Ka Iso Nam N̄kpọ Man Odot Ndina Baptism

1. (a) Nso idi ndusụk ufọn emi isidiade ima ina baptism? (b) Nso ke idineme ke ibuotikọ emi?

NDI ama ayak idemfo ọnọ Jehovah onyụn̄ ana baptism man owụt ke ama ayak idem ọnọ enye? Edi ntre, afo emeben̄e Abasi ete anam fi enyene edisana ubieresịt. (1 Pet. 3:21) Afo ndinam ntre owụt ke emenịm eti uwụtn̄kpọ ọnọ mme uyen ye mbufa owo emi ẹdude ke esop mbufo. Ata eti n̄kpọ ke afo ekebiere oro! Edi ekpedi unaha kan̄a baptism-e? Imọdiọn̄ọ ke amama Jehovah ke omonyụn̄ oyom ndinam se inemde enye esịt. Ọmọdiọn̄ọ ke baptism edi akpan n̄kpọ emi edinamde ẹfen mme idiọkn̄kpọ fo, afo onyụn̄ edi ufan Abasi. (Utom 2:38-40) Edi omosụk ekeme ndimen̄e ndina baptism. Nso n̄kpọ ikeme ndin̄wam fi? Ke ibuotikọ emi, imọn̄ ineme (1) se isinamde ndusụk owo ẹmen̄e ndina baptism, (2) ntak emi ọfọnde ikûfre ke utịt ererimbot emi ọmọn̄ ededi, ye (3) ufọn emi afo edidiade edieke anamde n̄kpọ man odot ndina baptism udaha ubiat ini.

SE ISINAMDE NDUSỤK OWO ẸMEN̄E NDINA BAPTISM

2. Nso inam ndusụk owo ẹsimen̄e ndina baptism?

² Se isinamde ndusụk owo ẹmen̄e ndina baptism edi ke ntak ndịk. Ke uwụtn̄kpọ, kpa ye emi edide ke mmọ ẹyom ndinam n̄kpọ Jehovah, edi ndịk esinam mmọ ke ọkpọkọm mmọ ẹtịme didie ke mmọ idikemeke ndinem Abasi esịt. Edieke etiede fi ntre, fiak kokot mme itie Bible emi ẹkemede ndinam fi enịm ke Jehovah iyomke yak afo ọfọn ama, ndien ke edieke anamde ofụri ukeme fo man atuak ibuot ọnọ enye, ke eyenem enye. (Ps. 103:13, 14; Col. 3:23) Edieke ndịk anamde fi ke ẹyekọbọ fi, dọhọ Jehovah ọnọ fi ukem uko emi enye ọkọnọde owo kiet emi eketienede ewet Psalm. Owo oro ọkọdọhọ ete: “Jehovah ada ye ami; ndifeheke ndịk. Nso ke owo ekeme ndinam mi?”​—Ps. 118:6.

3. Nso ke ndusụk owo ẹkeme ndikere emi ekemede ndinam mmọ ẹkûna baptism? (Se ndise n̄ko.)

³ Ndusụk owo ẹma Jehovah, edi mmọ inaha baptism sia mmọ ẹkere ke mmimọ inen̄ekede idiọn̄ọ n̄kpọ iban̄a Jehovah ye se Bible ekpepde. Edi ndi ana ọdọdiọn̄ọ kpukpru n̄kpọ? Kop uwụtn̄kpọ kiet mi ke Bible. Ke unyekisọn̄ ama akanam ufọk-n̄kpọkọbi emi ẹkesịnde apostle Paul ye Silas enyek, mmọ ẹma ẹkwọrọ ikọ ẹnọ ekpeme ufọk-n̄kpọkọbi oro ye ikọtufọk esie. Ana-edi ete oro ye mbonufọk esie ẹma ẹkụt ke se iketịbede ke ufọk-n̄kpọkọbi oro edi utịben̄kpọ. N̄kpọ en̄wen edi ke mmọ ẹma ẹkpep ndusụk akpan n̄kpọ ẹban̄a Jehovah ye Jesus okoneyo oro. Ke ntak oro, mmọ ẹma “ẹna baptism ye unana ubiatini.” (Utom 16:25-33) Edieke edide ọmọdiọn̄ọ Jehovah, ama enye ke ofụri esịt fo, ọdiọn̄ọ mme akpan n̄kpọ emi Bible ekpepde, akabade esịt ọkpọn̄ mme idiọkn̄kpọ fo, onyụn̄ ebiere ke ayaka iso odu uwem nte Jehovah oyomde, afo omodot ndina baptism.​—Mark 12:30.

4. Ndusụk owo ẹsisịn esịt ke nso emi esinamde mmọ ẹmen̄e ndina baptism? (Se ndise n̄ko.)

⁴ Ndusụk owo emi ẹyomde ndinam se inemde Abasi esịt ẹsisịn esịt ke se iditakde mmọ. Idiọkke owo ndikere se iditakde enye ke ini enye oyomde ndibiere n̄kpọ ekededi. (Luke 14:27-30) Edi ndusụk owo ẹsifịna idem ẹban̄a se mmọ ẹdiyakde atak man ẹkeme ndinam n̄kpọ Abasi. Se iketịbede inọ Candace edi oro. Ini sista oro ekedide ekpri eyenọwọn̄, ẹma ẹkpep enye se owo akpanamde man enem Jehovah esịt, edi akananam enye ikanamke se ẹkekpepde enye oro. Ke enye ama okokpon, enye ama afiak ọtọn̄ọ ndikpep Bible. Enye ọdọhọ ete: “Mma ndiọn̄ọ se akpanade nsinam nnọ Jehovah, edi ke n̄kan̄ kiet n̄kekemeke sia uwem emi n̄kadiade ke ererimbot ke ekenem mi. Mma ndiọn̄ọ ke ọyọsọn̄ mi ndision̄o ubọk n̄kpọn̄ mme n̄kpọ oro.” Se ifịnade mbon eken edi ke mmọ ẹkere ke mmimọ idikemeke ndidu uwem nte Jehovah oyomde ke mmọ ẹma ẹkena baptism. Mmọ ẹkere ke mmimọ ima ina baptism ima, ke mmimọ iyanam akwa idiọkn̄kpọ ndien ẹsio mmimọ ẹfep ke esop. Edieke mme utọ n̄kpọ oro ẹnamde fi ẹmen̄e ndina baptism, nso ke ekeme ndinam?

5. Nso ke ikpenen̄ede isịn ekikere ima ikere m̀mê akpana ina baptism? (Matthew 13:44-46)

⁵ Ke ini iyomde ndidep n̄kpọ, idịghe okụk ifan̄ emi ẹnyamde n̄kpọ oro kpọt ke isikere, imesikere n̄ko m̀mê n̄kpọ oro eyenen̄ede enyene ufọn ọnọ nnyịn. Edieke imende ufọn emi n̄kpọ oro edinyenede inọ nnyịn idomo ye okụk ifan̄ emi ẹdinyamde n̄kpọ oro, ndien enye edi ke ufọn emi n̄kpọ oro edinyenede enen̄ede okpon akan ekọmurua oro, nnyịn isibiatke ini ndidep n̄kpọ oro. Ukem ntre, ima ikere m̀mê akpana ina baptism, idịghe sụk mme n̄kpọ emi anade iyak atak kpọt ke ikpekere iban̄a, edi yak ikere n̄ko akakan ufọn emi nnyịn ididiade ke ndidi ufan Jehovah. Jesus akada uwụtn̄kpọ iba anam se itịn̄de emi an̄wan̄a. (Kot Matthew 13:44-46.) Ke uwụtn̄kpọ oro kiet kiet, ekenenem ete kiet ndinyam kpukpru n̄kpọ emi enye ekenyenede man enye ekeme ndidep ọsọn̄urua n̄kpọ emi enye okokụtde. Afo n̄ko omokụt ata ọsọn̄urua n̄kpọ, n̄kpọ oro edi akpanikọ emi aban̄ade Obio Ubọn̄ Abasi. Edieke ekerede m̀mê osụk edi se adade akpanikọ emi okụtde odu uwem, nen̄ede kere ban̄a mme uwụtn̄kpọ emi Jesus ọkọnọde. Emekeme ndibụp idemfo ete: ‘Ndi mmenen̄ede nnịm ke akpanikọ emi n̄kụtde mi ọsọn̄ urua? Ndi mmama nte ami ye Jehovah idide ufan, se enye anamde mi ndori enyịn ndinyene, ye nditọ-ete ke ofụri ererimbot emi ẹmade mi?’ Se ededi emi ọbọrọde ke mme mbụme oro ekeme ndin̄wam fi anam n̄kpọ emi edinamde enen̄ede ama akpanikọ emi okụtde mîdịghe anam fi okụt se ikpande fi ndibiere ndina baptism.

6. Nso idin̄wam nnyịn inam se isụk ikpepde?

⁶ Ke ini Jesus ọkọnọde uwụtn̄kpọ asuan n̄kpasịp, enye ama etịn̄ aban̄a nte esịt owo ekemede nditie emi ekemede ndikpan enye ndinam n̄kpọ mban̄a se enye okopde m̀mê se ẹkpepde enye. Kpa ye oro, Jesus ama onyụn̄ owụt ke ndusụk owo ẹyekop eti mbụk Obio Ubọn̄ “ye eti esịt eke ọfọnde” ẹnyụn̄ ẹnam n̄kpọ ẹban̄a etop oro. (Luke 8:5-15) Ntre, edieke afịnade fi ke etie nte udûkemeke ndinam se ekpepde, kûyak idem emem fi. Jehovah ekeme ndin̄wam fi enyene “obufa esịt,” enye emi ekemede ndin̄wam fi anam se enye ọdọhọde. Bọn̄ akam dọhọ Jehovah an̄wam fi ama se osụk ekpepde emi, onyụn̄ an̄wam fi ananam se osụk ekpepde.​—Ezek. 18:31; 36:26.

7-8. Nso isinam ndusụk uyen mînaha baptism? (Se ndise n̄ko.)

⁷ Ndusụk uyen ẹma Jehovah, edi mmọ inamke n̄kpọ emi edinamde mmọ ẹna baptism ke ntak se mbon en̄wen ẹtịn̄de ye mmọ. Ke uwụtn̄kpọ, ndusụk mbon emi ẹsinọde nditọ ufọkn̄wed item ke ufọkn̄wed ẹkeme ndidọhọ nditọ ufọkn̄wed yak mmọ ẹnyịme nte mme owo ẹdude uwem idem ekpededi nte mme owo ẹdude uwem oro inemke Jehovah esịt. Edi utọ item oro ekeme ndida n̄kesịm afanikọn̄. (Ps. 1:1, 2; N̄ke 7:1-5) Afanikọn̄ oro idisịmke fi edieke anamde se andiwet Psalm kiet akanamde. Enye ọkọdọhọ Jehovah ete: “Mmenyene ikike n̄kan kpukpru mme andikpep mi, koro ntiede n̄kere se afo etide mi.”​—Ps. 119:99.

⁸ Se ikopde owụt ke ndusụk ete ye eka emi ẹdide Mme Ntiense Jehovah ẹsinam ọsọn̄ nditọ mmọ ndina baptism. Nte mme ete ye eka ẹsinamde oro edi ke mmọ ẹsinen̄ede ẹsịn ekikere ke ebiet emi nditọ mmọ ẹkpekade ufọkn̄wed ẹketre, utọ utom emi mmọ ẹkpenamde, mîdịghe edi ke mmọ isin̄wamke nditọ mmọ oro ẹbiere se mmọ ẹdinamde inọ Jehovah. Ndi emekere ke ete ye eka fo ẹkeme nditetịm n̄n̄wam fi anam se idin̄wamde fi ebiere ndina baptism? Edieke edide ntre, neme ye mmọ. Diọn̄ọ ete ke inamke n̄kpọ m̀mê isua ifan̄ ke afo edi, ke afo emekeme nditetịm n̄kpere Jehovah.​—N̄ke 20:11.

9. Nso ikeme ndinam ndusụk owo ẹdọhọ yak ifiak ibet kan̄a, ikûna baptism?

⁹ Ndusụk owo ẹdot ndina baptism edi mmọ ẹdọhọ yak ifiak ibet kan̄a ke ntak emi mmọ ẹtienede ubọkn̄ka mmọ, mîdịghe akam ekeme ndidi mmọ ẹbet yak owo ntem m̀mê ntem etiene ana. Ke uwụtn̄kpọ, mmọ ẹkeme ndiyom ndina baptism ke ukem usen emi ufan mmọ anade mîdịghe owo ke ubon mmọ anade. Idiọkke afo ndina baptism ke ukem usen emi ufan fo m̀mê owo ke ubon fo anade. Edi ndi akpana mme utọ ntak oro ẹnam fi okûna baptism? Ti ke afo ndiyak idem nnọ Abasi edi n̄kpọ emi afo ke idemfo ọn̄wọn̄ọde ndinam. Idịghe ini emi mbon en̄wen ẹnade baptism ke afo akpada ebiere m̀mê ayana baptism m̀mê udûnaha.​—Rome 14:12.

NTAK EMI ỌFỌNDE IKÛFRE KE UTỊT ERERIMBOT EMI ỌMỌN̄ EDEDI

10. Nso ikeme ndinam ndusụk owo ẹmen̄e ndinam n̄kpọ Abasi?

¹⁰ Ke ẹsiode ẹfep mme ntak oro inọde ke enyọn̄ enyọn̄ emi, ndusụk owo ẹkeme ndidọhọ yak mmimọ ikûnam n̄kpọ Abasi kan̄a sia mmọ ẹkere ke idịghe mfịn ke utịt edidi. Edi ndi utọ ekikere oro osụk enen do? Jesus okodụri mme mbet esie utọn̄ ete: “Ẹben̄e idem, koro Eyen owo eyedi ke hour eke mbufo mîdorike enyịn.”​—Luke 12:40.

11. Nte ikpepde n̄kpọ iban̄a Jehovah ika, nso ke oro edinam nnyịn inam? Ntak-a? (Psalm 119:60)

¹¹ N̄kpọ emi akpanamde yak iyom ndiyak idem nnọ Jehovah edi ima. Nte inen̄erede ima edima Abasi nnyịn ika, ntre ke ọdọn̄ nnyịn ndima mme ewụhọ esie nnyụn̄ nnam mme ewụhọ esie oro ndondo emi ẹnamde nnyịn ifiọk mmọ. (Kot Psalm 119:60.) James emi ekedide mbet Jesus anam nnyịn idiọn̄ọ akpan ntak en̄wen emi akpanamde nnyịn isọsọp inịm mme ewụhọ Jehovah: Idụhe owo nnyịn ndomokiet emi ọdiọn̄ọde se iditịbede n̄kpọn̄. Ekeme ndinam nnyịn idikam inyeneke usen kiet en̄wen “ndinam se inende,” ntre idaha-emi edi nnennen ini ikpanamde n̄kpọ iban̄a se idiọn̄ọde.​—Jas. 4:13-17.

12. Nso ke ikeme ndikpep nto uwụtn̄kpọ emi Jesus ọkọnọde aban̄a in̄wan̄ vine?

¹² Kpa ye se itịn̄de oro, ndusụk owo ẹkeme ndikere ke edide ina baptism idaha-emi m̀mê nte ini akade, ke osụk edi ukem n̄kpọ. Mmọ ẹkeme nditi uwụtn̄kpọ emi Jesus ọkọnọde aban̄a in̄wan̄ vine. Mmọ ẹkeme ndikere ẹte, ‘N̄kọ enye ekekpep ke ndusụk owo ẹkenam utom sụk hour kiet kpọt edi mmọ ẹbọ ukem okụk emi ẹkekpede mbon emi ẹkenamde utom ofụri usen oro.’ Edi mbonutom emi ẹkenamde utom hour kiet kpọt ẹma ẹnọ ntak emi akanamde mmọ ẹkûbak utọn̄ọ. Kop ntak oro mi: “Koro baba owo kiet ikpehe nnyịn utom.” Idịghe nte ẹdọhọ ke mmọ ẹkedi ifu, n̄kukụre edi ke idụhe eke ekekpede mmọ utom. Ndondo emi ẹkekotde mmọ utom, mmọ ikabiatke ini nditiene n̄kanam utom. (Matt. 20:1-16) Mfịn, Jesus ọdọhọ idi mbet imọ inyụn̄ itiene ikwọrọ etop Obio Ubọn̄. Ikpanaha ibiat ini ndinam se enye ọdọhọde inam oro.

13. Nso ke ikeme ndikpep nto n̄wan Lot?

¹³ Owo ekededi emi osụk emen̄ede ndinam n̄kpọ man odot ndina baptism ekeme ndikụt ke eyenen̄ede ọsọn̄ enye ndinam n̄kpọ nnem Abasi esịt ke akpatre minit. Jesus ama ọdiọn̄ọ oro onyụn̄ odụri mme mbet esie utọn̄ ete: “Mbufo ẹti n̄wan Lot.” (Luke 17:31-35) N̄wan Lot ama enen̄ede ọdiọn̄ọ ke idibịghike Abasi ọmọn̄ ososobo Sodom ye Gomorrah, edi etie nte enye ikekemeke ndisio esịt esie n̄kpọn̄ mme n̄kpọ emi enye ọkọkpọn̄de do. (Gen. 19:23-26) Uwụtn̄kpọ n̄wan Lot emi onyụn̄ eti nnyịn ke usụn̄ edinyan̄a emi Abasi ebererede enịm mi idinaha in̄wan̄ ke nsinsi. Ini Abasi ama ekem, enye eyeberi usụn̄ oro idinyụn̄ itatke enye aba.​—Luke 13:24, 25.

14. Mme prọfesi emi ẹban̄ade utịt ererimbot emi ẹkpenam fi anam nso?

¹⁴ Mme n̄kpọ emi ẹtịbede ke ererimbot kpukpru usen ke ẹsu prọfesi Bible emi aban̄ade utịt editịm n̄kpọ emi. Idem ekpededi ndusụk n̄kpọ oro itịbeke ke ebiet emi odụn̄de, afo ndikụt nte mme n̄kpọ oro ẹtịbede ke nsio nsio itie ke ererimbot akpana anam fi okụt ke edi se anade baptism udaha ubiat ini. Kere se apostle Peter ọkọdọhọde mme Christian ke eyo mme apostle ẹnam. Enye ọkọdọhọ mme Christian oro “ẹtịn̄ enyịn ẹkpeme” sia “utịt kpukpru n̄kpọ [ama asan̄a] ekpere.” (1 Pet. 4:7) Ke itie Bible oro, ana-edi “utịt” emi ẹtịn̄de ẹban̄a do aban̄a ini ẹkesobode Jerusalem ye temple esie. Mbon emi Peter ekewetde leta oro ọnọ ẹma ẹdụn̄ yak oyom usụn̄ eti-eti ọkpọn̄ Jerusalem, ntre mmọ ididụhe ke obio oro ini ẹdisobode obio oro. (1 Pet. 1:1) Edi mmọ ẹyetetịm ẹnịm ke kpukpru n̄kpọ eken emi Jehovah ọn̄wọn̄ọde ndinam oyosu ndondo emi mmọ ẹkụtde nte prọfesi enye emi etịbede. Ukem oro ke onyụn̄ edi ye afo, nte afo okụtde nte mme prọfesi Bible emi aban̄ade utịt ererimbot emi osude, enye oro ayanam etịn̄ enyịn ekpeme. Se idiwụtde ke afo emetịn̄ enyịn ekpeme edi afo ndinam n̄kpọ man odot ndina baptism.

15. Didie ke ikeme ndiben̄e idem nnọ usen Jehovah? (2 Peter 3:10-13)

¹⁵ Peter ama etịn̄ nte ikemede ndiben̄e idem nnọ usen ikpe Jehovah emi osụk edide ke ọyọhọ leta esie iba emi Abasi ọkọnọde enye spirit yak ewet. Ini Peter ekewetde leta oro ọnọ mme Christian emi ẹkedude ke eyo mme apostle, usen oro ikekpetke-kpet ndidi kan̄a. Kpa ye oro, enye ọkọdọhọ mmọ ‘ẹsọn̄ọ ẹnyene usen oro ke ekikere.’ (Kot 2 Peter 3:10-13.) Nte ikemede ndinyene usen oro ke ekikere edi nnyịn ndiben̄e idem nnọ usen oro nnyụn̄ nyak yak ọdọdọn̄ nnyịn usen oro ndidisịm. N̄kpọ emi idinamde iwụt ke ọdọdọn̄ nnyịn usen oro ndidi edi nnyịn ndidu “edisana ido uwem” nnyụn̄ nnam “mme edinam uten̄e Abasi.” Kere nte edinemde Jehovah ndikụt nte afo anamde mme n̄kpọ emi ẹwụtde ke emeten̄e enye! Idụhe-du nte mîdinemke enye ndikụt nte afo ayakde idemfo ọnọ enye onyụn̄ anade baptism.

MME UFỌN EMI EDIDIADE EDIEKE ANAMDE N̄KPỌ IDAHA-EMI

16. Ini ewe idi mfọnn̄kan ini emi akpanamde n̄kpọ man ana baptism? (2 Corinth 6:1, 2) (Se mme ndise n̄ko.)

¹⁶ Idaha-emi edi mfọnn̄kan ini afo ndinam n̄kpọ man ana baptism. (Kot 2 Corinth 6:1, 2.) Eunuch owo Ethiopia emi Philip okosobode ama okụt ke ọfọn imọ isọsọp ina baptism. Ndondo emi eti mbụk emi ẹkekwọrọde ẹnọ enye akan̄wan̄ade enye, enye onyụn̄ okụtde mmọn̄ se anade baptism, enye ikekereke ite: ‘N̄kpama ndidiọn̄ọ n̄kpọ en̄wen en̄wen mban̄a eti mbụk kan̄a. Iyokụt mmọn̄ en̄wen nte isụk ikade ke usụn̄.’ Utu ke oro, enye okobụp Philip ete: “Nso ibiọn̄ọ mi ndina baptism?” (Utom 8:26, 27, 35-39) Ata eti uwụtn̄kpọ ekedi oro! Ke eunuch oro ama akana baptism ama, enye ama “[ọnyọn̄] esie ke idatesịt.”

17. Nso ke ikpenen̄ede inịm?

¹⁷ Edieke afo emen̄ede ndina baptism, nen̄ede nịm ke Jehovah ada ke ikpat ndinam fi yak edi ufan esie. (Rome 2:4) Enye ekeme ndin̄wam fi edieke ndịk anamde fi, edieke afo ekerede ke se anade okpụhọde man ana baptism ọsọn̄ akan fi, mîdịghe ke ini se mbon en̄wen ẹnamde mîyakke fi ana baptism. Ama ana baptism onyụn̄ enyene eti ubieresịt ke iso Abasi, ana-edi oyokụt ke “mme n̄kpọ oro ẹdude ke edem” inen̄ekede idi akpan n̄kpọ inọ fi aba. (Phil. 3:8, 13) Ini oro ndien ke afo edikeme ndisịn ekikere ke “mme n̄kpọ oro ẹdude ke iso,” oro edi, nte mme n̄kpọ emi Jehovah ọn̄wọn̄ọde ndinam nnọ mbon emi ẹyakde idem ẹnọ enye ẹnyụn̄ ẹnade baptism ẹsude.​—Utom 3:19.