Nte Afo Emeti?

Nte afo ama enen̄ede ọnọ ntịn̄enyịn ke mme nsiondi Enyọn̄-Ukpeme eke ndondo emi? Ke edide ntre, afo eyekụt nte edide inem inem n̄kpọ nditi se itienede emi:

▫ Nso idi n̄wọrọnda ukpụhọde ke ufọt owo ye mme unam?

Akpan ukpụhọde ọkọn̄ọ ke nte ẹkebotde, ukeme, ye nte mfre anamde utom. Ke unam ekpere ndidi kpukpru edinam mfre ẹdi se ẹma ẹketotịm ẹsịn ke se ẹkotde idahaemi ọniọn̄ eke ntụk. Emi idịghe ntre ye mme owo. Abasi ama ọnọ mme owo ukeme ndinam ubiere. (Mme N̄ke 30:​24-⁠28)​—⁠4/15, page 5.

▫ Nso udeme ke edikwọ ikwọ ekenyene ke utuakibuot temple nditọ Israel?

Ikwọ, akpan akpan mme ọkwọ ikwọ, ẹma ẹnyene akpan itie ke utuakibuot, ikenen̄ekede idi man ẹwụt mme akpan n̄kpọ ke Ibet, edi man ẹnam ẹnyene nnennen edu utuakibuot. Enye ama an̄wam nditọ Israel ndituak ibuot nnọ Jehovah ke spirit. (1 Chronicles 23:4, 5; 25:⁠7)​—⁠5/1, page 10, 11.

▫ Nso orụk ntịn̄enyịn ke nditọwọn̄ ẹyom toto ke uyen?

Mme ete ye eka ẹnyene ndinọ obufa nsekeyen ntịn̄enyịn ke ekperede ndidi kpukpru ini. Paul ekewet ete: “Toto ke uyen afo ama ọfiọk Edisana N̄wed Abasi, emi ekemede ndinam fi ọwọrọ ọniọn̄ ọbọ edinyan̄a.” (2 Timothy 3:15) Ntre ntịn̄enyịn oro otode ete ye eka oro Timothy ọkọbọde, idem toto ke uyen, ekedi ke uduot eke spirit n̄ko.​—⁠5/15, page 11.

▫ Nso idi uyarade inan̄ oro ẹwụtde nte ke Bible ọdọn̄ọ etop oro Abasi ọnọde ofụri ubonowo?

(1) Odu ekem. Bible odu ọnọ n̄kpọ nte mbahade 98 eke ikie ke otu mme andidụn̄ ke ererimbot. (2) Ekem ye mbụk. Bible ọdọn̄ọ mme mbụk akpanikọ, utu ke ndidi mme n̄ke oro owo mîkemeke ndisọn̄ọ. (3) Enyene ufọn. Mme ewụhọ ye mme edumbet esie ẹwụt usụn̄uwem oro adade ufọn ọsọk mbon oro ẹsọn̄ọde ẹmụm mmọ ẹkama. (4) Prọfesi. Enye edi n̄wed emi etịn̄de ọyọhọ ọyọhọ se iditịbede ke ini iso.​—⁠6/1, page 8, 9.

▫ Nso mbiomo isan̄a ye edidiọn̄ọ nnennen ido ukpono?

Ndondo oro nnyịn idiọn̄ọde nnennen ido ukpono, ana nnyịn ibọp uwem nnyịn ikanade enye. Enye edi usụn̄uwem. (Psalm 119:105; Isaiah 2:⁠3)​—⁠6/1, page 13.

▫ Ntak emi ọkpọkpọ ukpepn̄kpọ Bible edide ata akpan n̄kpọ-⁠ọ?

Oyom kpukpru ikọt Abasi ẹnam idatesịt ye odudu mmọ ẹfiak ẹdi obufa ke usen ke usen ebe ke ndiyom mbufa ye mme ntotụn̄ọ ikpehe akpanikọ eke Ikọ Abasi. Ke usụn̄ emi mmọ ẹyekop nduaidem ke n̄kan̄ eke spirit.​—⁠6/15, page 8.

▫ Nso ke ikọ oro “idiọkn̄kpọ” ọwọrọ nte ẹdade ke Bible?

Ke mme uduot ikọ edinam mmọ, mme ikọ Hebrew ye Greek oro ẹwakde ndida ke Bible ndida nnọ “idiọkn̄kpọ” ẹwọrọ “taba,” ke usụn̄ifiọk eke editaba m̀mê editre ndisịm utịtmbuba, nde, m̀mê se ẹkeketde. Akpa owo iba oro ẹma ẹduọ ẹkpọn̄ ndiwụt mbiet ubọn̄ Abasi, ẹtabade uduak oro ẹkebotde mmọ ke mbiet Abasi. Ke mme ikọ en̄wen, mmọ ẹma ẹnam idiọkn̄kpọ. (Genesis 2:17; 3:⁠6)​—⁠6/15, page 12.

▫ Ntak enen̄ede ọdiọk ndikot n̄wed mbon nsọn̄ibuot?

Ndusụk n̄wed mbon nsọn̄ibuot ẹkpep nsu ebe ke “nneminua” ye “ikọ abian̄a.” (Rome 16:17, 18; 2 Peter 2:⁠3) Kpukpru uwetn̄kpọ mbon nsọn̄ibuot ẹdi sụk nsụkuyo onyụn̄ akam anam idem emem owo. Idụhe n̄kpọ ndomokiet oro ọbọpde-bọp.​—⁠7/1, page 12.

▫ Ndi Greece ọkọtọn̄ọ ukara mbio obio?

Ke Greece eset, ukara mbio obio okodu ke edinam ke ibat ibat ikpehe obio ukara, ndien idem ke mme ikpehe ẹmi irenowo kpọt ẹkenam umekowo. Emi ọkọwọrọ nte ke mbahade inan̄ ke itie ition ke otu mme andidụn̄ iketieneke ibuana. Oro ọkọsọsọn̄ ndidi ukara ofụri owo m̀mê ukara mbio obio!​—⁠7/1, page 16.

▫ Nso isinam ndọ Christian enyene uforo?

Ke ini ebe ye n̄wan ẹkponode ekikere Abasi kaban̄a ndọ ẹnyụn̄ ẹdomode ndida mme edumbet Ikọ esie ndu uwem. (Ephesus 5:​21-⁠33)​—⁠7/15, page 10.

▫ Didie ke ukpepn̄kpọ ubon fo ekeme ndinyene inem?

Domo ndibuan kpukpru nditọ. Tie in̄wan̄în̄wan̄ nyụn̄ nọ nsịnudọn̄, otorode nditọ fo inem inem ke mmọ ndibuana. Kûkụre sụk ibuotikọ edi domo ndisịm esịt nditọ fo.​—⁠7/15, page 18.

▫ Nso ke ikọ oro ọwọrọ: “Ini mme owo ẹdọhọde ẹte, idu ke emem ye ifụre.” (1 Thessalonica 5:⁠3)

Tịmfiọk ete ke Bible idọhọke ke mme idụt ẹyenyene “emem ye ifụre.” Edi mmọ ke nsụhọde n̄kaha ẹditetịn̄ ẹban̄a oro ke n̄wọrọnda usụn̄, ẹnọde idotenyịn ẹnyụn̄ ẹnamde ẹnịm enye ke akpanikọ ke usụn̄ oro owo mîkonịmke ke mbemiso. Eyetie nte idotenyịn edinyene emem ye ifụre ekpere akan nte akanam edide.​—⁠8/1, page 6.

▫ Siak usụn̄ ita ẹmi Jehovah owụtde eti ibuot.

Jehovah omowụt nte enye eben̄ede idem ndifen nnọ owo. (Psalm 86:⁠5) Enye esinyịme ndikpụhọde se enye akaduakde ndinam nte mbufa idaha ẹdemerede. (Se Jonah, ibuot 3.) N̄ko, Jehovah omowụt eti ibuot esie ke nte enye akamade odudu. (1 Ndidem 22:​19-⁠22)​—⁠8/1, page 12-⁠14.