Eto Ndutụhọ

Utọ n̄kpọ nte enyeoro Jesus Christ akakpade ke edikọn̄ [enye] ke eto. (Matthew 27:32-40, NW; Mark 15:21-30, NW; Luke 23:26, NW; John 19:17-19, 25, NW) Ke ata usem Greek, ikọ oro (stau·ros΄) emi ẹkabarede “eto ndutụhọ” ke New World Translation enen̄ede ada ọnọ nnennen eto, m̀mê ọsọp-iso eto, ndien uyarade ndomokiet idụhe nte ke mme andiwet N̄wed Abasi mme Christian usem Greek ẹma ẹda enye ndida nnọ eto oro enyenede mbiọn̄ iba.

N̄wed oro The Non-Christian Cross, emi John Denham Parsons ewetde, ọdọhọ ete: “Idụhe udịmikọ ndomokiet ke otu ediwak uwetn̄kpọ oro ẹnamde Obufa Testament, emi, ke akpa usem Greek, enyenede idem uyarade oro mîdịghe in̄wan̄în̄wan̄ nte ke stauros oro ẹkekamade ke n̄kan̄ Jesus ekedi efen akan ikpîkpu stauros; m̀mê ndikpọdọhọ nte ke enye ikedịghe ibio ekpat eto kiet, edi ke ekedi mbio iba ẹkọn̄de ẹdian kiet ke uduot cross. . . . emi idịghe ekpri n̄kpọ abian̄a ke n̄kan̄ mme andikpep nnyịn ndikabade ikọ oro, stauros nte ‘cross’ ke ini ẹkabarede mme uwetn̄kpọ Ufọkederi usem Greek ẹsịn ke usem emana nnyịn, ndinyụn̄ nsọn̄ọ edinam oro ke ndisịn ‘cross’ ke n̄wed ukabadeikọ nnyịn nte se stauros ọwọrọde ye unana editịm nnam an̄wan̄a nte ke oro ke usụn̄ ndomokiet ikedịghe se ikọ oro ọkọwọrọde akpa ke eyo mme Apostle, ikonyụn̄ ikabakede idi akpan n̄kpọ oro enye ọwọrọde tutu ke anyanini ama ekebe, ndien akakabade edi ntre, ke edide ama akam ededi, n̄kukụre koro, kpa ye unana uyarade oro enyenede nsọn̄ọ, ekedi ke ndusụk ntak mîdịghe ndusụk owo ẹkekere ẹte ke stauros emi ẹkedade ẹwot Jesus ama enyene uduot enyeoro.”—London, 1896, pp. 23, 24.

Ntak Akanade Jesus Akpa ke Eto

Ke ini oro Jehovah ọkọnọde nditọ Israel ibet esie, mmọ ẹma ẹdori idemmọ mbiomo edinịm se enye esịnede. (Exodus 24:3) Nte ededi, nte nditọ anam-idiọkn̄kpọ Adam, mmọ ikekemeke ndinam ntre ke mfọnmma usụn̄. Ke ntak emi mmọ ẹma ẹdidu ke idak isụn̄i Ibet. Man ẹdorode mmọ san̄asan̄a isụn̄i emi ẹfep ke idem, ẹkenyene ndiyịri Jesus ke eto nte abiatibet emi ẹsuenede. Kaban̄a emi apostle Paul ekewet ete: “Kpukpru mmọ eke edinam utom ibet ẹdu ke idak isụn̄i: koro ẹwetde ẹte, Ọdọdiọk ọnọ kpukpru owo ẹmi mîyịreke ke kpukpru mme item eke ẹwetde ke n̄wed ibet, ite inịm mmọ. . . . Christ akafak nnyịn osio ke isụn̄i ibet emi odorode nnyịn, sia Enye amakabade edi n̄kpọ ke ibuot nnyịn; koro ẹwetde ẹte, Owo eke ẹyịride ke eto edi n̄kpọ isụn̄i Abasi.”—Galatia 3:10-13.