Acatrene Jë La Imelekeu i Epon Lue Trefën

1. Hnauëne la easa qaja ka hape, ahnahna qaathei Iehova la nyipi sinee?

AHNAHNA qaathei Iehova la troa hetre nyipi sinee. (Iako. 1:​17) Ame la nyipi sinee, ke ka hnimi easë me hnimi Akötresie. Angeic a ce madrin me easë, me ce treij me easë. Nge tha xou angeice kö troa hmekë së la easa nyiqane jea. Ketre sinee ka nyipici, nge ijije hi tro sa mejiune koi angeic. Celë hi matre easa qaja ka hape, itre sinee lai ka “amadrinëne la hni” së!​—It. Ed. 27:9.

2. Pine nemene matre nyipiewekë tro la lue trefën a acatrene la aqane imelekeu i nyidro? (Mataio 19:6)

² Nyipiewekë tro la lue trefën a tune la lue nyipi sinee. Tha tro kö nyidro a mekun ka hape, eje hë lai, ngo loi e tro pala hi nyidro a nue trengecatr matre acatrene la imelekeu i nyidro. Maine tha kuca kö nyidro, tro hë ketre a mekun ka hape, angeice cas, maine dekurag, maine elëhni. Ngo e tro nyidro a acatrene la imelekeu i nyidro, tro hë nyidro a cas kösë ca ngönetrei hë nyidro. (E jë la Mataio 19:6.) Ame ngöne la tane mekune celë, tro sa ce wang la aqane tro pala hi la lue trefën a acatrene la imelekeu i nyidro. Ngo tro sa pane ce wang la aqane tro la trejin ka tha faipoipo pala kö, a iën la trejin ka troa nyipi sinee i angeic utihë epin.

AQANE TROA IË FÖI EASË KA TROA SINEE SË UTIHË EPIN

3-4. Nemene la ka troa xatuane la ketre trejin troa öhne la ketre trahmanyi maine föe ka loi? (Itre Edromë 18:22)

³ Qëmekene troa xom la ketre mekun ka tru, nyipiewekë troa mekun la itre eloin me itre engazone la mekune cili, memine la thangane koi së. Thenge la mekun hne së hna axeciën, ijije hi tro sa mele madrin maine hleuhleu ngöne la mele së. Celë hi matre, nyipiewekë troa xomi ijine troa mekune hnyawa qëmekene troa axeciëne la ketre mekun ka tru.

⁴ Ame la easa ië föi easë, lo ka troa nyisinee së utihë epin, ke celë hi mekun ka tru nyine tro sa axeciën. Pine laka, qaathei Iehova la faipoipo, matre nyipiewekë tro sa thele ixatua thei Nyidrë. Aja i Nyidrë tro la trahmanyi a öhnyi föe ka loi, nge tro la föe a öhnyi trahmanyi ka loi. Nge atre kö Nyidrë la ka loi koi së isa ala cas. (E jë la Itre Edromë 18:22; Isa. 48:​17, 18) Tro la itre trepene meköt ka ej ngöne la Tusi Hmitrötr a xatuane la ketre trejin troa öhne la atr ka ihmeku me angeic.

5. Hnauëne laka, nyipiewekë troa thele föi easë thene la itre sinee i Iehova?

⁵ Ame la easa xomi bapataiso, easa nyisinee i Iehova. (Sal. 25:14) Matre, e eö a pi faipoipo, loi e tro eö a thel thene la itre xaa sinee i Nyidrë. (1 Kor. 7:​39) Eö hi lai a amamane ka hape, eö a wangatrune la itre trepene meköti Nyidrë, nge tro eö a öhn elanyi laka, ahnahna qaathei Nyidrë la föi eö. (It. Ed. 19:14) Ketre, tha tro kö a traqa koi eö la itre jol ka xulu qa ngöne la hna faipoipo memine la atr ka tha nyihlue i Iehova. (2 Kor. 6:​14) Tha tro kö eö a iatre memine la ketre atre ne fen, ngacama pëkö trejin hnei eö hna pi faipoipo memin ngöne la ekalesia. Nge the mekun kö ka hape, tro eö a huli angeic kowe la nyipici. Tha ka inamacane kö la aqane ujë cili!

6-7. Nemene la itre hnying nyine tro la itre ka iatre a isa hnyingën?

⁶ Tha hnene kö laka, ka bapataiso la ketre trejin, matre tro angeic a ketre trahmanyi maine föe ka loi koi eö. Maine eö a iatre me ketre, nyipiewekë tro eö a hnyinga ka hape: ‘Tune kaa la aqane ujë i angeic kowe la fami angeic? Angeice kö a meku itre xan me metrötr? Drei la itre sinee i angeic? Tune kaa la aqane ujë i angeic e isazikeu kö la mekuna i itre xan me angeic? Angeice kö a catre fë mekun maine kapa la mekuna i itre xan e pëkö trepene meköt hna ena? Tune kaa la aqane goeën angeic la mani?’

⁷ Hnyinge jë fe ka hape: ‘Ka catre kö la ihnimi angeic koi Iehova? Angeice kö a isine troa heetrëne “la itre thiina ka hnyipixe”? Tro kö angeic a xatua ni troa catre nyihlue i Iehova? Casi kö la itre objectif i nyio ngöne la huliwa i Iehova? Tro kö nyio elanyi a lue nyipi sinee utihë epin?’ (Kol. 3:​9, 10) Maine eö la ketre trejin föe, tro kö angeic a ketre sinee me he ne fami ka loi? (1 Kor. 11:3) Maine eö la ketre trejin trahmany, tro kö angeic a metrötrë eö, ngacama hetre tria i eö? Loi e troa xomi ijine matre sa hnyawane la itre hnyinge celë. Celë hi matre, ame la epon a iatre, thele jë troa atre ketre hnyawa.

8-9. Nemene la ka troa xatuane la lue ka iatre troa xomi mekun ka loi? (Wange ju fe la foto.)

⁸ Ame la epon a iatre, thele jë troa atre hnyawa la pengöi ketre, matre tro eö a xomi mekun ka loi. Thele jë troa atre la hna qaja hnei itre xan göi angeic. Hapeu, itre atre kö a qaja ka hape, ketre atr ka ipië, ka loi thiina, me ka atreine tulu ewekë? Hane hi la hna kuca hnei Sarah, ketre trejin qa Guyane, nge ka faipoipo me Daniel. Öni angeic: “Hnenge hna hnyingë pengöi Daniel kowe la trejin ka ce mele me nyidrë, me kowe la ka cainöj lapa me nyidrë, me kowe la ketre qatre thup, me itre trejin föe ne la ekalesia i nyidrë. Hnenge fe hna hnying kowe la itre xaa sinee i nyio.” Ketre, the cile kö troa hnyingën kowe la atr hnei eö hna iatre memin ka hape, hetre ewekë kö hnei angeic hna kuca ekö maine enehila, nge ka nyipiewekë tro eö a atre. Eje hi, ijije hi tro la itre ewekë hna kuca ekö me itre hna majemin a aciane la itre jol ngöne la faipoipo.

⁹ Maine epuni a luelu, maine hetre hna qaja hnene la ketre trejin ka macaj göne la pengöi angeic, the wangahmalohmaloëne kö. Celë hi ka troa xatua epon troa wang ka hape, tro kö a sisedrëne maine tro pena a inu.b Tro pena së a ce wang la aqane tro la lue trefën a acatrene la imelekeu i nyidro.

TRO PALA HI A CE TRO MATRE ACATRENE LA IMELEKEU I EPON

10. Hnauëne laka, nyipiewekë tro la lue trefën a xomi ijine troa ce lapa?

¹⁰ Tro la trahmanyi me föe a acatrene la imelekeu me cas i nyidro, e tro nyidro a xomi ijine troa ce lapa, ngacama isa tru hnei jole i nyidro. Tro lai a aijijë nyidro troa porotrikën la ka traqa ngöne la drai, me ifekeune la itre mekun me aliene hni, me amamane la ihnimi ketre koi ketre, me ce madrin.

11. Nemene la ka troa angazone la imelekeu ne la lue trefën?

¹¹ Pi tro kö la lue trefën a ce lapa, hune la troa lapa iananyi. Nyipici laka, ame itre xaa ijin, tro nyidro a lapa iananyi, ngo koi hnepe ijine hi. Ngo tune kaa e qeadridri catr la ijine nyidro a lapa iananyi? Ame la itre xan, hnei angatr hna xom la ketre huliwa ngöne la ketre nöj, matre qea catr la ijine tha iöhnyi kö angatr memine la fami angatr. Nyipici laka, hetre manie i angatr, ngo tru la itre thangane ka ngazo kowe la mele ne trefëne i angatr.

12-13. (a) Nemene la hna kuca hnene la itre xaa trefën matre tro pala hi a ce? (Wange ju fe la foto.) (b) Ekaa la göhnene la föi easë ngöne la mele së? (Wange ju la hna eköhagen “Göhnene La Föi Easë Ngöne La Mele Së.”)

¹² Hane hi la hna kuca hnene la itre trefën matre tro pala hi nyidro a ce. Öni Leah, ka mel e Guam ka hape: “Pi tro catre ni me föeng a ce kuca la nöjei pengöne huliwa. Ame la kola hë nyio, ke tha hna traqa lapa kö la tro ketre a tro, nge ketre pë hë a lapa.” Öni Roxanne ka mel e Etazini: “Tru catr la itre huliwa i nyio, matre loi e tro nyio a kuci porogaram troa ce, tune la easa kuci porogaram kowe la itre huliwa ka nyipiewekë.” (Wange ju la Amosa 3:3.) Öni Damien ka mel e France: “Hnenge hna öhne laka, loi e tro fe ni a kuca la itre huliwa hna pi kuca hnene la föeng. Nge ame itre xaa ijin, madrine fe ni troa kuca la itre huliwa cili.” (Mat. 7:​12) Nge öni Katie ka mel e Etazini: “Loi e troa amë acone la telefone matre troa ce porotrik hnyawa.”

¹³ Ame la ka nyipiewekë catre kö kowe la lue trefën, ke ene la troa ce kuca la itre huliwa i Iehova. Öni Myriam ka mel e France: “Nyio a pane e Tusi Hmitrötr e hmakany, me ce ithanatane la ka ketri nyio, memine la itre ini nyine tro nyio a trongën ngöne la mele i nyio. Ka tru catr koi ni la itre ijine cili. Nge eni a madrin la nyio a ce thith, ke eni a dreng la föeng a qaja la ihnimi nyidrë koi Iehova.” Öni Katie, lo hne së hna qaja ha e caha: “Madrine catre ni la eni a ce cainöj memine la föeng. Mingöminge catr la eni a drei nyidrë a qeje Iehova, nge kola acatrene la imelekeu i nyio.”​—It. Ed. 27:17.

CATRE JË IHNIMIKEU NGÖNE LA ITUPATH

14-15. Pine nemene matre loi e tro la lue trefën a isine troa elëhun la itre jol ka traqa ngöne la faipoipo? Qaja jë la ketre ceitun.

¹⁴ Pine laka, itre atr ka tha pexeje kö së, matre tro pala hi a traqa koi së la itre jol ngöne la faipoipo. Öni Tusi Hmitrötr, tro la itre trefën “a ixelë me itre akötr.” (1 Kor. 7:​28) Ame la hnëewekë cili, ke “kola qaja la itre jol me itre itupath ka traqa kowe la itre trefën.” Pine nemene matre loi e tro la itre trefën a isin troa elëhun la itre jole cili me acatrene la imelekeu i nyidro?

¹⁵ Tro sa xom la ketre ceitun. Maine hna angazone la ketre uma hnapan, maine ketre tablo ka tru thupen, ke tro lai atrekë ewekën a thel troa nyihnyawane ej, ngacama ije macatre ne troa nyihnyawan. Tha tro kö angeic a cil troa nyithupen atrun, maine kuca la hnei angeic hna atreine matre nyihnyawane ej. Pine nemen? Pine laka, ka nyipiewekë koi angeic lai uma maine tablo cili. Ketre tun, ka nyipiewekë catr la faipoipo. Ngacama ka catr la faipoipo, ngo tro pala hi a traqa la itre jol kowe la itre trefën. Tune la tablo hna nyihnyawane hmaca, ijije fe hi troa lolo hmaca la faipoipo. Nyipici laka, tro la lue trefën a xomi ijin me nue trengecatr troa acatrene hmaca la imelekeu i nyidro. Ngo tro lai a amadrinë Iehova. (Mala. 2:​16) Ketre, nyidroti lai a amamane la ihnim me metrötr ketre koi ketre, me koi Iehova, Atrekë Ewekëne la faipoipo.

16. Thenge la 1 Korinito 13:​4-8a, nemene la ka troa xatuane la itre trefën troa elëhun la itre jol ka traqa koi angatr? (Wange ju la foto memine la hna eköhagen “Ixatua Matre Acatrene La Imelekeu i Epon.”)

¹⁶ Ame la kola traqa la itre jol ngöne la faipoipo, the canga mekune kö troa isa lapa. (1 Kor. 7:​10, 11) Loi e tro pe epon a isa hnying ka hape, ‘Nemene la itre xaa nyine tro ni a kuca matre acatrene la imelekeu i nyio?’ Wange hmaca ju la hna qaja hnei Tusi Hmitrötr göne la aqane troa hnim la itre xan, nge thele jë la aqane tro epon a amamane la itre xaa igötranene la ihnim hna qaja ngöne 1 Korinito 13:​4-8a. (E jë.) The thele kö troa itrij, ngo isine jë pe troa ahlëne hmaca la ihnimi epon. Hnyinge jë ka hape: “Nemene la nyine tro ni a kuca matre acatrene hmaca la imelekeu i nyio?” Sipo ixatua jë koi Iehova. Thele ixatua jë ngöne la itre itus me itre video së, me thene la itre qatre thup me itre trejin ka macaj. Ceitune hi la faipoipo i epon memine la “eno ka köni wanaeamo,” nge Iehova la hnaakönine otretr ka catr. Maine tro epon a mejiune koi Nyidrë, tha tro kö ej a “canga xecie.”​—A. Cai. 4:​12.

17. Nemene la nyine troa kuca hnene la itre ka faipoipo me itre ka pi faipoipo matre troa madrin?

¹⁷ Aja i Iehova tro la itre hlue i Nyidrë a madrin, ene la itre ka faipoipo me itre ka pi faipoipo. Celë hi matre e tha faipoipo pala kö eö, iëne jë la ketre trejin ka troa nyisinee i eö utihë epin. Maine ka faipoipo hë eö, acatrene jë la imelekeu i epon. Ame la kola traqa la itre jol ngöne la mele ne trefën, isine jë troa elëhune itre ej, nge mejiune jë koi Iehova. E cili, tro hë eö a ‘ce madrine memine la föi eö hnei eö hna hnim.’​—A. Cai. 9:9.