Amë Panë Iehova Jë Ngöne La Mele i Eö

1-2. Tune kaa la aqane tro la ketre ewekë a sewe së troa goeëne la ka nyipiewekë?

PANE mekune jë laka, kola ho la telefon, nge epuni a xomi loto. Maine jë, kola aja ixatua hnene la atr ka hë, ngo ame la ka nyipiewekë ngöne la ijine cili, ke troa goeëne hnyawa la gojeny. Ka ceitune hi lai ngöne la mele i easë. Loi e tro sa atre la nyine tro sa kuca, nge ka nyipiewekë ngöne la ijine cili.

² Tru catr la itre ewekë nyine tro sa kuca. Ngo, atre hi easë laka, ame la ka sisitria, ke troa kuca la itre huliwa i Iehova.a (Mat. 6:​33) Tune la aqane hmek la atr ka xomi loto, itre hlue i Iehova a hmekëne la itre ewekë ka troa ajeanyi angatr qa ngöne la gojenyi ne mel.​—It. Ed. 4:​25; Mat. 6:​22.

3. Nemene la hne së hna troa ce wang ngöne la tane mekune celë, nge tro lai a xatua së tune kaa?

³ Aja i easë asë troa amë panëne la itre huliwa i Iehova ngöne la mele i easë. Ngo kolo fe a traqa koi së la itre jol ka sewe së troa kuca la aja i Iehova. (Luka 21:​34-​36) Matre tune kaa la aqane tro sa amë panëne la huliwa i Nyidrë? Ame ngöne la tane mekune celë, tro sa ce wang (1) la itre ewekë ka troa ajolë së, (2) la aqane kuca i Iesu matre tro pala hi a amë panëne la huliwa i Iehova, nge (3) la aqane tro sa nyitipu nyidrë.

ITRE EWEKË KA TROA SEWE SË

4-6. Nemene la itre jol ka troa sewe së troa amë panëne la aja i Iehova?

⁴ Hetre ewekë ka nyipiewekë ngöne la mele së. Maine jë, hetre jol ngöne la fami, maine hetre sine meci së, maine itre xaa jol pena. Itre jole lai ka nyipiewekë nyine tro sa canga wang. Ngo hapeu, ijije kö tro itre ej a sewe së troa amë panën la huliwa i Iehova ngöne la mele së? Öö, e tro sa mekun atrune pala ha, maine nu asë la traeme së, me trengecatre së kowe itre ej.

⁵ Ketre, alanyim thei easë ka mel ngöne la itre nöj laka, hetre jol göi politik, maine pë mani, maine kola xötre la itre mec, maine isi pi mus. Itre ewekë lai ka qajaqaja la pengöne la fen. (2 Tim. 3:1) Hnene la itre jole cili, matre easa hnehengazo me mekune lapane itre ej.

⁶ Maine jë, atre hi easë la itre atr hna ketr hnene la itre jole cili. Matre trotrohnine hi së laka, tru la akötre i angatr. Tha hna xupe kö la atr matre tro pala hi angeic a hnehengazo. Nge itre xan a mekun ka hape, thatreine hë angatr mel tun ekö! Matre angatr a thele madrin ngöne la itre nyine iamadrinë. Nemene la nyine tro sa kuca, e celë fe hi mekuna së? Tro sa ce wang la ka troa xatua së tro pala hi a amë panëne la aja i Iehova. Pane ce wange jë së la tulu i Iesu.

AQANE KUCA I IESU

7. Maine ju, nemene la ka troa sewe Iesu troa kuca la aja i Iehova?

⁷ Maine ju, tro la itre jol göi politik me jole itre atr a sewe Iesu troa kuca la aja i Iehova. Ame ngöne la ijine i nyidrë, tru catr la itre atr ka pë ewekë, nge ka wezipo. (Mat. 14:14; Mar. 14:7) Hna qanangazo angatr hnene la angetre Roma me itre xaa atre Iudra. Ame la itre atr a öhne laka, atreine hi Iesu kuca la itre iamamanyikeu, hnei angatr hna thel troa acili joxu nyidrë. (Ioa. 6:​14, 15) Ketre, Satana fe a thel troa akeinyi Iesu. Hnei angeic hna tupathi nyidrë, matre tro nyidrëti a canga kapa asë la nöjei baselaia ne la fen. (Mat. 4:​8, 9) Nge hnei Peteru, ketre sinee i nyidrë hna thel troa sewe nyidrë me hape: “Waea Joxu, the nue nyipëti kö troa akötr.”​—Mat. 16:​21, 22.

8. Nemene la hnei Iesu hna kuca matre tro pala hi a amë panëne la aja i Iehova?

⁸ Nemene la hnei Iesu hna kuca matre tro pala hi a amë panëne la aja i Iehova? Köni ewekë. Hnapan, hnei nyidrë hna xom la aqane waiewekë i Iehova. (Ioa. 8:​28; 14:9) Hnaaluen, hnei nyidrëti hna catre huliwa i Iehova. (Mat. 9:​35) Nge hnaakönin, hnei nyidrëti pala hi hna mekune catrëne la ka nyipiewekë. (Ioa. 4:​34) Hnei Iesu hna canga lepetrij la itre itupathe i Satana. Ketre, atre hi Iesu laka, Peteru a hnimi nyidrë, ngo ame la mekuna i angeic, ke tha ka ihmeku kö memine la aja i Iehova. (Mat. 4:​10; 16:23) Tha hnei nyidrëti kö hna nue la hna qaja maine kuca hnene la itre atr, troa sewe nyidrë troa kuca la aja i Iehova. Ame enehila, isapengöne kö la itre ewekë ka sewe së, memine lo itre ewekë ka sewe Iesu ekö. Ngo e tro sa nyitipu Iesu, tro së lai a catre amë panëne la aja i Iehova.

AQANE TROA NYITIPU IESU

9. Nemene la nyine tro sa kuca matre tro pala hi sa “trotrohnine la aja i Iehova”? (Efeso 5:​17)

⁹ Tro sa waiewekë tui Iehova. Celë hi ka troa xatua së troa “trotrohnine la aja i [Nyidrë].” (E jë la Efeso 5:​17.) Tro sa atre la aja i Nyidrë e tro sa e me lapa mekun la Tusi Hmitrötr. Ngacama tha Tusi Hmitrötre kö a qaja la jol hne së hna cile kow, ngo ijije hi tro sa atre la mekuna i Iehova. Tune kaa? Loi e tro sa atre hnyawa la aqane waiewekë i Nyidrë, me nue ej troa iuji së.

10. Tune kaa la aqane tro sa atre la aqane waiewekë i Iehova?

¹⁰ Tro sa atre la aqane waiewekë i Iehova, e tro sa e la Tusi Hmitrötr, me lapa mekun la aqane ujë i Nyidrë kowe la itre atr. (Iere. 45:5) Ame la easa e la ketre hna melën, isa hnyinge jë ka hape: ‘Nemene la hna ini ni göi Iehova? Tune kaa la aqane tro ni a saze la aqane waiewekëng matre xom la aqane waiewekë i Nyidrë?’ Eje hi, ka draië catre kö la itre mekuna i Iehova hune la itre mekuna së. (Isa. 55:9) Matre qanyi Nyidrëti kö qaja koi së la aqane tro sa kuca la aja i Nyidrë. (Sal. 143:10) Nge easë fe a sipo Nyidrë troa xatua së troa trotrohnine la aqane waiewekë i Nyidrë, me tro thenge ej.​—1 Ioa. 5:​14.

11. Nemene la hnei Iehova hna ajane koi së?

¹¹ Ame la easa atre la aqane waiewekë i Iehova, easa trotrohnine laka, tha aja i Nyidrëti kö tro sa amë acone la itre huliwa i Nyidrë. Ngo aja i Nyidrëti pe tro sa atreine cile catr la kola traqa la pune la fene celë. (Mat. 24:44) Nge tha Nyidrëti kö a ajan troa ahacenyi së hnene la seseu me hnehengazo. (Mat. 6:​31, 32) Ame itre xaa ijin, hnene la itre sine meci së, me huliwa së, me uma, me itre jol e kuhu hnalapa, me itre xaa jole ju kö, matre easa hnehengazo. Ngo ame la kola traqa la itre mekune cili, the thëthëhmine kö laka, hetre hnei Iehova hna hnëkën koi së. Nyidrëti a upi së troa thele inamacan, me trengecatr thei Nyidrë.​—Sal. 55:22; It. Ed. 3:​5-7.

12. Nemene la ka troa xatua së troa madrin, ngacama kola ngazo catre la fen? (Mataio 5:3)

¹² Catre jë huliwa i Iehova. Ame la easa öhne la itre ewekë ka traqa ngöne la fen, ke kola ahlëne thei easë asë la hnehengazo. Ngo thatreine kö së saze la itre ewekë cili. Matre loi e tro pe sa catre kuca la itre huliwa i Iehova. Hnei Iehova hna xupi easë memine la aja troa atre Nyidrë. Matre, e tro sa thel troa easenyi Nyidrë, tro së lai a madrin. (E jë la Mataio 5:3.) Tro sa easenyi Nyidrë tune kaa? Loi e tro sa inine la Tusi Hmitrötr matre atrepengöi Iehova hnyawa, me nue mel kowe la itre huliwa i Nyidrë. Maine eje hi lai hne së hna kuca, tro Nyidrëti lai a madrin, ke easa huliwane hnyawane la traeme së.​—It. Ed. 23:15.

13. Tune kaa la aqane tro sa “huliwane hnyawane la traeme [së]”?

¹³ Pine laka, easë la itretre drei Iesu, matre easa isine troa “huliwane hnyawane la traeme [së].” (Efe. 5:​15, 16) Trotrohnine hi easë laka, ame ngöne la xötre celë, ke tha kolo hi a qaja la itre huliwa së e nöjei drai. Kolo fe a upi së troa huliwane hnyawane la traeme së, qëmekene troa traqa la pun. Tune kaa la aqane tro sa huliwane hnyawane la traeme së? Maine tro sa goeëne lapane la itre nuvel, memine la itre ewekë ka ngazo ka traqa ngöne la fen, ke tro lai a thapa la trengecatr nyine tro sa hamën koi Iehova, nge tro fe së a dekurag. Matre nyipiewekë tro sa tuluthe hi la hawa hne së hna xom troa e maine goeën la itre nuvel. Tro së lai a hetre ijine me trengecatr troa kuca la itre huliwa i Iehova ka aegöcatrenyi së. Loi e tro mina fe sa catre cainöj, me thel troa wange hmaca la itre atr hne së hna porotrik memin. Nyipiewekë tro sa xatuane la itre atr troa “atrehmekune hnyawa la nyipici,” ke jëne mel koi angatr.​—1 Tim. 2:4.

14. Nemene la eloine la troa catre huliwa i Iehova? (Wange ju fe la foto.)

¹⁴ Ame la easa catre huliwa i Iehova, ke kola xatua së troa lapa atre la kepine matre kola tro ngazo la fen. Tha easë kö a xou la kola traqa la itre jol göi politik, maine mani, maine itre sine mec. Atre hi easë laka, kolo hi lai a eatrëne la hna qaja hnei Tusi Hmitrötr. Nge tro kö a eatr la aja i Iehova. Tha easë kö a enienij menu, ngo easë pe a catre mejiune koi Iehova matre xatua së troa cile catr.​—Sal. 16:8; 112:​1, 6-8.

15. Maine ka “atreine tulu ewekë” së, nemene la hne së hna troa atreine kuca? (1 Peteru 4:7)

¹⁵ Loi e tro sa mekun catrën la ka nyipiewekë. Ame la ka tru kowe la itre atr enehila, ke troa thele madrin. Tha mekune kö angatr laka, easenyi hë troa apatrene la fene celë. Tha ka ngazo kö troa thele madrin, ngo loi e tro sa “atreine tulu ewekë,” matre tha tro kö sa waiewekë tui fen. (E jë la 1 Peteru 4:7.) Kola hapeue lai? Loi e tro sa atreine waiewekë. Tro lai a xatua së matre tha tro kö sa nu asë la trengecatre së troa thele madrin, ngo tro pe a atreine axecië mekun ka loi. Tro së lai a xom la itre mekun ka amadrinë Iehova, nge ka amamane ka hape, atre hi easë la ka nyipiewekë.​—2 Tim. 1:7.

16. Nemene la ka nyipiewekë koi Iesu qëmeken tro nyidrëti a mec?

¹⁶ Tha hnei Iesu kö hna thëthëhmine la ka nyipiewekë. Itre hawa qëmekene tro nyidrëti a mec, atre hi nyidrëti laka, ame la ka nyipiewekë ke, troa mele nyipici koi Iehova me kuca la aja i Nyidrë. Celë hi matre hnei nyidrëti hna catre thith. Hnei Iesu hna hmek, ngo hnene la itretre dreng hna hmulizië ke, “kucakuca catre angatr hnei hleuhleu.”​—Luka 22:​39-​46; Ioa. 19:30.

17. Hnauëne la itre xan a huliwane la itre réseaux sociaux, ngo nemene la nyine troa hmekën? (Wange ju fe la foto.)

¹⁷ Tune la itretre drei Iesu, easë fe a kucakuca e itre xaa ijin. Hnene la itre ewekë ka traqa enehila, matre easa hnehengazo. Itre xan a lapa aqeanyi ngöne la itre réseaux sociaux matre pane mekune la itre xaa ewekë. Angatr a porotrik me iupifë foto kowe la itre fami angatr me itre sinee i angatr. Ngo angatre fe a goeë video me film, me elo jeux. Tru catr la itre ewekë ka hnyipixe nyine troa e me goeën, matre itre hawa me trengecatr hnei angatr hna nu e nöjei drai. Nemene la ka amamane ka hape, easa huliwane la itre réseaux sociaux ngöne la tulu? Isa hnyinge jë ka hape, ‘Ame la eni a ase huliwane la itre réseaux sociaux, eni kö a egöcatr, maine kola ajeanyi ni qa ngöne la ka nyipiewekë?’

18. Pine nemene matre loi e troa atreine waiewekë la easa iëne la itre nyine iamadrinë?

¹⁸ Loi e tro sa atreine waiewekë la easa goeëne la itre video me itre séries ngöne streaming, maine goeëne la itre video ka hopatr ngöne Ëternet, maine elo jeux vidéos. Tha ka ngazo kö la itre ewekë cili, nge itre ej a amadrinë së. Ngo nyipiewekë tro sa waipengöne la itre hne së hna goeën me elon, memine la traem hne së hna nu. Easa nyiqane goeëne la itre neköi video, e thupen kola mama la itre xan utihë la easa goeëne la itre film ka amamai isi me itre ewekë ka sis. Celë hi ka traqa kowe la ketre trejin trahmanyi qa Asie. Hnei angeic hna nyiqane goeëne la itre igötranene film, utihë la angeic a goeëne la itre xaa video ka mama. Ngo e thupen, hnei angeic hna goeëne la itre video ka sis. Ame hë la pun, angeic ha nyiqane goeë pornographie. Eloine pe, hna xatua angeic hnene la itre qatre thup me itre sinee i angeic, matre hnei angeic hna tuluthe hi la traeme i angeic ngöne telefon, me huletrij la itre applications ne streaming. Kola amamane hnene la tulu celë la enyipiewekën troa atreine waiewekë la easa iën la itre nyine iamadrinë.

19. Nemene la ka troa traqa e tro pala hi sa meku vakas me mano?

¹⁹ Ketre, loi e tro fe sa atreine waiewekë la easa xomi ijine mano me vakas. Nyipiewekë tro sa mano, ke ka lolo kowe la he së me ngönetrei së. Ngo e tro pala hi sa meku vakas, ke tha tro hë së lai a amë panëne la ka nyipiewekë. (Fil. 1:​10) Isa qanyi easë axeciëne la nyine tro sa kuca, me traem hne së hna troa nu. Ngo ame la easa xomi mekun, loi e tro sa isa hnying ka hape: ‘Ame la traem hnenge hna nu troa mano me vakas, ke kolo kö a amamane ka hape, eni a atreine waiewekë? Atre kö ni la ka nyipiewekë, nge kolo kö a amamane ngöne la meleng laka, “easenyi hë la pune la nöjei ewekë asë”?’

20. Nemen la itre thangane ka loi e tro pala hi sa kuca la itre huliwa i Iehova?

²⁰ Maine tro pala hi sa kuca la itre huliwa i Iehova me itre hna majemin ka loi, ke tro së lai a kepe thangane ka lolo. (Isa. 48:17) Jëne la ixatua i Iehova, ijiji së hi troa cil kowe la itre jol ka traqa koi së. Nge tha tro kö a enienijë së hnene la itre ewekë ka traqa e celë fen. Ketre, tro së lai a atreine waiewekë göi ijine vakas me mano. Haawe, catre jë së atreine waiewekë tui Iehova, me catre huliwa i Nyidrë, me goeëne catrëne la ka nyipiewekë. Maine ka xeci koi së lai, tha tro kö sa nue la itre jol troa ajeanyi së qa ngöne la hmi i Iehova, nge tro hë së a “xölehuje la nyipi mel.”​—1 Tim. 6:​19.