Troa “Atreine Hamë Ini” Ngöne La Hna Cainöj

1. Nemene la hne së hna thel troa atre hnyawa, nge pine nemen? (2 Timoteo 4:2) (Wange ju fe la foto.)

ÖNI Iesu kowe la itretre dreng ka hape: “Inine jë la nöjei atr . . .  Ini angatre jë troa trongëne lo nöjei ewekë hnenge hna amekötine koi nyipunie.” (Mat. 28:​19, 20) Kolo lai a hape, Iesu a upe la itre keresiano asë troa ini itre xan. Nyipici, Iehova a ea koi Nyidrë “la itre ka hmalahnine,” nge itre angela a ee së kowe la itre atr cili. (It. Hu. 13:48; Ioa. 6:​44; Hna Am. 14:6) Ngo, hetre nyine tro fe sa kuca. Tro sa ce wang la tulu i Paulo me Banaba. Tusi Hmitrötr a qaja ka hape, ame ngöne la sunago e Ikonio, ‘lolo catre la aqane ithanata i nyidro, matre nyimutre la angetre Iudra me Geres ka hane lapaun.’ (It. Hu. 14:1) Eje hi, ame Paulo me Banaba, ke ka “atreine hamë ini.” (E jë la 2 Timoteo 4:2.) Loi e tro la itre keresiano asë a inine troa atreine hamë ini hnyawa.

2. Hnauëne la itre xan a mekun ka hape, thatreine kö angatr hamë ini hnyawa?

² Itre xan a mekun ka hape, tha ijiji angatr kö troa hamë ini hnyawa, ke tha qai angatre kö hna hane ini, maine pëkö hnei angatr hna atreine kuca. Hnene fe la itre hlue i Iehova ekö hna hane mekun ka hape, pëkö eloi angatr. (Eso. 4:​10; Iere. 1:6) Nge ame pena itre xan, angatr a goeëne la huliwa hna kuca hnene la itre xaa trejin ngöne la hna cainöj, matre ame koi angatr, tha ijiji angatre kö troa hane hamë ini, ke pëkö thangan la huliwa i angatr tu itre xan. Nyipici laka, tha nöjei atr asë kö la ka troa kapa la maca ka loi. Nge e tro la atr a kapa maine tha kapa la maca ka loi, ke tha hnene hmekuje kö la thangane la hne së hna cainöj. Tune la hne së hna qaja, Iehova me itre angela a isine matre tro la itre atr ka ajan a atre la nyipici. Nge easë fe a isine troa tro fë hnyawane la maca ka loi. Celë hi matre, ame ngöne la tane mekun celë, tro sa ce wang la köni ewekë ka troa xatua së troa atreine hamë ini hnyawa.

WANGATRUNE JË LA ITRE ATR

3. Hnauëne laka, atreine hi Iesu ketr la hni ne la itre ka dreng?

³ Öni Tusi Hmitrötr, “atre hnyawa hi [Iesu] la aliene hni ne la atr.” (Ioa. 2:​25) Kolo hi lai a amaman ka hape, atre hi nyidrë la aqane mekun ne la atr, memine la kepin matre angatr a kuca la ketre ewekë. Atreine hi nyidrë ketr la hni angatr, ke öhne hi nyidrë la ka ej e kuhu hni angatr. Öhne hi nyidrë laka, tha hna xatua angatre kö troa atre Akötresie, nge hna ahacenyi angatr hnene la qenenöj memine la itre ini i atr. (Mat. 9:​36; 23:4) Celë hi matre, ame ngöne lo Cainöj Hune La Wetr, hnei nyidrëti hna ini angatr la itre ewekë ka troa xatua angatr. Alanyim la itre atr ka tro koi nyidrë, ke nyidrëti a ithanatane la itre ewekë ka ketri angatr.

4. Tro sa amaman tune kaa ka hape, easa hnehengazone la itre atr? (Goeëne ju fe la itre foto.)

⁴ Easë a amaman ka hape, easa hnehengazone la itre atr hne së hna ixelë memin, la easa thele troa trotrohnine la ka ajolë angatr. Nge fene i Satana a akötrën la itre atr hne së hna cainöje kow. Maine tro pala hi sa mekune lai, ke tro ha hmaloi koi së troa trotrohni angatr. Hapeu, angatre kö a xouene la ketre ewekë ka traqa ngöne la nöj? Jole kö koi angatr troa öhnyi huliwa? Itre kem me thine kö a seseu göne la itre nekö i angatr ka ini? Pane mekune jë la pengöne la mel ne la itre atre cili, ka cil kowe la “itre ijin akötr hna thatreine xomihnin” nge pëkö mejiune i angatr kowe la Tusi Hmitrötr.​—2 Tim. 3:1; Isa. 65:​13, 14.

5. Hnauëne laka, tha ceitu Iesu kö memine la itre faresaio? (Mataio 11:​28-​30)

⁵ Iesu a hnim la itre atr, nge öhne hi angatr qa ngöne la aqane ujë i nyidrë. Tha ceitu nyidrëti kö memine la itre faresaio ka thaipiëne me methinëne la itre atr! (Mat. 23:13; Ioa. 7:​49) Ngo Iesu pe a wangatrun me metrötrë angatr. Atreine catre nyidrë hamë ini, ke ka ipië me menyike nyidrë. (E jë la Mataio 11:​28-​30.) Loi e tro fe sa menyik me metrötrëne la itre atr.

6. Tro sa amaman tune kaa la ihnim me metrötr kowe la itre atr ka xele ma drei së maine icilekeu?

⁶ Itre xan a xele ma dreng la maca ka loi me icilekeu me easë. Nemene la nyine tro sa kuca? Hnei Iesu hna ini së troa xomihnine la icilekeu. Ngo hnei nyidrëti fe hna ini së troa “kuca la loi koi angetre methinë [së], me amanathithine la itre ka qejegele [së], me thithi sai angetre qaqa [së]. (Luka 6:​27, 28) Tro sa atreine kuca lai e tro sa mekun ka hape, hetre kepin matre angatr a ujë tun. Nyipici laka, itre xan a catr icilekeu memine la huliwa ne cainöj. Ngo ame la itre xan, ke hetre ketre kepine kö matre xele angatr ma drei së. Maine jë, hetre jole ka traqa kowe la fami angatr maine hetre ketre ewekë pena. Maine pena, ame la easa traqa, ke ka elëhni hë angatr. Ngo loi e tro sa trongëne la eamo celë hna hape, “Tune la aqane hnyapane la xen hnei sootr, loi e tro pala hi la itre trengewekë i nyipunie a menyik matre hnyapa troa dreng, nge tro hë nyipunieti lai a atreine sa.” (Kol. 4:6) Maine tro sa thele troa trotrohnine la itre atr, tro së lai a atreine hamë ini hnyawa.

NYITREPENE JË LA INI I EÖ HNEI TUSI HMITRÖTR

7. Tune kaa la aqane amamane Iesu laka, nyidrëti a nyitrepene la itre ini nyidrë hnei Tusi Hmitrötr? (Ioane 7:​14-​16)

⁷ Tha Iesu kö a nyitrepene la itre ini hnei nyidrëti hna hamën hnene la sipu inamacane i nyidrë. Nyidrëti pe a nyitrepene hnene la Trengewekë i Akötresie, matre hmaloi hi troa trotrohnin me xolouth la itre ini i nyidrë. Öni Tusi Hmitrötr, “Qaathei Akötresie la itre ini [hnei nyidrë] hna hamën, nge tha ceitu kö me itretre cinyihan.” Matre itre ka drei nyidrë “a haine la aqane hamë ini i nyidrë.” (Mar. 1:​22) Ame la itretre cinyihan ngöne la ijine i Iesu, ke itre ka majemine amexeje la itre hna qaja hnene la itre ka hamë ini, matre acatrene la itre ini i angatr. Ngo ame kö Iesu, hnei nyidrëti pala hi hna amexeje la itre xötre ne la Tusi Hmitrötr. Maine ju, ijiji nyidrëti hi troa huliwane la sipu inamacane i nyidrë, matre troa pi mama me qenexetihene la itre xan, ke nyidrëti la nekö i Akötresie, nge ka mele nyidrëti ekö e hnengödrai. Ngo tha hnei nyidrëti kö hna ujë tun. Ka ce tro pala hi la itre ini nyidrë memine la aja i Akötresie, me Trengewekë i Nyidrë. (E jë la Ioane 7:​14-​16.) Celë hi tulu ka lolo kowe la itretre drei nyidrë.

8. Tune kaa la aqane nyitipu Iesu hnei Peteru?

⁸ Hnene fe la itretre drei Iesu hna hane nyitrepene la itre ini angatr hnene la hna qaja hnei Tusi Hmitrötr. Pane mekune jë la cainöj hna cile fë hnei Peteru ngöne lo ijine Penetekos macatre 33 M.K. Tha hnei angeice kö hna ini aqeany. Ngo nyimutre la itre xötr hnei angeic hna huliwane matre troa amamane ka hape, hnei Iesu hna eatrëne la itre hnei Iehova hna perofetan. Celë hi ka ketr la hni ne la itre ka drei angeic. (It. Hu. 2:​14-37) Nemene la thangan? “Ame asë hi la itre ka kapa madrine la itre trengewekë celë, tre hna bapataiso angatr, matre ngöne la drai cili, nyixane hmaca jë la itretre dreng hnene la ala 3000.”​—It. Hu. 2:​41.

9. Hnauëne la tro sa huliwane la Tusi Hmitrötr la easa hamë ini?

⁹ Tusi Hmitrötr hmekuje hi la ka atreine ketr la hni ne la itre ka drei së. (Heb. 4:​12) Matre loi e tro sa huliwane ej la easa hamë ini. Aja së troa “cainöjëne la trengewekë i Akötresie,” ngo tha itre sipu mekuna së kö. (2 Tim. 4:2) Itre Edromë 2:6 a hape: “Iehova kö la ka hamën la inamacan; qa ngöne la që i nyidrë la atrehmekun me atreine waiewekë.” Matre ame la easa nyitrepene la itre ini hne së hna hamën hnene la Tusi Hmitrötr, ke kösë easa nue Nyidrë troa ithanata. (Mala. 2:7) Easa ajan tro la itre atr a atre ka hape, ka sisitria kö la inamacane qa hnine la Tusi Hmitrötr, hune la inamacane i atr. Qaathei Akötresie la Tusi Hmitrötr, nge ej a xatua së troa amadrinë Nyidrë me mele madrin.​—2 Tim. 3:​16, 17.

10. Tune kaa la aqane tro eö a amamane kowe la ka ini Tus la hna qaja hnei Tusi Hmitrötr?

¹⁰ Ame la eö a hnëkë troa ini Tus me ketre, thele jë troa amamane kowe la ka ini Tus la hna qaja hnei Tusi Hmitrötr. Ngacama tru catr hnei ini hne së hna xom qa ngöne la itre foto me video, ngo Tusi Hmitrötr la hne së hna inin. Matre ce e jë me angeic la itre xötr ka tru, nge xatua angeice jë troa lapa mekun itre ej. Nge ame la eö a ce goeën me angeic la itre foto maine itre video, xatua angeice jë troa öhne la itre trepene meköt ka mama. Tha nyipiewekë kö troa ithanata atrun, maine e asë la itre xötr. Nue ijine jë koi angeic troa trotrohnine la aliene la xötr, nge e tha trotrohnine pala kö, e hmaca jë me angeic lai xötr. Aqane tro hi eö lai a inine koi angeic la hna qaja hnei Tusi Hmitrötr, ngo tha ketre itusi kö, maine foto maine video.​—1 Kor. 2:​13.

11-12. (a) Tune kaa la aqane tro sa xomihnine la itre ka ini Tusi me së? (Itre Huliwa 17:​1-4) (Wange ju fe la foto.) (b) Tune kaa la itre xan göne la Tusi Hmitrötr, nge tro sa xatua angatr tune kaa?

¹¹ Maine jole kowe la ka ini Tus troa kapa la nyipici, the thëthëhmine kö laka, loi e tro sa “cainöjëne la trengewekë i Akötresie. . . ngöne la xomihni.” Isa aqane kökötre kö së ngöne la nyipici. Ame la itre xaa ka ini Tus, loi e tro sa nue ijine koi angatr troa trotrohnine hnyawane la itre nyipici ka hmaloi hi koi së. Eje hi, ame ekö lo, anyimua cainöje Paulo kowe la angetre Iudra ne Thesalonika. Nge hnei angeice pala hi hna amexeje la itre hna cinyihan, matre tro la itre xan thei angatr a trotrohnine la nyipici.​—E jë la Itre Huliwa 17:​1-4.

¹² Nemene la ketre aqane tro eö a xomihnine la ka ini Tusi me eö? Tha tro kö eö a ithanata atrun, ngo tro pe a hnying koi angeic matre tro angeic a fe la hni angeic. Isine jë troa drei angeice hnyawa matre troa trotrohnine la aqane mekune i angeic. E thupen, iëne jë la itre xaa xötr nyine tro epon a ce e me ce ithanatan, matre tro angeic a atre la mekuna i Iehova. The thëthëhmine kö laka, ame la itre xan, thatre kö angatr ekö la Tusi Hmitrötr, memine la aliene ej. Haawe, amamane jë koi angeic la Tusi Hmitrötre i eö hna fejan. Huliwane jë la götrane “Aliene La Trengewekë i Akötresie” ngöne la itre pane götrane ne la Tusi Hmitrötr Fene Ka Hnyipixe, matre amamane koi angeic la enyipiewekëne la itre ini hna hamën. Nge amamane jë koi angeic la cas maine lue xötr, matre tro angeic a öhne laka, hetre ixatua hne së hna kapa qa ngön. Tune la itre xötr ka mama ngöne la hnying 15, matre tro angeic a öhne laka, Tusi Hmitrötr a xatua së troa hetrenyi la nyipi madrin. Haawe, e tro eö a amamane kowe la ka ini Tus la emenene la Tusi Hmitrötr, troa hetre thangane la aqane hamë ini i eö.

XATUA ANGEICE JË TROA ATREPENGÖI IEHOVA

13. Ame la easa hamë ini, drei la nyine tro sa qaja atrun? Qaja jë la ketre ceitun.

¹³ Ame la aja i easë, ke troa xatuane la itre ka drei së troa atrepengöi Iehova me easenyi Nyidrë. (Iako. 4:8) Ijije hi tro sa aceitunëne la huliwa së memine la hna kuca hnene la atr ka qa ziliwa. Tha angeice kö a xom la sine laam troa thina angeic, ngo tro pe a thinane la ziliwa matre öhne jë hnene la sinatronge i angeic. Ceitune hi lai memine la easa hamë ini. Loi e tro sa xatuane la ka ini Tus troa goeëne catrë Iehova, ngo tha easë kö.

14. Tro sa xatuane tune kaa la ka ini Tus troa hetre aja troa amadrinë Iehova?

¹⁴ Ame la eö a ini Tus me ketre, thele jë troa aciane thene la ka ini Tus la aja troa amadrinë Iehova. (It. Ed. 27:11) Tha eö kö a qaja koi angeic la nyine troa kuca maine tha kuca, matre troa Temoë Iehova. Loi e tro pe angeic a saze, ke angeic a hnimi Iehova, nge aja i angeic troa amadrinë Nyidrë. Maine angeic a isi memine la ketre hna majemine ka ngazo, hnyingëne jë koi angeic ka hape: “Hnauëne la Iehova a sisine la huliwa cili? Hnauëne la Iehova a upi eö troa nuetrij la huliwa cili, nge ka amadrinë eö pe? Kola amamane tune kaa ka hape, Nyidrëti a hnimi eö?” E tro eö a ithuecatr koi angeic tro pala hi a meku Iehova, ke tro hë angeice lai a öhne laka, Iehova la ketre Kem ka lolo. Tro lai a upi angeic troa amadrinë Nyidrë.

THELE JË TROA MACA NGÖNE LA AQANE HAMË INI

15. Nemene la nyine tro eö a kuca matre tro eö a maca troa hamë ini?

¹⁵ Sipo Iehova jë troa xatua eö troa waipengöne la aqane hamë ini eö, memine la nyine tro eö a saze. (1 Ioa. 5:​14) Nge ame la eö a ase thith, thele jë troa trongëne la itre ini hnei Iehova hna hamën ngöne la itre ijine icasikeu, göne la aqane troa ini itre xan. Ketre, sipone jë kowe la itre trejin ka macaj troa sine la ini Tusi eö, matre tro angatr a goeëne la aqane kuca i eö. The thëthëhmine kö laka, atre hnyawa hi eö la ini hnei epon hna troa ce ithanatan, ngo pëkö hna atre hnene la ka ini Tus. Pane mekune jë la thangane kowe la ka ini Tus la itre ini hnei epon hna troa ce wang. Nge xatua angeice jë troa trotrohnine laka, maca ka lolo la maca qa hnine la Tusi Hmitrötr. Nge maca lai ka troa xatua angeic troa imelekeu me Iehova, me mele madrin.​—Sal. 1:​1-3.

16. Hnauëne laka, loi e tro pala hi sa thel troa maca ngöne la aqane hamë ini së?

¹⁶ Pëkö ketre madrine ka tru hune la troa ini itre xan la nyipici göi Iehova. Ame ngöne la fen ka hnyipixe, tro pala hi sa kuca la huliwa cili, ke alanyim la itre atr elanyi nyine tro sa inin. Haawe, catre jë së wangatrune la itre atr, me nyitrepene la itre ini së hnei Tusi Hmitrötr, me xatua angatr troa atrepengöi Iehova. Tro hë së lai a maca troa hamë ini.