Yak Un̄wana Mbufo Ayama!

KE AKPATRE ini ama edisịm ọnọ akani eren oro ndikụt Messiah oro ẹken̄wọn̄ọde! Ebede ke uyarade oro Abasi ọkọnọde Simeon ama ọfiọk ete ke ‘imọ idikpaha tutu imọ ikụt Christ emi Jehovah ọdọn̄de.’ (Luke 2:26) Edi nso n̄kpọ idatesịt ke ekedi ntem ke ini Simeon okodụkde temple ndien Mary ye Joseph ẹyakde Jesus oro edide nsekeyen ẹsịn enye ke ubọk! Enye ama ọnọ Abasi ekọm, ọdọhọde ete: “Ke emi, O Ọbọn̄, Afo ke ayak owo Fo ọnyọn̄ ke ifụre . . . Koro enyịn mi ẹmekụt edinyan̄a Fo . . . un̄wana eke ediyararede n̄kpọ ọnọ mme Gentile, onyụn̄ edi ubọn̄ ikọt Fo Israel.”—Luke 2:27-32; men Isaiah 42:1-6 domo.

Jesus, ọtọn̄ọde ke baptism esie ke isua 30 tutu osịm n̄kpa esie, ama owụt idem nte idide “un̄wana” inọ ererimbot. Ke mme usụn̄ ewe? Enye ama ọnọ un̄wana eke spirit ebe ke ndikwọrọ mban̄a Obio Ubọn̄ Abasi ye mme uduak Esie. Enye n̄ko ama ayarade mme nsunsu ukpepn̄kpọ ido ukpono onyụn̄ owụt mme utom ekịm an̄wan̄wa. (Matthew 15:3-9; Galatia 5:19-21) Ke ntre, Jesus ama ekeme nditịn̄ nte enende ete: “Ami ndi un̄wana ererimbot.”—John 8:12.

Jesus akakpa ke isua 33 E.N. Nte un̄wana oro ama enịme ini oro? Baba-o! Ke adan̄aemi okosụk odude ke isọn̄, Jesus ama ọdọhọ mme mbet esie ete: “Yak un̄wana mbufo ayama ke iso owo.” (Matthew 5:16) Nte asan̄ade ekekem, ke Jesus ama akakpa mme anditiene enye ẹma ẹkaiso ndinam un̄wana oro ayama.

Ke ndikpebe Jesus, mme Christian mfịn ẹwụt un̄wana Jehovah ebe ke ndibuana ke utom ukwọrọikọ. Mmọ “[ẹkaiso] ẹsan̄a nte nditọ un̄wana,” ẹwụtde idemmọ nte idide mme n̄wọrọnda uwụtn̄kpọ ke usụn̄uwem Christian.—Ephesus 5:8.