Catre Jë Së Me Mele Nyipici Tui Benaia

Benaia la ketre atr ka catr nge ka huliwa kowe la lue joxu, Dravita me Solomona. Angeic hi la nekön la ketre atre huuj. Eje hi, tha ka huliwane kö la itretre huuj me angetre Levi la itre jia ne isi. Ngo hnei Benaia hna huliwan itre ej matre isigöline la ëje i Iehova. Hnei angeic hna humuth la ketre liona e kuhu hnine la hnë tha tim, me humuth la ketre atr ne isi ka qeadridri catr. Tru catre la mejiune i Dravita koi angeic, matre hnei nyidrëti hna acili angeic troa tan ne la itre ka thupë joxu.​—2 Sam. 23:​20-​23.

Hnei Benaia hna mele nyipici koi Dravita la kola icilekeu hnei Abasaloma me Adonia. (2 Sam. 8:​18; 15:18; 1 It. Jo. 1:8) Nge ame lo Dravita a qatr, hnei Benaia pala hi hna mele nyipici koi nyidrë, me xatua Solomona troa joxu. (1 It. Jo. 1:​32-​40) Eje hi, hnei Benaia hna mele nyipici koi Iehova me kowe la itre atr hnei Nyidrëti hna iën, ngacama tha ka mele nyipici kö itre xan.

Nyipiewekë fe tro sa catr, matre atreine cil koi Satana me itre sinexöle i angeic. Catre jë së metrötrëne la itre trepene meköti Iehova. (Efe. 6:​11; 1 Pet. 5:​8, 9) Ngacama itre xan a iën troa trotriji Nyidrë, ngo catre jë pe së mele nyipici koi Nyidrë, ke tro kö Nyidrëti a amanathithi së.​—2 Sam. 22:26.