Kepin Matre Easa Madrin Ngacama Kola Methinë Së

1. Nemene la hnei Iesu hna qaja göne la imethinë?

ÖNI Iesu ngöne la Cainöj Hune La Wetr ka hape: “Madrine nyipunie la kola methinë nyipunie.” (Luka 6:​22) Kola sesëkötr hnene la itre ka drei nyidrë. Eje hi, pëkö atr ka ajan troa methinë angeic. Matre hnauëne la nyidrëti a qaja lai? Ketre hnying ka lolo catr, ke ame enehila, alanyim la itre ka xele ma wai së. Tro sa ce wang la kepin matre kola methinë së, me aqane tro pala hi sa madrin.

KEPIN MATRE KOLA METHINË SË

2-3. Nemene la ketre kepine matre kola methinëne la itre nyipi keresiano, nge kola xatua së tune kaa? (Ioane 16:​2, 3)

² Kola methinë së ke, easa nyihlue i Iehova. Öni Iesu göne la itre ka axösisi së me humuthi së ka hape: “Thatre Kakati kö hnei angatr, nge ketre thatre ni kö.” (E jë la Ioane 16:​2, 3.) Matre zöi drei la kola icilekeu memine la itre hlue i Akötresie? Satana. Angeice “la haze ne la fene celë.” (2 Kor. 4:​3, 4) Angeic a atimekëne la itre atr matre tha tro kö angatr a trotrohnine la nyipici, me uku angatr troa icilekeu memine la itre ka hnimi Iehova. (Ioa. 8:​42-​44) Nemene la thangan e tro sa trotrohnin ka hape, Satana la ka ukune la itre atr troa icilekeu me easë? Tro lai a xatua së matre tha tro kö sa methinë angatr.

³ Tro sa ce wang la ka traqa koi Pavel,a ka mel ngöne la ketre nöj hna wathebone la hmi së. Pine laka, tha cile kö angeic troa nyihlue i Iehova, hna othi angeic me lepi angeic me umë angeic koi nyimu treu. Öni Pavel enehila: “Xecie koi ni laka, itre dremoni la ka ukune la itre atr troa axösisi ni, ke angatr a icilekeu memine la hmi ka wië. Pëkö ihmönyinyi easë memine la itre ka huliwa ngöne la kalabus. Angatre hi a kuca la huliwa i angatr.” Hna icilekeu hnene la keme me thin ka tha hmi kö, memine la ketre trejin trahmanyi qa Croatie. Öni angeic: “Trotrohnine hë ni enehila laka, Satana la ithupëjia, ngo tha kaka me nenë.”​—Efe. 6:​12.

4. Nemene la hna ini së hnei Iesu me Setefano? (Wange ju fe la foto.)

⁴ Tha easë kö a methinëne la itre ka icilekeu. Easë pe a thithi sai angatr. (Mat. 5:​44) Celë hi hna ini së hnei Iesu me Setefano. Thupene la hna jeifao Iesu hnene la itre sooce i angetre Roma, hune la sinöe ne iaxösisi, öni nyidrë: “Kaka, nue pi la ngazo i nyudren.” (Luka 23:34) Iesu a sipo Iehova troa nue la ngazo ne la itre sooc, ke hna upi angatr troa humuthi nyidrë. Nyidrëti fe a mekun la itre atr hna ajojezine hnene la itre he ne hmi, nge ka ajan tro nyidrëti a mec. Öhne hi Iesu laka, thatre kö angatr la hnei angatr hna kuca. Hnei Setefano fe hna sipo Akötresie troa nue la ngazo ne la itre ka humuthi angeic. (It. Hu. 7:​58-​60) Hnei Iehova kö hna sa la thithi Iesu me Setefano? Öö. Alanyim la itre atr ka ajane tro Iesu a mec, ka ietra e thupen, me lapaune koi nyidrë utihë la xomi bapataiso. (It. Hu. 2:​36-​41) Nge hnei Saulo atre Taraso, lo ketre trahmanyi ka kapa la meci Setefano, hna bapataiso me hace fë la hnei angeic hna kuca ekö.​—1 Tim. 1:​13.

5. Nemene la ini hne së hna xom qa ngöne la hna melën hnei César?

⁵ Enehila mina fe, Iehova a dreng la easa thith thatraqane la itre ka icilekeu me easë. Tro sa ce wang la hna melën hnei César, ka mel e Vénézuela. Xele catr la keme i angeic ma wang la hmi së. Öni César: “Eni a haine la thineng, ke ketre föe ka lolo catr. Hnei eahlo pala hi hna amë panëne la Baselaia, ngo tha hnei eahlo kö hna nuaxöj la kemeng. Hnei eahlo hna ini eahun, itre nekö i eahlo troa metrötrë nyidrë. Hnei eahlo fe hna ini eahun tro pala hi a drengethenge nyidrë e tha ka icilekeu kö memine la aja i Iehova.” Itre macatre thupen, kola nyiqane lolo trootro la thiina ne la keme i angeic. Öni César: “Ame la ketre drai, hnenge hna catre thith koi Iehova, me sipo kaka troa ini Tusi me ni. Tha nyine qaja kö la madrineng la nyidrëti a kapa la sipong.” Thupene lai, hnene la keme i César hna xomi bapataiso. Tha itre ka icilekeu asë kö la ka xomi bapataiso, ngo tro la itre xan a loi thiina koi së e tro angatr a goeëne la aqane ujë së. Madrine catre së la angatr a ujë tun! Aja i easë troa öhne la aqane tro Iehova Akötresie ka utipine me “Atre Iameköti e cailo fen,” a eatrongëne la itre xaa atr koi Nyidrë.​—Gen. 18:25.

6. Thenge la Mareko 13:​13, nemene la ketre kepin matre kola methinën la itre nyipi keresiano?

⁶ Kola methinë së ke, easa metrötrë Iesu. Öni Iesu ka hape, tro la nöjei atr asë a methinën la itre nyipi keresiano “pine la ëje [i nyidrë.].” (E jë la Mareko 13:13.) Kola hapeue lai? Ame la ‘ëje’ i Iesu, ke kola qaja la itre thiina i nyidrë me hnëqa i nyidrë, ene la troa Joxu ne la Baselaia i Akötresie. Itre atr a methinë së, ke angatr a mejiun kowe la itre musi atr. Nge tha angatre kö a mejiune kowe la atr hnei Iehova hna iën troa mus, ene Iesu Keriso. Ngo hna acili Iesu troa joxu qane lo 1914. Nge easenyi hë tro nyidrëti a lep apatren la itre mus ka thipetrij la musi nyidrë.

7-8. Hnauëne la kola hnyima fë la itre xaa trejin? (Ioane 15:​18-​20) (Goeëne ju fe la itre foto.)

⁷ Kola methinë së ke, xele easë troa ujë tune la itre atre ne fen. Öni Iesu ka hape, troa methinën la itretre dreng pine laka “trenyiwa [angatr] kowe la fen.” (E jë la Ioane 15:​18-​20.) Tune la itre pane keresiano, easa thipetrij la aqane mekun, me ujë me itre aqane ithanata ka akötrë Akötresie. Celë hi matre, alanyim la itre trejin hna hnyima fë ngöne la hna huliwa me hna ini. (1 Pet. 4:​3, 4) Ngo easa madrin la itre ka icilekeu a saze la aqane goeë së me haine la aqane ujë së.

⁸ Tro sa ce wang la ka traqa koi Ignacio, ka mel e Amérique centrale. Ame lo angeic a ini, hnene la ketre porofesör hna lapa hnyimasai angeic pine laka, angeic a metrötrëne la itre trepene meköt qa hnine la Tusi Hmitrötr. Ngo qëmeken tro angeic a afenesine la itre ini, hnene la porofesör hna hnyingë angeic la kepin matre angeic a trongëne la itre trepene meköt, ngacama kola hnyimasai angeic hnei itre xan. Öni Ignacio koi nyidrë ka hape, ame la itre wathebo i Akötresie ke, kola thupë angeic. E thupen, hnei angeic hna hë nyidrë kowe la icasikeu. Angeic a sesëkötr la nyidrëti a traqa! Hna ketri nyidrë hnene la aqane ujë ne la itre trejin, matre hnei nyidrë hna sine lapane la itre icasikeu. E thupen, hnei nyidrë hna ini Tus Hmitrötr, nge hna hane fe traqa koi nyidrë la icilekeu. Ngo, hnei nyidrëti hna catr uti hë la xomi bapataiso.

9-10. (a) Hnauëne laka, isapengöne kö së me itre atre ne fen? (b) Nemene la ini hne së hna xom qa ngöne la tulu i Paulo?

⁹ Isapengöi easë kö me itre atre ne fen, ke tha easë kö a lö hnine la kuci politik me itre isi. (Ioa. 18:36) Easa trongëne la hna amekötine ngöne Roma 13:​1, me isine troa metrötrëne la itre wathebo i mus. Tha easë kö a thele troa cilëne la ketre hnëqa ngöne la politik me voot. Pine nemen? Pine laka, ase hë së ië Iehova memine la Baselaia i Nyidrë hna cilën hnei Iesu. Alanyim la itre Temoë Iehova hna akalabusin pine la lapaune i angatr. Ngo angatr pala hi a cainöj. Angatr e cili a nyitipu Paulo aposetolo. Itre macatre ne umën me akalabusi angeic. (It. Hu. 24:27; 28:​16, 30) Ngo hnei angeic pala hi hna canöjëne la maca ka loi kowe la itre ka drei angeic, tune la itre ka thupë kalabus, itre ka huliwa ngöne la hnakootr, itre ka mus, itre joxu me itre ka huliwa i Nero Joxu.​—It. Hu. 9:​15.

¹⁰ Ketre tun, itre trejin hna akalabusin a cainöj kowe la itre ka pi drei angatr, tune la itre juges, me itre ka cilën la itre hnëqa ka tru me itre ka thupë kalabus. Traqa koi 6 lao macatre ne akalabusin la ketre trejin trahmany pine la lapaune i angeic. Ame la kalabus koi angeic, ke tha ketre götrane kö hnë ifolosa, ngo ketre teritoar nyine tro angeic a huliwan. Ketre madrine ka tru la troa huliwa i Iehova me cainöj kowe la itre atr ka hetre hni ka ajan! (Kol. 4:3) Tro pena sa ce wang la itre xaa kepin matre easa madrin, ngacama kola methinë së.

KEPIN MATRE EASA MADRIN NGACAMA KOLA METHINË SË

11. Tro la icilekeu a acatrene tune kaa la lapaune së? Qaja jë la ketre ceitun.

¹¹ Ame la itre atr a methinë së ke, kola eatrëne la itre hna perofetan. Ame ngöne lo hna pane perofetan hnei Tusi Hmitrötr, hnei Iehova hna qaja ka hape, tro Satana me itre sine xöle i angeic a methinëne la itre ka nyihlue i Iehova. (Gen. 3:​15) Ame ngöne la 4 lao Evangelia, anyimua amexeje Iesu la nyipici cili. (Mat. 10:22; Mar. 13:​9-​12; Luka 6:​22, 23; Ioa. 15:20) Hna amexeje fe hnene la itre ka cinyanyine la Tusi Hmitrötr. (2 Tim. 3:​12; Iako. 1:2; 1 Pet. 4:​12-​14; Iud. 3, 17-​19) Celë hi matre tha sesëkötre kö së la kola axösisi së, ngo easë pe a madrin, ke kola eatrëne la itre hna perofetan. Kolo hi lai a amaman ka hape, easë ngöne la nyipi hmi. Önine la ketre trejin föe ka mel ngöne la ketre nöj hna wathebone la hmi së, ka hape: “Ame la eni a nue mel koi Iehova, atre ju hi ni e cili laka, tro kö a axösisi ni e ketre ijin. Matre, tha sesëkötre kö ni, nge pëkö xoung la kola traqa la itre jol.” Hnene fe la föi angeic hna icilekeu me angeic. Hnei nyidrë hna qanangazo angeic me dreuthetrij la Tusi Hmitrötr me itre itusi angeic. Ngo tha xou kö angeic, kolo jë pe a acatrene la lapaune i angeic. (Heb. 10:39) Öni angeic: “Ase hë qaja ka hape, troa axösisi së, matre tha sesëkötre kö ni. Ame la kola traqa la icilekeu ke, xecie koi ni ka hape, eni ngöne la nyipi hmi.”

12. Nemene la ka xatuane la ketre trejin troa cile catr qëmeken la iaxösisi?

¹² Ngacama atre hi së laka, troa axösisi së, ngo tha ka hmaloi kö troa cile catr. Kola mekun hmaca hnene la ketre trejin trahmany lo ijine kola akalabusi angeic. Öni angeic: “Ame itre xaa ijin, eni a dekurag me seseu me treij.” Nemene la ka xatua angeic troa cile catr? Öni angeic, “Tha mano kö ni thith. Eni a nyiqane thith e hmakany. Ame la kola traqa la ketre jol ngöne la drai, ke eni hmaca a thith. Nge ame la kola traqa la itre ewekë ka tha meköti kö nge ka aelëhni ni, ke eni a lapa kabine me catre thith.” Ketre, hnei angeic hna lapa mekun la tulu ne la itre trejin ka mele nyipici ekö me enehila. Itre hna majemine lai ka xatua angeic troa cile catr qëmeken la iaxösisi, me kapa la tingeting lo hnei Iesu hna qaja kowe la itretre dreng.​—Ioa. 14:27; 16:33.

13. Nemene la ka troa xatua së troa cile catr kowe la imethinë?

¹³ Loi e troa sisitria la ihnim hune la imethinë. Hnei Iesu hna catr hnimi Iehova uti hë la mec. Tru catre fe la ihnimi nyidrë kowe la itre sinee i nyidrë. (Ioa. 13:1; 15:13) Maine tro sa catre hnimi Iehova me itre trejin, ke tro së lai a atreine cil kowe la imethinë. Hnauëne la easa qaja lai? Tro sa ce wang la tulu i Paulo.

14. Nemene la ka xatua Paulo troa mele nyipici uti hë la pun?

¹⁴ Qëmeken tro Paulo a mec, hnei angeic hna cinyany koi Timoteo sinee i angeic. Öni angeic: “Tha hnei Akötresieti kö hna hamë së la ua ka xou, ngo ka mene pe, me ihnim.” (2 Tim. 1:7) Kola hapeue lai? Tro la ketre trejin a atreine cil kowe la itre itupath ka catr, e ka catr la ihnimi angeic koi Iehova. (2 Tim. 1:8) Ketre, hnene la ihnimi Paulo koi Iehova hna xatua angeic troa atreine cile catr qëmeken la mec, me mele nyipici uti hë la pun.​—It. Hu. 20:​22-​24.

15. Itre trejin enehila a amamane tune kaa la ihnimi angatr kowe la itre xaa trejin? (Wange ju fe la foto.)

¹⁵ Tru catr la ihnimi ne la itre hlue i Iehova kowe la itre trejin ka mele nyipici ngöne la iaxösisi. Tha cile kö itre xan troa nue mel kowe la itre xaa trejin me easë. Ame ekö, hnei Perisila me Akula hna nue mel koi Paulo. (Roma 16:​3, 4) Ame enehila e Russie, alanyimu la itre trejin ka tro kowe la hnakootr, matre ithuecatr kowe la itre trejin hna oth. Ame la ketre trejin föe hna oth a öhne la itre trejin ngöne la hnakootr, ke hna ketri eahlo pala ha, matre thatreine kö eahlo ithanata. Hnene la ihnimi ne la itre trejin hna thue trengecatre koi eahlo. Eje hi, sisitria kö la ihnimi së hune la imethinë. Ketre ewekë lai ka amadrinë së!

16. Hnauëne la Peteru a qaja ka hape, easa madrin la easa cile kowe la iakötrë? (1 Peteru 4:​14)

¹⁶ Atre hi së laka, Iehova a kepe së la easa cil kowe la imethinë. (E jë la 1 Peteru 4:​14.) Öni Peteru aposetolo ka hape, easa madrin la kola akötrë së pine la ëje i Iehova. Pine nemen? Pine laka, ame la easa cile catr ke, kola mama ka hape, “thei [easë] hë” la ua i Akötresie. Atre hi Peteru la aliene la troa kepe së hnei Iehova me cile catr qëmekene la iaxösisi. Eje hi, thupene la Penetekos 33 M.K., hnene la itretre thupëne la uma ne hmi i angetre Iudra hna othi Peteru me itre xaa aposetolo, ke angatr a cainöj. Ngo hnei Peteru hna isigölin la lapaune i angeic. (It. Hu. 5:​24-​29) Ngacama hna thaucë angatr, ngo tha cile pi kö angatr troa cainöj. Angatr pe a madrin atraqatr “ke ame koi angatr, ahnahna la troa ahmahmanyi angatr pine la ëje i [Iesu].” Ketre tu së fe, easa madrin la easa cil kowe la itre itupath.​—It. Hu. 5:​40-​42.

17. Nemene la hnei Iesu hna qaja kowe la itretre dreng lo jidr qëmeken tro nyidrëti a mec?

¹⁷ Ame lo jidr qëmeken tro Iesu a mec, öni nyidrë kowe la itretre dreng ka hape: “Ame la atre hnimi ni, tre hna hnimi angeice fe hnei Kaka, nge tro ni a hnimi angeic.” (Ioa. 14:21) Easa treqene la ijin laka, tha tro hmaca kö a methinë së, ke easa nyihlue i Iehova, ngo tro pe së a ihnimikeu! (2 Thes. 1:​6-8) Ngo ame enehila, loi e tro sa lapa mekune la itre kepin matre easa madrin, ngacama kola methinë së.