Ndida Un̄wana Nsịm Mme Nsannsan Ebiet ke Bolivia
N̄KOKON̄ ikpọ obot edem edere ye edem usiahautịn eke Bolivia ẹnyanade ẹna ke unaisọn̄ unaisọn̄ ikpehe ufiop isọn̄, ọyọhọde ye nsehe ikọn̄. Inyan̄ emi mînaha sụn̄, oro ewetde ebe ke akai ye unaisọn̄ oro ọyọhọde ye mbiet abaharede mmọemi. Ndikwọrọ eti mbụk Obio Ubọn̄ ke mme utọ nsannsan ebiet oro etie didie?
Kere nte afo ekpesịnede ke esịt akamba ubom, oro ẹdade akamba ekpat eto etịbi, oro ẹnyụn̄ ẹsịnde engine ke edem esie ẹwat. Emi ekedi se mme asan̄autom uyọhọ-ini itiokiet ẹtode Trinidad ẹkesobode, kpa obio oro odude ke n̄kan̄ ikpehe El Beni ke Bolivia. Mmọ ẹkediomi isan̄ emi man mmọ ẹkpekeme ndinọ ikọ ntiense ke mme ebietidụn̄ mbeninyan̄ oro akananam owo mîdaha ‘eti mbụk Obio Ubọn̄’ ikosịm. (Matthew 24:14) Ke ẹma ẹkewat ẹbe ata ntatara nsemnsem akpammọn̄, ubom mmọ ama ọtọn̄ọ ndiwat ndụk ekpri idịm ke n̄kan̄ Akpa Mamoré.
Owo kiet ke otu oro obụk ete: “Akayak esisịt nnyịn ndisịm Mamoré ke ini nnyịn ikedide ididiọn̄ọ ite ke akpatre usụk idịm oro ama asat. Ke iwọn̄ọde ke ubom, nnyịn ima ifiọhọ idem nnyịn ibụhọde ke okpụk oro akadiade nnyịn osịm ifụhi! Ke ndidomo ndibụhọde, n̄wan mi ama ọduọk ikpaukot esie. Edi ye un̄wam mme andisan̄a mbe, nnyịn ima ikeme ndinụk ndodobi ubom oro nsio ke mbat ndori ke ata nsatisọn̄. Ke ọkpọsọn̄ utom ediwak hour ama okokụre, nnyịn ima isịm Mamoré.
“Nnyịn ndien ima iwat emem emem ika enyọn̄ enyọn̄ akpa, emi n̄kokon̄ mbeninyan̄ oro ọyọhọde ye nsehe ikọn̄ okodude ke nnasia ye ufien. Ke ẹkopde uyo engine oro, ikpọ ikụtinyan̄ ẹma ẹdon̄o ke mbio eto ẹmi ẹkefiọrọde ke enyọn̄ ẹdụk mmọn̄, ke adan̄aemi ndiye okụn̄abak ke ndusụk ini ẹketopde idem mmọ ẹsion̄o ke mmọn̄. Eboho nsụn̄ikan̄ otode ikan̄ oro ẹkebarade ke mbenesụk ndida mbịn n̄kpọ-nta okowụt akpa ebiet oro idituakde ida. Ke ima ikeyịri ubom nnyịn ke etuek n̄kọk eto, nnyịn ima ineme nneme ye mme owo oro ẹketiede ufan ufan mi iban̄a mme edidiọn̄ Obio Ubọn̄ oro ẹdide. Ke ndiwụt inemesịt mmọ ẹma ẹbiom mfri ye nsenunen ẹsọk nnyịn.
“Nte n̄kụteyo ekedide, nnyịn ima iwaha mme itie efen man itọ n̄kpasịp akpanikọ. Eyo ama okụt nnyịn itisịm San Antonio. Mbio obio-in̄wan̄ oro ẹma ẹdụk idap. Kpa ye oro, nte mbụk akasuanade nte ke ẹmọn̄ ẹwụt ndise, ẹma ẹtọn̄ọ ndidomo utuenikan̄. Ẹma ẹyịri ukpatn̄kpọ ke edem enan̄-mbakara man ẹmen n̄kpọduoho nnyịn ẹdụk obio. Ediwak owo ẹma ẹkabade ẹmehe ye Mme Ntiense Jehovah ebe ke ndise ye ata edisosobo.
“Ke ndan̄nsiere nnyịn ima ikaiso ndiwaha n̄ka mbufa ebiet. Ke n̄kokon̄ mbenesụk kiet, iban ke ẹkeyet ọfọn̄ mmọ, ye idem nsekeyen, ke ata ikpọ ikpọk ikụtinyan̄. Akananam mmọ ikopke etop Bible nnyịn. Ke ebiet kiet n̄kpri iyak ẹma ẹfrọ ẹwọrọ ke mmọn̄ ẹkpere ubom oro, ndien ediwak ẹma ẹfrọ ẹdụk esịt ubom. Ntre ke ima ikowụt ndise oro ima, nnyịn ima ita ufafran̄ iyak mbemiso iduọkde odudu. Ke utịt isan̄ oro, ima inịm ekese n̄wed ke nsannsan ebiet emi, ndien nnyịn ima ikop uyụhọ ke ndikan̄wam ediwak owo ẹkop eti mbụk nte akpa ini.”—Men Rome 15:20, 21 domo.
Uyarade Ndausụn̄ Angel
Kụt idemfo idahaemi ke isan̄ eyenutom oro akade ndiyom owo kiet ke obio oro enyenede owo 12,000, emi afo akade nte akpa ini. Udiọn̄ọke n̄kpọ ndomokiet uban̄a enye ibọhọke enyịn̄ esie. Oro ekedi n̄kpọ-ata akanade ke iso asan̄autom uyọhọ-ini iba ẹmi ẹkebehede ke Guayaramerín, ẹdoride enyịn ndikụt owo oro ke mbemiso ekesikpepde Bible onyụn̄ odụkde mme mbonoesop ke obio efen ndien ekem ọwọrọ aka obio emi. Ke ẹma ẹkenam idụn̄ do, ebe ye n̄wan ẹdide mme asiakusụn̄ mi ẹma ẹbiere ndinam isan̄ ubọ ofụm nsụhọde ke efakurua, emi otu mme owo ẹkebohode ke okpokoro ẹdia udia m̀mê ẹnemede nneme. Ke ata ndondo oro, eren kiet ama asan̄a ekpere ebe ye n̄wan oro onyụn̄ ọtọn̄ọ nneme. Mmọ ẹma ẹbụp enye m̀mê enye ọdiọn̄ọ n̄wan oro mmimọ iyomde. Enye ọkọdọhọ, “Baba, edi eka-anwan mi edi kiet ke otu Mme Ntiense Jehovah.” Sia ẹkediọn̄ọde ẹte ke owo Ntiense ndomokiet idụhe ke obio oro, mmọ ẹkekere ke ekeme ndidi n̄kpọ emi otịmede enye.
Nte ededi, ke ndan̄nsiere mmọ ẹma ẹkese akanian̄wan emi, oro mîkekemeke ndikpọn̄ bed ke ntak okobụn̄de ukot. N̄wan emi ọkọdọhọ ete, “Ami ndi kiet ke otu Mme Ntiense Jehovah, edi ami nnaha baptism kan̄a.” Ke ẹbụpde m̀mê anie ekekpep enye akpanikọ, enye ama anyan ubọk ke ndise adiaha eyeyen esie ke ibibene onyụn̄ ọdọhọ ete: “Enye ekekpep mi.” Mmọ ikekemeke ndinịm se mmọ ẹkekụtde! Enye ekedi eyenan̄wan oro mmọ ẹkeyomde! Mmọ ẹma ẹbụp ẹte, “Ntak emi ebe-eyen fo ọkọdọhọde ke imọ idiọn̄ọke enye?” Akanian̄wan emi ama ọbọrọ ete, “Oh, enye ọdọ ndọ idahaemi, ndien ebe-eyen mi ọdion̄ọ enyịn̄ ndọ esie kpọt.” Adiaha eyeyen esie emi ikodụhe ke ufọk ini oro, edi otode ke leta ẹma ẹsinịm ukpepn̄kpọ Bible ke oro ebede. Utịp-e? Eyenan̄wan emi ye ekaeka esie ẹma ẹkọri ẹkesịm idaha edina baptism. Ufọk mmọ ke ẹkeda nte Ufọkmbono Obio Ubọn̄ ẹnọ esop oro ọkọride-kọri, ndien nte asan̄autom uyọhọ-ini, akparawa an̄wan emi omodụri ediwak owo owụt esop Jehovah.
Ndikwọrọ Ikọ ke Ufọt Ufọt N̄kan̄ Ufiop Eyo
N̄ko, kere nte ubomofụm mbufo ọduọde ke an̄wa ubomofụm oro etiede mbiet mbiet ke San Joaquín, ke esịt esịt ufiop idụt mbon Bolivia. Ekikere fo inaha sụn̄ ke ini ekerede aban̄a mbuka mbuka udọn̄ọ oro, isua iba ke mbemiso, ọkọsọhide mbahade kiet ke itie ition ke otu mbio obio emi efep.
Ebe ye n̄wan ẹdide mme asiakusụn̄ oro ẹtode Trinidad ẹdibehe ke ubomofụm mi ẹma ẹnyenyene ifiọk ẹban̄a mfọnido mme owo ẹmi. Ebe obụk ete: “Nneme a-Bible oro ikenyenede ke isan̄ ubomofụm nnyịn ama ada okosụn̄ọ ke owo ndinọ nnyịn ikot ndikodun̄ ke ufọk esie, ke ata mfọn. Mme enyeneufọk oro nnyịn ikodude ẹma ẹkam ẹsinọ nnyịn udia ke usụhọde ekọmurua, anamde nnyịn isiyak ofụri ini nnyịn isịn ke utom ukwọrọikọ. Ibịghike ke ima ikebehe do, ẹma ẹdọhọ nnyịn isịm an̄waekọn̄ usọp usọp. Ke ini akamba owoekọn̄ oro ọkọdiọn̄ọde ete ke nnyịn idịghe mbon ukpụhọ ukara edi ke idi Mme Ntiense Jehovah, enye ama owụt esen esen udọn̄ onyụn̄ ọbọ Bible, ye n̄wed ukpep Bible onyụn̄ otobo Enyọn̄-Ukpeme ye Awake! Ke oro ebede, ayak esisịt ndidi kpukpru owo ke obio ẹma ẹnọ ọyọhọ n̄kpan̄utọn̄ ke un̄wọn̄ọ Bible oro aban̄ade mfọnmma nsọn̄idem ke n̄kpet n̄kpet ini iso.”—Ediyarade 21:4.
Asan̄autom uyọhọ-ini inan̄ ẹma ẹyom ndito ke San Joaquín n̄ka San Ramón, edi n̄kukụre usụn̄ ukaisan̄ oro okodude ekedi ukpatn̄kpọ oro enan̄ odụride. Katọn n̄wed ke mmọ ẹkeda nte n̄kpọitie. Ibighike katọn ẹmi ẹma ẹnuaha ke ntak edituak ye ọkpọsọn̄ nnyen̄e ukpatn̄kpọ emi, ye n̄kokon̄ wheel eto esie. Isiọn̄ ama akam oyụt unen ẹmi ẹkedọn̄ọde ke esịt ukpatn̄kpọ oro.
Ke ẹma ẹkesan̄a hour duop ẹbe ke nsesịre ikọt, mmọ ẹma ẹsịm ebiet oro idiọn̄ọ ndomokiet mîkodụhe ke usụn̄, ndien eyo ama ọtọn̄ọ ndikụt. Andiwat ama anam ndịk omụm otuowo oro ke ndidọhọ, “N̄kere ke nnyịn imosop usụn̄!” Mmọ ke ẹketọn̄ọ ndinyịk ẹte, ‘Nnyịn ikpasan̄a didie ididu ke nsesịre ikọt emi ọyọhọde ye urụkikọt ye ata ndiọi unam mi?’ etise andiwat oro ama adian ete, “Edi ẹkûfịna idem. Enan̄ ẹmi ẹsika isan̄ emi mbemiso.” Ntre ke ekedi. Ke n̄kpọ nte hour kiet mmọ ẹma ẹwọn̄ọ ke nsesịre ikọt oro ẹdụk San Ramón!
Mi, n̄ko, ẹma ẹbiat ediwak usen ke nditọt Paradise oro edide nnọ mbon oro akananam mîkopke iban̄a enye. Owo Ntiense ndomokiet ikodụn̄ke mi; edi n̄kpọ ama otịbe emi okokpụhọde oro.
Isụn̄utom Catholic kiet ama esisan̄a ye Mme Ntiense nte mmọ ẹkesidụkde enyịnusụn̄ ke enyịnusụn̄. Nte ededi mmọ ẹma ẹbe usụn̄ ẹnyụn̄ ẹkekụt enye ke ufọk efen oro mmọ ẹkekade. Ke ẹdude ke n̄kpaidem ke ntak ido ufan ufan esie, mmọ ẹma ẹnọ enye n̄wed oro Akpanikö oro Adade osim Nsinsi Uwem. Okposụkedi enye ke idemesie mîkenyeneke ata udọn̄, enye ama ọkpọn̄ n̄wed oro ọnọ eyeneka ebe esie, oro okokotde se isịnede ke esịt n̄wed oro, akaiso ndikpep, ndien nte ini akade akabade edi owo Ntiense oro anade baptism.
Afanikọn̄ ke Inyan̄ N̄kan̄ Ufiop Isọn̄
Idahaemi kụt idemfo nte ọbọide ubom ke enyene-ndịk, mmọn̄ oro mînana sụn̄. Ikpọ itiat oro ẹdịbede, okpụk okpụk mbenesụk, ye mme ekpat eto, ọkọrọ ye ikpọ esịk ẹdi kpasụk ifan̄ ke otu n̄kpọ afanikọn̄. Asat, edidịm, ye ukpam ẹyọyọhọ mmọn̄ ẹmi. Mme n̄kpọ ntre ẹkedi n̄kpọ-ata oro nditọete ẹkesobode ke Riberalta, ẹmi ẹkenyenede utom edida ikọ ntiense nsọk mme andidụn̄ ke mbeninyan̄ obio oro.
Man ẹsịm mme nsannsan ebiet ẹmi, mmọ ẹma ẹbọp ekpri ubom ẹkotde Luz de los Ríos (Un̄wana Inyan̄). Ke ini edidi esenyịn district ye circuit, ẹma ẹbiere ẹte ẹmen ekpri ubom emi ẹkedomo ẹse ke inyan̄. Kpukpru n̄kpọ ẹma ẹsan̄a nte ọfọnde tutu ini ubom oro akafahade ke n̄kọk eto oro eketeherede. Ọkpọsọn̄ usọp mmọn̄ ama odụri ekpri ubom oro adian ke eto kiet oro ọkọduọde. Ukem nte ofụt, ọsọbọ-iso ibio n̄kọk eto ama okịm n̄kan̄ ubom oro—akayak esisịt ndikịm n̄wan esenyịn district! Mmọn̄ ama odụk esịt, ndien ekpri ubom oro ama ọwọn̄ọde okûbọ, osion̄ode mbon esan̄ esie ọduọn̄ọ ke usọp usọp mmọn̄ oro. Ndien esenyịn district ye n̄wan esie ikekemeke ndiwọk! Ye un̄wam mbon oro ẹkekemede ndiwọk, mmọ ẹma ẹkesịm obot ke ifụre. Edi ekpri ubom oro ama osop ata ofụri ofụri. Ke ediwak usen ẹma ẹkebe, ẹma ẹfiọhọ enye ke n̄kpọ nte itiat ita ke usụk usụk idịm oro. Kpukpru n̄kpoduoho, ẹsịnede katọn n̄wed 20, ẹma ẹtak.
Mbon Ekọn̄ Mmọn̄ Bolivia ẹma ẹn̄wam ndidụri enye nsio, ndien ke ẹma ẹkeda ediwak urua ẹdiọn̄, ekpri ubom oro ama afiak odu ke mben̄idem ndikụre akpa isan̄ esie. Ọkpọsọn̄ isan̄ emi ọkọtọn̄ọ ye idiọk enyọn̄ ye mfịna engine.
Akpa itie oro nditọete ẹmi ẹkeyịride ubom, otu mme Ọkwọrọikọ ẹma ẹdisobo ye mmọ, ẹmi ẹkesakde mmọ nsahi ẹte: “Ekpri ubom mbufo ifọnke ke inyan̄ emi!” Ukeme ndiwụt ndise slide ama okpu ke ntak idiọk ukwak unọ-ikan̄. Ke ẹfiakde ẹtọn̄ọ uwat ke inyan̄ oro, Mme Ntiense oro ẹma ẹfiọk ẹte ke n̄kpri ubom eken ẹma ẹsan̄a ye obukpon̄ utịn̄ikọ ẹdi, ẹdụride mme owo utọn̄ ẹban̄a edide “mme prọfet abian̄a.” Nte an̄wan̄ade, mme Ọkwọrọikọ oro ẹkenam emi. Nte ededi, oro akakam ededemede udọn̄ mme owo.
Okposụkedi isan̄ emi eketrede nsunsu utịn̄ikọ eke mme prọfet abian̄a oro, nditọete oro ẹkesụk ẹkekop nyekidem, koro mmọ ẹkesụk ẹnyenede ndinam isan̄ usen 21 nsịm Fortaleza.
Ke usụn̄ isan̄ oro, mmọ ẹma ẹnọ ọbọn̄ obio nsannsan ekpụk oro ikọ ntiense; enye ama ọnọ ọyọhọ n̄kpan̄utọn̄. Ebede ke utịn̄ikọ Bible oro kiet ke otu mme asiakusụn̄ ọkọnọde, ẹma ẹda ata idotenyịn mme akpan̄kpa ẹdọn̄ otu mbon ntuan̄a esịt ke ana-in̄wan̄ nsannsan ebiet oro. Akani eren kiet ye afia anyan ntan̄ebek ama owụt esịtekọm esie, ndien enye ama obụp nte imọ ikpekemede nditobo magazine nnyịn ke isua duop! Ke Fortaleza, owo 120 ẹma ẹdia ufọn ẹto ndutịm usio ndise slide N̄ka oro.
Mme asiakusụn̄ ẹmi ẹkekop uyụhọ didie ntem ke ndikada un̄wana nsịm mme nsannsan ebiet! Ke akpanikọ, usụn̄ ifụre ye uyụhọ ndomokiet idụhe aba oro owo ekemede ndida uwem esie nnam n̄kpọ akan ndinam n̄kpọ Andibot uwem ke idemesie, kpa Jehovah Abasi.—Psalm 63:3, 4.
[Ndise obio/Mme ndise ke page 26]
(Ama oyom ndikụt nte enye enen̄erede etie, se n̄wed)
BOLIVIA
Guayaramerín
Riberalta
Fortaleza
San Joaquín
San Ramón
Trinidad
San Antonio