Se Baptism Ọwọrọde ye Akpan Ntak Emi Ikpanade Baptism

1. Nso n̄kpọ iwụt ke baptism edi kiet ke otu akpan n̄kpọ emi Bible ekpepde?

ESỊT esinem nnyịn eti-eti ima ikụt nte mbufa owo ẹnade baptism! Ndi ama ọfiọk ke utọ inemesịt oro ama odu ke ata akpa mboho Ikọ Abasi emi mme Christian ẹkenịmde? Ke mboho oro, ẹma ẹna baptism, apostle Peter ama onyụn̄ ọnọ utịn̄ikọ. Ke utịn̄ikọ esie oro, enye ama anam yak an̄wan̄a ntak emi edide ata akpan n̄kpọ ndina baptism. (Utom 2:38, 40, 41) Apostle Paul ekewet ete ke “ukpepn̄kpọ aban̄ade baptism” esịne ke otu “akpa ukpepn̄kpọ emi aban̄ade Christ.” (Heb. 6:1, 2) Kpa ye emi etiede nte n̄kpọ aban̄ade baptism inen̄ekede isịne n̄kpọ, ọfọn yak enen̄ede an̄wan̄a nnyịn. Ntak-a?

2. Ntak emi anade n̄kpọ aban̄ade baptism enen̄ede an̄wan̄a nnyịn?

² Ukem nte eti itiat idakisọn̄ mîsiyakke ufọk ọduọ edieke oyobio ọwọrọde, edieke n̄kpọ aban̄ade baptism enen̄erede an̄wan̄a nnyịn, imekeme nditetịm mbuọt idem ye Jehovah. Ana n̄kpọ aban̄ade baptism emi enen̄ede an̄wan̄a nnyịn ekpededi ke isụk inam n̄kpọ man ina baptism mîdịghe ediwak isua ebe tọn̄ọ ikana baptism. Ntre ke ibuotikọ emi, imọn̄ ibọrọ mme mbụme emi: Baptism ọwọrọ nso? Didie ke ẹsinịm owo baptism? Ndien ntak emi isinade baptism ke enyịn̄ Ete ye Eyen ye edisana spirit?

SE BAPTISM ỌWỌRỌDE

3. Baptism ada aban̄a nso?

³ Ndina baptism owụt mbon en̄wen ke afo emenyịme se Bible ekpepde aban̄a Jehovah Abasi ye Christ Jesus, ke amakabade esịt ọkpọn̄ mme idiọkn̄kpọ fo, ke omokpụhọde mme n̄kpọ ke uwem fo man anam n̄kpọ Jehovah, ke ọmọdiọn̄ọ ke Jesus ke Abasi ada anyan̄a nnyịn, ndien ke ama ọbọn̄ akam ke ofụri esịt ọnọ Abasi ete ke ayadiana ye esop Esie anam uduak Esie. Ndondo emi ọn̄wọn̄ọde ndinam mme n̄kpọ oro nnọ Abasi mîdịghe ayak idem ọnọ enye onyụn̄ ana baptism, usụn̄ nsinsi uwem ke afo ọtọn̄ọ asan̄a oro.

4. Ndibụk owo ofụri ofụri ke mmọn̄ ada aban̄a nso? (Se ndise n̄ko.)

⁴ Ama ana baptism, ẹyebụk fi ofụri ofụri ke mmọn̄, ekem ẹdịbede fi ẹsio ke mmọn̄ oro.a Enye oro etie nte n̄kpọ emi ẹdọhọde ke ẹma ẹbụk fi, ekem ẹnam fi eset. (Men Colossae 2:12 domo.) Baptism owụt ke omokpụhọde ikpọ n̄kpọ ke uwem fo. Anam didie edi ntre? Ke ini esịnede ke mmọn̄ oro, owụt ke emetre akani uwem fo, ndien ke ini ọwọrọde ke mmọn̄, owụt ke ọmọtọn̄ọ obufa uwem, ndien ke obufa uwem ọtọn̄ọde mi, ndinam uduak Abasi edi akpan n̄kpọ akan ọnọ fi.

5. Didie ke se afo anamde man ana baptism ebiet utom emi Noah akanamde man ọkọn̄ ubom? (1 Peter 3:18-21)

⁵ Kot 1 Peter 3:18-21. Imekeme ndimen se afo anamde man ana baptism idomo ye utom emi Noah akanamde ndikọn̄ ubom. Ekpedi ibịghike ọkọtọn̄ọ ndikpep n̄kpọ mban̄a Jehovah, ekeme nditie fi nte ke mme n̄kpọ emi anade anam man odot ndina baptism ẹsọn̄ ẹkan fi, akam ekeme nditie fi nte ke ọsọn̄ ndinam mme n̄kpọ oro ukem nte ọkọsọn̄de Noah ndikọn̄ ubom. Ndi enen̄ede edi se anamde mme n̄kpọ oro? Ama edi se Noah akanamde. Abasi ke idemesie eketeme Noah nte enye edikọn̄de ubom, ndien akana Noah anam se Abasi ọkọdọhọde enye ket-ket-ket man mme owo ẹbọhọ Ukwọ oro. Noah ama ekeme ndikọn̄ ubom oro sia enye ama ọbuọt idem ye Jehovah, okop uyo Jehovah; edi ikokụreke do, Jehovah ama onyụn̄ an̄wam enye. Noah ama anam “kpukpru se Abasi eketemede.” Afo n̄ko emekeme ndinam ntre.​—Gen. 6:22.

6. Didie ke baptism ekeme ndinyan̄a fi?

⁶ Ke ufan̄ikọ 21, apostle Peter ekewet ete ke baptism ‘anyan̄a fi,’ edi imọdiọn̄ọ nan̄a ke owo ndinyụn̄ mbụk fi ke mmọn̄ inamke enyene edinyan̄a m̀mê ndinam ẹfen mme idiọkn̄kpọ fo. Iyịp Jesus kpọt ekeme ndinam ẹfen mme idiọkn̄kpọ fo. (1 John 1:7) Kpa ye oro, edi ata akpan n̄kpọ afo ndina baptism sia Jehovah ọdọhọ fi anam ntre. Ndien ama ana baptism, enye oro etie nte ‘eben̄e eke afo eben̄ede Abasi ete anam fi enyene eti ubieresịt.’ Edinenem Jehovah ndinam se afo eben̄ede enye oro. Nte baptism asan̄ade ‘anyan̄a fi’ m̀mê anamde fi enyene edinyan̄a edi oro.

NTE ẸSINỊMDE OWO BAPTISM

7. Ẹkpenịm owo baptism didie? Nso en̄wen ke ikpekere iban̄a ke ini ẹnịmde owo baptism?

⁷ Ke ẹsiode ẹfep Bible ndiwụt ke ana ẹbụk owo ofụri ofụri ke mmọn̄, enye itịn̄ke ediwak n̄kpọ en̄wen iban̄a nte baptism ekpetiede. Kpa ye oro, N̄wed Abasi an̄wam nnyịn idiọn̄ọ nte ẹkpenamde n̄kpọ. Ke uwụtn̄kpọ, mme item Bible ẹn̄wam mbon emi ẹyomde ndina baptism ẹdiọn̄ọ nte mmọ ẹkpesịnede n̄kpọ, ẹnyụn̄ ẹn̄wam mbon emi ẹdade ẹse ẹdiọn̄ọ nte mmọ ẹkpenamde n̄kpọ. (1 Cor. 14:40; 1 Tim. 2:9) Mfịn, ebiowo esiwak ndibụk owo ke mmọn̄, ndien nnyịn ikpanamke n̄kpọ yak etie nte ke mbon ẹsinịmde mme owo baptism ẹdi n̄kpri abasi. (1 Cor. 1:14, 15) Abasi enyịme baptism ekpededi mbon emi ẹdude ẹkụt nte ẹnịmde mme owo baptism ẹwak m̀mê iwakke.​—Utom 8:36.

8. Mme mbụme ewe ke ẹsibụp mbon emi ẹyomde ndina baptism? Ntak-a? (Utom 2:38-42) (Se ndise n̄ko.)

⁸ Bible ọdọhọ yak ida inua nnyịn ‘itan̄a an̄wan̄wa man inyene edinyan̄a,’ oro edi, ke ana ida inua nnyịn iwụt ke imọbuọt idem. (Rome 10:9, 10; se se ẹwetde ẹban̄a “publicly declare” ke ufan̄ikọ oro ke nwtsty.) Enen̄ede odot nnyịn ndinam se itịn̄de oro ke ini iyomde ndina baptism, sia baptism akam edi akpan n̄kpọ emi edinamde nnyịn inyene edinyan̄a! Ke ntak oro, ẹsibụp mbon emi ẹyomde ndina baptism mbụme iba emi. Akpa, “Ndi ama akabade esịt ọkpọn̄ mme idiọkn̄kpọ fo, ayak idemfo ọnọ Jehovah, onyụn̄ enịm ke Jesus Christ ke enye edida inyan̄a fi?” Mbụme enye emi enen̄ede aban̄a se owo emi oyomde ndina baptism ama akananam mbemiso enye odotde ndina baptism. Ndien enye onyụn̄ edi mbiet n̄kpọ emi Peter ọkọdọhọde otu-owo emi enye eketịn̄de ikọ ọnọ ke Pentecost ẹnam. Ọyọhọ mbụme iba edi, “Ndi ọmọfiọk ke afo ndina baptism owụt ke afo edi Ntiense Jehovah, ke afo onyụn̄ esịne ke esop Jehovah?” Mbụme enye emi eti nnyịn ndinam se ikọn̄wọn̄ọde inọ Abasi ini ikayakkde idem inọ enye. Nte idinamde oro edi nnyịn ndinam se esop Jehovah ẹdọhọde nnyụn̄ ndiana ye nditọ-ete nnyịn nnam n̄kpọ Abasi ukem nte mme Christian ke eyo mme apostle ẹkenamde. (Kot Utom 2:38-42.) Mbon emi ẹkemede ndibọrọ mbụme iba oro ke ofụri esịt ẹte ‘ih’ ẹdot ndina baptism.

9. Nso ke ana kpukpru owo ẹnam man ẹnem Jehovah esịt?

⁹ Idem mbemiso ọkọtọn̄ọde ndikpep akpanikọ, ekeme ndidi ama esidu eti uwem unyụn̄ unamke akwa idiọkn̄kpọ ndomokiet. Mîdịghe ekeme ndidi ete ye eka fo emi ẹdide Ntiense Jehovah ẹkebọk fi ẹnyụn̄ ẹn̄wam fi ama Jehovah. Edieke edide ntre, ndi osụk edi se akabarede esịt onyụn̄ anade baptism man enem Abasi esịt? Ih. Inamke n̄kpọ m̀mê ewe ke otu oro ebehe nnyịn, ana kpukpru nnyịn idiọn̄ọ ke ikadada idiọkn̄kpọ imana, ndien ke idiọkn̄kpọ oro adian̄ade nnyịn ọkpọn̄ Abasi. (Ps. 51:5) Edi ke ima ikedidiọn̄ọ Jehovah, imesibiere ndinam uduak esie edi akpan n̄kpọ akan ke uwem nnyịn. Ndondo emi inamde enye oro ima, nnyịn ikabade esịt inyụn̄ itre idiọk uwem emi ikesidude itọn̄ọ ndidu eti uwem emi enemde Ete nnyịn emi odude ke heaven esịt, imekeme ndina baptism ndien.​—Utom 3:19.

10. Akpanam nso ekpedi ama anana baptism ke ido ukpono en̄wen?

¹⁰ Ekpedi ama anana baptism ke ido ukpono en̄wen, ana osụk ana baptism nte Ntiense Jehovah. Ntak-a? Sia ukûnen̄ekede udiọn̄ọ akpanikọ emi aban̄ade Jehovah Abasi ye Jesus ini oro. Ndien idem ekpededi ama ọbọn̄ akam ayak idem ọnọ Abasi, se ọkọn̄wọn̄ọde ndinam oro ikekemke ye uduak esie sia ukûnen̄ekede udiọn̄ọ uduak esie oro. Ini apostle Paul okosobode ye irenowo ke Ephesus emi ẹma ẹkenana baptism, enye ama ọdọhọ mmọ ẹfiak ẹna sia mmọ ikọdiọn̄ọke akpanikọ emi aban̄ade Jesus.b (Utom 19:1-5) Ukem ntre ke onyụn̄ edi mfịn, baptism emi Abasi enyịmede edi enye emi owo anade ke enye ama ekenyene nnennen ifiọk uduak Abasi.

“KE ENYỊN̄ ETE YE EYEN YE EDISANA SPIRIT”

11. Owo ndina baptism “ke enyịn̄ Ete ye Eyen ye edisana spirit” ọwọrọ nso? (Matthew 28:18-20)

¹¹ Jesus ọkọdọhọ yak mbufa mbet imọ ẹna baptism “ke enyịn̄ Ete ye Eyen ye edisana spirit.” (Kot Matthew 28:18-20.) Nso ke ikọ esie oro ọkọwọrọ? Ke Bible, ama okụt ikọ oro “enyịn̄,” esiwak ndida mban̄a utọ owo emi owo edide. Enye n̄ko ekeme ndida mban̄a idaha owo ye odudu emi owo oro ekerede enyịn̄ oro enyenede. Ntre, ima inam n̄kpọ “ke enyịn̄” owo m̀mê n̄kpọ, enye oro owụt ke imọdiọn̄ọ odudu emi owo oro m̀mê n̄kpọ oro enyenede. (Men Matthew 10:41 domo; se se ẹwetde ẹban̄a “because he is a prophet” ke ufan̄ikọ oro ke nwtsty.) Se nte ekemede ndiwụt ke ọmọdiọn̄ọ odudu ye idaha emi Ete ye Eyen ẹnyenede, ye se Abasi esidade edisana spirit anam.

12. Didie ke isina baptism ke enyịn̄ Ete? (Ediyarade 4:11) (Se ndise n̄ko.)

¹² Ke enyịn̄ Ete. Emi ọwọrọ ke imenịm ke Jehovah edi Ete nnyịn emi odude ke heaven, mîdịghe ke enye edi Owo emi ọnọde nnyịn uwem. Enye edi Ata Ọkpọsọn̄ Abasi, enye okobot kpukpru n̄kpọ. (Kot Ediyarade 4:11.) Imọdiọn̄ọ ke enye edi Andikop akam, ndien enyịn̄ esie isikot enye ntem ata ukpono ukpono iyakke ndịk anam nnyịn, edide ke ini ibọn̄de akam inọ enye ye ke ini itịn̄de iban̄a enye inọ mbon en̄wen. (Ps. 65:2) Edi ikụreke do, n̄kpọ en̄wen do. Mbon emi ẹkekpan̄de utọn̄ ẹnọ Peter ke Pentecost ẹma ẹdọdiọn̄ọ n̄kpọ ẹban̄a Jehovah, edi idaha-emi akana mmọ ẹdiọn̄ọ ke enye ada Jesus Christ ọnọ nsinsi edinyan̄a.​—Rome 5:8.

13. Didie ke isina baptism ke enyịn̄ Eyen? (Se ndise n̄ko.)

¹³ Ke enyịn̄ Eyen. Enye oro ọwọrọ ke imenịm ke Jesus edi ikpọn̄-ikpọn̄ edibon Eyen Abasi. Jesus edi “usụn̄.” Oro ọwọrọ ke enye edi n̄kukụre owo emi ekemede ndinam idi ufan Jehovah. (John 14:6) Jesus onyụn̄ edi Andifak nnyịn, enye emi akakpade ọnọ nnyịn man nnyịn inyene uwem. Nnyịn ndifiọk oro anam ọdọn̄ nnyịn ndidu uwem nte enye okodude ke ofụri usen uwem nnyịn, idịghe sụk usen emi inade baptism kpọt. (1 John 2:6) Ntre, imesisịn ifịk ikwọrọ ikọ ukem nte Jesus ọkọkwọrọde, nnyịn iyakke n̄kpọ ndomokiet akpan nnyịn. (Luke 4:43) Imakam inyịme ndiyọ ukọbọ ke ntak emi isọn̄ọde ida inam n̄kpọ Abasi. (2 Tim. 3:12) Sia Jesus edide “ibuot ọnọ esop,” imesikpono enye. Ntre, esinenem nnyịn ndisụk ibuot nnọ mbon emi enye emekde ẹte ẹda nnyịn usụn̄ ẹnyụn̄ ẹse ẹban̄a mme mbet imọ.​—Eph. 4:8, 11, 12; 5:23.

14. (a) Didie ke isina baptism ke enyịn̄ edisana spirit? (Se ndise n̄ko.) (b) Siak mme baptism en̄wen emi mbon emi ẹyetde aran ẹsinade. (Se ekebe emi “Mme Baptism Emi Mbon Emi Ẹyetde Aran Ẹsinade.”)

¹⁴ Ke enyịn̄ edisana spirit. Enye emi ọwọrọ ke imenyịme akpanikọ emi aban̄ade edisana spirit. Oro edi ke imenyịme ke enye idịghe owo m̀mê ubak Abasi-Ita-ke-Kiet, utu ke oro, ke edi anam-utom odudu Abasi. Imenyịme ke Jehovah akada edisana spirit esie an̄wam mme prọfet esie ẹtịn̄ se enye oyomde mmọ ẹtịn̄, onyụn̄ ada an̄wam mbon emi ẹkewetde Bible ẹwet se enye okoyomde mmọ ẹwet. Ntre, imesikot Bible kpukpru ini, inyụn̄ inam se Bible ekpepde. (2 Pet. 1:20, 21) Nnyịn isinyụn̄ iyomke ndinam ikpọ idiọkn̄kpọ sia n̄kpọ ntre esinam Abasi inọhọ nnyịn spirit esie, spirit esie inyụn̄ idụhe ke esop.​—Eph. 4:30.

15. Nso ke ikpebiere ndinam?

¹⁵ “Ukpepn̄kpọ aban̄ade baptism”c esịne n̄kpọ awak, biere ndikpep kpukpru oro yak an̄wan̄a fi ekpedi ama ana baptism, nyụn̄ nam se ọkọn̄wọn̄ọde ọnọ Abasi ini akayakde idem ọnọ enye onyụn̄ anade baptism. Edi ekpedi unaha baptism kan̄a, ndi enyene se imụmde fi ikama? Ibuotikọ emi etienede eyeneme se afo akpakade iso anam man ana baptism.