Aqane Tro Sa Goeëne La Itre Itupath

1-2. Nemene la nyine tro sa kuca matre elëhun la itre itupath? (Wange ju fe la foto.)

HAPEU, eö kö a melën la ketre jol, maine kola icilekeu me eö hnei fami, maine qanangazo eö pine la lapaune i eö? Eö kö a wezipo maine utipië trootro? Maine pena, hna mecitriji eö hnene la atr hnei eö hna hnim? Tune la itre xaa hlue i Iehova, “tru hnei akötr me hleuhleu” ka traqa koi eö.​—Sal. 90:10.

² Maine aja së troa elëhune la itre jole cili, nyipiewekë tro sa waiewekë tui Iehova. Pine nemen? Pine laka e tha goeëne kö së la itre jol tune la aqane goeëne Iehova, tha tro kö lai a mama koi easë la aqane tro sa elëhun itre ej. Ceitune hi lai memine la easa xomi loto. Maine ka dro lai pare-brise ke, tha tro kö sa öhne la itre ewekë e kuhu gojeny. Ngo e ka porop, canga tro hi sa atre la nyine tro sa kuca matre neëne la jol. Ame ngöne la tane mekune celë, tro sa ce wang (1) la aqane tro sa goeëne la itre itupath ka traqa koi së, (2) la itre thangan ka ngazo e tha xome kö së la aqane goeëne i Iehova, nge (3) la nyine tro sa kuca matre troa hetrenyi la aqane waiewekë i Iehova.

AQANE TRO SA GOEËNE LA ITRE ITUPATH

3. Pine nemene matre tro pala hi a hetre jol ngöne la fene celë?

³ Tro pala hi a hetre jol ngöne la fene celë. Pine laka itre atr ka tha pexeje kö së, nge Satana la ka musinëne la fen, matre tro pala hi a traqa koi së la itre jol. Ketre, easenyi hë la pun, matre kola elë la etrune la itre hulö, nge kolo fe a ngazo catr la thiina ne la itre atr. (Mat. 24:8; 2 Tim. 3:​13) Maine tro Iehova a nyinyine la itre jole celë, ke kösë Nyidrëti a xatua Satana troa musinëne la fen. Pine laka Satana la ka mus, kola traqa koi së asë la itre “ijine akötr.”​—A. Cai. 9:​12.

4. Nemene la itre xaa itupath ka traqa kowe la itre hlue i Iehova?

⁴ Easë fe a akötr, ke easa xötrethenge Iesu. Anyimua qaja Iesu kowe la itretre dreng laka, troa axösisi angatr pine la lapaun. (Mat. 24:9; Ioa. 6:2) Celë hi matre, tha sesëkötre kö së la kola axösisi së. (1 Thes. 3:​3, 4) Ketre, ame la easa cile catr, ke kolo hi lai a amamane ka hape, easë ngöne la gojenyi ka tro kowe la mele ka pë pun. Nge easë fe a amamane ka hape, hnei easë hna iën troa nyihlue i Iehova, nge ka thoi Satana. Eje hi, Satana a adrone la ëje i Iehova, me qaja ka hape, itre atr a nyihlue i Nyidrë göi thupen. Angeic a axösisine la itre hlue i Akötresie, matre anyipicine la hnei angeic hna qaja. (Iobu 1:​9-11) Ngo ame la easa cile catr ngöne la itre itupath, easa amadrinë Nyidrë.​—It. Ed. 27:11.

5. Nemene la hna ini së hnei Atre Cainöj 7:​13, 14? (Goeëne ju fe la itre foto.)

⁵ Iehova a nue tro la itre ewekë ka ngazo a traqa koi së. Tha Iehova kö a ngazo thiina maine tupathi së hnene la itre ewekë ka ngazo. (Iako. 1:​13) Ngo öni Solomona joxu ka hape, ame la “ijine akötr” ke, “huliwa ne la nyipi Akötresie.” (E jë la Atre Cainöj 7:​13, 14.) Kola hapeue lai? Ame ngöne la itre xaa xötr ne la Tusi Hmitrötr, kola qaja ka hape, Iehova a kuca la ketre ewekë, ngo Nyidrëti pe a nue la ewekë cili troa traqa. Matre nemene la hna ini së hnene la hna qaja hnei Solomona ngöne Atre Cainöj 7:​13, 14? Hnapan, itre atr ka tha pexeje kö së, nge easa mel ngöne la fene i Satana, matre hetre ijine loi me ijine akötr. Haawe, ame la kola traqa la “ijine loi,” loi e tro sa madrin me olene koi Iehova, ke ahnahna lai qaathei Nyidrë. Ketre, Solomona a amekunë së laka, thatre kö së “la ka troa traqa elany.” Matre thatre kö së ka hape, tro kö a lolo la drai elany, maine ngazo. Eje hi, kola traqa la jol kowe la itre atr ka loi me itre atr ka ngazo.

6. Hnauëne la Iehova a nue së kowe la itupath? (Heberu 12:​7, 11)

⁶ Ame la easë a cil kowe la itupath, Iehova a ini së troa mejiune koi Nyidrë, ngo tha kowe kö la sipu trengecatre së. Öhne hi Iehova la itre jol ka traqa koi së. Nge ame la easa akötr, Nyidrëti fe a akötr, nge aja i Nyidrë troa xatua së. Ngacama Nyidrëti a nue së troa “tro ngöne la hnathup ne la ahnuene la mec,” ngo Nyidrëti pala hi a eatrongë së, me hnimi së, me hamë së la trengecatr ka ijij. (Sal. 23:4) Ketre, itre itupath a xatua së troa öhn la itre thiina së nyine troa saze. Nge jëne la ixatua i Iehova, kola lolo la itre thiina së. (E jë la Heberu 12:​7, 11.) Tui Iobu, nyipiewekë tro angeic a hetre ipië. Tha Iehova kö la qane la itre jol ka traqa koi Iobu. Ngo hnei Nyidrëti hna nue itre ej troa traqa koi angeic, matre ini angeic. (Iobu 42:​1-6) Atre hi easë laka, tha tro kö Iehova a nue la ketre jol ka troa thë la imelekeu së me Nyidrë. Tro “pala hi [së] a hun,” e tro sa mele nyipici ngöne la itupath.​—Roma 8:​35-39.

7. Pine nemene matre ijiji eö hi troa madrin la kola axösisi eö pine la lapaun?

⁷ Ijije hi tro sa madrin ngacama kola axösisi së. Maine kola axösisi eö pine la lapaun, the mekune kö ka hape, tha madrine kö Iehova koi eö. Kolo pe lai a amamane ka hape, Nyidrëti a kepe eö. (Mat. 5:​10-12) Maine celë hi aqane goeëne eö la iaxösisi, tro hë eö lai a madrin la kola axösisi eö, tune lo itre aposetolo ekö. (It. Hu. 5:​40-42) Ketre, tro la aqane ujë i eö a ukune la itre xan troa pi atre la nyipici me “atrunyi Akötresie.” (1 Pet. 2:​12) Tui Iosefa, ijiji eö hi troa madrine ngöne la itupath.​—Gen. 39:​3, 23.

8. Nemene la ka xatua së troa cile catr ngöne la itupath?

⁸ Tro kö a patr elanyi la itre itupathi së. Kola amamane hnene la hna melën hnei Iobu laka, tha ka huti kö la itre itupath. Eje hi, “tru hmaca kö la hnei Iehova hna amanathithi Iobu enehila hun ekö.” (Iobu 42:12) Ketre tun, tha nyine qaja kö la aqane tro Iehova a amanathithi së elanyi ngöne la fene ka hnyipixe. Ka hohopatre hi me iakötrë la mele së enehila. Ngo ame kö elany, tro sa mele madrin utihë epine palua. Celë hi mekun ka xatua së troa cile catr utihë la pun!​—Mat. 24:13.

E KA NGAZO LA AQANE GOEËNE SË LA ITRE JOL

9. Nemene la pun koi së, e ka ngazo la aqane waiewekë së göne la itre itupath?

⁹ Ame la kola traqa la itre itupath, tha tro kö sa mekun menun koilo, wanga tro sa ahacenyi së. Maine jë, tro sa mekun ka hape, Iehova la qane la itre akötre së. Ame lo xötrei, hnei Iobu hna mekun ka hape, qaathei Akötresie la itre ka traqa koi angeic. Ame la pun, hnei angeic hna “thele troa pi meköt hui Akötresie.” (Iobu 32:2) Tui Naomi, hnei angeic lo hna mekun ka hape, Iehova la ka axulune la itre akötre i angeic. (Rut. 1:​13, 20, 21) Maine tha saze ju Iobu me Naomi la aqane waiewekë i nyidro, tro lai a thë la aqane imelekeu i nyidro me Iehova. (It. Ed. 19:3) Hnei Nyidrë hna xatua nyidro troa saze la aqane waiewekë i nyidro, me amanathithine la aqane mele nyipici i nyidro.

10. Nemene la hne së hna mekun la kola traqa la itre itupath?

¹⁰ Ngacama atre hi easë ka hape, tha Iehova kö la qane la itre itupath, ngo tro së lai a nyiqane mekune laka, tha Nyidrëti kö a sikusiku së. Ijije hi tro la aqane waiewekë cili a akucakucanyi së. (It. Ed. 24:10) Hna traqa la itre jol koi Dravita joxu me Habakuka perofeta, matre hnei nyidro hna hane hnying ka hape, Iehova kö a dreng la itre thithi nyidro. (Sal. 10:1; Habak. 1:2) Ngo tha cile kö nyidro troa catre thith. Matre hnei Iehova hna sa la itre thithi nyidro me xatua nyidro. Nge celë fe hi hnei Nyidrë hna troa kuca koi eö.​—Sal. 10:17.

11. Nemene la ka troa traqa e ka ngazo la aqane goeëne së la itre itupath?

¹¹ Maine ka ngazo la aqane goeëne së la itre itupath, tro së lai a sesëkötr la kola traqa la ketre jol, maine mekun ka hape, tha ka meköti kö la ka traqa koi së. (1 Pet. 4:​12) Tha trotrohnine kö la itretre dreng la kepin matre troa axösisin me humuthi Iesu. (Luka 18:​33, 34) Hnei Iesu hna qaja hnyawan la ka troa traqa koi nyidrë, ngo hnei Peteru hna wangacon. Matre hnei Iesu hna haji Peteru, ke tro la aqane waiewekë i angeic a sewe nyidrë troa kuca la aja i Iehova. (Mar. 8:​31-33) Thupene la kola humuthi Iesu, tha trotrohnine pala kö la itretre dreng la kepin matre hna humuthi nyidrë. Ngo tha cile kö Iesu troa xatua angatr. Thupene la kola amele nyidrëti hmaca, hnei nyidrë hna “qejepengöne hnyawa koi [angatr] la itre hna Cinyihan,” me amekötine la aqane waiewekë i angatr göne la kepin matre hnei nyidrëti hna akötr. (Luka 24:​25-27, 32, 44-48) Maine tro angatr a lapa mekun la itre ini i Iesu, tro lai a hnëkë angatr kowe la itre itupath ka troa traqa e thupen. Loi e tro sa lapa mekun la hna qaja hnei Tusi Hmitrötr ka troa hnëkë së kowe la itre itupath.

12. E ka ngazo la aqane goeëne së la ketre jol, nemene la itre mekun ka troa traqa koi së?

¹² Maine ka ngazo la aqane goeëne së la itre jol, tro së lai a mekun ka hape, tha ka meköti kö la hna kuca koi së, nge pëkö nyin lai jol. Celë hi ka mama ngöne la ceitune i Iesu memine la itre ka huliwa ngöne la hnë traa vin. Tha ka madrine kö la itre xaa ka huliwa, ke ame koi angatr, tha hna nyithupei angatre hnyawa kö. Ngo önine la maseta kowe la ketre e angatr ka hape: “Sineeng, pëkö iwesitrë i nyiso.” (Mat. 20:​10-13) Hnei angatr hna eetr, ke ame koi angatr, tha ka meköti kö la hna kuca hnene la maseta. Angatr a mekun laka, tro la maseta a nyithupei angatr atrun, ngo tha celë kö lo hna axeciën. Ame enehila, itre xaa trejin a hleuhleu, me mekun ka hape, hetre ewekë ka tha meköti kö hna kuca. Maine jë, tha kapa kö angatr la ketre hnëqa ngöne la ekalesia, maine pena kola upi angatr troa nue la hnëqa. Nemene la nyine tro sa kuca matre troa goeëne la ketre jol tune la aqane goeëne Iehova?

NYINE TRO SA KUCA LA KOLA TRAQA LA JOL

13. Tune kaa së la kola traqa la ketre jol?

¹³ Atre hnyawa hi së la hna qaja hnei Tusi Hmitrötr göne la itre akötr. Maine jë, hne së hna amamane la itre xaa xötr kowe la itre atr ka melëne la itre jol. Ngo maine easë la ka melën la itre jol, hapeu, atreine kö së waiewekë ka loi? Maine jë easa mekun ka hape, Iehova a ameköti së, maine tha drenge kö Nyidrë la itre thithi së. Maine eje hi lai, nemene la nyine tro sa kuca?

14. Nemene la nyine tro eö a sipo Iehova la eö a cil kowe la itre jol? (Filipi 4:​13)

¹⁴ Sipo ixatua jë koi Iehova. Qaja jë koi Iehova la itre jol ka traqa koi eö, nge fe pi la hni i eö koi Nyidrë. Qaja jë koi Nyidrë la hnei eö hna ajan tro Nyidrëti a kuca. Sipo Nyidrëti jë fe la uati hmitrötr matre troa hetre trengecatr me inamacan troa cile catr. The thëthëhmine kö laka, hetre ketre aqane tro kö Iehova a sa la itre thithi eö. (Efe. 3:​20) Ijije fe tro Nyidrëti a up la itre angela me itre trejin troa xatua eö. (Sal. 34:7) Celë hi matre kapa ju la aqane xatua eö hnei Nyidrë. Tro Nyidrëti a hamën atrune la uati hmitrötr, matre xatua eö troa troa cil kowe la nöjei jol.​—E jë la Filipi 4:​13.

15. Nemene la ka troa xatua eö troa cil kowe la itre itupath? (Wange ju fe la foto.)

¹⁵ Catre jë acatrene la imelekeu i eö me Iehova. Maine jë, thupene la jol, tha ijiji eö hë troa huliwa koi Iehova tun ekö. Ngo catre jë kuca la hnei eö hna atrein. Ame la easa cil kowe la “itre akötr me itre jol,” loi e tro sa nyialiene la he së hnene la itre mekune i Akötresie. (Sal. 119:143) Haawe, loi e troa e Tusi Hmitrötr e nöjei drai, me inin ajuin, me lapa mekune ej. Catre jë cainöj, me sine la itre icasikeu, me hamë mekun. Ce tro lapa jë memine la itre trejin. Nge the lapa casi kö.​—It. Ed. 18:1.

16. Ame la easa akötr, nemene la itre mekun ka traqa koi së, nge tro sa apatrene itre ej tune kaa? (2 Korinito 10:​4, 5)

¹⁶ Lepetrije pi la luelu. Ame la kola traqa la itre jol, easa nyiqane mekun menune koilo göne la pengöi easë, me pengöi Iehova. Ceitune hi la itre mekune cili me “itre itra etë atraqatr.” (E jë la 2 Korinito 10:​4, 5.) Tro sa apatrene itre ej jëne “la atrehmekune qaathei Akötresie” ka mama ngöne la Tusi Hmitrötr, me ngöne la itre itusi së. Hapeu, easë kö a mekun e itre xaa ijin laka, tha madrine kö Iehova koi së? Haawe, lapa mekune jë la hna melën hnei Paulo aposetolo. Tru la itre jol ka traqa koi angeic lo angeic a cainöj trootro, ngo kolo pe lai a acatrene la mejiune i angeic laka, madrine catr Keriso koi angeic. (2 Kor. 11:​23-27) Easë kö a luelu laka, ase hë Iehova nue la itre ngazo së ekö? Maine eje hi, makëne jë la itre xötr ka amamane laka, Iehova a senge la itre ngazo së. (Isa. 43:25) E thupen, e jë la itre xötre cili me lapa mekun. (Sal. 119:97) Maine pena, hna traqa koi së maine ketre sinee së la ketre akötr ka tru. Matre ame enehila, easa mekune ka hape, tha Iehova kö a thupëne la itre hlue i Nyidrë. Haawe, thele jë la itre kepin matre Iehova a nue së troa akötr, memine la itre kepin ka amamane ka hape, Nyidrëti a thupën la aqane imelekeu së me Nyidrë. (Sal. 91:​9-12) Ketre, e jë la itre hna melëne hnene la itre trejin ka cile catr qëmekene la itre itupath ka tru.a

17. Nemene la nyine tro sa kuca la easa cil kowe la itre jol?

¹⁷ Tune kaa la drai enehila? Maine jë ketre ijine loi, ke pëkö jol ka tru ka traqa koi eö. Nga olene jë koi Iehova, nge lapa mekune jë la aqane hnimi eö hnei Nyidrë. (A. Cai. 7:​14) Ngo e traqa ju la ketre jol koi eö, mekune ju la hnei Iehova hna qaja ngöne la Tusi Hmitrötr, nge catre jë mejiune koi Nyidrë. Nge “tro kö nyidrëti a nyi jëne kötre i [eö], matre atreine jë [eö] cile hut.” (1 Kor. 10:13) Ngo tune kaa la aqane tro sa xatuane la itre trejin ka cil kowe la itre jol ka tru? Celë hi hne së hna troa ce wang ngöne la tane mekun ka troa xulu.