Sụn̄sụn̄ Ido
IFỤRE ifụre ido, eke n̄kohodeidem m̀mê ntan̄idem mîdụhe. Ido n̄kan̄ ekikere oro anamde owo ekeme ndiyọ mfiomo ye ime ye unana ediyat esịt, editọhọ utọk, m̀mê uduakesịt edisio usiene. Enye edi ata n̄kpet n̄kpet nsan̄a, owo inyụn̄ iwakke ndikụt nte adianarede ọkpọn̄ utọ nti edu eken nte nsụhọdeidem, nsụkesịt, ye sụn̄sụn̄ edu. Ikọ Hebrew oro ẹkabarede “sụn̄sụn̄” (ʽa·naw΄) oto orụn̄ esie oro ʽa·nah΄, emi ọwọrọde “sụk esịt, sụhọde idem, sụhọde nnịm.”
Ke Bible, ẹsọn̄ọ ẹtịn̄ ẹban̄a sụn̄sụn̄ ido nte edu n̄kan̄ ekikere eke owo, akpa kan̄a, kaban̄a Abasi, ndien kaban̄a ekemmọ edibotn̄kpọ. Ke uwụtn̄kpọ, ẹwet ẹte: “Ndien mbon nsụkesịt (“sụn̄sụn̄ ido,” NW) ẹdara Jehovah.” (Isaiah 29:19) Ẹkeme ndikpep mbon oro ẹnyenede sụn̄sụn̄ ido n̄kpọ—Jehovah “eyekpep mmọ eke ẹnyenede sụn̄sụn̄ ido usụn̄ esie” (Psalm 25:9, NW)—mmọ ẹyenyụn̄ ẹnyịme ndibọ ntụnọ oro otode ubọk Abasi, okposụkedi emi esidide ubiak ubiak n̄kpọ ke ini ẹnọde. (Mme Hebrew 12:4-11) Sụn̄sụn̄ ido anam owo ebet Jehovah ndinen̄ede ukwan̄ edinam ye afanikọn̄ oro ẹsobode nte mîdotke, utu ke ndikabade mfiop ye iyatesịt. (Psalm 37:8-11) Mme utọ owo oro isikwe edikpu, koro enyeemi Jehovah emekde, kpa ‘nsehe etak eto Jesse,’ eyenen̄ede n̄kpọ onịm ke edinen ido ọnọ “sụn̄sụn̄ mbio isọn̄.”—Isaiah 11:1-4.
Moses
Moses ekedi kpa utọ owo oro, “e[ke]di sụn̄sụn̄ owo, akan kpukpru owo ẹmi ẹdude ke iso ererimbot,” kpa owo emi ekekemede ndiyọ nsụkuyo ye unana utọk. (Numbers 12:3) Idaha ẹtịn̄de ẹban̄a sụn̄sụn̄ ido esie mi ekedi ke ini Miriam ye Aaron ẹkekụnide n̄kụni ẹban̄a Moses. Ke ata idem-n̄kpọ, ekedi nsụkuyo oro ẹkesụkde Jehovah nte mîdotke emi enye okonyụn̄ ọsọpde ọfiọk aban̄a onyụn̄ asuade ọnọ.—Numbers 12:1-15.
Ndusụk mme atatikọ edọhọ ẹte ke Moses ndikewet n̄kpọ emi mban̄a sụn̄sụn̄ ido esiemmọ ekedi editoro idemesie ke usụn̄ oro mînenke. Mbon nsụkuyo eken ẹdọhọ ke edi owo efen akadian utịn̄ikọ emi ke ukperedem, ke adan̄aemi mmọ eken ẹsiode emi ẹwụt nte uyarade nte ke idịghe Moses ekewet Akpa N̄wed Ition eke Bible. Nte ededi, Commentary eke Cook etịn̄ aban̄a mme ikọ ẹmi ete: “Ke ini nnyịn idade mmọ nte edi Moses eketịn̄ ke idịghe ‘proprio motu [eke idemesie],’ edi ke idak ndausụn̄ Edisana Spirit emi okodorode enye (cf. xi. 17), mmọ ẹwụt edu ‘unana asari,’ emi edide n̄kpọ ntiense inikiet ọnọ edidi akpanikọ mmọ n̄ko ye ikọ ẹmi, n̄ko nte edide ye mme udọn̄ikọ emi Moses ke in̄wan̄în̄wan̄ ewetde aban̄a ndudue esiemmọ (cf. xx. 12 sqq.; Ex. iv. 24 sqq.; Deut. i. 37), kpa mmemmem ido owo emi eketiede ntiense aban̄a idemesie, edi mîketiehe inọ idemesie (cf. St Matt. xi. 28, 29). Ẹsịn ikọ ẹmi ndinam an̄wan̄a nte Moses mîkanamke n̄kpọ baba kiet nditoro idemesie, ye ntak emi nte utịp, Ọbọn̄ ekesịnde ubọk ata usọp usọp.”
Jesus Christ
Jesus ama owụt sụn̄sụn̄ ido ke ndiyọ kpukpru orụk mfiomo ye unana nsụkuyo, idem ayakde idemesie ọnọ ẹda ẹka ẹkewot nte eyenerọn̄ ye unana edikûbọde inua esie mfan̄a mfan̄a. (Philippi 2:5-8; Mme Hebrew 12:2; Utom 8:32-35; Isaiah 53:7) Andikpon-n̄kan-Moses emi n̄ko ama ayarade idemesie owụt mbon en̄wen nte enyeemi enyenede sụn̄sụn̄ m̀mê ifụre ifụre ido. (Matthew 11:28, 29, AS, KJ, ED, NW, Ro) Nte Isaiah 61:1 ekebemde iso etịn̄, ẹma ẹyet enye aran ke spirit Jehovah ‘ndibụk eti mbụk nnọ mbon nsụkesịt (“sụn̄sụn̄ ido,” NW).’ Ke ama okokot prọfesi emi okụre ke synagogue eke obio emana esie ke Nazareth, Jesus ama ọdọhọ ete: “Ikọ n̄wed Abasi emi omosu ke utọn̄ mbufo mfịn emi.” (Luke 4:16-21) Ke ndisio edima Eyen esie ndọn̄ ntre ete edikpep mbon o-sụn̄sụn̄ ido aban̄a edinyan̄a, Abasi ke akpanikọ okowụt mmọ ata san̄asan̄a mfọn.—Psalm 149:4; Mme N̄ke 3:34.
Ada Mme Ufọn Edi
Ikot oro prọfet Zephaniah ọkọnọde osụk ododu ọnọ sụn̄sụn̄ mbio isọn̄ ete: “Mbufo kpukpru sụn̄sụn̄ mbio isọn̄ ẹmi ẹnamde ikpe esie, ẹyom Jehovah; mbufo ẹyom edinen ido, ẹyom sụn̄usụn̄ ido [m̀mê, nsụkesịt; nsụhọdeidem] m̀mê mbufo ẹyedịbe ke usen iyatesịt Jehovah.” (Zephaniah 2:3,ikọ idakisọn̄) Okon̄de akan onyụn̄ akade anyan akan oro edi mme utịbe utịbe un̄wọn̄ọ ẹnọde utọ mbon oro. Ke uwụtn̄kpọ: “Mbon nsụkidem ẹyeda isọn̄ ẹnyene; ediwak emem eyenyụn̄ enem mmọ esịt.” (Psalm 37:11) Ke n̄kan̄ eke spirit ye ata ata idem-n̄kpọ, “mbon nsụkidem (“sụn̄sụn̄ ido,” NW) ẹyedia ẹyụhọ.”—Psalm 22:26.
Ntre, ke okpụhọrede ye mme idiọkowo ẹmi ẹdade mbon o-sụn̄sụn̄ ido ẹtụn usụn̄ ẹnyụn̄ ẹyomde ndisobo mmọ (Amos 2:7; 8:4), Jehovah esikpan̄ utọn̄ ke udọn̄ ofụri esịt mmọ ke ndiyere akam mmọ; idotenyịn mmọ ke Jehovah ikpaha mfụhọ. (Psalm 10:17; 9:18) Emi edi n̄ke akpanikọ, “Ọfọfọn ndisụk esịt ye mbon ukụt (“mbon o-sụn̄sụn̄ ido,” NW), n̄kan ndideme mbụme ye mbon iseri.”—Mme N̄ke 16:19.