Ntak Utuakibuot Christian Ọfọnde Akan
Mme Akpan N̄kpọ Ẹtde Mme Hebrew
JEHOVAH ABASI ama ọtọn̄ọ mfọnn̄kan ikpehe utuakibuot ke ini enye ọkọnọde Eyen esie, Jesus Christ, edi isọn̄. Oro ekedi ntre koro Jesus, Anditọn̄ọ Ido Ukpono Christ, okpon akan mme angel ye prọfet Moses. Itie oku Christ ototịm ọfọn akan ke ẹmende ẹdomo ye eke mme Levi ke Israel eset. Ndien uwa Jesus ọfọn ata etieti akan eke mme unam oro ẹkesiwade ke idak Ibet Moses.
Ẹnam akpan n̄kpọ ẹmi ẹn̄wan̄a ke n̄wed ẹkenọde ẹsọk Mme Hebrew. Nte an̄wan̄ade edi apostle Paul ekewet enye ke Rome n̄kpọ nte 61 C.E. onyụn̄ ọnọ ẹsọk mme andinịm ke akpanikọ ẹkedide mbon Hebrew ke Judea. Toto ke eset, mme Christian ẹdide mbon Greek ye mbon Asia ẹma ẹnịm ẹte ke Paul ekedi andiwet, ndien editịm mmehe emi andiwet ekemehede ye N̄wed Abasi eke usem Hebrew ye enye ndikama mbufiọk usụn̄ utịn̄ikọ, emi edide ido apostle oro, ọsọn̄ọ emi. Ekeme ndidi enye eketre ndisịn enyịn̄ esie ke ntak usua oro mme Jew ẹkesuade enye ye ke ntak ẹkediọn̄ọde enye nte “apostle mme Gentile.” (Rome 11:13) Idahaemi ẹyak nnyịn itịm idụn̄ọde mfọnn̄kan mme ikpehe Ido Ukpono Christ, nte ẹyararede ke n̄wed emi Paul ekewetde ọnọ ẹsọk mbon Hebrew.
Christ Okpon Akan Mme Angel ye Moses
Se ẹbemde iso ẹwụt edi n̄kokon̄ idaha Eyen Abasi. (1:1–3:2) Mme angel ẹtuak ibuot enọ enye, ndien itie esie nte edidem onyụn̄ odu ye Abasi. Mmọdo akpana nnyịn inọ n̄kpan̄utọn̄ okpon akan nte esidide ke se Eyen etịn̄de. Akande oro, nnyịn ikpenyene nditi nte ke okposụkedi Jesus ọkọsụhọrede akan mme angel, ẹma ẹmenede enye okon̄ akan mmọ ẹnyụn̄ ẹnọ enye ofụri odudu ndikara ererimbot oro edide.
Jesus Christ n̄ko okpon akan Moses. Didie ke edi ntre? Ọfọn, Moses ekedi sụk asan̄autom ke ufọk Abasi eke nditọ Israel. Nte ededi, Jehovah ama onịm Jesus ndikara ofụri ufọk oro, m̀mê esop ikọt Abasi.
Mme Christian Ẹdụk Nduọkodudu Abasi
Ekem apostle oro osio owụt nte ke ẹkeme ndidụk ke nduọkodudu Abasi. (3:7–4:18) Nditọ Israel oro ẹkesiode ke itie ufụn eke Egypt ẹma ẹkpu ndidụk sia mmọ ẹketụtde utọn̄ ẹnyụn̄ ẹnanade mbuọtidem. Edi nnyịn imekeme ndidụk ke nduọkodudu oro edieke inyenede mbuọtidem ke Abasi inyụn̄ itienede Christ ke n̄kopitem. Adan̄oro, utu ke ndinịm sụk Sabbath eke urua ke urua, nnyịn ke usen ke usen iyedara mfọnn̄kan edidiọn̄ edinyene nduọkodudu mbọhọ kpukpru utom ibụk.
Ndidụk ke nduọkodudu Abasi edi un̄wọn̄ọ kiet ke ikọ esie, emi “ọsọp[de] akan kpukpru ofụt iso iba, okịm abahade ukpọn̄ ye spirit.” Enye esinam ntre sia enye esisụhọrede odụk esịt man ọfiọk uduak ye edu, man abahade mme udọn̄ obụkidem ye ekikere esịt. (Men Rome 7:25 domo.) Edieke “ukpọn̄” m̀mê uwem nnyịn nte owo kiet kiet, ọyọhọde ye edu “spirit” m̀mê ekikere Abasi, nnyịn imekeme ndidụk ke nduọkodudu Abasi.
Itie Oku ye Ediomi oro Ọfọnde Akan
Ekem Paul ama owụt nte itie oku Christ ye obufa ediomi ọfọnde akan. (4:14–10:31) Jesus Christ emi mînyeneke idiọkn̄kpọ owụt anam-idiọkowo mbọm koro, ukem nte nnyịn, ẹma ẹdomo enye ke kpukpru usụn̄. Akande oro, Abasi ama emek enye ndidi “oku ke nsinsi nte utọ Melchizedek asan̄ade.” Utu ke ndibiet akwa oku ubon Levi, Jesus enyene uwem emi owo mîkemeke ndisobo ndien ke ntem iyomke andida itie esie ke utom unyan̄a uwem esie. Enye inyeneke ndiwa uwa unam, koro enye ama awa mfọnn̄kan anana idiọkn̄kpọ ikpọkidem esie ama onyụn̄ ebe odụk ke heaven ye ufọn iyịp esie oro.
Obufa ediomi, emi ẹdade iyịp Jesus Christ ẹsọn̄ọ, ọfọn akan Ibet ediomi. Mbon oro ẹdude ke obufa ediomi ẹnyene ibet Abasi ke esịt mmọ ẹnyụn̄ ẹfen mme idiọkn̄kpọ mmọ. (Jeremiah 31:31-34) Esịtekọm ẹnyenede ẹnọ emi onụk mmọ ndiyarade idotenyịn mmọ an̄wan̄wa nnyụn̄ nsop idem ye ekemmọ mme andinịm ke akpanikọ. Utu ke ndibiet mmọ, mme andikokoi nnam idiọkn̄kpọ inyeneke aba uwa usio-isop ndomokiet inọ idiọkn̄kpọ.
Mbuọtidem Edi Akpan N̄kpọ!
Man ibọ ufọn ito obufa ediomi oro ọfọnde akan, oyom nnyịn inyene mbuọtidem. (10:32–12:29) Oyom ediyọ n̄ko edieke anade nnyịn ibọ se Jehovah ọkọn̄wọn̄ọde. Nte n̄kpọ nsịnudọn̄ ndiyọ, nnyịn imenyene “otu” mme ntiense ẹkedude mbemiso eyo Christian, ẹkande nnyịn ẹkụk. Nte ededi, nnyịn akpan akpan ikpotịm ikere iban̄a uwem unana ndudue eke Jesus ke idak ndutụhọ. Ke ubak ubak ẹkeme ndise ndutụhọ ekededi emi Abasi ayakde osịm nnyịn nte ntụnọ emi ekemede ndin̄wụm mfri emem edinen ido. Mme un̄wọn̄ọ Jehovah ndidi se ẹberide edem ekpenyene ndikọri udọn̄ nnyịn ndinam edisana utom nnọ enye ke ‘ukpono ye uten̄e.’
Paul eberi ye mme ikọ item. (13:1-25) Mbuọtidem ekpenyene ndinụk nnyịn ndiwụt ima nditọete, ifọn ido, iti ekemmọ mme andinịm ke akpanikọ oro ẹkụtde ukụt, ibat ndọ ke n̄kpọ eke ẹkponode, inyụn̄ ‘iyụhọ ke se nnyịn inyenede.’ Nnyịn ikpenyene ndikpebe mbuọtidem mbon oro ẹdade usụn̄ ke esop inyụn̄ ikop uyo inọ mmọ. Akande oro, ana nnyịn ifep edinam nsọn̄ibuot, ibiom esuene emi Jesus okobiomde, “iwa uwa ekọm inọ Abasi kpukpru ini,” inyụn̄ ikaiso ndinam se ifọnde. Utọ edu ntre esịne n̄ko ke otu n̄kpon n̄kan ikpehe ata Ido Ukpono Christ.
[Ekebe/Ndise ke page 24]
Nsio Nsio Baptism: Mme ikpehe utuakibuot ke ataya Israel ẹma ẹnyene n̄kpọ ndinam ye “udia ye edin̄wọn̄ n̄kpọ ye nsio nsio uyeremmọn̄ [“baptism,” NW].” (Mme Hebrew 9:9, 10) Baptism emi ekedi uyeremmọn̄ ido edinam emi Ibet Moses okoyomde. Ẹma ẹsiyet kpukpru n̄kpoduoho oro ẹkedehede, ndien edinam idem asana nte ido edide ama esịne owo ndiyet edisịnen̄kpọ esie ye ediyere mmọn̄. (Leviticus 11:32; 14:8, 9; 15:5) Mme oku ẹma ẹsiyere mmọn̄, ẹnyụn̄ ẹda mmọn̄ ẹdarade kpukpru n̄kpọ oro ẹbuanade edifọp uwa. (Exodus 29:4; 30:17-21; Leviticus 1:13; 2 Chronicles 4:6) Edi “nsio nsio uyeremmọn̄” oro ikesisịneke edinam ‘edinịm cup, eso, ye mme n̄kpọ okpoho baptism’ emi ndusụk mme Jew ẹkesinamde ke ini Messiah edide; Mme Hebrew 9:10 inyụn̄ itịn̄ke iban̄a edibụk ke mmọn̄ oro John Andinịm owo baptism akanamde m̀mê ndidi baptism mbon oro ẹkeyararede uyakidem mmọ ẹnọ Abasi nte mme Christian.—Matthew 28:19, 20; Mark 7:4; Luke 3:3.