndaha n̄ka efakutom ke ndondo oro otu oro asuanade.
4 Anam Ẹdiana Ọtọkiet: Ndutịm unọ ikọ ntiense otu ọnọ nnyịn eti ifet ndidiọn̄ọ mbon eken ke esop. Ke adan̄aemi owo mîkpanke owo ndibem iso ndiomi owo emi enye edidade asan̄a, ọyọfọn n̄ko nnyịn ndidụk mme mbono an̄wautom ye unana edibem iso ndiomi owo emi ididade isan̄a. Ẹkeme ndidọhọ nnyịn isan̄a ye owo emi nnyịn mîtịmke imehe, ntem anamde nnyịn inyene “in̄wan̄-in̄wan̄ esịt” ndiwụt mbon efen ima.—2 Cor. 6:11-13.
5 Unọ ikọ ntiense otu esisịn udọn̄ ọnọ nnyịn onyụn̄ odụri nnyịn adian ọtọkiet nte mme “nsan̄a utom ke akpanikọ.” (3 John 8, NW) Nnyịn ikpakam ibuana ke enye ọyọhọ ọyọhọ!