Ntọt M’ọkwọrọ Obio Ubọn̄

N̄kani Asua Ẹdiana Kiet ke Ndinam N̄kpọ Jehovah

“AKPA ini oro n̄kokopde n̄kpọ ekededi mban̄a Mme Ntiense Jehovah ekedi ke ini emi n̄kanamde utom nte owo ukpeme ekọn̄ ke Bosnia,” ntre ke Branko anam an̄wan̄a.a

Branko okodu ke utom ukpeme ke ufọkibọk emi ẹkenọde mbon oro ẹkedade unan usọbọ. Kiet ke otu mme dọkta ke ekekpep Bible ye Mme Ntiense, ndien ke ini utom okoneyo, enye ama anam ekese se enye ekekpepde aban̄a Bible an̄wan̄a Branko.

Se Branko okokopde okoneyo oro ama enen̄ede onụk enye tutu enye ayak n̄kpọekọn̄ esie onịm usọp usọp. Enye ama okosobo ye Mme Ntiense, oyomde ndikpep ekese efen efen. Ndusụk ini ke ukperedem, ke ama ọkọwọrọ aka idụt efen ke Europe, Branko ama oyom Ufọkmbono Obio Ubọn̄ okụt onyụn̄ odụk mbonoesop ke esop usem Yugoslavia eke Mme Ntiense Jehovah. Do ke Branko okosobo Slobodan.

Slobodan n̄ko okoto Bosnia ama onyụn̄ anam utom nte owo utom unyịmesịt kpa ke ekọn̄ oro ye Branko—edi ke isio isio itienna. Slobodan akada ye mbon Serbia an̄wana ye mbon Croatia. Ke ini mmọ mbiba ẹkesobode, Slobodan ama akabade edi Ntiense Jehovah oro ama akana baptism. Enye ama onyịme ndikpep Bible ye Branko, kpa akani asua esie. Nte ukpepn̄kpọ akakade iso, Branko ama ekpep ekese n̄kpọ aban̄a Jehovah, ndien ima oro enye ekenyenede ọnọ Abasi ama ọkọri. Emi ama onụk Branko ndiyak uwem esie nnọ Andibot. Ke October 1993 enye ama ayarade uyakidem esie ke baptism mmọn̄.

Didie ke Slobodan akakabade edi kiet ke otu Mme Ntiense Jehovah? Enye ama abak ọkpọn̄ iso ekọn̄ ke Bosnia. Enye ama okot ndusụk n̄wed oro Mme Ntiense ẹmịn̄de, edi ekedi ke Ntiense iba ẹma ẹkewaha ufọk esie ke ntọn̄ọ ntọn̄ọ 1992 ke udọn̄ esie ke Ikọ Abasi ọkọkọri. Anie akaka ebịne Slobodan, onyịme ndikpep Bible ye enye? Ekedi Mujo, emi n̄ko okotode Bosnia edi emi ẹkebọkde nte owo Muslim. Nte ukpepn̄kpọ Bible akakade iso, Mujo ye Slobodan, emi inikiet ko ẹkedide mme asua, ẹma ẹsida ini ndidu ọtọkiet kpukpru usen ndisọn̄ọ mbuọtidem kiet eken.

Ekọn̄ oro ke akani Yugoslavia ama ada uwem ediwak tọsịn owo ke mme itie ikie. Edi Branko, Slobodan, ye Mujo idahaemi ẹnam utom nte mme ọkwọrọ eti mbụk uyọhọ ini ke ukem esop eke Mme Ntiense Jehovah. Mmọ ẹma ẹkan en̄wan ekpụk ye eke orụk ubọk, ndien idahaemi mmọ ẹyom emem ke adan̄aemi ẹsụkde ibuot ẹnọ Andibot, Jehovah.

Edi nso ikada mme utọ ukpụhọde oro idi? Ekedi ima oro mmọ ẹnyenede ẹnọ Jehovah, ukpono oro mmọ ẹnyenede ẹnọ Bible, ye ọkpọsọn̄ udọn̄ mmọ ndida akpanikọ Bible nsịn ke edinam ke uwem mmọ. Nte Edisana N̄wed Abasi ọdọhọde, “ikọ Abasi enyene uwem, onyụn̄ ananam n̄kpọ . . . onyụn̄ enyene ukeme ndidụn̄ọde ekikere ye uduak esịt owo.”—Mme Hebrew 4:12.

[Ikọ idakisọn̄]