Tro Sa “Kepe Thangan Ka Loi” e Tro Sa Atreine Thelewekë

1-2. Kola hapeu la troa atreine thelewekë, nge tro ej a xatua së tune kaa?

HAPEU, hnene kö la ketre atr hna pë metrötr koi eö? Hna hane kö mekuhni eö maine akötrë eö? Maine pena, hna hane kö traqa koi eö la xou pine la ketre jol? Maine eje hi lai, tha ka hmaloi kö troa kuca maine qaja la itre ewekë ka loi ngöne la itre ijine cili. Ngo Tusi Hmitrötr a amaman ka hape, ame ngöne la itre ijine cili, ke hetre thiina ka sisitria ka troa xatua së, ene la atreine thelewekë.

² Ame la atreine thelewekë, ke kola xatua së matre tha tro kö sa axecië mekun thenge la hne së hna öhn, ngo kolo fe a uku së troa thele la itre xaa ithuemacany. Ej a xatua së troa trotrohnine la itre kepin matre traqa pi lai jol, memine la aqane tro sa ujë. Matre easa “thupëne la aqane ithanata” së, me atre la ijin troa ‘lapa thaup.’ (It. Ed. 10:19; Sal. 4:4) Ketre, ej a xatua së troa xomihni la easa wesitr, me nue la ngazo itre xan. Nge ej fe a xatua së troa kapa la itre eamo me ihaji. (It. Ed. 19:20) Maine tro sa atreine thelewekë, ke tro hë la itre trengewekë së me itre huliwa së a amadrinë Iehova. Tro ha lolo la mele së, me mele itre xan. Ka nyipiewekë catr la thiina cili, la kola traqa la itre itupath, nge kola elë la trenge hni së. Tro sa ce wang la köni hna melën e hnine la Tusi Hmitrötr, ka amaman la aqane tro la atreine thelewekë a xatua së troa ipië, me lapa tingeting, me catre mejiun koi Iehova.

LOI E TROA IPIË, NGO THE PI TRU KÖ

3. Drei lae Naamana?

³ Maine aja së troa kuca la meköt, loi e tro sa nuetrij la pi tru. (1 Pet. 5:5) Ijije hi tro la atreine thelewekë a xatua së. Tune kaa? Tro sa ce wang la ka traqa koi Naamana. Ka mele angeic e Suria, götrane kolopi ne Isaraela. Angeic la ketre atre ka tru, ke angeic la tane la itre sooc ne la angetre Suria. Ngo hna tithi angeic hnei lepera.​—2 It. Jo. 5:1.

4. Kola mama tune kaa ka hape, ka atreine thelewekë Naamana?

⁴ Hnene la nekönatr jajiny ne Isaraela, hlu ne la föi Naamana hna qaja koi eahlo ka hape, ijije hi tro la ketre perofeta e Isaraela a nyinyine la meci Naamana. (2 It. Jo. 5:​2, 3) Maine ju, tro Naamana a qaja ka hape, ‘Drei la hlue cili ka traqa qa ngöne la nöje trenyiwa, matre qaja koi ni la nyine tro ni a kuca?’ Ngo hnei angeic pe hna atreine thelewekë. Eje hi, tha hnei angeice kö hna drei simin la hna qaja hnene la nekönatr, hnei angeice pe hna ipië me trongëne la hna qaja. Hnei Naamana hna sipone kowe la joxu ne Suria troa tro e Isaraela, matre aloinyi angeic.​—2 It. Jo. 5:​4, 5.

5. Nemene la ka traqa koi Naamana lo angeic a traqa e Isaraela?

⁵ Aja i Naamana troa aloine la meci angeic, matre hnei angeic hna wai Iorama joxu ne Isaraela. Ngo Iorama joxu a mekun ka hape, hnene la joxu ne Suria hna upi Naamana matre thele iwesitrë me nyidrë. Ame la kola drenge lai, hnei Elisaia perofeta hna sipo Iorama troa upi Naamana koi nyidrë. (2 It. Jo. 5:​6-9) Ngo ame la Naamana a traqa thei Elisaia, goi tha fetra fe Elisaia troa wai angeic maine ithanata me angeic. Hnei nyidrëti pe hna up la ketre atr troa qaja koi Naamana la nyine troa kuca, matre aloine la meci angeic.​—2 It. Jo. 5:​10.

6. (a) Hnauëne laka xele kö Naamana ma dreng la itre hna amekötin? (b) Nemen la ka amaman ka hape, ka atreine thelewekë la itre hlue i Naamana, nge nemene hë la thangan? (2 Itre Joxu 5:​13, 14)

⁶ Ame lo xötrei, tha hnei Naamana kö hna dreng lo itre hna amekötin, hnei angeic hna “elëhni” me “bëeke fë trenge hni.” (2 It. Jo. 5:​11, 12) Pine nemen? Maine jë angeic a mekun ka hape, tha hna metrötrë angeic kö, nge angeic pe la ketre tane la itre sooc. Maine pena, angeic a mekun ka hape, ame la itre hna amekötin hnei Elisaia, ke kola thaipiëne la nöj e Suria. Celë hi matre, xele hë angeic ma lapa troa nyinyine la meci angeic, nge angeic ha pi bëeke kowe la hnalapa i angeic. Ngo ka atreine thelewekë la itre hlue i angeic, matre hnei angatr hna sipo iele angeic troa lapa. Eloine pe, hnei Naamana hna ipië me xötrethenge la itre hna amekötin hnei Elisaia. Ame hë la thangan, ke hna aloine la meci angeic!​—E jë la 2 Itre Joxu 5:​13, 14.

7. Nemene la itre ini nyine tro sa xom qa ngöne la hna melëne hnei Naamana? (Itre Edromë 22:4) (Goeëne ju fe la itre foto.)

⁷ Nemene la itre ini nyine tro sa xom qa ngöne la hna melëne celë? Ame la atr ka atreine thelewekë, ke tha angeice kö a goeëne la ka mama. Nge tha angeice kö a kei thenge la itre aliene hni angeic. Ame la atre cili, ke ka ipië. Nge ame la atr ka ipië, ke tha ka nyi ka atre kö, atre hi angeic laka, angeice fe a aja ixatua qaathei Iehova. Ngacama tha ka nyihlue i Iehova kö Naamana, ngo hnei angeic hna thelewekë me dreng la hna qaja hnei itre xan, tune la neköjajiny hlue ne la föi angeic, me itre hlue i angeic, me Elisaia perofeta i Iehova. Ngacama jole koi angeic troa kapa lo xötrei, ngo hnei angeic hna ipië, me xomi mekun ka loi. Matre hna aloine la meci angeic. Maine kola hamëne koi easë la ketre eamo, maine ketre hna amekötin ka jol koi së troa trongën, pane cile ju me hnying ka hape, ‘Nemene la ka troa mama qa ngöne la hnenge hna troa qaja maine kuca? Ipië maine pi tru?’​—E jë la Itre Edromë 22:4.

LOI E TROA TINGETING, NGO THA TRO KÖ A ELËHNI

8. Eue la kola jele la trengehni së?

⁸ Ame la kola jele la trenge hni së, tro la atreine thelewekë a xatua së matre tha tro kö sa ujë ngöne la elëhni. Tha ka hmaloi kö ke, ame la kola hna koi së la itre trenge ithanata ka akötr, maine kola ujë angazonyi koi së, ke easa wesitr. (Efe. 4:​26) Tro sa ce wang la hna kuca hnei Dravita me Abigaila ngöne la ketre ijine jol.

9. Tune kaa la aqane ujë i Nabala koi Dravita?

⁹ Pane mekune jë la: Dravita me itre sooc i angeic a zae ngöne la hnapapa e Parana. (1 Sam. 25:1) Ame e cili, angatr a thupëne la mele ne la itre ka thupë mamoe me itre sii Nabala, ketre trahmanyi ka trenamo. (1 Sam. 25:​15, 16) Ame lo ijine xötre pene mamoe, hnei Dravita hna up la itre atre i angeic troa ibozu me Nabala, me sipo xen koi angeic. (1 Sam. 25:​6-8) Ngo pëkö ca hni ne ole i Nabala koi Dravita me itre sooce i angeic. Goi pë fe ca metrötre i angeic koi angatr, uti fe hë la qaqa angatr hnei angeic.​—1 Sam. 25:​10, 11.

10. Tune kaa la aqane amamane Abigaila me Dravita laka, lue ka atreine thelewekë nyidro? (1 Samuela 25:​32, 33) (Goeëne ju fe la itre foto.)

¹⁰ Maine eö ju, nemene la hnei eö hna troa kuca? Hna jele la trengehni Dravita. Atre hi easë la pengöi Dravita, matre tha sesëkötre kö së la kola elëhni hnei nyidrë, nge nyidrë ha pi humuthi Nabala! (1 Sam. 25:​13, 21, 22) Dravita hë ngöne la gojenyi ne tro troa wai Nabala, ngo acilë nyidrëti ju hi hnene lo föi Nabala, Abigaila, ketre föe ka atreine waiewekë. Tune kaa la aqane amamane Abigaila laka, ka atreine thelewekë angeic? Öhne hi angeic la nyipi pengöi Dravita, ngacama ka elëhni catr. Matre hnei angeic hna xatua Dravita troa xomihnine la elëhni. Hnei angeice fe hna traqa fë xen, me hamëne koi Dravita la itre eamo cememine la ipië. (1 Sam. 25:​18, 23-​31) Hnei Dravita mina fe hna atreine thelewekë, ke hnei nyidrëti hna dreng la itre eamo i Abigaila, ka tro thenge la mekuna i Iehova. Lapa kötr ju hi la elëhni nyidrë, nge pë ju kö ngazo hna kuca.​—E jë la 1 Samuela 25:​32, 33.

11. Tro la atreine thelewekë a xatua së tune kaa la easa elëhni? (Itre Edromë 19:11)

¹¹ Nemene la itre ini nyine tro sa xom qa ngöne la hna melëne celë? Ngacama hetre kepin matre easa wesitr, ngo tro la atreine thelewekë a xatua së troa thele tingeting. Tro ej a xatua së troa mekun la thangane la hne së hna troa qaja maine kuca. (E jë la Itre Edromë 19:11.) Ame la Abigaila a amekunë Dravita la mekuna i Iehova, ke hnei nyidrë hna canga xomehnöth la elëhni. Ketre tun, maine troa traqa la ketre ewekë ka aelëhni eö, the canga wesitre kö. (Iako. 1:​19) Thithi jë koi Iehova, nge xomi ijine jë troa thele la mekuna i Nyidrë. Tro lai a xatua eö troa tingeting.

12. Tune kaa la aqane tro la itre xan a xatua së troa atreine thelewekë me tingeting?

¹² Hnei Iehova hna xatua Dravita jëne Abigaila. Ame enehila, tro fe Nyidrëti a xatua së troa atreine thelewekë jëne la itre trejin. Matre ame la eö a elëhni, pane thele eamo jë thene la ketre trejin ka macaj, ketre trejin ka troa xatua eö troa atreine waiewekë. (It. Ed. 12:15; 20:18) Maine eö la ka xatuane la ketre trejin ka elëhni, tro eö a nyitipu Abigaila tune kaa? Tune kaa la aqane tro eö a xatua angeic troa waiewekë tui Iehova? Tro Iehova lai a amanathithine la itre trengecatr hnei eö hna nu troa xatua itre xan troa atreine thelewekë, me tingeting.

LOI E TROA MEJIUNE KOI IEHOVA, NGO THA TRO KÖ A XOU

13. Tro la atreine thelewekë a xatua së tune kaa la easa xou?

¹³ Ame itre xaa ijin, troa traqa koi së la itre jol ka axouenyi së. Ngo tro la atreine thelewekë a xatua së troa elëhune la xou. Ej a xatua së troa mekun ka hape, tru catre kö la mene i Iehova hune la itre ewekë ka axouenyi së enehila. (Sal. 27:1) Ijiji Iehova troa xatua së e nöjei ijin, ngacama ame koi së, pëkö ka atreine xatua së. Celë hi ini ka mama qa ngöne la hna melën hnei Iona. Ka hnimi Iehova catr Iona, ngo hnei angeic hna xou la Iehova a upi angeic troa kuca la ketre ewekë ka jole catr.

14. Nemene la itre kepine matre tha kapa kö Iona la hnëqa qaathei Iehova?

¹⁴ Hnei Iehova hna upi Iona troa tro Nineve matre tro fë la maca ne iameköti. (Iona 1:​1, 2) Maine eö ju la hnei Iehova hna up, nemene la hnei eö hna troa kuca? Ame la troa tro qa Isaraela a tro Nineve ngöne la nöj e Asuria, ke ca treu ne trongë ihnadro. Nge pëkö ka thatre la pengöne la angetre Asuria, itre ka isi me iaxösisi. Hna hëne la traone Nineve ka hape, “traon ka ihumuth.” (Nah. 3:​1, 7) Celë hi matre, tha hnei Iona kö hna kapa la hnëqa, ngo hnei angeice pe hna kötr.​—Iona 1:3.

15. Nemene la ka xatua Iona troa acatrene la mejiune i angeic koi Iehova? (Iona 2:​6-9)

¹⁵ Ame lo Iona a kötr, hnei Iehova hna amamane la mene i Nyidrë koi angeic, me kuca la ketre iamamanyikeu matre amele angeic. (Iona 1:​15, 17) Trotrohnine hë Iona. Tha hnei angeice kö hna goeëne la ejolene la hnëqa, ngo hna goeëne pe la atreine i Iehova troa thupë angeic qa ngöne la nöjei jol. (E jë la Iona 2:​6-9.) Matre ame la Iehova a upi angeice hmaca a tro Nineve, hnei angeic hna canga kapa. Hna drei angeic hnene la angetre Nineve, matre tha apatrenyi angatre ju kö.​—Iona 3:5.

16. Tro la atreine thelewekë a xatua së tune kaa la kola traqa la itre ewekë ka iaxoueny? (Itre Edromë 29:25) (Goeëne ju fe la itre foto.)

¹⁶ Nemene la itre ini nyine tro sa xom qa ngöne la hna melëne celë? Tha tro kö sa nue la ketre ewekë, tune la xoue atr, troa sewe së troa nyihlue i Iehova. (E jë la Itre Edromë 29:25.) Hnene la atreine thelewekë hna xatua Iona troa goeëne la ixatua i Iehova, hune la ejolene la hnëqa i angeic. Ketre tun, loi e tro sa goeëne la aqane xatua së me thupë së qan ekö hnei Iehova, hune la itre ewekë ka axouenyi së. Lapa mekune jë la tulu ne la itre trejin ka cile catre qëmekene la itre jol ka tru, me ka xom la itre hnëqa ka jole catr ke, hnei angatr hna mejiune koi Iehova.a (Heb. 13:6) Matre loi e tro sa atreine thelewekë la easa mejiune koi Iehova me xatua itre xan troa hane tun.

CATRE JË SË WAIEWEKË TUI IEHOVA

17. Nemene la nyine tro sa kuca matre atreine thelewekë hnyawa?

¹⁷ Tune la hne së hna ce wang, tro la atreine thelewekë a xatua së troa cil kowe la itre jol ka traqa. Nemene la nyine tro sa kuca matre tro pala hi sa atreine thelewekë? Iehova la qane la atreine thelewekë. Nge Nyidrëti a hamë së la atreine cili, jëne la Tusi Hmitrötr me uati hmitrötr. (Neh. 9:​20; Sal. 32:8) Nyidrëti a hamë së la itre eamo ka xatua së troa axecië mekun ka loi, me xomihnine la itre aliene hni së. (Sal. 119:​97-​101) Tro së lai a atreine thelewekë hnyawa, e tro sa e me lapa mekune la Tusi Hmitrötr, me sipo Iehova la uati hmitrötr. Tro lai a xatua së troa waiewekë tui Iehova, me kuca la hnei Nyidrëti hna ajan.​—It. Ed. 21:​11, ith.

18. Nemene la nyine tro eö a catre kuca?

¹⁸ Trotrohnine hë së la enyipiewekëne troa atreine thelewekë, matre catre jë sipone la thiina cili koi Iehova. (Sal. 14:2) E cili, tha tro kö sa “trotrije la gojenyi ne la atreine thelewekë.” (It. Ed. 21:16) Tro hë së lai a atreine thelewekë ngöne la nöjei ijin me “kepe thangan ka loi.”