Ubịnikọt Okụtde Unen Emi Ẹkamade—Mbụk Obio Ubọn̄
“NTAK Emi Uwem Ọyọhọde Ntem ye Mme Mfịna?—Nte Paradise Oro Afanikọn̄ Mîdụhe Ekeme Ndidu?” Emi ekedi ibuotikọ Mbụk Obio Ubọn̄ Nọ. 34, tract enyenede page inan̄ oro ẹkesuande ke ata ediwak idụt ke usem 139 ke April ye May isua oko. Mme Ntiense ke Jamaica ẹtịn̄ ẹban̄a utom ubịnikọt emi nte “kiet ke otu mme akpan n̄kpọ eke isua.” “Akwa n̄kpọ emi ọnọde nditọete idatesịt,” edi nte Mme Ntiense ke Belgium ẹkotde enye. Ke Czech Republic, emi ekedi akpa ini oro Mme Ntiense Jehovah ẹkenyenede ifet ndibuana ke ndisuan Mbụk Obio Ubọn̄. N̄kọk itieutom ọtọt ete: “Ubịnikọt oro ama ada edu ifịk ye ifiopesịt edi.” Ẹma ẹkop ukem ikọ oro ẹto ediwak idụt eken.
Mbụk Obio Ubọn̄ Nọ. 34 ama enyene akpan etop ọnọ mbon oro ẹtuan̄ade ẹnyụn̄ ẹsemede ẹban̄a mme mbubiam n̄kpọ oro ẹnamde ke enyịn̄ ido ukpono. (Ezekiel 9:4) Enye ama akama ndọn̄esịt ọnọ mbon oro ẹnyenede mfịna ke ntak “ndiọk eyo” emi mmọ mîkemeke ndikara. (2 Timothy 3:1) Ke anyande ubọk owụt Bible, tract oro ama owụt ete ke ibịghike ẹyekọk mme mfịna uwem. Paradise oro afanikọn̄ mîdụhe edi akpanikọ. (Luke 23:43) Ediwak mbon oro ẹkekotde Mbụk Obio Ubọn̄ oro ẹma ẹkop inemesịt ke etop esie. Eren kiet ke Togo ọkọdọhọ Ntiense kiet ete: “Mfan̄a idụhe iban̄a se afo etịn̄de.”
Nte owo mîkemeke ndifan̄a, ndisuan Mbụk Obio Ubọn̄ emi ama odụri ntịn̄enyịn ke n̄wọrọnda usụn̄. Ke Denmark enyeneufọk kiet ama ọbọrọ Ntiense kiet oro ọkọnọde tract ete: “Nsụk nto United States ndondo emi nnyọn̄ ndi. Esisịt ini mbemiso n̄kpọn̄de do, owo ama ọnọ mi tract mbufo. Ami ndisụk mbehe edi emi, ndien ye unana ubiatini ẹnọ mi ukem tract oro ke Danish!”
Ufiop Ufiop Ibetedem Ẹnọde Ubịnikọt Oro
Mme Ntiense Jehovah ke ofụri ererimbot ẹma ẹbuana ye ifiopesịt ke utom edisuan tract oro. Austria, El Salvador, Haiti, Hungary, Italy, New Caledonia, ẹkedi sụk ibat ibat ke otu ediwak idụt oro ẹketọtde n̄wakn̄kan ibat ofụri ini eke mme asuanetop ke mme ọfiọn̄ oro ẹkesuande Mbụk Obio Ubọn̄.
Ke Zambia esenyịn circuit kiet ama ọnọ eyen esie an̄wan, Deborah, emi edide isua ita ke emana ukpep ndinọ mme n̄wed ke ufọk ke ufọk. Ke ini oro ẹkedade Mbụk Obio Ubọn̄ Nọ. 34 ẹnam ubịnikọt, Deborah ama ọnọ se iwakde ibe idem tract 45. Eka esie ama ọtọn̄ọ ukpepn̄kpọ Bible ye ndusụk owo oro ẹkebọde Deborah Mbụk Obio Ubọn̄.
Ke South Africa uyen kiet ama ọnọ nsan̄a ufọkn̄wed ekerede Cashia tract emi. Cashia ama okot tract oro onyụn̄ ọdọhọ ete: “Emi akam ọfọn akaha—ndidu uwem ke nsinsi ke paradise isọn̄! Ntak owo mîketịn̄ke inọ mi iban̄a emi ke mbemiso?” Ẹma ẹtọn̄ọ ukpepn̄kpọ Bible. Ke ufan̄ urua kiet Cashia ama ọbọ tract efen. Ọyọhọ iba emi okoto ufan emi enye ọkọtọn̄ọde oto uwet leta emi edide owo Roman Catholic, emi odụn̄de ke Cyprus. Ufan emi ẹketọn̄ọde ẹto uwet leta mi ama anam an̄wan̄a Cashia ntak emi mme ukpepn̄kpọ Roman Catholic ẹdide nsu onyụn̄ ọdọhọ enye ete ke imọ imaduak ndikpep Bible ye Mme Ntiense Jehovah. Nte ededi, oro ama enen̄ede ọsọn̄ọ ubiere Cashia ndikaiso ke ukpepn̄kpọ esie.
Eyeneren isua duop ke Switzerland ama abuana ye eka esie ke ndisuan tract oro. Enye ama ọnọ n̄kaiferi kiet idem kiet onyụn̄ esịn udọn̄ ọnọ enye nditịn̄ enyịn n̄kot enye. N̄kaiferi oro ama obụp eyeneren oro m̀mê enye enen̄ede onịm se ndise edem esie owụtde ke akpanikọ—anana-utịt uwem ke isọn̄. Nso ke eyeneren oro ọkọbọrọ? “Oh, ih, ami mmenen̄ede nnịm ke akpanikọ.” N̄wan oro ndien ama ayarade ete ke imọ ke ikọdụn̄ọde iyom ido ukpono akpanikọ koro ekese ntuaha odude ke ido ukpono imọ. Ke mfiakn̄ka, ẹma ẹtọn̄ọ ukpepn̄kpọ Bible.
Mme Usọp Usọp Edinam
Ndusụk ini Mbụk Obio Ubọn̄ ama anam mbon oro ẹkotde enye ẹnam n̄kpọ usọp usọp. Ke ama okokot tract oro, eyenan̄wan kiet ke Belgium edide isua 11 ama ayarade ọnọ kiet ke otu Mme Ntiense Jehovah ete ke imọ ima isiyịp n̄kpọ ke ufọkurua. Eka eyenan̄wan oro ikoyomke n̄kpọ emi ayarade, edi se ekpri eyenan̄wan oro okokotde ama otụk ubieresịt esie, ndien enye ama ọsọn̄ọ eyịre ndika n̄kosobo ye esenyịn ufọkurua oro. Ke akpatre eka oro ama onyịme ndiyak eyenan̄wan esie asan̄a ye Ntiense oro afiak aka ufọkurua oro. Esenyịn ufọkurua oro ama odu ke n̄kpaidem aban̄a ediyarade idiọkn̄kpọ esie. Ke ini enye ọkọfiọkde ete ke edi Mbụk Obio Ubọn̄ okonụk enye ndinam n̄kpọ ke usụn̄ emi, enye ama ọbọ idem kiet ke idemesie man okụt se isịnede oro ekenyenede odudu ntre. Eyenan̄wan oro ke enyene ukpepn̄kpọ Bible oro enyenede n̄kọri idahaemi.
Ntiense kiet ke Cameroon ama ọkpọn̄ idem Mbụk Obio Ubọn̄ kiet ye eren kiet onyụn̄ obụk ete: “Ke ini nnyịn ikafiakde ika, nnyịn ima ikụt nte ke enye ama odudụri udịm ke esịt esie onyụn̄ enyene ediwak mbụme. Ke ama ọkọbọ mme ibọrọ oro ẹnọde uyụhọ, enye ama etịn̄ ete: ‘Edi ata ofụri akpanikọ nte ke ido ukpono etịp n̄kpọ esịn ke unana inemesịt ubonowo. Tract mbufo an̄wam mi ndifiọk ekese, edi nyema ndifiọk ekese efen efen.’” Enye idahaemi ke enyene ukpepn̄kpọ Bible ofụri ini.
Ntiense kiet anamde utom ke ufọk ke ufọk ke Uruguay ama ọnọ eren kiet tract oro. Ntiense oro ama akaiso ke utom ukwọrọikọ eke ufọk ke ufọk esie onyụn̄ anam utom akanade ikpehe oro tutu enye ọwọn̄ọde edisịm enyịnusụn̄ esa ufọk ọbọn̄ oro. Enye ama odu ke n̄kpaidem ndikụt eren oro adade ebet enye, ye tract ke ubọk. Enye ama okokot enye ndien okoyom ntọt efen efen. Ẹma ẹtọn̄ọ ukpepn̄kpọ ke ebe oro.
Mbon An̄wa Ẹn̄wam ke Ndisuan
Ke Japan akparawa Ntiense kiet ama osobo ye eren kiet odude ke iduọk isua 50 esie onyụn̄ emen tract oro owụt enye. Eren oro ama obụp ete: “Nso ke esinam ye ekpri ikọn̄ n̄wed oro ke ini afo osobode ye mme owo oro mîkemeke ndikụt usụn̄?” Ntiense oro ama onyịme ete ke imọ ifiọkke. Eren oro ama ọdọhọ enye ebet esisịt onyụn̄ afiak odụk ufọk esie. Enye ama ọwọrọ edi ye idem Mbụk Obio Ubọn̄ kiet onyụn̄ ọdọhọ ete: “Ami mma mbọbọ ekpri ikọn̄ n̄wed oro. Mma n̄kere ke enye esịne ata inem inem ye akpan ntọt, ntre mma nsion̄o enye nsịn ke n̄wed nnan. Mbọk da emi n̄wam mme owo oro ẹdide nnan.” Eren oro ama abiat ediwak hour ndision̄o Mbụk Obio Ubọn̄ oro nsịn ke n̄wed nnan man otodo mme nnan ẹkûtaba se isịnede ke esịt esie.
Ke Slovakia eren kiet ama ama tract oro etieti tutu enye afiak osion̄o idem 20, ndien enye ama asuan se enye akafiakde osion̄o ẹmi ke idemesie. Asuanetop kiet ke Switzerland ama ọkpọn̄ idem Mbụk Obio Ubọn̄ kiet ọnọ ubon kiet onyụn̄ akaiso anam utom ke enyọn̄ ufọk oro ubon emi okodụn̄de. Ke ini afiakde osụhọde edi, ekpri eyeneren kiet otode ubon oro ama edisobo ye enye, emi ọkọdọhọde enye ọnọ imọ idem tract 19 efen efen. Ke ufọkn̄wed emi eyeneren oro akakade, ẹma ẹnọ nditọ ufọkn̄wed utom ndiwet n̄kpọ mban̄a mme mfịna ye ndụn̄ọde kaban̄a usọbọ. Enye ama oyom Mbụk Obio Ubọn̄ man ọnọ nditọ ubet ukpepn̄kpọ esie idem kiet kiet.
Owo Ikebehe Ikpọn̄ Baba Owo Kiet
Mbon oro ẹkebuanade ke ubịnikọt oro ẹma ẹdomo ndikụt nte ke owo ikebehe ikpọn̄ baba owo kiet. Ke New Caledonia Ntiense iba ẹma ẹnam isan̄ ẹka nsannsan efakutom emi ekpụk kiet ẹdụn̄de ndikasuan Mbụk Obio Ubọn̄ oro. Ke usụn̄, mmọ ẹma ẹkụt afan̄usụn̄ oro eketiede nte owo isisan̄ake, edi kpa ye oro mmọ ẹma ẹbiere ndikese m̀mê owo ekededi odụn̄ ke utịt utịt esie. Ke ẹwọn̄ọde ke moto, mmọ ẹma ẹsan̄a ẹdụk afan̄usụn̄ oro, ẹdụkde n̄kpri idịm ẹsan̄a ẹbe tutu mmọ ẹkekụt ufọk kiet ke akpatre. Ebe ye n̄wan oro akananam mîkopke n̄kpọ iban̄a Mme Ntiense Jehovah ẹkedụn̄ do, ndien mmọ ẹma ẹbọ idem Mbụk Obio Ubọn̄ kiet. Ke ukperedem mme asuanetop oro ẹma ẹnam mfiakn̄ka ndien ke n̄kpaidem mmọ ẹma ẹkụt ẹte ke ebe ye n̄wan oro ẹma ẹdiọn̄ usụn̄ oro ye ediwak n̄kpri ẹbọp man otodo Mme Ntiense oro ẹkeme ndiwat moto mmọ tutu ẹdisịm ufọk oro. Ẹma ẹtọn̄ọ ukpepn̄kpọ Bible ofụri ini.
Ke Poland Ntiense kiet ekenyene ndisan̄a mbe ikpehe oro ẹbọpde ufọk man ọkọnọ enyeneufọk kiet Mbụk Obio Ubọn̄ oro. Mme anamutom oro ẹma ẹda ẹse nte enye akasan̄ade afiak edibe itie ubọpufọk oro. Ke akpatre, kiet ke otu mme anamutom oro ama ada okot enye, ọdọhọde enye ete okûfre mmimọ. Ke ini enye akasan̄ade okosịm mmọ, mmọ ẹma ẹtre utom ẹnyụn̄ ẹnọ ọyọhọ n̄kpan̄utọn̄ ke nneme tract oro. Mmọ ẹma ẹbọ ediwak Mbụk Obio Ubọn̄ oro ọkọrọ ye mme magazine ndien ke ukperedem, ke mfiakn̄ka, ẹbọ ikpọ n̄wed.
Ẹma ẹsuan ediwak miliọn Mbụk Obio Ubọn̄ Nọ. 34 ke mme itie ikie ke ediwak usem. Etop esie enyenyene ọkpọsọn̄ odudu. Ediwak owo ẹkpep ẹte ke ẹkeme ndinyene paradise oro afanikọn̄ mîdụhe. Nnyịn ibọn̄ akam ite mbon oro ẹnyenede eti esịt ẹkpekam ẹkaiso ndinam n̄kpọ mban̄a ndien ke akpatre ẹdidu ke otu “mbon nsụkidem” ẹmi ‘ẹdidade isọn̄ ẹnyene; ediwak emem edinyụn̄ enemde mmọ esịt.’—Psalm 37:11.
[Ekebe ke page 31]
Ẹkaiso Ndisuan Mme Magazine!
April ye May 1995 ama okụt ubịnikọt edisuan Mbụk Obio Ubọn̄ Nọ. 34 oro okokụtde unen akamba akamba. Ke ọfiọn̄ iba oro, ẹma ẹsuan n̄ko magazine Enyọn̄-Ukpeme ye Awake! ke n̄wọrọnda usụn̄. Eyenete eren kiet ke Czech Republic, ke uwụtn̄kpọ, ọtọt ete ke April imọ ima inịm Mbụk Obio Ubọn̄ 250 ye magazine 750. Ke Guadeloupe, ẹma ẹsio Saturday, April 15, ẹnịm nte akpan usen magazine. Ekpere ndidi kpukpru asuanetop ke idụt oro ẹma ẹbuana ke utom ukwọrọikọ usen oro! Slovakia ama enyene obufa n̄wakn̄kan ibat magazine ẹsuande ke April. Ẹma ẹnyene ukem ntọt oro ẹto ediwak idụt efen.
Ntre ntak mûnamke April ye May 1996 ẹdi n̄wọrọnda ọfiọn̄ edisuan mme magazine? Mme esop ẹkeme ndinam ndutịm nnọ mme akpan usen magazine. Owo kiet kiet ekeme ndibuana ke usiakusụn̄ unọ un̄wam. Ke mme usụn̄ ẹmi ye mme usụn̄ en̄wen, ẹkeme ndisịn udọn̄ nnọ edisuan magazine, ndien ẹyekaiso ndisuan akpan etop oro ẹketan̄ade ke Mbụk Obio Ubọn̄ Nọ. 34. Ndien, nte ekedide isua oko, Jehovah iditreke ndidiọn̄ edu nsịnifịk oro nnyịn iwụtde.—2 Timothy 4:22.