Manathithi Ka Tru La Itre Gurup Ne Cainöj

1-2. Tune kaa la aqane goeëne la itre xaa trejin la itre gurup ne cainöj?

MEKUNE pala kö eö la ijine eö a nyiqane cainöje trootro? Tru la madrine i eö! Eö ha sine la fami ne la itre Temoë Iehova ka atrune la ëje i Nyidrë. (Sal. 148:​1, 2, 12, 13) Ngo eö fe a sine la ketre gurup ka co, ene la gurup ne cainöj. Hnene la itre gurup ne cainöj matre atreine jë së cainöjëne “la maca ka loi ne la Baselaia e cailo fen.”​—Mat. 24:14.

² Tune kaa la aqane goeëne eö la itre gurup ne cainöj? Öni Wendya ketre trejin föe ka hape: “Tru la hna xatua ni hnene la gurup ne cainöj. Jëne la itre trejin, hnenge hna inin troa cainöj me ini itre xan, troa hetre objectifs me eatrëne itre ej, nge hetre nyipi sineenge hë.” Öni Rich, ketre trejin trahmany: “Madrine catre ni troa elemekene la gurup ne cainöj. Kola aijijë ni troa xatuane la itre atrene la gurup troa acatrene la imelekeu i angatr me Iehova, me macaje trootro thupene la bapataiso.” Öni Dinah ketre trejin föe: “Lolo catr la itre gurup ne cainöj. Kösë faminge hi la gurupeng.”

3. Nemene la hne së hna troa ce wang ngöne la tane mekune celë?

³ Ame ngöne la tane mekune celë, tro sa pane ce wang la hnëqa ne la itre ka elemekene la itre gurup ne cainöj me itre ka xatua angatr, memine la aqane thupën angatr la itre atrene la gurup. E thupen, tro sa ce wang la nyine tro së isa ala cas a kuca matre xatuane la gurup i easë. Nge tro fe sa ce wang la nyine tro sa kuca matre kepe thangan qa ngöne la gurup së.

KA ELEMEKEN ME KA IXATUA

4. (a) Nemene la hnëqa ne la atre elemekene la gurup ne cainöj? (b) Tune kaa la aqane xatuane nyidrë la itre atrene la gurup? (Wange ju la hna eköhagen “Ixatua Kowe La Ka Elemekene La Gurup.”)

⁴ Ame la ka elemekene la gurup ne cainöj ke, ketre qatre thupb. Hnene la lapa ne la itre qatre thup hna upi nyidrë troa xatuane la itre atrene la gurup me acatrene la imelekeu i angatr me Iehova. Tune kaa la aqane kuca i nyidrë? Hnapan, nyidrë a hnehengazone la itre atrene la gurupe i nyidrë. (It. Ed. 27:23) Atre hnyawa hi nyidrë la itre atrene la gurup, nge nyidrë a ithanata lapa me angatr matre troa atre la itre huliwa i angatr. Celë hi ka aijijë nyidrë troa xatua angatr troa easenyi catr me Iehova, me ithuecatr, maine hamëne la ixatua hnei angatr hna ajan. (It. Ed. 12:25; Isa. 32:2; Iako. 2:​15-17) Hnaaluen, nyidrë a xatuane la itre trejin ne la gurup troa catre cainöj. Nyidrëti a xomiujine la huliwa ne cainöj, me catre cainöj memine la gurup e nöjei pune wiik e ijij. Nyidrëti fe a isine troa cainöj memine la itre trejin asë, matre troa hamëne la itre ithuecatr me itre ixatua ka ihmeku me angatr isa ala cas. Maine hetre jole i nyidrë, nge tha ijiji nyidrëti kö troa cainöj memine la gurup, tro nyidrëti a sipone kowe la trejin ka xatua nyidrë maine ketre trejin trahmanyi troa iujine la gurup. Hnaakönin, nyidrëti a xatuane la itre trejin trahmanyi troa xom la itre hnëqa ngöne la ekalesia. (1 Tim. 3:1) Nyidrëti a hamëne la itre eamo qa hnine la Tusi Hmitrötr, me felisite angatr, me hamë formasio matre xatua angatr troa atre ixatua elanyi maine qatre thup. Ka nyipiewekë catr la hnëqa ne la atre elemekene la gurup ne cainöj, matre loi e tro la lapa ne la itre qatre thup a hamëne la hnëqa cili kowe la qatre thup ka macaj.

5. Nemene la itre jol hna cile kow hnene la itre ka elemekene la itre gurup ne cainöj?

⁵ Ngacama aja ne la itre ka elemekene la itre gurup troa thupëne la gurupe i angatr, ngo hetre jol hnei angatr hna cile kow. Tui Jörg, nyidrë a elemekene la ketre gurup ne cainöj e Allemagne, ngo hetre xaa hnëqa i nyidrë mina fe. Öni nyidrë: “Tha ka hmaloi kö troa eatrëne asë la itre hnëqa së. Thatreine kö ni eatrëne la objectifeng, ene la troa hën asë la itre atrene la gurupeng.” Öni Abel, ketre qatre thup ne Ouganda ka 70 lao macatre, ka hape: “Tha tru kö hnei qatre thup me atre ixatua ngöne la ekalesia. Matre alanyim la itre trejin ngöne la ca gurup ne cainöj. Hnene lai, matre jol koi ni troa xatuane me ithuecatr kowe la itre atrene la gurupeng.” Nge öni Obed, ketre qatre thup qa Suriname ka hape: “Pi tro catre ni a hamë formasio koi itre xan. Ngo loi e troa nue trengecatr me traem, nge tha canga mama kö la itre thangan. Celë hi matre, easa wangacone la formasio.” Nemene la ka troa xatuane la itre qatre thup ka cil kowe la itre jole cili?

6. Pine nemene matre loi e troa acone la itre gurup ne cainöj?

⁶ Maine ijij, loi e troa acone la itre gurup ne cainöj, matre tro la atre elemekene a atrepengöne hnyawa la itre trejin, me xatua angatr isa ala cas troa easenyi Iehova. Ngo tune kaa e tha tru kö hnei qatre thup ngöne la ekalesia? Maine tro la lapa ne la itre qatre thup a eköth la itre gurup ka tru, ke thatreine jë kö la itre ka elemeken eatrëne la hnëqa i angatr. Matre loi e tro pe a up la ketre ka ixatua troa iujine la ketre gurup ne cainöj. Maine ka co hi la itre gurup, ke tro ha hmaloi kowe la itre ka elemeken troa eatrëne la hnëqa i angatr, ene la troa thupëne la itre trejin.

7. Maine tha tru kö hnei qatre thup, nemene la nyine tro la itre ka elemekene a kuca matre troa xatuane la itre trejin ne la gurup? (1 Peteru 5:2) (Wange ju fe la foto.)

⁷ Maine tha tru kö hnei qatre thup, nge hetre gurup hnei eö hna elemeken, isine jë troa hamë formasio kowe la trejin ka xatua eö, matre tro angeic a atreine thupëne la itre mamoe i Akötresie. (E jë la 1 Peteru 5:2.) Thue hnëqa i angeice jë. Upi angeice jë e xaa ijine troa iujine la icasikeu göi cainöj, me thawa la itre trejin. Ce thithi jë me angeic, nge ithanatane jë me angeic la itre huliwa hna kuca hnene la itre trejin ngöne la huliwa ne cainöj. Ce tro lapa jë me angeic troa vizitëne la itre trejin. Ce hnëkë jë me angeic lai vizit, nge ce wange jë e thupen la itre hnei angeic hna kuca ka lolo memine la nyine tro angeic a huliwan. Aqane tro hi eö lai a xatua angeic troa macaj, matre tro fe angeic elanyi a hane elemekene la ketre gurup ne cainöj. (2 Tim. 2:2) Ketre, ijije fe tro eö a sipone kowe la itre trejin ka macaj troa xatuane la itre xan ngöne la huliwa ne cainöj. Loi e tro la itre pionie me itre trejin ka cainöj qan ekö, a ce huliwa memine la itre ka xötrei cainöj maine itre ka thatrein. Ijije hi tro la itre trejin ka macaj a amamane la aqane troa nyiqane ithanata, maine iwai hmaca, maine ini Tus. Tro pena së a ce wang la köni aqane tro sa xatuane la gurup ne cainöje së.

XATUANE JË LA GURUP NE CAINÖJ

8. Tune kaa la aqane tro sa xatuane la gurup ne cainöje së? (Roma 1:​12)

⁸ Troa cainöj memine la gurup. Ame la eö a cainöj memine la gurup, epuni a “itö ithuecatrekeu.” (E jë la Roma 1:​12.) Ka loi la tro sa ce cainöj, ke easa igoeë la easa cainöj ngöne la ketre götran gaa ngazo, nge kolo fe a xatua së troa triji xou. Tune kaa e kola ajolë eö hnene la huliwa troa ce cainöj memine la gurup? Sipone jë kowe la maseta i eö troa saze la itre hawa ne huliwa i eö. Maine jë, tro nyidrë a kapa la sipo i eö. (Neh. 2:​4-6) Nge tune kaa e eö a wezipo maine qatre hë eö matre tha ijiji eö kö troa cainöj memine la gurup? Ce ithanatane jë lai memine la ka elemekene la gurupe i eö. Maine jë tro nyidrë a thele jëne matre tro eö a sine la icasikeu ne cainöj jëne visioconférence, maine up la itre xaa trejin troa cainöj jëne telefon maine cinyanyi tus me eö. Nge tune kaa e ka jeune hi eö, ngo jole koi eö troa cainöje lapa? Sipone jë kowe la ketre trejin ne la gurup troa ce cainöj me eö e nöjei wiik. Wange hmaca ju la ka nyipiewekë, me aqane tro eö a huliwan hnyawane la traeme i eö. (Roma 12:11; Kol. 4:5) Tru catr la itre thangan hnei eö me gurupe i eö hna troa kapa. Nge thithi jë koi Iehova, matre tro Nyidrëti a hamë “aja me trengecatre i [eö] troa kuca.”​—Fil. 2:​13.

9. Nemene la nyine troa kuca matre madrin me ihnim la gurup ne cainöje së? (Roma 12:13)

⁹ Troa ikep. Maine tro sa “ikep” ke tro hë lai a madrin me ihnim la gurup ne cainöj. (E jë la Roma 12:13.) Hapeu, ijije kö tro sa nue la hnalapa së, matre kuca la itre icasikeu ne cainöj? Ame ngöne la itre xaa ekalesia, itre gurup a hëne la trejin ka traqa qa ngöne la ketre ekalesia troa cilefë cainöj, troa ce xen me angatr. Ngacama tha ijije nyidrëti kö, ngo angatre kö gurup a ce xen me madrin thupen la icasikeu. Öni Sarah ketre pionie hut ka hape: “Xou eni troa hëne la itre atr kowe la hnalapang. Matre, eni a thel troa atre angatre hnyawa hune la troa hnehengazone la xen.” Ame la easa kuca asë la hne së hna atrein troa ikep, easë hi lai a xatuane la gurup troa ihnim tune la ketre fami, me easenyi koi Iehova, me acatrene la ihnim ngöne la gurup.​—Neh. 8:​10; It. Hu. 20:35.

10. Nemene la nyine troa kuca e aja i easë troa maca troa cainöj me hamë ini? (Itre Edromë 1:5; 27:17) (Wange ju fe la foto.)

¹⁰ Thele jë troa maca troa cainöj me hamë ini. E tro sa maca troa cainöj me hamë ini, ke tro së lai a ajan troa ce cainöj memine la gurup. Hapeu, hetre ketre aqane cainöje kö hnei eö hna pi huliwane hnyawan? Sipo ixatua jë koi ketre. (E jë la Itre Edromë 1:5; 27:17.) Qaja jë lai objectif i eö kowe la ka elemekene la gurupe i eö. Nge tro nyidrëti lai a xatua eö troa eatrën. The cile kö troa sipo xatua thei itre xane fe, tune la ketre pionie maine trejin ka macaj ngöne la gurupe i eö. Celë hi hna kuca hnei Heather, ketre trejin föe ka lapa pe hi. Öni angeic: “Hnenge hna sipon kowe la ketre trejin föe ka pionie la aqane troa iwai hmaca. Hnei eahlo hna loi thiina koi ni, me ce cainöje lapa me ni. Göi xatua ni fe hnei eahlo troa nyiqane ini Tus memine la ketre atr hnenge hna wang lapan. Madrine catre ni la hnenge hna sipo ixatua koi eahlo, ke ame enehila, tru la ajange troa cainöj.” Eje hi, ijiji easë asë hi troa xatuane la gurup ne cainöje së.

AQANE TRO EÖ A KEPE THANGAN QA NGÖNE LA GURUP NE CAINÖJ

11-12. Tune kaa la aqane xatua eö hnene la gurup ne cainöj troa easenyi Iehova me macaj? Qaja jë la ketre hna melën.

¹¹ Itre thangan ka loi kowe la imelekeu së me Iehova. Hetre thangan e tro sa sine la ketre gurup ne cainöj. Ame la itre hnei Iehova hna hnime catrën, tune la itre sine föe, me itre neköeng me itre qatr, angatr a kepe ithuecatr qaathene la ka elemekene la gurup. (1 Thes. 2:8; Iako. 1:​27) Kolo fe a hamë formasio koi së, matre maca ngöne la hna cainöj me atreine hamë ini. Ame la itre trejin trahmany ka amamai tulu ka loi, ke kola xatua angatr troa macaj me kapa la itre xaa hnëqa ngöne la ekalesia.​—1 Tim. 3:​10.

¹² Hane hi la aqane xatua Wendy, lo hne së hë hna qaja ha, hnene la gurup ne cainöj. Öni angeic, “Pine laka, ka icilekeu kaka memine la nyipici, matre jole koi nenë troa ce cainöj memine la gurup e pune wiik. Ngo ame eni, ke hna nue ni troa cainöj. Hnene la ketre trejine föe ka pionie, nge ka tru kö hung, hna nyisineeng me xatua ni. Hnei eahlo hna hamë formasio koi ni, matre maca troa cainöj, me xatua ni troa kuca la itre xaa ewekë ngöne la ekalesia. Nge mekune pala hi ni, lo ka elemekene la gurup a hamë ni la itre eamo qa hnine la Tusi Hmitrötr ka xatua ni pala hi enehila.”

13. Nemene la itre thangan hne së hna troa kapa, e tro sa sine la gurup ne cainöje së? (Wange ju fe icetrön.)

¹³ Kola hnimi së. Ame la easa ‘cas’ memine la itre atrene la gurup, ke easë hi lai a acatrene la imelekeu së me angatr. (Fil. 1:​27) Pine laka, ka co hi la gurup ne cainöj, matre ijije hi kowe la itre trejin ka lapa pe hi troa hane nyisinee itre xan. (2 Kor. 6:​13) Ame ngöne la itre ijine jol, la easa wezipo, me hleuhleu maine treije pine la ketre sine së ka mec, ke easë a kepe ixatua qaathene la gurup ne cainöj. (1 Thes. 5:​14) Pine laka, calemi hë la akötr atraqatr matre nyipiewekë tro sa hetre nyipi sinee. (Mat. 24:21) Maine jë, tha tro kö a patr la itre jole së, ngo hmaloi hi tro sa xomihnin itre ej, ke atre hi së laka, itre trejin a hnimi së me xatua së.​—It. Ed. 17:17.

14. Ame la kola traqa la itre jol, nemene la ixatua hne së hna kapa qaathene la gurup ne cainöje së?

¹⁴ Hetre ixatua hne së hna kapa. Maine traqa ju la mec ka ixötrekeu, maine itre hulö, maine easa lö koi pital, maine kola iaxösisi, maine kola pë mani la nöj, tro sa kepe ixatua qaathene la gurup ne cainöje së. Ame ngöne la itre ekalesia, tro la Komite Ne Huliwa a ce ithanatane memine la itre ka elemekene la itre gurup matre wang la hna bezoën hnene la itre trejin, me aqane troa xatua angatr. Ame la kola traqa la ketre hulö, tro la itre ka elemekene la gurup a hëne la itre fami ne la gurup i angatr, matre troa atre ka hape, ekaa angatr, nge e hetre hnei angatr hna ajan, tune la drösinöe, maine xen, maine tim, maine uma, maine iheetr. Tha nyine qaja kö la ixatua me ihnim hne së hna kapa qaathene la gurup ne cainöje së la kola traqa la itre jol!

15. Nemene la hna kuca hnene la itre hlue i Iehova asë?

¹⁵ Tune la hne së hna qaja, ka tru la organizasio i Iehova. Ame e hnengödrai, traqa koi itre milio me itre miliar lao angela. Nge ame e celë fen, ase hë sasaith la 9 millio lao trahmanyi me föe ka lapaune koi Nyidrë, nge kolo pala hi a kökötr la etrune cili. (Zaka. 8:​23; Hna Am. 5:​11) Itre hlue i Iehova e hnengödrai me e celë fen a nue trengecatr matre cainöjëne la maca ka loi ne la Baselaia! (Hna Am. 14:​6, 7) Matre catre jë së wangatrune la gurup ne cainöje së, ke celë hi ka aijijë së troa atrunyi Iehova.​—Sal. 111:1.