Mejiune Jë Kowe La Atr Ka Sisitria Ne La Fen

1. Nemene la itre jol ka traqa koi Iobu?

TRU catr la itre jol ka traqa koi Iobu, ketre atr ka lapaun. Hna meci asë la itre nekö i angeic, me itre hlue i angeic, nge hna tithi angeic hnei mec. Ketre, hna atrekënö me humuth la itre öni i angeic. Nge kola qaja angazo angeic hnei itre xan. Ame la kola traqa hnene la itre “sinee” i angeic, ke pëkö ithuecatr hnei angatr hna hamën. Göi qaja fe hnene la föi angeic ka hape, “Eji Akötresieti jë, nge meci pi.” (Iobu 2:9; 15:​4, 5; 19:​1-3) Maine ju, tro la itre ewekë cili a thë la mejiune i Iobu koi Akötresie, nge tro angeic a mekun ka hape, tha Nyidrëti kö a thupëne la itre hlue i Nyidrë.

2-3. Ame la easa akötr, nemene la itre mekun ka traqa koi së, nge nemene la hna troa ini së hnene la tusi Iobu?

² Ame itre xaa ijin, easë fe a cil kowe la itre jol ka tru, ka tupath la mejiune së koi Iehova. Eje hi, easa melëne “la itre ijin akötr hna thatreine xomihnin.” (2 Tim. 3:1) Matre ame la kola traqa itrai la itre jol, kösë itre ej a ahacenyi së, nge thatreine kö së cile catr. Nge easë fe a mekun e cili ka hape, tha Iehova kö a meku së.

³ Maine hna hane fe traqa koi eö la itre mekune cili, ke the dekurage kö. Hnei Iobu hna öhn laka, Iehova a amelene la itre ka nyipici koi Nyidrë. Tui Iobu, ijije hi tro sa acatrene la mejiune së koi Iehova. Tro la tusi Iobu a xatua së jëne la lue ini. Ame la hnapan, Iehova hmekuje hi la Atre Ka Sisitria ne la fen. Hnaaluen, ijiji Nyidrë hi troa huliwane la itre ewekë ne fen matre eatrëne la aja i Nyidrë, me thupë së matre tro pala hi a lolo la imelekeu së me Nyidrë.

HNEI SATANA HNA HANE LÖ KOI ANGATR

4. Drei fe la ka traqa, lo Iehova a icasikeu memine la itre nekö i Nyidrë?

⁴ Ame la ketre drai, hnene la “itre neköne la nyipi Akötresie” hna icasikeu me Nyidrë. Öni Tusi Hmitrötr: “Hnei Satana fe hna lö koi angatr.” (Iobu 1:6) Kolo petre hi a mama ngöne la Tusi Hmitrötr la hnëewekë “Satana,” ene “la Atre Icilekeu” maine ithupëjia me Iehova. Ame ngöne la ijine cili, tha nekö i Akötresie hmaca kö Satana. Angeice hë la ithupëjia me Iehova, memine la fami i Nyidrë e hnengödrai me e celë fen. Eje hi, ame la hnei Iehova hna qaja ngöne Genese 3:​15, ke kola amamane ka hape, tha Satana hmaca kö a sine la fami i Nyidrë e hnengödrai, ene “la föe” ka troa hamën la “matran.”

5. Nemene la hna ini së hnene la icasikeu ka ej e hnengödrai?

⁵ Hnei Iehova hna amë ngöne la Tusi Hmitrötr la icasikeu cili, ke aja i Nyidrë tro sa atre la hna qaja. Kola amamane hnene la itre trengewekë i Satana ka hape, angeice hi la atre thoi ka pë hni. (Iobu 1:9; wange ju fe la Hna Amaman 12:10.) Kolo fe a akeukawanyi së hnene la hna melëne celë. Ej a amamane ka hape, ka meköt la aqane huliwane Iehova la mene i Nyidrë. Ketre, Nyidrëti la ka Tru Trenge Men, nge ka atreine musinën me amekötine la itre ka mel.

IEHOVA LA KA MUS

6. Tune kaa la aqane amamane Iehova laka, Nyidrëti la ka xomiujine la icasikeu e hnengödrai? (Iobu 1:​7, 8)

⁶ E jë la Iobu 1:​7, 8. Iehova kö la ka xomiujine la icasikeu. Hnei Nyidrë hna hnying koi Satana ka hape: “Hnei ö kö hna öhnyi Iobu lo hlueng?” Atre hi Iehova laka, öhne hi Satana la pengöi Iobu, nge aja i angeic troa lepi Iobu. Tro sa ce wang la aqane huliwane Iehova la mene i Nyidrë matre xatua Iobu.

7. Thenge la Iobu 1:​10, 11, nemene la hnei Satana hna qaja göne la itre hlue i Iehova?

⁷ E jë la Iobu 1:​10, 11. Iehova la Atr Ka Sisitria ne la fen, me ka Tru Trenge Men, matre Nyidrëti a huliwane la mus me mene i Nyidrë thenge la aja i Nyidrë. (Iere. 32:17; Dan. 4:​35) Ngo öni Satana ka hape, Iehova a huliwane menune la musi Nyidrë. Ame koi angeic, Iehova a hamëne la itre ewekë ka lolo kowe la itre atr, tui Iobu, matre tro angatr a nyihlue i Nyidrë. Nge ame la itre atr, angatr a nyihlue i Nyidrë göi thupen. Nemene la hnei Iehova hna kuca la kola silitrengathoi Nyidrë hnei Satana?

8-9. Nemene la hna amekötin hnei Iehova koi Satana, nge pine nemen? (Iobu 1:​12) (Wange ju fe la foto.)

⁸ E jë la Iobu 1:​12. Hnei Iehova hna nue Satana troa anyipicine la hnei angeic hna qaja, ngo hetre ifego hnei Nyidrëti hna amë. Hnei Nyidrëti hna amekötine ka hape: “The ketri [Iobu] pi kö!” Qëmekene la itre angela asë ka sine la icasikeu, hnei Nyidrëti hna hamëne la itre hna amekötin koi Satana. Pëkö nyine tro Satana a qaja e koho hun. Tro pe angeic a trongëne lai hna amekötin. Eje pala hi enehila. Eje hi, hnei Iehova hna huliwane la mus me mene i Nyidrë troa thupë Iobu, me amamane ka hape, Nyidrëti la Akötresie ka meköt me ka ihnim.

⁹ Ngo göti ju kö Satana. Hnei Iobu hna mele nyipici koi Iehova. (Iobu 1:​22) Ngazo pe, tha tro kö Satana lo Atre Icilekeu a nue Iobu.

10. Hnauëne la Iehova a nue Satana troa lepi Iobu hmaca? (Iobu 2:​2-6)

¹⁰ E jë la Iobu 2:​2-6. E thupen, hnei Satana hna isine troa thë la lapaune i Iobu. Öni Satana, tro Iobu lai a eji Akötresie, matre tha tro kö angeic a traqa kowe la mec. Matre hnei Iehova hna nue Satana troa lepi Iobu, ngo hetre hnei Nyidrëti hmaca hna amekötin. Öni Nyidrë: “Wange kö eö la mele i angeic!” Matre hnei Satana hna trongëne hnyawane la itre hnei Nyidrë hna amekötin. Thatreine kö angeic elëhun. Iehova e cili a amamane ka hape, pëkö ka Sisitria hui Nyidrë e celë fen.

IEHOVA A APATRENE LA ITRE AKÖTRE I IOBU

11. Tune kaa la aqane amanathithi Iobu hnei Iehova, thupene la hna apëne la itre akötre i angeic? (Iobu 42:​10-​13)

¹¹ E jë la Iobu 42:​10-​13. Mama ha koi nöjei atr laka, tha tro kö Iobu a nuetriji Iehova, matre hnei Nyidrë hna sewe Satana troa lepi Iobu. Hnei Iehova hna apëne la itre akötre i angeic. Ame e cili, thatreine kö Satana troa catre fë mekun, me elëhun la hna amekötin hnei Iehova. Eje hi, tha ijiji Satana hmaca kö troa lepi Iobu, lo atr hna hnim catrëne hnei Iehova.

12. Nemene la hnei Iehova hna kuca kowe la itre hlue i Nyidrë ka mejiune kowe la mene i Nyidrë?

¹² Ame ngöne la itre drai ne la pun, hnei Iehova hna huliwane la mene i Nyidrë, matre troa amelene la itre hlue i Nyidrë. Ame lo 1945, traqa koi 230 lao Temoë Iehova hna folosane ngöne la ketre camps i Nazi, nge mele ju kö angatr qa ngöne lo hna hape, marche de la mort. Thupene la ka traqa koi angatr, hane hi la hnei angatr hna cinyanyin: “Ketre itupath ka tru la hnei eahun hna melën. Ceitu eahun memine lo itre hna amelen qa ngöne lo fur ka idreuthi catr, göi tha pupui eë fe angatr. . . . Hna atiqanyi angatre pe hnene la trengecatr me mene i Iehova. Mingöminge catr la aqane amele hun qa ngöne la hnaope i liona, matre casi hi la aja hun, ene la troa nyihlue i Iehova uti hë epine palua. Celë hi lai manathith ka tru koi hun.”​—Wange ju fe la Daniela 3:​27; 6:​22.

13. Nemene la ka xecie koi së la easa cil kowe la itre jol? (Goeëne ju fe la itre foto.)

¹³ Ijije fe tro sa melëne la ketre jol, kösë easë hnine la hnaope i liona. (1 Pet. 5:​8-​10) Ame itre xaa ijin, tro sa hleuhleu, me hnying ka hape, ‘Eu la troa patre la jole celë?’ Ame ngöne la itre ijine cili, loi e tro sa mekune hmaca lo ka traqa koi Iobu. Ijije hi tro sa mejiune kowe la atreine i Iehova troa apatrene la itre akötre së. Tro kö Nyidrëti a apatren enehila, maine ngöne la fene ka hnyipixe. Ase hë Nyidrëti sa la drai tro Nyidrëti a apatrene la fene celë, nge tha tro kö Nyidrëti a uth la drai cili!

TRU LA IHNIMI IEHOVA KOWE LA ITRE HLUE I NYIDRË

14-15. Nemene la hnei Iehova hna pi hamëne kowe la itre hlue i Nyidrë ka mele nyipici, nge pine nemen? (Iobu 14:15) (Wange ju fe la icetrön.)

¹⁴ E jë la Iobu 14:15. Tru catr la ihnimi Iehova kowe la itre hlue i Nyidrë ka mele nyipici. Matre e traqa ju mec la ketre, tru la aja i Nyidrë troa amele angatr hmaca. Jëne la melehmaca, tro Nyidrëti a nyihnane la akötr ka xulu qa ngöne la mec, hnene la madrine atraqatr.​—Isa. 65:17.

¹⁵ Hnei Iobu hna mel ngöne la fen hna musinën hnei Satana. Ngo Tusi Hmitrötr a qaja ka hape, hnei Iehova hna apatrene la sine meci angeic, nge tru hmaca kö la hnei Nyidrëti hna amanathithi angeic e thupen hune ekö. Ka pëkö pengöne la itre manathithi cili, hune la hnei Iobu hna troa kapa elanyi ngöne la paradraiso. Iehova e cili a amamane ka hape, aja i Nyidrë tro la itre hlue i Nyidrë a mele madrin. Eje hi, ame elany, tro Nyidrëti a aijijëne la itre ka mele nyipici troa mel utihë epine palua ngöne la fen hna troa aparadraison. (Hna Am. 21:​3, 4) Iehova la Atr Ka Sisitria ne la fen, nge aja i Nyidrë troa kuca lai. Tro la mekune cili a akeukawanyi së la easa cil kowe la itre jol!

16. Nemene la ketre kepine matre easa mejiune koi Iehova?

¹⁶ Thupene la itre macatre ne mele madrin, hna mec hnei Iobu. Ngo ijiji Iehova troa apatrene la mec, ke pëkö sai Nyidrë. Nyidrëti la Atre Ka Sisitria ne la fen, me ka Tru Trenge Men. (Dreut. 32:39) Nge pëkö ketre atr ka troa sewe Nyidrë troa amelene hmaca la itre hnei Nyidrëti hna hnim. Nge tro kö Nyidrëti a amele angatr ngöne la ijine hnei Nyidrëti hna sa.​—Roma 8:​38, 39.

CATRE JË MEJIUNE KOI IEHOVA

17. Nemene la ka amamane laka, thatreine kö Satana troa apatrene la itre hlue i Iehova?

¹⁷ Kola ithuecatre koi së hnene la tusi Iobu troa mejiune koi Iehova. Easa olene koi Iehova, ke tha hnei Nyidrëti kö hna nue Satana troa apatrene la itre hlue i Nyidrë! Ame enehila, traqa koi 9 milio lao hlue i Iehova. Celë hi ka jelenyipicine laka, Iehova la Atr Ka Sisitria ne la fen, me ka Tru Trenge Men. Hnei easë hna öhne laka, tha hune kö la itre jia ne isi hna kuca nyine akötrë së. (Isa. 54:17) Hnene la itre mus ka catr, me itre he ne hmi hna thele troa apatrene la nöje i Iehova, ngo thatreine kö angatr. Ketre, pëkö ka atreine sewe së troa qeje Iehova, me amamane laka, atre thoi me ihumuth lae Satana. Goi thatreine fe la mec troa acilë së, ke tro kö Iehova a amelene hmaca la itre ka nyipici koi Nyidrë.​—Hos. 13:14.

18. Hnauëne la easa mejiune kowe la itre drai elany?

¹⁸ Maine tro sa lapa mekun la hna melëne hnei Iobu, tro lai a acatrene la mejiune së laka, tro pala hi Iehova a ce me easë, pëkö ka troa axouenyi easë. Ame ngöne la ijine akötr atraqatr, tro Satana memine la trongene isi angeic a mekun ka hape, pëkö ka thupëne la nöje i Akötresie, matre tro angatr a thel troa lepi së. Ngo tune lo ewekë ka traqa ngöne la hneijine i Iobu, tro Iehova a huliwane la men atraqatre i Nyidrë. Tha tro kö Nyidrëti a nue Satana troa lep apatrenyi së. Eje hi, easenyi hë tro Nyidrëti a apatrene la itre akötr hna axulun hnei Satana. Nge troa kuië Satana me itre dremoni ngöne la hnaop ka jui nge ka thatrehmekun koi 1000 lao macatre. (Luka 8:​31; Hna Am. 20:​1-3) E thupen, troa apatrene palua Satana me itre sinexöle i angeic. (Hna Am. 20:10) Tune la hnei Iehova hna perofetan, troa waja fica la he i angeic.​—Gen. 3:​15; Roma 16:20.

19. Nemene la manathith hna troa kapa hnene la itre ka mejiune koi Iehova? (Wange ju fe la foto.)

¹⁹ Itre hlue i Iehova a lapa treqene la nyipi mel, memine la madrin hnei Nyidrëti hna thingehnaean. Thatreine kö së mekun la elolone la mele i easë elanyi ngöne la fene ka hnyipixe. Öni Iehova: “Hanawang! Eni a ahnyipixene la nöjei ewekë asë.” (Hna Am. 21:5) Kola hapeue lai? Thatreine hë Satana me itre dremoni akötrë së, maine ukune la itre atr troa kuca la itre ewekë ka ngazo, tune la aqane kuca i angeic qan ekö ngöne la hlapa e Edrena. Matre uqa hnyawa ha së! Tro hë sa meköle hnyawa e jidr, ke patre hë la fene i Satana me itre ewekë ka ajolë së. Ame ngöne la fen asë, tro la itre ka mel qa ngöne la isi Amagedro a öhne la kola aloine la itre ka wezipo. Nge troa nyiqane amelene la itre sinee së ka mec. Tro hë së lai a öhn la mel hnei Iehova hna hnëkëne koi së!

20. Nemene la aja së?

²⁰ Ame ngöne la itre drai ne la pun, easa cile kowe la itre jol, ngo loi e tro sa catr mele nyipici koi Iehova. Matre aja së troa catre mejiune koi Iehova, me drengethenge Nyidrë. Amamane jë së la ihnimi së koi Nyidrë, me jelethoi Satana. Catre jë së lapa treqene la mel elanyi fene la musi Iehova, Atr Ka Sisitria ne la fen, ke tru la aja i Nyidrë troa amanathithine la itre hlue i Nyidrë!