Aliene Me Enyipiewekëne La Bapataiso

1. Nemene la ka amamane ka hape, ame la ini göi bapataiso ke, ketre pane ini göi Keriso?

TRU la madrine së la kola xomi bapataiso hnei ketre! Hnene la itre pane keresiano hna hane madrin tun, la angatr a sine la pane icasikeu ne la ekalesia hna hnyipi acil. Ame ngöne la ijine cili, alanyim la itre ka xomi bapataiso, nge hna cile fë la ketre cainöj ka qejepengöne la aliene la bapataiso. (It. Hu. 2:38, 40, 41) Öni Paulo aposetolo, ame ngöne la “itre pane ini göi Keriso” ke, hetrenyi fe la “ini göi bapataiso.” (Heb. 6:1, 2) Ngacama tha ka jole kö la ini göi bapataiso, ngo nyipiewekë tro sa trotrohnine ej hnyawa. Pine nemen?

2. Hnauëne laka, nyipiewekë tro sa trotrohnine hnyawa la ini göi bapataiso?

² Ame la uma ka cile catr, ke ka hetre trepene ka catr. Ketre tun, troa cile catre la lapaune së, e tro sa trotrohnine hnyawa la ini göi bapataiso. Nyipiewekë tro së isa ala cas a trotrohnine hnyawane la ini cili, ngacama tha bapataiso pala kö së, maine ka hekö hë së bapataiso. Celë hi matre, tro sa ce sa la itre hnyinge celë: Nemene la bapataiso? Nemene la nyine troa kuca hnene la itre ka bapataiso? Nge hnauëne la easa xomi bapataiso ngöne la ëjene la Kem, me Nekön, me uati hmitrötr?

ALIENE LA BAPATAISO

3. Nemene la hnei eö hna amamane koi itre xan la eö a bapataiso?

³ Ame la eö a bapataiso, eö hi lai a amamane koi nöjei atr laka, ase hë eö kapa la nyipici göi Iehova me Iesu Keriso, me ietrane la itre ngazo i eö. Ketre, ase hë eö saze la mele i eö matre nyihlue i Iehova, nge atrehmekune hë eö laka, Iesu hi la jëne iamele. Nge hnei eö hna sisinyi koi Iehova ngöne la thithi laka, tro hë eö a kuca la aja i Nyidrë, nge aja i eö troa hane sine la organizasio i Nyidrë. Ame la eö a sisiny, me xomi bapataiso, eö hi lai a trongëne la gojenyi ka tro kowe la mele ka pun.

4. Kola hapeu la kola heti eö ngöne la tim? (Wange ju fe la foto.)

⁴ Ame la eö a bapataiso, kola heti eö ngöne la tim,a kösë kola kelemi eö. Nge ame la eö a mejë qa ngöne la tim, kösë mele hmaca ha eö. (Wange ju fe la Kolose 2:12.) Jëne la bapataiso, eö hi lai a amamane ka hape, ase hë eö saze la aqane mele i eö. Pine nemen? Pine laka, ame la kola heti eö ngöne la tim, eö a amamane ka hape, ase hë eö nuetrij la itre thiina i eö hnapan. Nge ame la eö a mejë hmaca, eö hi lai a amamane ka hape, tro hë eö a kuca la aja i Akötresie.

5. Pine nemene matre ceitune hi la itre trengecatr hnei eö hna nu troa xomi bapataiso, memine la itre trengecatr hnei Noa hna nu troa cane la aka? (1 Peteru 3:18-21)

⁵ E jë la 1 Peteru 3:18-21. Ceitune hi la itre trengecatr hnei eö hna nu matre xomi bapataiso, memine la itre trengecatr hnei Noa hna nu troa cane la aka. Maine eö petre hi a atre Iehova, eö jë a mekune ka hape, tru pala ha la nyine troa kuca matre bapataiso. Nge maine jë, casi hi la mekuna i eö lai me Noa ekö, lo angeic a mekun troa cane la aka. Ngo ka nyipiewekë catr troa nue trengecatr! Tro sa ce wang la tulu i Noa. Akötresie la ka amekötine la aqane troa cane la aka, nge hnëqa i Noa troa trongëne la itre hna amekötine cili, matre amelene la itre atr ngöne la Iwë Atraqatr. Hnei Noa hna lapaune koi Akötresie, me kapa la ixatua qaathei Nyidrë. Hnei angeic hna idrengethenge me cane la aka. Tui Noa, ijiji eö troa “kuca asë la hnei Akötresie hna upi [eö] troa kuca.”—Gen. 6:22.

6. Tune kaa la aqane amele së hnene la bapataiso?

⁶ Ame ngöne la xötre 21, Peteru aposetolo a qaja ka hape, bapataiso a ‘amele së.’ Nyipici, tha hnene kö laka, hna heti së matre mele hë së, kösë ase hë wasine la itre ngazo së. Waea! Madra i Iesu hmekuje hi la ka ahmitrötrë së qa ngöne la nöjei ngazo asë. (1 Ioa. 1:7) Ngo, ka nyipiewekë troa bapataiso, ke ketre hna amekötine lai hnei Iehova, nge aqane tro eö a “sipone koi Akötresie troa hetre mekuthetheu ka loi.” Nge tro kö Nyidrë a kapa la sipo i eö. Celë hi matre, bapataiso a ‘amele së’ maine tro xomi së kowe la mel.

NYINE TROA KUCA HNENE LA ITRE KA BAPATAISO

7. Jëne la Tusi Hmitrötr, nemene la hne së hna trotrohnine göne la bapataiso?

⁷ Pëkö hnei Tusi Hmitrötr hna qaja göne la aqane trongene la bapataiso, ene pe, troa hetin ngöne la tim. Ngo ej a xatua së troa trotrohnine la nyine troa kuca hnene la itre ka bapataiso. Jëne la itre trepene meköt, atre hi la itre ka bapataiso la aqane tro angatr a heetr, me aqane tro la itre ka traqa troa goeën a ujë. (1 Kor. 14:40; 1 Tim. 2:9) Ame enehila, ketre qatre thup la ka kuca la bapataiso. Ngo tha easë kö a atrun menune pala ha lai qatre thup cili. (1 Kor. 1:14, 15) Ketre, ka lolo la bapataiso, ngacama alanyim maine ala xalaithe hi la ka goeën.—It. Hu. 8:36.

8. Nemene la lue hnying hna hnyingën kowe la itre ka troa xomi bapataiso, nge pine nemen? (Itre Huliwa 2:38-42) (Wange ju fe la foto.)

⁸ Öni Tusi Hmitrötr, “maine aja [së] troa mel, nyipiewekë tro [së] a qaja trongëne la maca hnene la që” së, ene la troa qaja la lapaune së. (Roma 10:9, 10) Easa “qaja trongëne la maca hnene la që” së ngöne la easa cainöj koi itre xan, ngo memine fe ngöne la ijin easa xomi bapataiso! Celë hi matre, lue hnying hna hnyingëne kowe la itre ka xomi bapataiso. Ame la pane hnying: “Hnei epuni kö hna ietrane la ngazo i epun, me kapa la jëne mel qaathei Iehova, ene Iesu Keriso?” Ame la hnyinge celë, ke kola amamane la hnei angeic hna kuca matre xomi bapataiso, nge ka ihmeku memine la hnei Peteru hna amekötin ngöne la ijine Penetekos. Nge ame la hnaaluen: “Trotrohnine kö epun laka, jëne la bapataiso, epuni a amamane ka hape, Temoë Iehova ha epun, nge epuni ha sine la organizasio i Iehova?” Kola amamane hnene la hnyinge celë laka, tro sa metrötrëne la hne së hna sisiny, e tro sa ce huliwa memine la organizasio i Iehova, me trongëne la itre hna amekötin, me ce nyihlue i Akötresie memine la itre trejin, tune lo itre pane keresiano. (E jë la Itre Huliwa 2:38-42.) Ame la itre ka nangëne la lue hnyinge cili, ke angatr hi lai a amamane ka hape, ijiji angatre hë troa xomi bapataiso.

9. Nemene la nyine tro sa kuca matre kepe së hnei Akötresie?

⁹ Maine jë, qëmekene tro eö a atre la nyipici, pëkö ngazo ka tru hnei eö hna kuca, nge ka meköt la aqane ujë i eö. Maine pena, hna hetru eö hnene la keme me thine i eö ka hmi, nge hnei nyidro hna ini eö troa hnimi Iehova. Hapeu, tro kö eö a ietrane la itre ngazo i eö, me xomi bapataiso matre kepe eö hnei Akötresie? Öö. Ngacama pëkö ngazo ka tru hne së hna kuca, ngo loi e tro së a isa atre ka hape, itre atr ka ngazo së, matre nanyi së qaathei Akötresie. (Sal. 51:5) Ame la easa atre Iehova, easa axeciën e cili troa amë panëne la aja i Nyidrë, nge pine pë hë la itre aja së. Celë hi matre easa ietrane la itre ngazo së ekö, me ujë, ene la troa mele thenge la aja i Akötresie. Ame e cili, ijiji easë hë troa xomi bapataiso.—It. Hu. 3:19.

10. Nemene la nyine tro eö a kuca, ngacama hna bapataiso eö ekö thene la ketre hmi?

¹⁰ Tro kö eö a bapataiso thene la itre Temoë Iehova, ngacama hna bapataiso eö thene la ketre hmi? Öö. Pine nemen? Pine laka, ame ekö thatre Iehova hnyawa kö eö, me Iesu. Nge ngacama ase hë eö sisinyi koi Nyidrë ngöne la thith, ngo thatre kö eö la aja i Nyidrë lo ijine cili. Ame lo Paulo e Efeso, hetre itre trahmanyi ka bapataiso hë, ngo thatre hnyawa kö angatr la itre ini Keriso. Matre hnei angeic hna upi angatr troa bapataiso hmaca.b (It. Hu. 19:1-5) Ketre tune mina fe enehila, ka meköt la bapataiso ne la ketre atr, e atre hnyawa hi angeic la aja i Akötresie.

“NGÖNE LA ËJE I KAKA, ME NGÖNE LA ËJE NE LA NEKÖN, MEMINE LA UATI HMITRÖTR”

11. Kola hapeu la troa bapataiso “ngöne la ëje i Kaka, me ngöne la ëje ne la Nekön, memine la uati hmitrötr”? (Mataio 28:18-20)

¹¹ Hnei Iesu hna amekötine troa bapataisone la itretre dreng “ngöne la ëje i Kaka, me ngöne la ëje ne la Nekön, memine la uati hmitrötr.” (E jë la Mataio 28:18-20.) Kola hapeue lai? Ame la hnëewekë “ëje” ngöne la Tusi Hmitrötr, ke kola qaja la aqane goeën la ketre atr hnei itre xan. Ngo kolo fe a qaja la hnëqa i angeic, maine musi angeic. Matre, ame la easa kuca maine qaja la ketre ewekë “ngöne la ëje” i ketre, ke trotrohnine hi së laka, hetre hnëqa i angeic, maine ka trene musi angeic. Tro sa ce wang la aqane tro sa metrötrëne la hnëqa i Kem, me Nekön, memine la huliwa ne la uati hmitrötr.

12. Kola hapeu la troa bapataiso ngöne la ëje i Kaka? (Hna Amaman 4:11) (Goeëne ju fe la itre fot.)

¹² Ngöne la ëje i Kaka. Atre hi së laka, Iehova la Keme së, ke Nyidrëti la Atre Hamë mel. Nyidrë la ka Tru Trenge Men, me Atre Xup la nöjei ewekë. (E jë la Hna Amaman 4:11.) Atre hi së laka, Nyidrëti la Atre Dreng la itre thith, nge ame la easa ithanata koi Nyidrë, maine qeje Nyidrë koi itre xan, easa huliwan la ëje i Nyidrë cememine la metrötr. (Sal. 65:2) Ngo hetre ketre ewekë kö nyine tro sa atre matre troa bapataiso ngöne la ëje i Kaka. Ame la itre ka dreng la cainöje i Peteru ngöne lo ijine Penetekos, ke atre hë angatr la ëje i Iehova. Ngo nyipiewekë tro fe angatr a trotrohnine laka, Nyidrëti la ka hamëne la mel jëne Iesu Keriso.—Roma 5:8.

13. Kola hapeu la troa bapataiso ngöne la ëje ne la Nekön? (Goeëne ju fe la itre fot.)

¹³ Ngöne la ëje ne la Nekön. Atre hi easë laka, Iesu la Nekö i Akötresie ka cas, hna xup mekötin hnei Nyidrë. Iesu “la gojeny,” ke nyidrëti la ka aijijë së troa imelekeu me Iehova. (Ioa. 14:6) Iesu la Atre Itö mele së, ke hnei nyidrëti hna mec matre tro sa hetrenyi la mel. Celë hi ka uku së troa xötrethenge la tulu i nyidrë o drai, ngo tha ene hmekuje kö ngöne la drai ne bapataiso. (1 Ioa. 2:6) Matre, tui nyidrë, easa catre cainöj e ijine loi me ngazo. (Luka 4:43) Easë mina fe a cile catr qëmekene la iaxösisi, ke aja i easë troa nyihlue i Iehova. (2 Tim. 3:12) Nge atre hi së laka, Iesu la “he ne la ekalesia,” matre easa drengethenge la itre atr hnei nyidrëti hna acil troa thupëne la itre nekö i mamoe i nyidrë.—Efe. 4:8, 11, 12; 5:23.

14. (a) Kola hapeu la troa bapataiso ngöne la ëje ne la uati hmitrötr? (Goeëne ju fe la itre fot.) (b) Nemene la itre xaa aqane bapataisone la itre hna iën? (Wange ju la hna eköhagen “Itre Xaa Aqane Bapataisone La Itre Hna Iën.”)

¹⁴ Ngöne la ëje ne la uati hmitrötr. Atre hi easë la nyipici göne la uati hmitrötr. Tha ketre atre kö, maine ketre atrene la A.I.U, ngo kolo pe a qaja la trengecatre i Akötresie. Hnene la uati hmitrötr hna xatuane la itre perofeta ekö, memine la itre ka cinyanyine la Tusi Hmitrötr. Celë hi matre, easa e Tusi Hmitrötr e nöjei drai, me trongëne la itre ini hna hamën ngöne la mele së. (2 Pet. 1:20, 21) Ketre, easa thupëne matre tha tro kö a kuca la itre ngazo ka tru, wanga tha huliwa pi ej the së, me ngöne la ekalesia.—Efe. 4:30.

15. Nemene la nyine tro sa isine troa kuca?

¹⁵ Maine ka bapataiso hë eö, isine jë troa trotrohnine hnyawane la itre “ini göi bapataiso”c me mele thenge la hnei eö hna sisiny koi Iehova. Tune kaa e tha ka bapataiso pala kö eö? Hetre ewekë kö ka sewe eö troa bapataiso? Ame ngöne la tane mekun e thupen, tro sa ce wang la nyine tro eö a kuca matre troa traqa kowe la bapataiso.