Mme Mbụme Ẹtode Mme Andikot
Sia Jesus okotode ubon Jesse ye David, ntak emi ẹkotde enye “orụn̄” mme eteete esie Jesse ye David?
Afo nte ido edide esikere aban̄a orụn̄ eto m̀mê mbiet nte etịbede mbemiso ekpat eto m̀mê mme n̄kọk eto. Ntre editie nte ẹtịn̄ ẹban̄a Jesse (m̀mê eyen esie David) nte orụn̄ emi Jesus ke akpatre ọkọwọrọde oto. Edi, Isaiah 11:10 ama ebemiso etịn̄ ete ke Messiah oro edidide edidi “orụn̄ Jesse,” ndien N̄wed Mbon Rome 15:12 ama emen prọfesi emi abuan ye Jesus Christ. Ke ukperedem Ediyarade 5:5 okokot enye “Lion emi otode ke esien Judah, kpa orụn̄ David.” Ntak ẹdu ẹnọ enyịn̄ ẹmi.
Bible esiwak ndida mbiet, utọ nte eto, nnam n̄kpọ an̄wan̄a. Ndusụk ini emi oto akpanikọ oro nte ke n̄kpasịp ama asiaha onyụn̄ ọkọri, orụn̄ ẹsibemiso ọkọri mbemiso mme akpan n̄kọk, mme n̄kọk eto eken, m̀mê mfri emi orụn̄ ẹmụmde ẹkama. Ke uwụtn̄kpọ, Isaiah 37:31 okot ete: “Ubak ufọk Judah emi ọbọhọde onyụn̄ osụhọde eyetọn̄ọ ntak omụm orụn̄ esie ke isọn̄, onyụn̄ on̄wụm idem ke enyọn̄.”—Job 14:8, 9; Isaiah 14:29.
Edieke afanikọn̄ osịmde orụn̄ oro, ofụri eto oro esitiene okop unọmọ oro. (Men Matthew 3:10; 13:6 domo.) Nte ekemde, Malachi ekewet ete: “Usen eke edidide eyeta mmọ, Jehovah mme udịm ọdọhọ, emi mîdisụhọke orụn̄ mîdinyụn̄ isụhọke n̄kọk inọ mmọ.” (Malachi 4:1) Se enye ọwọrọde an̄wan̄a—edisịbe mfep ofụri ofụri. Ẹyesịbe mme ete ye eka (mme orụn̄) ẹfep, ọkọrọ ye nditọ mmọ (mme n̄kọk).a Emi odori nsọn̄uyo ke akamba mbiomo oro mme ete ye eka ẹnyenede kaban̄a n̄kpri nditọ mmọ; ẹkeme ndidiọn̄ọ nsinsi ini iso n̄kpri nditọ ebe ke idaha oro mme ete ye eka ẹdade ke iso Abasi.—1 Corinth 7:14.
Ẹda mme ikọ oro ke Isaiah 37:31 ye Malachi 4:1 ẹto akpanikọ oro nte ke mme n̄kọk (ye mfri oro mme udiana n̄kọk ẹn̄wụmde) ẹnyene uwem mmọ ẹto orụn̄. Emi edi ukpọhọde ndidiọn̄ọ nte Jesus edide “orụn̄ Jesse” ye “orụn̄ David.”
Ke n̄kan̄ obụkidem, Jesse ye David ẹkedi mme eteete Jesus; mmọ ẹkedi mme orụn̄, enye edi nsehe m̀mê n̄kọk. Isaiah 11:1 eketịn̄ aban̄a Messiah oro edidide ete: “Nsehe kiet eyetịbe ke etak eto Jesse, n̄kọk eyenyụn̄ asiaha ke orụn̄ esie.” Kpasụk ntre, ke Ediyarade 22:16, Jesus okot idemesie “Eyen David.” Edi enye n̄ko okot idemesie ‘orụn̄ David.’ Ntak-a?
Usụn̄ kiet oro Jesus edide “orụn̄” Jesse ye David edi nte ke ebede ke enye udịm ubon mmọ osụk ododu. Idụhe owo ndomokiet mfịn oro ekemede ndisọn̄ọ ke imọ ito esien Levi, Dan, m̀mê idem eke Judah, edi nnyịn imekeme ndinịm ke akpanikọ nte ke udịm ubon Jesse ye David ke ododu koro Jesus ke odu uwem idahaemi ke heaven.—Matthew 1:1-16; Rome 6:9.
Jesus n̄ko ama ọbọ itie Edidem eke heaven ada. (Luke 1:32, 33; 19:12, 15; 1 Corinth 15:25) Emi enyene n̄kpọ ndinam ye itie ebuana esie idem ye mbon oro ẹkedide mme eteete esie. Ke edu ntịn̄nnịm ikọ, David okokot Jesus Ọbọn̄ esie.—Psalm 110:1; Utom 2:34-36.
Ke akpatre, ẹnọ Jesus Christ odudu nte Ebiereikpe. Ke Tọsịn Isua ẹmi ẹdide, mme ufọn ufak Jesus ẹyebe n̄ko ẹsịm Jesse ye David. Uwem mmọ ke isọn̄ ini oro edikọn̄ọ ke Jesus, emi edinamde n̄kpọ nte “Nsinsi Ete” mmọ.—Isaiah 9:6.
Mmọdo, okposụkedi Jesus okotode udịm ubon Jesse ye David, se enye akabade edi ye se enye edinamde anam enye odot ndidi se ẹkotde “orụn̄ Jesse” ye “orụn̄ David.”
[Mme Ikọ idakisọn̄]
a Uwetn̄kpọ itie ubụkowo mbon Phoenicia eset ama ada ukem ikọ emi. Enye ama etịn̄ aban̄a owo ekededi oro okụbọrede udi ete: “Akpakam mmọ inyeneke orụn̄ ke isọn̄ m̀mê ndinyene mfri ke enyọn̄!”—Vetus Testamentum, April 1961.
[Ebiet Ẹdade Ndise Ẹto ke page 31]
Pictorial Archive (Near Eastern History) Est.