Catre Jë Uti Hë La Bapataiso

1. (a) Nemene la itre eloin e tro sa xomi bapataiso? (b) Nemene la hne së hna troa ce wang ngöne la tane mekun celë?

HAPEU hnei eö kö hna nue mel koi Iehova me xomi bapataiso? Maine eje hi lai, hnei eö hna sipo Akötresie troa hetre mekuthetheu ka loi. (1 Pet. 3:21) E cili, eö la ketre tulu ka lolo kowe la itre jeune me kowe la itre ka tha bapataiso pala kö. Ketre mekun ka loi hnei eö hna xom! Ngo tune kaa, e tha ka xomi bapataiso pala kö eö? Eje hi, ka hnimi Iehova eö, nge aja i eö troa kuca la aja i Nyidrë. Atre hi eö laka, nyipiewekë la bapataiso matre tro Iehova a nue la itre ngazo i eö me kepe eö. (It. Hu. 2:38-40) Ngo, maine jë hetre ewekë ka sewe eö troa kuca lai. Nemene la ka troa xatua eö? Ame ngöne la tane mekun celë, tro sa ce wang la (1) kepin matre itre xan a luelue troa xomi bapataiso, (2) kepin matre nyipiewekë tha tro kö a thëthëhmine la pun la fen celë, me (3) itre thangane ka loi hnei eö hna kapa, e tro eö a nue trengecatr, me isine troa xomi bapataiso.

HNAUËNE LA ITRE XAN A LUELU

2. Hnauën la itre xan a luelu troa xomi bapataiso?

² Itre xan a luelu troa xomi bapataiso, ke angatr a xou. Ngacama, tru la aja ne la itre xan troa nyihlue i Iehova, ngo angatr a xou troa tha eatrëne la itre aja i Nyidrë. Maine eje hi lai ka traqa koi eö, e hmaca jë la itre xötr ne la Tusi Hmitrötr, matre xecie koi eö laka, tha Iehova kö a treqen tro eö a pexej. Nge ame la eö a hamëne koi Nyidrë la hnei eö hna atrein, ke Nyidrëti lai a madrin me kapa la hmi eö. (Sal. 103:13, 14; Kol. 3:23) Maine eö a xouene la icilekeu, sipo Iehova jë troa xatua eö troa tune la atre cinyihane la Salamo, kola hape: “Ce Iehova me eni, tha tro kö ni a xou. Nemene la hna troa kuca koi ni hnene la atr?”—Sal. 118:6.

3. Nemene la ketre kepin, matre itre xan a luelu troa xomi bapataiso? (Wange ju icetrön.)

³ Itre xan a hnimi Iehova, ngo angatr a uthe lapan la ijine troa xomi bapataiso, ke angatr a mekun ka hape, thatre hnyawa kö angatr la Tusi Hmitrötr. Ngo hapeu, tro kö a atre asë la Tusi Hmitrötr, matre xomi bapataiso? Tro sa ce wang la ketre hna melën e hnine la Tusi Hmitrötr. Thupene la kola jumejume la kalabus hnene la ketre sa, hnei Paulo me Sila hna cainöj kowe la atre thupëne la kalabus me kowe la fami angeic. Trotrohnine hi angatr ka hape, ketre iamamanyikeu lai. Ketre, ame ju kö lai jidre cili, hnei angatr hna kapa la itre ini ka tru. Celë hi ka uku angatr troa canga “xomi bapataiso.” (It. Hu. 16:25-33) Maine atre Iehova hi eö me itre pane ini ne la Tusi Hmitrötr, tru la ihnimi eö koi Nyidrë, nge ase hë eö ietrane la itre ngazo i eö, nge eö a trongëne la itre trepene meköti Nyidrë, ke ijiji eö hë troa xomi bapataiso.—Mar. 12:30.

4. Nemene la itre xaa kepin matre itre xan a luelu troa xomi bapataiso? (Wange ju fe la foto.)

⁴ Itre xan a ajan troa amadrinë Iehova, ngo angatr a mekun la itre ewekë hnei angatr hna troa nuetrij. Eje hi laka, loi e troa pane mekun hnyawan qëmekene troa axecië mekun. (Luka 14:27-30) Ngo ame la itre xan, angatr a mekune la itre ewekë hnei angatr hna troa nuetrij. Celë hi ka traqa koi Candace. Hnei angeic hna atre la nyipici lo angeic a nekönatr. Matre ame hë la angeic a tru, hnei angeic hna luelu troa ini Tus hmaca. Öni angeic: “Atre hi ni la aja i Iehova, ngo eni a luelu, ke pi tro catre ni a melëne la mele ne fen. Atre hi ni laka, troa jole koi ni troa nue la mele cili.” Ame pena itre xan, angatr a luelu, ke ame koi angatr, tha ijiji angatr kö troa metrötrën la itre trepene meköti Iehova. Angatr a xou troa kuca la ketre ngazo ka tru thupene la bapataiso, nge troa upi angatr qa ngöne la ekalesia. Maine itre ewekë lai ka sewe eö troa xomi bapataiso, nemene la ka troa xatua eö?

5. Nemene la nyine tro sa mekun catrën la easa pi xomi bapataiso? (Mataio 13:44-46)

⁵ Nyipici laka, ame la easa itön la ketre ewekë, ke easa goeëne la thupen. Ngo easë fe a goeëne la enyipiewekën la ewekë cili koi së. Ngacama ka tru thupen, tha easë kö a cil troa itön, ke atre hi easë laka, easa bezoën. Ketre tun, ame la easa mekun troa xomi bapataiso, tha tro kö së a goeëne hi la etrun la itre ewekë hne së hna troa nuetrij. Mekune jë pe së la enyipiewekën troa imelekeu me Iehova. Hnei Iesu hna xome la lue ceitun, matre qaja la nyipici cili. (E jë la Mataio 13:44-46.) Ame ngöne la lue ceitun, ketre trahmanyi a madrin troa salemën asë la hnei angeic hna hetreny, matre itön la ketre trengamo. Hnei eö fe hna öhne la ketre trengamo, ene la nyipici ne la Baselaia. Matre e eö a luelu, lapa mekune jë la itre ceitune i Iesu, nge hnyinge jë ka hape: ‘Hapeu, xecie kö koi ni laka, trengamo ka tru la hnenge hna öhn? Eni kö a wangatrune la imelekeung me Iehova, me mejiun hnei Nyidrëti hna hamë ni, memine la lapa ne la itre trejin e cailo fen?’ Thenge la aqane sa i eö, acatrene jë la hni ne ole i eö kowe la nyipici, maine thele jë la ewekë ka sewe eö troa kuca la loi.

6. Nemene la nyine tro sa kuca, matre hetre hni ka lolo?

⁶ Ame ngöne la ceitune i Iesu ne la atr tra feja, nyidrëti a qaja la aliene hni ne la itre atr, memine la ka sewe angatr troa catre nyihlue i Iehova. Ngo hnei nyidrëti fe hna qaja laka, tro la itre xan a hetre “hni ka lolo.” Tro angatr a dreng me kapa la maca ne la Baselaia. (Luka 8:5-15) Maine eö a luelu, ke the dekurage kö. Jëne la ixatua i Akötresie, ijiji eö hi troa ‘hetrenyi la hni ka hnyipixe,’ matre drengethenge Nyidrë. Sipo Iehova jë troa saze la hni i eö, matre troa kapa me trongëne la nyipici ne la Baselaia ngöne la mele i eö.—Ezek. 18:31; 36:26.

7-8. Pine nemene matre tha xomi bapataiso kö la itre xaa jeune? (Wange ju fe la foto.)

⁷ Itre xaa jeune a hnimi Iehova, ngo tha kökötre kö angatr utihë la xomi bapataiso, ke kola ajojezi angatr hnei itre xan. Itre porofesör a ukune la itre ka ini troa mekun ka hape, tha ka ngazo kö la itre xaa aqane ujë ka sis. Ngo tro lai a hetre thangane ka ngazo kowe la itre jeune. (Sal. 1:1, 2; It. Ed. 7:1-5) Tro eö a atreine cil kowe la itre ka iajojezi, e tro eö a nyitipun la atre cinyihane la Salamo. Öni angeic: “Atreine ju kö ni waiewekë hune la itre ka ini ni, ke eni a lapa mekune la itre hnei nyipëti hna amexej.”—Sal. 119:99.

⁸ Kola mama enehila laka, ame la itre xaa kem me thin ka Temoë, ke tha angatre kö a xatuane la itre nekö i angatr troa xomi bapataiso, ngo angatre pe a sewe nyudren troa kökötr ngöne la nyipici. Angatr a uku nyudren troa ini aqean me hetre huliwa hna nyithupen hnyawan. Ame la itre xan, tha angatre kö a xatuane la itre nekö i angatr troa hetre objectif ngöne la huliwa i Iehova. Matre nemene la nyine tro eö a kuca, e tha xatua eö kö hnei kem me thine i eö troa catre hnimi Iehova? Pane ithanata jë me nyidro. Ngacama jeune ju hë eö maine ka tru, ngo ijiji eö hi troa nyisinee i Iehova.—It. Ed. 20:11.

9. Hnauëne la itre xan pala hi a uthe la ijin troa xomi bapataiso?

⁹ Ame la itre xan, ijiji angatre hë troa xomi bapataiso, ngo angatr pala hi a uth, ke angatr a treqene tro la ketre sinee i angatr a xomi bapataiso. Aja i angatr troa ce xomi bapataiso memine la ketre sinee maine atrene la fami angatr. Eje hi, pëkö engazone lai. Ngo, tro kö eö a nue la itre kepine cili troa sewe eö troa canga xomi bapataiso? The thëthëhmine kö laka, ame la eö a nue mel koi Akötresie, ke eö cas, la eö a sisiny koi Nyidrë. Tha tro kö a inyitipu la kola xomi bapataiso.—Roma 14:12.

HNAUËN LA TROA LAPA MEKUN LA DRAI NE LA PUN

10. Hnauëne laka, tha canga saze kö itre xan?

¹⁰ Ame itre xan, tha canga saze kö angatr matre xomi bapataiso, ke angatr a mekun ka hape, hetre ijine i angatr pala kö qëmeken troa traqa la pun. Ngo hapeu, ka inamacane kö la aqane mekune cili? Hnei Iesu hna hmekëne la itretre dreng ka hape: “Loi e ka hnëkë pala hi nyipunie, ke tro ha traqa la Nekö i Atr ngöne la hawa hnei nyipunieti hna tha mekun.”—Luka 12:40.

11. Nemene la thangane la troa atrepengöi Iehova hnyawa, nge pine nemen? (Salamo 119:60)

¹¹ Ihnim la ka troa uku së troa nue mel koi Iehova. E tro sa atrepengöne hnyawa la Akötresi së, ke tro lai a uku së troa hniin la itre wathebo i Nyidrë me canga trongën itre ej. (E jë la Salamo 119:60.) Hnei Iakobo hna qaja la ketre kepin, matre nyipiewekë troa canga trongëne la itre wathebo i Iehova. Eje hi, thatre kö së la itre ewekë ka troa traqa elany. Matre, e nöjei drai, loi e tro sa “kuca la meköt,” ene la troa kuca la aja i Iehova.—Iako. 4:13-17.

12. Nemene la ini hne së hna xom qa ngöne la ceitune i Iesu göne la vin?

¹² Ame ngöne lo ceitune i Iesu göne la vin, hnei nyidrëti lo hna qaja ka hape, casi hi la thupen kowe lo itre ka huliwa ca hawa, memine lo itre ka huliwa drai ka pexej. Ngo hnauëne laka, tha canga nyiqane kö lo itre ka huliwa koi ca hawa? Öni angatr: “Pë fe kö ka hane pi hë hun.” Tha itre ka genyi kö angatr, ngo pëkö ka canga hë angatr. Nge ame hë la kola hë angatr troa huliwa, hnei angatr hna canga kapa. (Mat. 20:1-16) Ame enehila, Iesu a hë së troa hane atre drei nyidrë me cainöjëne la maca ne la Baselaia. Matre loi e tro sa canga kapa la ihë i nyidrë.

13. Nemene la ini hne së hna xom qaathene la föi Lota?

¹³ Itre xan a mekun ka hape, ijije hi tro angatr a saze qëmeken troa apatren la fen. Ngo e tro pala hi sa itreqe, tro ha jole trootro koi easë troa saze. Celë hi matre, hnei Iesu hna hmekën la itretre dreng ka hape: “Mekune kö lo föi Lota.” (Luka 17:31-35) Atre hi eahlo laka, easenyi catre hë tro Akötresie a ameköti Sodroma me Gomora. Ngo jol koi eahlo troa nuetrij la itre ewekë hnei eahlo hna hetreny. (Gen. 19:23-26) Kolo lai a amaman ka hape, Iehova a nue ijin kowe la itre atr troa saze, ngo tha tro kö Nyidrëti a nue palua angatr troa kuci mekun. Matre ijine hi la troa saze, qëmekene tro Akötresie a apatren la fene celë.—Luka 13:24, 25.

14. Nemene la thangan koi eö la kola eatr la itre hna perofetan hnei Tusi Hmitrötr?

¹⁴ Kola amamane hnene la itre ewekë ka traqa ngöne la fen laka, kola eatr la itre hna perofetan hnei Tusi Hmitrötr göne la pune la fen. Celë hi hne së hna öhn e nöjei drai. Ngacama tha hna ketri kö la nöje i eö hnene la itre ewekë cili, ngo ame la eö a öhne la ka traqa ngöne la itre xaa nöj, tro lai a thue aja i eö troa xomi bapataiso. Tro sa ce wang la ketre hna melën ngöne la Tusi Hmitrötr. Hnei Peteru aposetolo hna ithuecatr kowe la itre pane keresiano troa “hmek” maine “hlë,” ke “easenyi hë la pune la nöjei ewekë asë.” (1 Pet. 4:7; ith.) Angeic a qaja “la pune” la mus i angetre Iudra, ene la ijin troa apatren la traone Ierusalema memine la uma ne hmi. Ame ngöne la tusi angeic, Peteru a ithanata kowe la itre keresiano ka lapa ananyin la traone Ierusalema, matre tha tro kö a hane ketri angatr hnene la itre ewekë cili. (1 Pet. 1:1) Ngo ame la angatr a öhne la kola eatr la hna perofetan hnei Peteru, tro lai a acatren la mejiune i angatr kowe la itre xaa hna perofetan hnei Iehova. Ketre tun, ame la eö a öhne la itre hna perofetan a eatr ngöne la fen, tro lai a uku eö troa hmek me xomi bapataiso.

15. Tro sa hnëkë tune kaa kowe la drai i Iehova? (2 Peteru 3:10-13)

¹⁵ Ame ngöne la hnaaluene tusi angeic, hnei Peteru hna qaja la enyipiewekën la troa lapa treqen la drai ne iameköti. Ame kowe la itre pane keresiano ekö, nanyi pala kö la drai cili. Ngo hnei Peteru hna ithuecatr koi angatr ka hape, tha tro kö a “thëthëhmine” la drai cili. (E jë la 2 Peteru 3:10-13.) Easa mekun la drai cili la easa hnëkë me lapa treqen tro ej a traqa. Ame la easa lapa treqen la drai cili, easa amaman la itre “thiina ka meköt, nge ka kuca la itre huliwa ka nyipici koi Akötresie.” Pane mekune jë la madrine i Iehova la Nyidrëti a goeë eö a kuca la “itre huliwa ka nyipici” koi Nyidrë! Tro Nyidrëti a madrin e tro eö a nue la mele i eö koi Nyidrë me xomi bapataiso.

ITRE MANATHITH LA TROA BAPATAISO

16. Eu la ijin ka loi troa xomi bapataiso? (2 Korinito 6:1, 2) (Goeëne ju fe la itre foto.)

¹⁶ Enehila hi la ijin ka loi troa xomi bapataiso. (E jë la 2 Korinito 6:1, 2.) Atre hnyawa hi la eunuka atre Aithiope ka hape, tha tro kö a uthe koi elany. Ame hë la angeic a trotrohnin la maca ka loi me öhne la ketre tim, tha hnei angeice kö hna qaja ka hape: ‘Ka loi tro ni a pane atre hnyawa la maca la loi. Hetre itre xaa tim ngöne la gojeny.’ Waea! Öni angeic koi Filipo, “Nemene pe kö la ka ajolë ni troa xomi bapataiso?” (It. Hu. 8:26, 27, 35-39) Ketre tulu lai ka lolo! Thupene la angeic a xomi bapataiso, “angeice pë hë a trongëne jë la tronge i angeic cememine la madrin.”

17. Nemene la ewekë nyine tha tro kö sa thëthëhmin?

¹⁷ Maine eö pala kö a luelu troa xomi bapataiso, the thëthëhmine kö laka, aja i Iehova troa eatrongë eö, ke aja i Nyidrë tro eö a imelekeu me Nyidrë. (Roma 2:4) Tro Nyidrëti a xatua eö troa elë hune la xou, me seseu, me nuetrij la itre ewekë ka sewe eö troa bapataiso. Ame hë la eö a öhne jëne la bapataiso laka, ka wië la mekuthetheu i eö qëmekei Akötresie, tha tro hmaca kö eö a mekun la ‘itre ewekë hutrö i eö.’ (Fil. 3:8, 13) Nge tro eö a lapa treqen la ‘itre ewekë ka eje qëmekei eö,’ ene la itre manathithi hnei Iehova hna hnëkën thatraqan la itre ka nue mel me xomi bapataiso.—It. Hu. 3:19.