Nyitipune Jë La “Akötresie Ne Iakeukawany”

1. Hnauëne la tro sa akeukawanyi itre xan?

KOLA akötrë së asë “hnene la itre itupath.” Celë hi matre, easa aja iakeukawanyi me ithuecatr. (1 Pet. 1:6) Easa madrin la itre xan a akeukawanyi së. Matre the cile kö së troa akeukawanyi itre xan. (Mat. 7:​12) Iehova “Akötresie ne iakeukawany” a amamane koi së la aqane “troa hane akeukawane la itre xan ngöne la nöjei pengöne akötr.” Easa nyitipu Nyidrë la easa “iakeukawanyikeu.” (2 Kor. 1:​3, 4; 1 Thes. 4:​18) Easa kuca lai, ke tru la ihnimi së kowe la itre trejin. Ame ngöne la tane mekune celë, tro sa ce wang (1) la hna qaja hnei Tusi Hmitrötr göne la aliene la troa akeukawanyi itre xan, (2) aqane tro sa akeukawanyi angatr, nge (3) nyine tro sa kuca la easa aja iakeukawany.

ALIEN LA IAKEUKAWANY E HNINE LA TUSI HMITRÖTR

2. Nemene la aliene la hnaewekë qene Geres hna hape, “akeukawan”?

² Nyimu aqane ujën la hnaewekë qene Geres hna hape, “akeukawan.” Ej a hape “ithuecatr,” “sipo ielen,” maine “eamo.” (Roma 12:8; wange ju la ithuemacany “ithuecatr.”) Ame la pane aliene la hnaewekë cili, ke “troa hë ketre matre ce tro me easë.” Kola amekunë së la ketre atr a canga nyinyap troa xatuane la sinee i angeic ka akötr. Nyimu aqane tro sa akeukawan la ketre sinee së, ngo ame la ka sisitria ke, tro angeic e thupen a egöcatr me madrin.

3. Nemene la ini hne së hna xom qa ngöne la tulu i Banaba? (Wange ju fe la foto.)

³ Tro sa ce wang la ketre ceitun qa hnine la Tusi Hmitrötr. Atreine catre Iosefa, ketre keresiano troa ithuecatr me akeukawanyi itre xan, matre hnene la itre aposetolo hna ati ëje i angeic ka hape, Banaba, kola hape “Nekö Ne La Iakeukawany.” (It. Hu. 4:​36) Pine laka, ka ihmeku hnyawa la ëje cili memine la pengöi angeic, matre tha hna hë angeic hmaca kö ka hape, Iosefa e hnine la Tusi Hmitrötr. Kolo hi lai a amamane ka hape, hnei Banaba pala hi hna xatuane la itre trejin, la angatr a aja ixatua. Thupen la Saulo a kapa la hmi keresiano, aja i angeic troa iöhny memine la itretre drei Iesu e Ierusalema. Ngazo pe, tru la xou i angatr, ke ka iaxösisi angeic ekö. Ngo hnei Banaba hna mejiun koi Saulo, me trosai angeic kowe la itre aposetolo.​—It. Hu. 9:​26-28.

AQANE TRO SA AKEUKAWANYI ITRE XAN

4. Nemene la ketre aqane tro sa akeukawanyi itre xan? (Roma 1:​11, 12)

⁴ Maine ijij, tro jë troa ituë. Hnei Iehova hna up la itre xaa hlue i Nyidrë troa akeukawan la itre ka akötr. Ame lo kola dekurag hnei Elia perofeta, hnei Iehova hna up la ketre angela troa ithuecatr koi angeic. (1 It. Jo. 19:​4-7) Hnei Paulo aposetolo mina fe hna hane wang la itre xaa trejin ke, atre hi angeic laka, tro lai a ithuecatr koi angatr me koi angeic fe. (E jë la Roma 1:​11, 12.) Ame la easa wang la ketre trejin, tha tro kö sa porotrik nyimenyim me angeic, ngo loi e tro sa nango lapa aqeany matre akeukawanyi angeic. (1 Kor. 16:7) Nge maine tha ijiji easë kö troa wai angeic, ke the cile kö troa hë angeic, maine cinyanyi tus maine kart, maine sms. Maine aja i easë troa ithuecatr koi itre xan, tro Iehova lai a nyijën easë matre xatua angatr.

5. Pine nemene matre jol koi së enehila troa akeukawane la itre trejin ka akötr?

⁵ Pine laka, kola ngazo catr la mel, matre kolo fe a jole koi së troa wang la itre trejin ka akötr. Ame lo kola akalabusi Paulo e Roma, hnei Onesiforo atre Efeso hna thele nyidrë, ngacama tro fe a hane akalabusi angeic maine humuthi angeic. (2 Tim. 1:​16-18) Tui Onesiforo, itre trejin qa Russie a isine troa akeukawane la itre trejin me angatr hna axösisin. Ame la kola kootrëne la itre trejin, itre xan a traqa ngöne la salle d’audience, ngacama ijije hi troa hane othi angatr. Nemene la nyine tro eö a kuca matre hnëkë troa ithuecatr kowe la itre trejin, e traqa ju othi angatr? Wange hmaca ju la hna kuca hnene la itre hlue i Iehova ekö me enehila, matre tro pala hi a easë a cas me madrin ngöne la iaxösisi.

6. Tro sa nyitipu Iehova tune kaa la easa akeukawanyi ketre? (Wange ju fe la foto.)

⁶ Drei angeic hnyawa ju. Ame lo Elia perofeta a xou kowe la mele i angeic, hnei angeic hna fe la hni angeic koi Iehova. Hnei Iehova hna drei angeice hnyawa, ngacama atre hë Nyidrë la ka ej e kuhu hni Elia. Nge hnei Nyidrë hna drei angeic, ngacama casi pala hi la hnei angeic hna qaja! (1 It. Jo. 19:​9, 10, 14) Hnei Iehova fe hna nue Habakuka perofeta troa qaja la ka ej e kuhu hni angeic. Kösë Habakuka a elëhun la hnei Iehova hna qaja, ngo tha hnei Nyidrëti kö hna elëhni. (Habak. 1:​2, 3) Ame enehila, Iehova a dreng la itre thithi së, ngacama atre hi Nyidrë la hne së hna ajan. Easa nyitipu Nyidrë la easa dreng hnyawa, la kola ithanata hnene la itre trejin. Loi e “troa saqe dreng.” Ame la angatr a ithanata, the thupatëne kö, ngacama angatr a qaja hmaca lo hnei angatr hna qaja ha. Nge the drengakötrëne kö la angatr a ithanata menu.​—Iako. 1:​19; A. Cai. 7:9.

7. Tro sa atre tune kaa la hna ajan hnene la atr ka akötr?

⁷ Thele jë troa trotrohnin la hnei angeic hna ajan. Thatre kö së la aliene hni ne la itre atr, tui Iehova. Tro sa trotrohnine la hnei angeic hna ajan, e tro sa drei angeice hnyawa. Isapengöi epuni kö me angeic, matre the mekune kö ka hape, atre hi epun la hnei angeic hna ajan. Xomi ijine jë troa drei angeice hnyawa, nge hnyinge jë matre troa atre la ka ej e kuhu hni angeic.​—It. Ed. 20:5.

8. Tune kaa la aqane akeukawanyi Maretha me Maria hnei Iesu thupene la meci Lazaro? (Goeëne ju fe la itre foto.)

⁸ Tro sa ce wang la aqane akeukawanyi Maretha me Maria hnei Iesu, thupene la kola meci hnei Lazaro. Nyidro asë a treije pine la xa i nyidro. Ngo isa kö la aqane akeukawanyi nyidro hnei Iesu. Thupene la Maretha a ase ithanata me Iesu, hnei nyidrë hna qejepengöne la melehmaca, me acatrene la lapaune i angeic kowe la ini cili. Ngo ame la Maria a traqa troa itronyi me nyidrë, nge angeic a treij, pëkö hnei nyidrëti hna qaja. Hnei nyidrëti pe hna ce treij me angeic, me hnyingëne la götran hna amë la ngönetrei i Lazaro. (Ioa. 11:​20-35) Nemene la ini? Tha ka ceitu kö la itre atr, matre isa kö la aqane tro sa akeukawanyi angatr. Celë hi matre, loi e tro sa pane atre la hnei angatr hna ajan.

9. Tro sa akeukawane tune kaa la itre xan jëne la Tusi Hmitrötr? (Roma 15:​4, 5)

⁹ Huliwane jë la Tusi Hmitrötr. Jëne la “iakeukawanyi qa hnine la itre hna cinyihan,” ijije hi tro eö a xatuane la ketre atr ka akötr troa mejiune kowe la itre hnei Iehova hna thingehnaean. (E jë la Roma 15:​4, 5.) Tro la mejiune cili a akeukawanyi angeic me ithuecatr koi angeic. (Isa. 40:31) Tro eö a öhne tune kaa la ketre xötr ka troa akeukawanyi angeic? Ame la itre xan, angatr a kuci list, me makën hnyawan la itre xötr. Thele jë ngöne jw.org la itre tane mekun ka qeje “iakeukawany.” Tro eö a öhn e kuhu hnine la itre xaa xötr nyine tro eö a amë ngöne la list i eö. Sipone jë koi Iehova troa xatua eö troa huliwane hnyawane la Tusi Hmitrötr, matre akeukawane la itre atr ka akötr. Nge tro kö la uati hmitrötr a amekunë eö la itre xötr ngöne la nyipi ijin.​—Ioa. 14:26.

10. Hnauëne laka, loi e tro sa ithanata amenyiken la easa ithuecatr koi itre xan?

¹⁰ Ithanata amenyikene jë koi angeic. Ame la hnëewekë qene Geres “akeukawan” ke, kolo fe a hape, “sipo ielen,” maine “eamo.” Ame itre xaa ijin, tro eö lai a hamë eamo kowe la ketre trejin ka akötr, matre tro angeic a saze la aqane mekune i angeic. Haawe, mekune hnyawa jë qëmekene troa ithanata, matre tha tro kö eö a akötrë angeice catr, ngo amele angeice pe. (It. Ed. 12:18) Loi e tro sa nyitipune la aqane ithanata i Iehova koi Elia perofeta. Ame koi Elia, angeice casi pe hi la ka nyihlue i Iehova e Isaraela, nge tha hnei angeice kö hna eatrëne hnyawan la hnëqa ne perofeta. Hnei Iehova hna xatua angeic troa amekötine la aqane waiewekë i angeic, ngo tha hnei Nyidrëti kö hna qaja ka hape, ka tria la mekuna i angeic. (1 It. Jo. 19:​15-18) Isine jë troa nyitipu Iehova. Loi thiina jë, nge mekune hnyawa jë la hnei eö hna troa qaja. Nge ame la eö a cile fë cainöj maine hamë mekun ngöne la ijine icasikeu, loi e tro pala hi a ithanata amenyiken, me ithuecatr kowe la itre trejin.

11. Nemene la hna bezoën hnene la itre ka akötr? (1 Ioane 3:​18)

¹¹ Troa hamën la hnei angatr hna bezoën. Tru catre kö la thangane la hne së hna kuca hune la hne së hna qaja. (E jë la 1 Ioane 3:​18.) Banaba la ketre tulu ka lolo. Hnei angeic hna salemën la hnepadro i angeic, me xome la mani troa xatuane la itre trejin ka hnyipi bapataiso, nge ka aja ixatua. (It. Hu. 4:​36, 37) Alanyim mina fe la itre trejin enehila ka xatuane la itre trejin ka aja ixatua. Akötre catr Gabriela qa Pologne, la kola thë la uma i angeic hnene la ketre di atraqatr. Öni angeic: “Eni a xou me seseu. Eni la ka thupë kaka me nenë, nge nyidro fe a xou. Thatre kö ni la nyine tro eahuni a kuca. Ngo hna traqa hnene la itre trejin qa ngöne la ketre ekalesia troa xatua eahun, nge ame ngöne la ca drai, tru catr la hnei angatr hna kuca matre nyihnyawane la uma. Celë hi ka acatrene la lapauneng laka, Iehova a inine la itre hlue i Nyidrë troa akeukawane la itre ka akötr.”

12. Nemene la ketre aqane tro sa ithuecatr kowe la itre trejin?

¹² Cile catre jë ngöne la itupath. Öni Paulo kowe la itre trejin ne Thesalonika ka hape, kola ithuecatr koi angeic la angeic a dreng laka, angatr pala hi a cile catr me mele nyipici. Angeic a madrin ke, tha ka gufa kö la itre trengecatr hnei angeic hna nu troa xatua angatr. (1 Thes. 3:​5-8) Ketre, atre hi Paulo laka, ame la angeic a mele nyipici ngöne la itre itupath ka tru, ke angeice hi lai a ithuecatr kowe la itre xaa trejin troa mele nyipici. (Kol. 2:​1, 2) Ketre tun, ame la itre trejin a öhne laka, Iehova a xatua së troa cile catr ngöne la itupath, ke kola ithuecatr koi angatr.

13. Nemene la thiina nyine tro sa amamane la easa ithuecatr koi itre xan?

¹³ Troa xomihni. Tha tro kö a canga mama la thangane la ithuecatre së thene la ketre trejin. Celë hi matre, öni Tusi Hmitrötr, “the mano kö ithuecatrekeu.” Kola mama e celë la enyipiewekën tro pala hi a nue trengecatr. (1 Thes. 5:​11) Matre catre jë ithuecatr kowe la itre ka aja ixatua. (1 Thes. 5:​14) Ngo, aja i easë fe troa hane akeukawanyi së. Matre nemene la nyine tro sa kuca?

EASË FE A AJA IAKEUKAWANY

14-15. Nemene la nyine tro sa kuca la easa seseu me hleuhleu?

¹⁴ Thithi jë koi Iehova. Ame la eö a seseu me hleuhleu, sipo Nyidrëti jë troa akeukawanyi eö. (Sal. 94:19) Qaja hnyawane jë koi Nyidrë la hnei eö hna ajan, nge fe pi la hni i eö koi Nyidrë. (Sal. 62:8) Nyipici laka, atre hë Iehova la ka ej e kuhu hni i eö, qëmeken tro eö a qaja. Ngo ame la eö a fe la hni i eö, ke eö hi lai a amamane laka, eö a mejiun koi Nyidrë. Ngacama hetre aqane tro kö Iehova a sa la itre thithi eö, ngo tro pala hi Nyidrëti a sa, ke itre thithi lai hna kuca ngöne la lapaun. (Mar. 11:24) Filipi 4:​6, 7 a hape: “Qaja jë la itre sipo i nyipunie koi Akötresie. . . . tro ha thupëne la itre hni me mekuna i nyipunie hnene la tingetinge qaathei Akötresie, tingetinge hna thatreine trotrohnine hnei atr.”

¹⁵ Sipo ixatua jë. Fe pi la hni i eö kowe la ketre sinee i eö ka macaj, maine ketre qatre thup hnei eö hna mejiune kow. Tru catr la ixatua hna troa hamë eö hnene la itre trejin. Ngo e pëkö hnei eö hna qaja, tro angatr a atre tune kaa la hnei eö hna ajan? (It. Ed. 14:10) Sipo angatre jë troa drei eö hnyawa, la eö a fe la hni i eö. Maine pena, troa ce thawa me eö la ketre xötr maine ketre tane mekun ka troa ithuecatr koi eö.

16. Nemene la ka troa traqa la kola thel troa ithuecatr koi së hnene la ketre trejin, nge nemen la nyine tro sa kuca?

¹⁶ Troa atreine xomihni me nue la ngazo. Ijije hi tro la ketre trejin a akötrë eö la angeic a thel troa ithuecatr koi eö. Maine jë tro angeic a qaja maine kuca la ketre ewekë ka troa nyixane la akötre i eö. Ame e cili, xomihni angeice jë. (1 Kor. 13:​4, 7) Tune la hna qaja hnei Iakobo 3:2: “Maine tha tria kö ketre hnei ithanata, atre ka pexej angeic.” The thëthëhmine kö laka, itre trejin a pi xatua eö. Ngazo pe, “canga ajane hi la hni, ngo kucakuca pe la ngönetrei.”​—Mat. 26:41.

17. Nemene la nyine tro sa catre kuca?

¹⁷ Pine laka, kola ngazo catr la fen, nge itre ithupëjia me Akötresie a icilekeu me easë, matre tro pala hi së lai a aja iakeukawany. Haawe, ange catre jë së itö iakeukawany.