Wange Pala Kö La Aqane Drenge Së

1-2. (a) Tune kaa la aqane thuane Iehova la itre hlue i Nyidrë? (Salamo 23:​1, 2, 5) (b) Nemene la hne së hna troa ce wang ngöne la tane mekune celë?

TRU catr la xen hne së hna kapa qaathei Iehova enehila. Casi hi la mekuna së me Dravita lo öni angeic: “Iehova la Atre Thupë ni. Tha tro kö ni a pë ewekë.”​—E jë la Salamo 23:​1, 2, 5.

² Iehova a hamë së la xen ngöne la itre ijine icasikeu. Nyipici laka, casi pala hi la itre ini hna hamën ngöne la itre ijine cili. Ngacama ‘catre hnyawa ha së ngöne la nyipici,’ ngo loi e tro pala hi a amexeje koi së la itre ini. (2 Pet. 1:​12) Hapeu, ka jole kö koi eö troa drenge hnyawa ngöne la itre icasikeu, la kola hamën la itre ini hnei eö hna atre hnyawa? Nga tro la tane mekune celë a xatua eö. Tro sa ce wang la kepin matre nyipiewekë tro sa dreng hnyawa ngöne la itre icasikeu. Nge tro fe sa ce wang la aqane tro la itre ka hamë ini a thue aja koi itre xan troa dreng. E thupen, tro sa ce wang la itre eamo ka troa xatua së troa drenge hnyawa. Ngo pane ce wange jë së ka hape, drei la ka ithanata koi së ngöne la itre ijine icasikeu.

IEHOVA A ITHANATA KOI SË

3. Tune kaa la aqane ithanata Iehova koi së, nge tune kaa la aqane huliwane së la Tusi Hmitrötr enehila?

³ Iehova a ithanata koi së jëne la Trengewekë i Nyidrë la Tusi Hmitrötr. (2 Tim. 3:​16, 17) Atre hnyawa hi lai hnei Iesu. Celë hi matre nyidrëti a huliwane lapane la Trengewekë i Iehova. Nge atreine catr Iesu huliwane ej, matre önine la itre ka dreng: “Hnauëne laka, atre hnyawa hi la atre ce la itre hna Cinyihan, nge tha qa pe hna ini?” (Ioa. 7:15) Ame la Iesu a qejepengöne la Itre Hna Cinyihan, ke pi tro catr la itre atr a dreng. Hnene fe la itre keresiano tui Paulo me Apolo hna huliwan lapane la Itre Hna Cinyihan la angatr a ithanata me itre atr. (It. Hu. 17:​2, 3; 18:​24, 28) Ame enehila, hna nyitrepene hnei Tusi Hmitrötr, la itre tane mekun, me itre emisio, me itre plan ne cainöj, me itre video hna kuca hnene la itre Temoë Iehova. Kola hain hnene la itre atr ka sine la itre icasikeu së laka, ame asë hi la itre ini hna hamën ke, hna nyitrepene hnei Tusi Hmitrötr. Nge ame la itre ka cilefë cainöj me sujet ke, angatr pala hi a fe Tusi Hmitrötr, tha angatre hi a amexej la itre xötr, ngo angatre fe a qejepengöne la aqane troa trongën la itre ini hna hamën.​—Luka 24:32.

4. Kola hapeu la troa “dreng”?

⁴ Ame la hnëewekë “dreng” ngöne la Tusi Hmitrötr, ke kolo fe a qaja la troa idrengethenge. Ame la easa e la Tusi Hmitrötr ngöne la itre ijine icasikeu, easa drei Iehova a ithanata, nge easë fe a trotrohnine la aja i Nyidrë. Matre hmaloi hi tro sa drengethenge Nyidrë. Nge madrine catre Iehova la Nyidrëti a öhnyi së a drei Nyidrë me trongëne la itre ini.​—It. Ed. 27:11.

KEPINE MATRE TROA DRENG NGÖNE LA ITRE ICASIKEU

5. Tro la ihnimi së koi Iehova a uku së troa u? (Ioane 4:​23, 24; 1 Ioane 5:3)

⁵ Easa dreng ngöne la itre icasikeu ke, easa hnimi Iehova. (Mat. 22:37) Ame la easa atrepengöi Nyidrëti hnyawa, ke kolo fe a kökötr la ihnimi së koi Nyidrë. Nge tro la ihnimi së a uku së troa drei Nyidrë, me drengethenge Nyidrë, me nyihlue i Nyidrë thenge la hna qaja e hnine la Tusi Hmitrötr.​—E jë la Ioane 4:​23, 24; 1 Ioane 5:3.

6. Nemene la hnei Iehova hna ini së troa kuca ngöne la itre icasikeu?

⁶ Easa dreng ngöne la itre icasikeu ke, easa hnim la itre xan. (Mat. 22:39) Ame ngöne la itre icasikeu, Iehova a ini së la aqane tro sa hnim la itre trejin memine la itre atr ka tha hmi kö me easë. Jëne la boroshür Hnime Jë La Itre Atr Hnei Epun Hna Inin, easa inine troa hetrenyi la itre thiina ka lolo ngöne la huliwa ne cainöj. Hapeu, jole kö koi eö troa nyiqane porotrik memine la itre atr? Nga goeëne hnyawa ju la aqane cilefë sujet hnene la itre trejin ngöne la icasikeu ne nyipine wiik.

7. Hnauëne laka, emele së troa drei Iehova?

⁷ Easa dreng ngöne la itre icasikeu ke, easa hnim la mel. Tune la itre hlue i Iehova ekö, e tro sa dreng la Trengewekë i Nyidrë, tro sa hetrenyi la mel. (Dreut. 32:​44-47) Ame la easa dreng ngöne la itre ijine icasikeu, easa kapa la itre ithuecatr ka xatua së troa treqene hnyawa la fene ka hnyipixe. (Roma 8:​25) Emele së troa drei Iehova, ke easa melëne la itre drai ne la pun, nge nyipiewekë tro sa hmek.​—Mat. 24:​42-44; Hna Am. 1:3.

LOI E TROA HMALOI KOWE LA ITRE KA DRENG TROA TROTROHNIN

8. Pine nemene matre nyipiewekë tro la itre trejin trahmanyi ka hamë ini a maca?

⁸ Nyipiewekë tro la itre trejin trahmanyi ka hamë ini qa ngöne la ita ne cainöj, tune la itre ka cilefë cainöj, a maca troa hamë ini. Ka hetre thangane catr la itre cainöj hna hnëkën hnyawan, nge hna nyitrepene hnei Tusi Hmitrötr. Ijije hi tro itre ej a thue aja koi itre xan troa atre la nyipici maine xatuane la itre trejin troa trotrohnine hnyawane la itre ini. Celë hi matre, tha tro kö la itre ka hamë ini qa ngöne la ita ne cainöj a wangesixane la hnëqa i angatr. Maine hetre hnëqa hnei eö hna troa cilefë, pane mekune ju la itre eamo hne së hna troa ce wang. Ngacama kola ithanata kowe la itre trejin trahmanyi ka cilefë cainöj, ngo ka nyipiewekë fe kowe la itre ka cilefë sujet qa ngöne la ita ne cainöj.​—2 Tim. 4:2; Tito 1:9.

9. Nemene la nyine tro eö a kuca matre hmaloi troa trotrohnin la cainöj?

⁹ Troa eköth hnyawa la cainöj. Eö a ajane tro la itre ka dreng a trotrohnine hnyawa la cainöje i eö. Maine tha trotrohnine kö angatr, tha tro kö angatre lai a drenge hnyawa. Tro eö a eköthe hnyawa tune kaa la cainöje i eö? Hane hi la aqane kuca: (1) Qaja jë la itre mekune ka tru ngöne la qan. (2) Qejepengöne jë itre ej, ase jë ketre thupei ketre. E ase hë eö qejepengöne la ketre mekun ka tru, pane cile ju, nge sisedrëne jë memine la ketre. (3) Amexeje jë itre ej qëmeken troa nyipun.

10. Pine nemene matre loi e tro la trejin ka cilefë cainöj a hetre aja troa ce thawa la itre mekun?

¹⁰ Troa hetre aja troa ce thawa la itre mekun ka ej ngöne la cainöj. Maine tro eö a madrin kowe la itre ini, tro ha hmaloi koi eö troa ce thawa me itre xan. (It. Ed. 2:​4, 5; It. Hu. 4:​20) Matre lapa mekune jë la itre xötr me itre mekun ka ej ngöne la plan. Mekune pala hi la ketre trejin qa Etazini ka 70 lao macatre, la ketre cainöj hna cilefë lo nyidrë a nekötrahmany. Öni nyidrë: “Mekune pala hi ni la aqane ithuecatre hun hnene la atre cilefë cainöj troa lapa mekun la itre hne së hna e ngöne la Tusi Hmitrötr. Mama hi ka hape, aja i nyidrë troa ce thawa la itre mekun, nge nyidrëti fe a qaja la aqane troa trongën la itre ini. Hnene la cainöje cili hna saze la meleng. Hnene ej hna amamane koi ni la aqane tro ni a kepe thangan qa ngöne la hnenge hna e Tusi Hmitrötr, nge celë hi ka acatrene la imelekeung me Iehova.”

11. Hnauëne laka, loi e troa qaja la aqane troa trongën la itre ini la epuni a cilefë cainöj? (1 Timoteo 4:​13-16)

¹¹ Mekune jë la hna ajan hnene la itre ka dreng, nge qaja jë la aqane tro angatr a trongën la itre ini. Tha tro kö a qaja hmekuje hi la itre ini ka tru, ngo loi e tro fe a huliwane la Tusi Hmitrötr matre ithuecatr koi angatr, me amamane la aqane tro angatr a trongëne la itre ini matre lolo la mele i angatr. Hnei Paulo hna hamëne la itre eamo ka ihmeku koi Timoteo, matre tro angeic a qale catr koi Iehova la angeic a xatuane la itre trejin ne Efeso. (E jë la 1 Timoteo 4:​13-16.) Mekune jë la hna ajan hnene la itre ka dreng, nge xatua angatre jë troa trongëne la itre ini ngöne la mele i angatr.

12. Pine nemene matre loi e tro eö a hamëne la cainöj kösë eö a porotrik?

¹² Ame la eö a amacane la cainöje i eö, ithanata catre jë kösë eö a porotrik. Maine tro eö a hamëne la cainöj kösë eö a porotrik hun la troa e la hna makën, tro ha hmaloi kowe la itre ka dreng troa drei eö hnyawa, me trotrohnine la itre ini hnei eö hna hamën. Önine la boroshür Troa Atreine e Tus Me Hamë Ini ka hape: “Loi e troa lualai me keukawa hnine la aqane ithanata. Tro ha canga mama la aja së troa ithanata kowe la itre atr.” Maine tro eö a ithanata qa kuhu hni, tro la itre ka drei eö, a pi drei eö hnyawa me trongëne la itre ini hnei eö hna hamën.

13. Pine nemene matre loi e tro la itre ka cilefë cainöj a sipo ixatua kowe la itre trejin ka macaj? (Wange ju fe la foto.)

¹³ Nyipiewekë troa sipo ixatua kowe la itre trejin ka macaj. Troa tune kaa? Hamëne pi koi nyidrë la cainöj hnei epun hna hnëkën, nge kapa ju la itre eamo hnei nyidrë hna hamën. Sipo nyidrëti jë troa drei eö la eö a amacan, me hamë ixatua matre tro eö a maca troa hamë ini. (It. Ed. 1:5) Ame itre xaa ijin, thatre kö së ka hape, hetre ini ka jol troa trotrohnin ke, ame koi së ka lualai hi. Matre tro la trejin a xatua së troa amacane la itre ini matre hmaloi koi itre xan troa trotrohnine me trongën itre ej. Easa ajan troa maca ngöne la aqane hamë ini, matre tro la itre ka drei së a kepe thangan qa ngöne la itre ini hna hamën hnei Tusi Hmitrötr.a

AQANE TRO SA DRENGE HNYAWA

14. Hnauëne la tro sa nyitipune la aqane ujë ne la atre cinyihane la Salamo 119? (Salamo 119:​24, 111, 167)

¹⁴ Tro sa atreine dreng hnyawa e tro sa akökötrene la hni ne ole së kowe la itre hna amexej hnei Iehova. Ka nyipiewekë la itre hna amexeje hnei Iehova, matre cil kowe la itre jol hne së hna melëne ngöne la “itre ijin akötr hna thatreine xomihnin.” (2 Tim. 3:1) Ngo maine easa mekun ka hape, casi pala hi la itre ini hna hamën ngöne la itre icasikeu, loi e tro sa lapa mekun la aqane ujë ne la atre cinyihane la Salamo 119, memine la aqane goeëne angeic la itre hna amexeje hnei Akötresie.​—E jë la Salamo 119:​24, 111, 167.

15. Nemene la ka troa xatua së troa hetre hni ne ole kowe la xen hne së hna kapa ngöne la itre icasikeu?

¹⁵ Nyipiewekë tro la angetre Isaraela ekö ngöne la hnapapa a kapa madrin pala hi la mana. Ketre tu së fe, nyipiewekë tro sa kapa madrine pala hi la xen hnei Iehova hna hnëkë thatraqai së enehila. (Eso. 16:​15, 31) Nyipici laka, ame lo xötrei, angetre Isaraela a madrin la angatr a kapa la mana. Xeni lai qaathei Iehova, ka hnyiapa, nge ka aijijë angatr troa mel. Ngo kola tro la itre drai, nge manono hë angatr hna xen la mana. (Num. 21:5) Nemene la ini? Tha tro pi kö sa sixan maine mekun ka hape, tha ka nyipiewekë kö la itre ini hne së hna kapa ngöne la itre icasikeu. Ngo loi e tro sa hetre hni ne ole kowe la itre ini cili, ke xeni lai qaathei Iehova. Nge the thëthëhmine pi kö së laka, organizasio i Iehova a xomi ijin troa hnëkën hnyawane la itre ini cili. Nge ketre, emele së hi lai.​—It. Ed. 3:​13, 16-18; Ioa. 17:3.

16. Nemene la ka xatuane la itre hlue i Iehova ka hekö hë ngöne la nyipici, matre tro pala hi a drenge hnyawa ngöne la itre icasikeu? (Wange ju la hna eköhagen “Ixatua Matre Tro Sa Drenge Hnyawa.”)

¹⁶ Tro sa atreine drenge hnyawa ngöne la itre icasikeu, e tro sa trongën la itre eamo e cahu. Nemene la ka xatuane la itre hlue i Iehova ka hekö hë ngöne la nyipici, matre tro pala hi a drenge hnyawa ngöne la itre icasikeu? Öni Ashley, ka 30 hë lao macatre ne nyihlue i Iehova ka hape: “Maine easa ajan troa drenge hnyawa ngöne la itre icasikeu, loi e tro sa hnëkë hnyawa. E tha hnëkë hnyawa kö ni lai, jole koi ni troa sa, nge eni a meku xaa ewekë.” Öni József, ka nyihlue i Iehova a 52 hë lao macatre enehila ka hape: “Madrine ni troa dreng la ketre ini hnenge hna atre hë, ke kola xatua ni troa atre la itre xaa mekun göne la ini cili. Nge maine ketre trejin la ka hamë ini, nge tha maca hnyawa kö la aqane hamën, eni a isine troa drenge hnyawa la itre ini qaathei Akötresie, hune la aqane hamën angeic la ini.”

17. Nemene la itre xaa eamo ka troa xatua eö troa drenge hnyawa ngöne la itre icasikeu? (Wange ju fe la foto.)

¹⁷ Maine jë, tro la itre eamo celë a xatua eö troa drenge hnyawa ngöne la itre icasikeu: (1) Qëmekene troa sine la itre icasikeu, the xeni atrunyi kö wanga tro eö a pi meköl. (2) Troa canga traqa, me iëne la göhne i eö qëmeken troa nyiqan la icasikeu. (3) Amë ju la telefone i eö ngöne mode silence, matre tha tro kö a ajolë eö troa dreng hnyawa. (4) Troa atre la hna troa ithanatane hnene la ka cilefë cainöj. (5) Goeëne ju la ka cilefë cainöj. (6) Troa xomi note maine desën la itre mekun ka tru hna tro fë. (7) Lapa mekune jë la itre xötr hna hamën memine la aqane acatrene itre ej la itre mekun. (8) Isa hnyinge jë ka hape, ‘Tro ni a huliwan tune kaa la ini celë matre xatuane la ketre trejin ne la ekalesia maine ketre atr ngöne la teritoar?’ (9) Qëmeken troa sine la ketre asabele maine asabele katru, lapa mekune jë la tan, me tane la itre cainöj, maine itre xötr. (10) Canga lapa ju ngöne la göhne i eö, matre hnëkëne la hni i eö, me drenge la miuzik me video ne nyiqan.

CATRE JË DREI IEHOVA LA NYIDRËTI A HAMË INI

18. Hnauëne laka, loi e tro pala hi sa drenge hnyawa ngöne la itre ijine icasikeu?

¹⁸ Loi e tro pala hi sa drenge hnyawa ngöne la itre ijine icasikeu. Jëne la itre icasikeu, Iehova a eatrongë së ngöne “itre gojenyi ne la meköt.” (Sal. 23:3; 31:3) Nyipiewekë tro sa kapa la itre eamo qaathei Iehova, matre tha tro kö sa nanyi qa ngöne la lapaun, tune la he hna uf hnei eny. Haawe, “wange pala kö la aqane drenge nyipunie,” nge trongëne jë la itre ini hna hamën ngöne la itre icasikeu. (Luka 8:​18) Ame la itre ka drei Iehova, tro angatr a madrin enehila, me hetrenyi la mel ka pë pun elany.​—Sal. 119:​2, 14.