“Akötresie Ka Nyipici” a Eatrëne La Itre Hna Thingehnaean

1. Pine nemen matre ijije hi tro sa mejiun koi Iehova? (Salamo 31:​2-5)

EASË a mel ngöne la fen hna musinën hnei Satana laka, tru la itre atr ka thoi, ka iaö me mele hnihni. Matre jole koi së troa mejiun koi ketre. Alanyim la itre atr ka trene entreprise ka huliwa thoi. Ketre, itre atr a thoi göne la itre ewekë hnei angatr hna salemën. Nge ame itre xaa ijin, tha eatrëne kö la itre sinee së la itre hnei angatr hna qaja. Ngo tru la madrine së la easa atre ka hape, ijije hi tro sa mejiun koi Iehova! Nyidrëti la “Akötresie ka nyipici.” (E jë la Salamo 31:​2-5.) Tha ka hane kö Iehova thoi, ka nyipici asë hi la hnei Nyidrëti hna qaja me kuca. Loi e xecie koi së laka, tro kö Nyidrëti a eatrën la hnei Nyidrëti hna qaja.

2. Nemene la hne së hna troa ce wang ngöne la tane mekune celë?

² Ame ngöne la tane mekun celë, tro sa pane ce wang la itre xaa kepin, matre loi e tro sa mejiun koi Iehova. E thupen tro sa ce wang la aqane tro la Akötresie ka nyipici a apatrene la fen ka ngazo i Diabolo, memine la hnei Nyidrëti hna kuca enehila, matre eatrëne la aja i Nyidrë. Tro la tane mekune celë a xatua së troa catre qaja koi itre xan la nyipici göi Iehova.

KEPIN MATRE TRO SA MEJIUN KOWE LA AKÖTRESIE KA NYIPICI

3. Hnauëne laka tro sa mejiune hnyawa koi Iehova?

³ Easë a mejiun koi Iehova, ke Nyidrëti la Atre Xup. Hnei Nyidrëti hna xup la hnengödrai me ihnadro memine asë hi la itre ka mel. (Gen. 1:1; Sal. 36:9; Hna Am. 4:​11) Hnei Nyidrëti hna xup la ihnadro, matre tha tro kö a patre la ka nyipiewekë koi së, tune la eny hne së hna manon me tim hne së hna ij. Nyidrëti a musinëne la ka ej e koho hnengödrai me celë fen. Pine laka Ka Tru Trenge Men Nyidrë me inamacan, matre tha xou së kö troa nue Nyidrë troa iujine la mele së.

4. Easë a atre tune kaa ka hape, Iehova a hnimi së?

⁴ Ijije hi tro sa mejiune koi Iehova, ke Nyidrëti a hnimi së. Hnei Nyidrëti hna xup la itre atr, ke aja i Nyidrë tro fe angatr a hane mele madrin tui Nyidrë. Matre öni Nyidrë: “Tro sa xupe la atr hnaiji nyiso, me ka tui nyiso.” (Gen. 1:​26) Hnei Nyidrëti hna hamë së la atreine troa isa ië ewekë, memine ihnadro ka mingöming matre tro sa lapan. (Sal. 115:16) Hnei Nyidrëti hna ahnith kowe la lue pane kem me thine së la hnëqa troa aparadraisone la ihnadro. (Gen. 1:​28; 2:​15) Nge, hnei Nyidrëti hna hamë nyidro la nöjei pengöne xen, me feja me öni me itre xane ju kö, matre tro nyidroti a mele madrin. Kola amaman laka, “ame la ihnimi nyipici i Iehova, ke ka epine palua.”​—Sal. 103:17.

5. (a) Nemene la hnei Iehova hna kuca lo Adramu me Eva a ena la wathebo? (b) Qaja jë la itre xaa hna thingehnaean hnei Iehova ka eatr. (Wange ju la hna eköhagen “Ka Eatre Pala Hi La Hna Qaja Hnei Akötresie.”)

⁵ Ijije hi tro sa mejiune koi Iehova, ke ka eatrëne pala hi Nyidrë la hnei Nyidrëti hna qaja. Tha hnei Nyidrëti kö hna xupe menune la ihnadro, “ngo matre troa lapan.” (Isa. 45:​18, 19) Ame lo Adramu me Eva a ena la wathebo, ke mec la pun koi nyidro. Maine jë easa mekun ka hape, tha tro kö a eatre la aja i Akötresie. Ngo ka eatrëne pala hi Iehova la itre hnei Nyidrëti hna thingehnaean. (Isa. 46:​10, 11) Tha saze kö la aja i Nyidrë. Aja i Nyidrëti pala hi troa nyialiene la ihnadro hnene la itre atr ka meköt. Celë hi matre, hnei Nyidrëti hna aijijë Adramu me Eva troa hetre nekönatr. Nge hnei Nyidrëti hna huujëne la Nekö i Nyidrëti ka cas, matre amelene la itre matra i Adramu, me aijijë angatr troa mele epin palua.​—Ioa. 3:​16.

TRO LA AKÖTRESIE KA NYIPICI A EATRËN LA ITRE HNA THINGEHNAEAN

6. Nemene la hnei Iehova hna qaja thupene la icilekeu e Edrena?

⁶ Hnene “lo un ekö, lo hna hëne ka hape, Diabolo me Satana”a hna uku Adramu me Eva troa icilekeu me Akötresie. (Hna Am. 12:9; Gen. 3:​4, 5; Ioa. 8:​44) Matre hnei Iehova hna ameköti angeic, me qaja ka hape, tro kö a apatrenyi angeic e ketre ijin. (Gen. 3:​15) Ngo alanyim la itre ka troa xötrethenge Satana me ujë tui angeic. Ame pe, hetre itre xane kö ka troa fedr koi Iehova me mele nyipici koi Nyidrë.

7. Drei la ka xötrethenge Diabolo, nge nemene la pun koi angatr?

⁷ Ame la itre ka xötrethenge Satana Diabolo, ke kolo itre angela ka icilekeu me itre atr ka xele ma drei Akötresie. Pine laka, angatr a icilekeu memine la aja i Akötresie, matre ce angatr me Satana, nge itre matra i angeice hë angatr. Ngo, tro ha apatrenyi Satana me itre sinexöle i angeic ngöne la ijin hnei Iehova hna sa.​—Dan. 2:​44; Roma 16:20.

8. Nemene la hnei Iesu hna kuca lo 1914? (Goeëne ju fe la itre foto.)

⁸ Hnauëne laka xecie koi së ka hape, tro kö a apatrenyi Satana me itre sinexöle i angeic? Ame lo 1914, hnei Iesu hna isi me Satana me itre dremoni, nge hnei nyidrëti hna ukapië angatr a tro celë fen. (Hna Am. 12:​7-9) Ngacama hna isi e hnengödrai, ngo drenge hi la fen la itre thangan. Öni Tusi Hmitrötr, “Ekölö hi ni la ihnadro me hnagejë, ke hna ukapië Diabolo koi nyipunie, nge atraqatr la trenge elëhni i angeic, ke hohopatre pe hi la ijine i angeic.” (Hna Am. 12:12) Qaane lo 1914, Satana a thelejëne matre tro la itre atr asë a nyixöle i angeic. Celë hi matre kola jole catre la fen. Ngo, easenyi hë tro Iesu a “ngaane la itre ithupëjia” me nyidrë. Nge, tro ha apatrenyi Satana me itre sinexöle i angeic. (Hna Am. 6:2) Tro Iesu e cili a ahmitrötrëne la ëje i Iehova. (Sal. 45:​4-6) Nge tro hë la nöjei atr a atre ka hape, Iehova hi la Akötresie ka nyipici!​—Ezek. 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

AKÖTRESIE KA NYIPICI A ACASINE LA ITRE KA HNIIN LA NYIPICI

9. Drei la hnei Iehova hna acasine enehila?

⁹ Qëmekene tro Iesu a ngaa Satana, Iehova a “acasine la itre ewekë asë thei Keriso, itre ewekë e hnengödrai me e celë fen.” (Efe. 1:​10) Ame la “itre ewekë e hnengödrai,” ke kola qaja la itre keresiano hnei Iehova hna iën matre ce musi me Iesu e hnengödrai. Nge ame la ‘itre ewekë e celë fen’ ke, kola qaja la itre atr ka troa mel epine palua ngöne la paradraiso e celë fen. Angatr asë a nue trengecatr matre qaja amamane la itre trengathoi Satana, me amamane la nyipici kowe la itre ka ajan.

10. Iehova a xatuane tune kaa la itre atr troa atre la nyipici? (Hna Amaman 14:​6, 7)

¹⁰ Iehova a acasine la itre atr ka hniin la nyipici jëne la huliwa ne cainöj laka, pëkö ketre huliwa ka tun qan ekö utihë enehila. (E jë la Hna Amaman 14:​6, 7.) Ngacama Iehova a up la itre atr troa cainöjëne la maca ka loi, ngo itre angela mina fe a acasine la itre atr ngöne la itre ekalesia. Jëne la huliwa ne cainöj, easa amamane la itre ini thoi hna tro fë hnei Babulona Atraqatr, ene la itre hmi ka thoi. Qan ekö, Satana a nyijëne ej matre silitrengathoi Iehova. (Hna Am. 18:​2, 4) Easenyi hë matre apatrene pi la itre hmi ka thoi, nge tro hë la Akötresie ka nyipici a kapa la lolo me iatrun.​—Hna Am. 17:16.

11. Easa wangatrehmekune tune kaa la itre hlue i Iehova?

¹¹ Ame la itre ka hniin la nyipici, ke itre ka xulu qa ngöne la nöjei nöj, matre isa aqane mele i angatre kö, ka trenamo itre xan, nge ame itre xan ka pë mo. (Hna Am. 7:​9, 10) Ame la angatr a dreng “la maca ka loi,” wangatrehmekune hi angatr la nyipici, nge madrin angatr troa ce tro memine la nöje i Iehova. (Mar. 13:10) Mama hnyawa ha enehila la eisapengönene la itre ka nyihlue i Iehova thenge la aja i Nyidrë me itre xan. Öni Malaki perofeta lo: “Tro hmaca epuni a öhne la eisapengönene la atr ka meköt me ka ngazo, memine la eisapengönene la atr ka nyihlue i Akötresie me ka tha nyihlue i nyidrëti kö.” (Mal. 3:​18) Jëne la aqane ujë i angatr memine la huliwa ne cainöj, itre hlue i Iehova a amamane ka hape, angatr a nyihluene la Akötresie ka nyipici.

12. Kola eatrën tune kaa la aja i Iehova hnene la huliwa ne cainöj?

¹² Ame la easa cainöjëne “la maca ka loi ne la Baselaia,” easë hi lai a drengethenge la ketre hna amekötin hnei Iesu, me eatrëne la ketre hna perofetan. (Mat. 24:14; 28:​18-20) Nemene la thangan? Ame ngöne la fen asë, alanyimu la itre atr ka xötrethenge Keriso. Nge celë hi ka aijijë angatr troa nyihluene la Akötresie ka nyipici utihë epine palua. Ketre manathith ka tru la troa eatrëne la aja i Iehova!

MEJIUNE JË KOWE LA ITRE DRAI ELANY

13. Drei la hnei Satana hna icilekeu memin, nge pine nemen?

¹³ Ka elëhni Satana ke, atre hi angeic ka hape, “hohopatre pe hi la ijine” matre apatrenyi angeice pi. (Hna Am. 12:​12, 13) Angeic a lep la itre hlue i Iehova e celë fen, itre hna iën troa mus ngöne la Baselaia, ene la “itre ka trongëne la itre hna amekötin hnei Akötresie, nge hna ahnithe kow la huliwa ne anyipici Iesu.” (Hna Am. 12:17; 14:12) Angeice fe a qanangazone la itre ka xatua angatr me ka catre cainöj.

14. Nemene la ewekë ka troa traqa la Satana a thel troa lep la nöje i Iehova? (Wange ju fe la foto.)

¹⁴ Thupene la kola apatrenyi Babulona Atraqatr, tro la itre sinexöle i Satana a thel troa lep la nöje i Iehova. E cili hi la kola nyiqane la isi Amagedro. (Hna Am. 16:​13, 14, 16) Tro Iesu memine la trongene isi ne hnengödrai a amelene la itre hlue i Iehova, me apatrene palua la fene i Satana. (Hna Am. 19:​19-21) Ame asë hi la itre atr ka thoi, me ka ngazo thiina, me ka iaö, ke tro asë hi angatr a patr. (Hna Am. 21:8) Ame e cili, tro la nöjei atr a atre laka, Iehova hi la Akötresie ka nyipici, me ka meköt.

15. Hnauën laka, hetre mejiune së kowe la itre drai elany? (Isaia 65:​16, 17) (Wange ju fe la foto.)

¹⁵ Ame enehila, tha ka casi kö la itre atr. Ngo Iehova a kuca matre tro la itre hlue i Nyidrë a cas. Nyidrëti a acasine la itre ka hniin la nyipici. Nge pëkö ka atreine sewe Nyidrë troa amanathithine la itre hlue i Nyidrë, memine la huliwa ne cainöj. (E jë la Isaia 65:​16, 17.) Matre loi e tro sa hetre mejiun kowe la itre drai elany. Kola ithuecatre koi së hnene la hna qaja hnei Paulo aposetolo ngöne Roma 8:​38, 39: “Thatreine kö la mec, me mel, me angela, me mus, me itre ewekë enehila, me itre ewekë elany, me men, me edraiën, me ejuin, me nöjei ewekë hna xup, troa thepe së qa ngöne la ihnimi Akötresie ka mama jëne Iesu Keriso Joxu së.”

16. Pine nemene matre eö a mejiune koi Iehova?

¹⁶ Nyimu kepin matre easa mejiune koi Iehova, Akötresie ka nyipici. Nyidrëti la Atre Xupi së, nge tru la ihnimi Nyidrë koi së. Tru la itre atr ka nyiqane nyihlue i Iehova, matre kola elë la etrune la ka alanyim atraqatr. (Isa. 60:22; Zaka. 8:​23) Ketre, atre hi së laka, ka eatrëne pala hi Nyidrë la itre hnei Nyidrë hna thingehnaean, nge easenyi hë tro Nyidrëti a apatrene la itre trengathoi me itre nyinyithiina i Satana. Celë hi matre tui Dravita, easa thith ka hape: “Atrunyi Iehova Akötresieti jë, . . . Ke nyidrëti hmekuje hi la atre kuca la itre huliwa nyine hain. Epi atrune la ëje i nyidrëti ka lolo uti hë epine palua, nge epi tiqa pi la fene hnengödrai asë hnene la lolo i nyidrë.”​—Sal. 72:​18, 19.