Ka Hnëkë Kö Eö Troa Cile Kowe La Itre Jol Thupene La Bapataiso?

1-2. Nemene la nyine tro sa kuca matre hnëkë kowe la itre jol ka traqa thupene la bapataiso? Qaja jë la ketre ceitun.

AME ngöne la fene i Satana, tro së lai a ixelë memine la itre jol. Öni Iesu kowe la itretre dreng: “Tro kö a hetre ewekë ka troa huli së troa kuca la ngazo.” (Mat. 18:7) Celë hi matre, loi e tro sa hnëkë troa cil kowe la itre jol. Nge ame la itre xan, ke itre jol memine la itre trejin me easë.

² Hane hi la ketre ceitun: Kola ithuecatr kowe la itre Temoë Iehova troa hnëkë qëmeken troa traqa la ketre hulö. Easa hnëkë tune kaa? Hnapan, easa pane thel troa atre la itre hulö ka traqa ngöne la nöje së. Nge the qaja pala ha e easa xötrei traqa e cili. E thupen, easa mekun la nyine tro sa kuca e traqa jë la ketre hulö. (It. Ed. 21:5) Ketre tun, loi e tro sa thel troa atre la itre jol ka troa thë la lapaune së, matre tro sa hnëkë me atre la nyine tro sa kuca. Ame e cili, tro sa atreine cile catr qëmekene la jol, nge tha tro kö ej a thë la imelekeu së me Iehova. (Sal. 17:5) Tro sa ce wang la köni jol hna troa melëne hnene la itre ka xötrei bapataiso, me aqane tro angatr a hnëkë.a

KETRE TREJIN A AKÖTRË EÖ

3. Nemene la itre jol ka troa traqa ngöne la ekalesia?

³ Mekune pala kö eö lo ijine eö a xötrei sine la itre icasikeu, nge eö a öhne la ihnim ka ej thene la itre hlue i Iehova? Xecie hë koi eö laka, e cili hi la nyipici. (Ioa. 13:35; Kol. 3:12) Eje hi lai hna melën hnei Blancab. Ngo, thupene la angeic a xomi bapataiso, hnei angeic hna cil kowe la ketre jol. Öni angeic: “Hna ngazo thiina koi ni hnene la ketre trejin föe. Nge hnenge fe hna öhn laka, ka ixöjetrij catr angeic. Eni a sesëkötr ke, hnenge hna inine laka, ka ihnim me thele tingeting la itre Temoë Iehova.” Nyipici laka, itre trejin a isine troa eënyine la itre thiina ka lolo, ngo itre atr ka ngazo pala hi angatr. (Efe. 4:23, 24; 1 Ioa. 1:8) Matre ame e ketre ijin, tro kö la ketre a qaja maine kuca la ketre ewekë ka troa akötrë eö. (Iako. 3:8) Celë hi kepin matre, hnene la itre xan hna nuetriji Iehova.

4. Nemene la aqane tro eö a hnëkë e traqa ju la ketre trejin a akötrë eö? (Efeso 4:32)

⁴ Nemene la aqane tro eö a hnëkë e traqa ju la ketre trejin a akötrë eö? E nöjei drai, trongëne jë la hna qaja ngöne Efeso 4:32. (E jë.) Maine tro eö a loi hni me utipi itre xan, tha tro kö eö lai a iwesitrë me itre trejin. Thele jë tro pala hi a nue la tria i itre xan. Nemene la ka troa xatua eö? Pane mekune jë la nöjei ijin eö a sipo Iehova troa sengetrij la itre ngazo i eö, nge Nyidrëti pala hi a kapa. (Mat. 6:12) Maine tro eö a mekun catrëne la aqane nue Iehova la itre ngazo i eö, me olene la hnei eö hna kapa e thupen, tro ha hmaloi koi eö troa nue la ngazo i itre xan.

5. Nemene la trepene meköt ka troa xatua së, e traqa ju ketre akötrë së? (Itre Edromë 19:11) (Goeëne ju fe la itre foto.)

⁵ E jë la Itre Edromë 19:11. Öni Tusi Hmitrötr, ame la kola akötrë së, tro la atreine thelewekëc a ahmitrëne la elëhni së. Hnene la trepene meköt celë hna xatua Rima, ketre trejin hna hnyipi bapataison. Öni angeic: “Ame la kola ngazo la thiina ne la itre trejin, nge ka akötrë ni, eni a canga mekun la hna qaja ngöne Itre Edromë 19:11. Eni a mekun la pengöi angatr, me itre hnei angatr hna melën ekö, nge eni a thel troa trotrohnine la kepin matre angatr a ujë tun. Eni fe a ce cainöj me angatr, matre troa atrepengöi angatre hnyawa.” Ketre eamo la ka lolo catr! Nyipiewekë catr enehila, tro eö a atrepengöne hnyawa la itre trejin me eö. Eje hi, e tro eö a atrepengöi angatr hnyawa, tro ha hmaloi koi eö troa nue la itre ngazo i angatr, e traqa ju angatr akötrë eö.

6. Nemene la ka troa xatua së troa imelekeu hnyawa memine la itre trejin ne la ekalesia?

⁶ Nemene la nyine tro eö a kuca matre tingetinge la ekalesia? Ame la eö a thel troa atrepengöne hnyawa la itre trejin, goeëne catrëne jë la itre thiina ka loi i angatr. (Wange ju fe la Itre Edromë 10:12; Roma 12:10; Fil. 2:2, 3) Celë hi ka xatua Mark, ketre hna hnyipi bapataison. Pine laka, angeic ha nyiqane ce tro lapa memine la itre trejin ne la ekalesia, hnei angeic hna öhne la itre tria i angatr. Nemene la ka xatua Mark? Öni angeic: “Hnenge hna öhne laka, ka pëkö pengöne la tria ne la itre trejin, hune la itre ngazo hna kuca hnene la itre atre ne fen. Eni a öhn e cili laka, tha tro kö ni a goeën catrëne la tria ne la itre trejin. Matre saze hë la aqane waiewekëng, eni a thel troa goeën catrëne la itre thiina ka loi i angatr.” Maine tro eö a nyitipu Mark, troa lolo la imelekeu i eö memine la itre trejin ne la ekalesia.

EÖ HMACA A MEKUN LA ITRE EWEKË HNEI EÖ HNA NUETRIJ

7. Pine nemene matre easa mekune hmaca lo itre ewekë hne së hna nuetrij ekö?

⁷ Ame lo eö a atre la nyipici, madrine catr eö troa nuetrij la fene i Satana. Ma eö jë a qaja ka hape, ‘Drei fe la ka pi bëek hmaca kowe la fene i Satana?’ Ngo ame la kola traqa la itre jol ka tru, eö ha nyiqane mekun lo mele i eö ekö, memine la itre hnei eö hna nuetrij matre troa nyihlue i Iehova. (Wange ju fe la Numera 11:4-6.) Ame la itre xaa trejin, hnei angatr hna nuetrij la ketre huliwa hna nyithupene hnyawa, ngo ka xom la traeme i angatr. Nge ame la itre xan, hna nuetriji angatr hnene la itre xaa sinee i angatr, la angatr a nyiqane ini Tus. Nge hnei itre xan hna nuetrij la ketre hna majemine ka ngazo, ngo ka hamë madrin koi angatr ekö. Tune kaa Iehova e tro sa nuetrij la imelekeu së me Nyidrë, matre bëeke hmaca kowe la itre ewekë cili? Nemene la nyine tro eö a kuca enehila, matre tha tro kö eö a bëeke hmaca kowe la itre ewekë hnei eö hna nuetrij ekö?

8. Nemene la ini hne së hna xom qaathei Aberahama me Sara?

⁸ Tusi Hmitrötr a qaja la itre hlue i Iehova ekö ka hane nuetrij la itre ewekë i angatr, matre nyihlue i Nyidrë. Maine ju, tro angatr a mekun hmaca lo itre ewekë hnei angatr hna nu. Ka tui Aberahama me Sara. Hnei nyidro hna drengethenge Iehova, me trotrij la traon e Ure, ketre traon hna ekögölith, matre troa mel fene la itre itat. (Heb. 11:8, 9) Maine jë, hnei nyidro hna hane qaja e itre xaa ijin lo mele i nyidro ka lolo e Ure. Ngo “maine hnei [nyidroti] ju hna lapa mekune” la itre ewekë cili, maine piine hmaca la mele i nyidroti ekö, tro hmaca nyidroti a bëek. Ame pe, hnei nyidro hna catr goeëne la mel hna hnëkën koi nyidro hnei Akötresie.—Heb. 11:15, 16.

9. Tune kaa la aqane goeëne Paulo lo itre ewekë hnei angeic hna nuetrij? (Filipi 3:7, 8, 13)

⁹ Tru catr la itre ewekë hnei Paulo hna nuetrij, matre troa nyihlue i Iehova. Qëmekene tro angeic a kapa la hmi keresiano, hnei angeic hna ini thei Gamaliela, ketre atre ini ka tru, nge hna metrötrën. (It. Hu. 22:3) Maine ju, tro angeic a cilëne la ketre hnëqa ka tru ngöne la hmi i angetre Iudra. (Gal. 1:13, 14) Ngo ame la angeic a kapa la maca ka loi, hnei angeic hna nuetrij la itre nöjei ewekë cili. Hapeu, ka loi kö la mele i angeic e thupen? Waea. Hna lepi angeic, me akalabusi angeic, me methinë angeic hnene la nöje i angeic. (2 Kor. 11:23-26) Maine hnei angeice ju hna goeëne catrëne la itre jole ka traqa koi angeic, me mekun hmaca lo mele i angeic ekö, tro angeice lai a hace me pi bëeke hmaca kowe ej. Ngo hnei angeice pe hna wangatrune la manathith troa nyihlue i Keriso, memine la itre manathith hnei angeic hna troa kapa elany. Xecie koi Paulo laka, tha ka gufa kö la itre trengecatr hnei angeic hna nu, matre troa atre drei Keriso!—E jë la Filipi 3:7, 8, 13.

10. Nemene la nyine tro pala hi sa lapa mekun? (Mareko 10:29, 30) (Goeëne ju fe la itre foto.)

¹⁰ Nemene la ini koi së? Maine eö maca a mekun lo itre ewekë hnei eö hna nuetrij ekö, mekune ju fe la kepin, matre hnei eö hna nuetrij itre ej. (A. Cai. 7:10) Goeëne jë la itre manathith hnei eö hna kapa qane lo eö a nyihlue i Iehova. Eö a nyisineene la Atre Ka Sisitria ne la fene hnengödrai. (It. Ed. 3:32) Eö a sine la ketre fami ka cas me ka ihnim. (E jë la Mareko 10:29, 30.) Nge easenyi hë tro eö a kapa la ketre mel ka lolo! (Isa. 65:21-23) Maine tro pala hi eö a mekune la itre manathith hnei eö hna kapa ngöne la huliwa i Iehova, tha tro kö eö lai a piine hmaca lo itre ewekë hnei eö hna nuetrij.

11. Nemene la ini hnei eö hna kapa qa ngöne la hna melën hnei Rosemary?

¹¹ Tro sa ce wang la hna kuca hnei Rosemary, ketre trejin föe ka xomi bapataiso lo kola 50 lao macatre. Öni eahlo: “Ame lo xötrei, jole koi ni ke, eni a pi feetë Noel, matre troa ce lapa me madrin memine la faming. Nge pi tro catre ni a hamë kado kowe la itre sineeng. Eni a madrin la eni a öhne la itre nekönatr a fe la itre kado i angatr fene lai sapë.” Nemene la ka xatua Rosemary? Öni eahlo: “Eni a itronyi memine la faming e itre xaa ijin. E nöjei macatre, eni a hën asë la faming, me hamë kado koi angatr, me qaja la etrune la ihniming koi angatr.” Ngo hetre ketre jol hmaca kö hnei Rosemary hna cile kow. Öni eahlo: “Ame la eni a atre la nyipici, ke hna nuetriji ni hnene la itre sineeng, nge ka iatre hnyawa eahun qan ekö. Ame itre xaa ijin, ena meku angatr ke, eni casi pe hi.”d Nemene la ka xatua Rosemary? Hnei eahlo hna thel troa cainöj memine la itre xaa trejin föe. Öni eahlo: “Ame enehila, tru catr la itre sineeng, nge eni a hnimi angatr me metrötrë angatr.” Nemene la ini koi së? Tro kö a traqa la itre ijine laka, tro hmaca eö a mekun lo itre ewekë ka amadrinë eö ekö. Ngo ijije hi tro eö a nyihnane la itre ewekë cili hnene la itre ewekë ka amadrinë Iehova. (Fil. 4:8, 9) Nge the thëthëhmine kö laka, tro pala hi Iehova a hamën atrun koi eö, hune la itre ewekë hnei eö hna nu.

ITRE XAN A NUETRIJI IEHOVA

12. Nemene la ewekë ka troa traqa ngöne la ekalesia, nge ka troa ajolë eö?

¹² Ame la eö a nyiqane nyihlue i Iehova, hnei eö hna nuetrij la fene ka ngazo matre troa sine la nöje i Iehova ka pë ethan. (Isa. 65:14) Ngo ame itre xaa ijin, tro la ketre atrene la ekalesia a kei kowe la ngazo. Nge ame itre xan, troa up qa hnine la ekalesia. (1 Kor. 5:13) Tro sa ce wang la hna qaja hnei Samar. Öni angeic: “Thupene ju hi la eni a xomi bapataiso, hnene la ketre qatre thup hna kuca la ketre ngazo ka tru, matre hna upi nyidrë qa ngöne la ekalesia. Hna ketri ni ke, ame koi ni, thatreine kö tro la ketre qatre thup a ngazo koi Iehova me kowe la ekalesia.” Nyipici laka, itre trejin a hnimi Iehova me isine troa mele nyipici. (1 Kor. 13:4, 7) Ngazo pe, ame e nöjei macatre, kola up la itre xaa trejin qa ngöne la ekalesia. Nge maine ketre trejin hnei eö hna atre hnyawa lai hna up, maine hnei eö hna wangatrun, tro lai a jole koi eö.

13. Nemene la aqane tro eö a hnëkë enehila, e traqa ju la ketre sinee i eö a nuetriji Iehova?

¹³ Nemene la aqane tro eö a hnëkë enehila, e traqa ju la ketre sinee i eö a nuetriji Iehova? Acatrene jë la imelekeu i eö me Iehova. (Iako. 4:8) The thëthëhmine kö laka, isa easë kö qëmekei Iehova, nge isa lapaune i easë kö koi Nyidrë. Ngacama easa nyihlue i Iehova memine la fami së, me ngöne la ekalesia, ngo nyipiewekë tro sa isa thith me e Tusi Hmitrötr.—Sal. 1:2; 62:8.

14. Nemene la hna ini së hnei Peteru? (Ioane 6:66-68)

¹⁴ Hetre ini nyine tro sa xom qa ngöne la aqane ujë i Peteru, lo kola nuetriji Iesu hnei itre xan. Ma hnei Peteru fe hna hane luelu lo ijine cili. Ngo goeëne la hnei angeic hna qaja ngöne Ioane 6:66-68. (E jë.) Tha hnei angeice kö hna goeëne la hna kuca hnei itre xan, ngo angeice pe a goeëne la itre trenge nyipici hnei Iesu hna ini angeic. Matre tha nanazije kö la lapaune i Peteru. Ketre tun, maine itre xan a nuetriji Iehova, the thëthëhmine kö laka, kolo hi lo organizasio lai ka ini eö la pengöi Nyidrë. Haawe, ea catrëne jë la nyipici! Öni Samar, lo hna qaja ha e kula ka hape, “Xecie koi ni ka hape, tha hnene kö laka, ka ngazo la hna kuca hnene la ketre trejin, matre ka ngazo asë hi la ekalesia, nge ka tria la hna qaja hnei organizasio. Ngacama ka ngazo la aqane ujë ne la itre atr, ngo ka mingöminge pala hi la itre thiina i Iehova.”

15. Nemene la ini hnei eö hna xom qaathei Emily?

¹⁵ Tro sa ce wang la hna melën hnei Emily. Ca wiik thupene la angeic a xomi bapataiso, hnene la thine i angeic hna trotrij la hnalapa, nge hna upi eahlo qa ngöne la ekalesia. Öni Emily: “Tha mekune pi kö ni ka hape, troa traqa la ewekë cili. Tru catr la hnenge hna meku nenë.” Nemene la ka xatua Emily? Öni angeic: “Tha eni casi kö. Ce eni me kaka memine la itre trejin ne la ekalesia. Angatre hi la sipu faming. Easë asë a melëne la itre jol. Celë hi matre, nyipiewekë tro sa cas, me itöithuecatr.” (1 Pet. 5:9) Tha tro kö sa treqene troa traqa la jol, matre acatrene la imelekeu së memine la itre trejin. Ijine hi la! Matre e traqa jë elanyi la ketre jol koi eö, ke tro angatre hi la ka troa xatua eö.

16. Nemene la ewekë nyine tha tro kö sa thëthëhmin? (Wange ju fe la foto.)

¹⁶ The thëthëhmine kö laka, Iehova a hajine la itre atr hnei Nyidrëti hna hnim. (Heb. 12:6) Aja i Nyidrë tro la itre hna up qa ngöne la ekalesia a bëeke koi Nyidrë. (2 Pet. 3:9) Matre, e hna up la ketre sinee i eö qa ngöne la ekalesia, the luelue kö laka, itre qatre thup a isine troa xatua angeic, matre tro angeic a bëeke hmaca koi Iehova.—2 Tim. 2:24, 25.

17. Nemene la ka xecie koi së?

¹⁷ Hnei easë hna ce wang la itre xaa jol hna melëne hnene la itre ka xötrei bapataiso. Maine jë, eö a nango xou, ngo the seseu kö. Ijije hi tro eö a hnëkë, matre troa cil kowe itre ej. Ketre, ce Iehova me eö, nge tro kö Nyidrëti a xatua eö. Qan ekö, hnei Nyidrëti hna ce me eö, uti pala hi enehila. Nge tro kö Nyidrëti a ce me eö elany! (1 Pet. 5:10) Traqa ju hë la nöjei pengöne jol, ngo tro kö Nyidrëti a hamë eö la trengecatr troa cile kow. Maine tro pala hi eö a sipo ixatua koi Nyidrë, pëkö ketre ewekë ka troa ananyi eö qaathei Nyidrë!—Sal. 119:165; Roma 8:38, 39.