Nasep Nuamsa In

1-3. (a) Mi tampi in a nasep uh bangci ngaihsut uh a hiam? (b) Hih khenpi sungah bang thute kikum ding i hiam?

LEITUNG bupah, mite in amau le a innkuanpihte kivak nading hanciam takin na a sem uh hi. Mi tampi in amau’ nasep tungah lungkim zo lo uh a, pawlkhatte in sun thapai-a na a sep uh pen cimtak uh hi. Tua bang na hihleh nasep nuam na sak semsem nadingin bang hih thei na hiam? Koi bangin na nasepah lungkimna nei thei ding na hiam?

² “Eite khempeuh in an ne tui dawnin i sepna thaman tawh lungdamin i om ding kilawm a, tua pen Pasian’ hong piak letsong ahi hi,” ci-in Jehovah in gen hi. (Thuhilhna 3:13) Jehovah in nasep ding kisapna le sepnopna lungsim nei dingin hong bawl hi. Amah in i sepna pan lungnopna i ngah ding deih hi.—Thuhilhna 2:24; 5:18 sim in.

³ Tua hileh, nasepna-ah nuam na sak nading bang in hong huh thei a hiam? Khristian te’n koi bang nasep a pelh ding uh kisam hiam? I nasepna le Jehovah biakpiakna koi bangin tawikhai kikimsak thei ding i hiam? I sep theih a thupi pen nasep in bang a hiam?

A LIANPEN NASEM MI NIH

4, 5. Jehovah in nasep bangci muh a hiam?

⁴ Jehovah mahmah in nasep nuam a sa hi. Piancilna 1:1-ah: “A kipat cil-in Pasian in vantung le leitung a piangsak hi,” ci-in kigelh hi. Pasian in leitung le a sunga om na khempeuh a bawl khit ciang, “hoih sa mahmah hi.” (Piancilna 1:31) Ei hong Piangsakpa in a bawlsa nate tungah lungkim mahmah hi.—1 Timoti 1:11.

⁵ Jehovah in na sem den hi. ‘Ka Pa in tuni dongin na sem tawntung hi,’ ci-in Jesuh in gen hi. (Johan 5:17) Jehovah in na lamdang a sep khempeuh a vekpi-in i theih khit zawh loh hangin, pawlkhat theih i nei hi. Tua sungah Pasian’ Gamah, a Tapa Jesuh Khrih tawh a ukkhawm ding mite a teel thu kihel hi. (2 Korin 5:17) Jehovah in mihingte lam hong lakin, kin zong hong kin mahmah hi. Leitung bupa taangko nasepna hangin mi awn tampi in Jehovah hong theitelta uh a, leitung paradais-ah tawntung nuntakna lametna hong neita uh hi.—Johan 6:44; Rom 6:23.

6, 7. Jesuh pen koi bang nasempa ahi hiam?

⁶ Jesuh in a Pa mah bangin nasep nuamsa hi. Leitungah a hong pai ma-in, Jesuh in vantung le leitunga om na khempeuh piansakna-ah Pasian ii “na geel siampa” bangin na sem hi. (Paunak 8:22-31; Kolose 1:15-17) Jesuh in leitungah a om lai-in zong kuhkal takin na sem hi. A naupan lai-in khutsiammi khat hong hi a, innsung vanzat a tuamtuam bawlin, inn khawng zong na lam hihtuak hi. Nasep siam mahmah ahih manin mite in “khutsiampa” ci-in thei uh hi.—Marka 6:3.

⁷ Ahih hang, leitunga a om lai-in Jesuh’ nasep a thupi pen in lungdamna thu taangkona le Jehovah’ thu mite kiang hilhna ahi hi. Amah in a nasep nading hun kum thum le a lang sung bek nei ahih manin, zingsang tunga kipan zan khuamial dongin kuhkal takin na a sem hi. (Luka 21:37, 38; Johan 3:2) Jesuh in leivui tamna lampi lakah khetawh tai tampi bang pai a, mi a tam theithei kiangah lungdamna thu a taangko hi.—Luka 8:1.

8, 9. Jesuh in nasep bang hang nuamsa a hiam?

⁸ Jesuh ading Pasian nasep pen an tawh kibang hi. Tua nasepna pan thahatna a ngah hi. Jesuh in annek hun nangawn zong nei lo zah dongin hanciam taka na a sep nite om hi. (Johan 4:31-38) Midang te’n a Pa’ thu a theih nading a hunpha neih khempeuh a zang hi. Tua ahih manin Jehovah kiangah: “Nangmah in sep dingin na hong piak nasep khempeuh sem khinta ka hih manin leitungah na min a thangsak ka hi hi,” ci-in a gen thei hi.—Johan 17:4.

⁹ Jehovah le Jesuh in kuhkal takin na sem uh a, amaute in nasepna pan lungnopna le lungkimna ngah uh hi. Eite in “Pasian a ettehte” ihi nuam a, ‘Jesuh ii khekhap i zui’ nuam hi. (Efesa 5:1, ZIV; 1 Peter 2:21) Tua ahih manin, en’ zong kuhkal takin na i sem a, i sep khempeuh a hoihpen dingin i sem hi.

NASEP BANGCI MUH DING I HIAM?

10, 11. I nasepna tung lungsim puakzia hoih i neih nading bang in hong huh thei a hiam?

¹⁰ Jehovah’ mite ihihna bangin, eimah le i innkuanpihte vak nading hanciam takin na i sem hi. I nasepna pan lungkimna neih ding cih pen thu haksapi khat hithei hi. Tua hileh, i nasepna pan lungkimna nei kei leng, bang hih thei i hiam?

¹¹ Lungsim puakzia hoih neih ding. Koi-ah sem ding, bang tan sem ding cih pen a kiteel thei lo zong hithei hi. A hih hang, lungsim puakzia kikhel thei hi. Ei kiang pan Jehovah in bang hong lamen hiam cih theihna in hong huh thei ding hi. Gentehna-in, Jehovah in innkuan lutangte kiang pan a innkuanpihte le a kisapnate uh ahih theihzah tawh hanciamin nasem a, a vak ding lamen hi. A taktakin ci leng, Lai Siangtho in ama innkuan a vak lo mi peuhmah “thu um lo mite sangin siazaw lai hi,” ci hi. (1 Timoti 5:8) Innkuan lutang na hih leh na innkuan vak nading kuhkal taka na na sep kul hi. Na nasep nuam na sa a, na sa kei zongin, innkuan na vak ciangin Jehovah’ lungdamsak na hih lam thei in.

12. Nasep kuhkalna le thumana in phattuamna koi bangin hong pia a hiam?

¹² Nasep kuhkal inla, thuman in. Hih in na nasep nuamsa dingin hong huh thei hi. (Paunak 12:24; 22:29) Lam khatah, thuman lecin na pu te’n hong muang ding hi. Nasepna pu te’n sum, van, le nasep hun a gusim lo, thuman taka na a semte it mahmah uh hi. (Efesa 4:28) A thupi pen in, kuhkal taka na na sepna le na thumanna Jehovah in thei gige hi. Na it mahmah Pasian ii maipha ngah cih na kitheih ciang, lungsim “kisuanna om loin” na om thei ding hi.—Hebru 13:18; Kolose 3:22-24.

13. Nasepna-ah i thumanna hangin bang phattuamna ngah thei lai i hiam?

¹³ Nasepna-ah gamtat hoih lahna in Jehovah min thangsak thei cih phawk in. Hih pen nasepna-ah nuam i sak theih nading thu dang khat ahi hi. (Titus 2:9, 10) Tua banah, gamtat hoih na lahna hangin na naseppih khat in Lai Siangtho sinnopna lungsim zong hong nei thei hi.—Paunak 27:11; 1 Peter 2:12 sim in.

KOI BANG NASEP TEEL DING KA HIAM?

14-16. Nasep i zon ciang bang i ngaihsut ding kisam a hiam?

¹⁴ Khristian khat in a sep ding, a sep loh ding nasep tawh kisai Lai Siangtho sungah ki-at lo hi. Ahih hang, nasep tawh kisai khensatna hoih i bawl theih nading thubulte om hi. (Paunak 2:6) Lai Siangtho thubulte ngaihsun kawmin, ei le ei hih bangin i kidong thei hi.

¹⁵ Hih nasep hangin Jehovah in khial hi a cih na khat peuhpeuh sep ding a kisap hun a om thei diam? Guktakna le zuaugenna cih banga Jehovah in a muhdah gamtatnate i thei khinta hi. (Paikhiatna 20:4; Sawltak 15:29; Efesa 4:28; Maangmuhna 21:8) Tua ahih manin Jehovah’ tehna tawh a kitukalh nasep khat peuhpeuh pen pilvang takin i pel hi.—1 Johan 5:3 sim in.

¹⁶ Hih nasep sem leng Jehovah’ muhdah gamtatna a panpih ka suak diam? Gentehna-in, biakinn lamna-ah a va kithalawh hileng e leh? Inn lama kithalawh pen a khialhna om lo hi. Ahih hangin, biakinn sunga a man lo upna a hilhte uh Pasian in deih lo hi cih thei hi hang. Upna man lo hilhna-ah i kihel loh hangin, Pasian’ muhna panin a mawh gamtatna-ah kihelna a nei tawh kibang ding hi lo ihi hiam?—Maangmuhna 18:4.

17. Pasian’ deihna banga i khensat theih nading bang in hong huh ding a hiam?

¹⁷ Lai Siangtho thubulte zang hi leng, Hebru 5:14-a a kigen “a theih theihnate uh zangin a sia a pha a khentel thei khin a picingsa mite” ihi ding hi. [ZSV] Hih bangin kidong in: ‘Hih na sem leng, midang te’n a tuklawh kha ding hiam? Ka nasep hangin innkuan nusia-a gamdang pai a kul khathei ding hiam? Tua bang hi leh inkuanpihte tungah siatna a tung ding hiam?

“A HOIHPEN NA TEELTHEI” UN

18. Biakpiakna mitsuan den ding cih pen bang hang haksa thei a hiam?

¹⁸ ‘Nitawp ni hunah’ Jehovah’ biakna i koih masak ding pen haksa khathei hi. (2 Timoti 3:1) Nasep zon ding le nasep neih den ding pen haksa mahmah thei hi. Innkuanpihte vak ding cih ahih sam hang, biakpiakna pen i thupi ngaihsut masak zawk ding ahi hi. I nuntakna-ah neihlelamte a thupi pen a, i koih ding hi lo hi. (1 Timoti 6:9, 10) Tua ahih manin koi bangin ‘a hoihpen teel thei’ ding a, innkuanpihte vak thei ding i hiam?—Filippi 1:9.

19. Jehovah i muanna in nasep vai bekbek lungkhama nei lo dingin koi bangin hong huh a hiam?

¹⁹ Na lungsim khempeuh tawh Jehovah muang in. (Paunak 3:5, 6 sim in.) Pasian in i kisapna teng thei khin ahihlam, le hong kinpih mahmah ahihlam i thei hi. (Late 37:25; 1 Peter 5:7) Lai Siangtho-ah hih bangin gen hi: “Sum deihluatna tawh na kipelh nadingun na nuntakna uhah kikem unla, na neihzah uh tawh lungkim un. Pasian in, ‘Note ka hong nusia ngei kei ding a, ka hong tamasak ngei kei ding hi,’ hong ci hi.” (Hebru 13:5) Jehovah in innkuan kivak nading vai bekbek tawh i lungkham ding deih lo hi. Pasian in i kisap teng hong vaihawmsak thei ahihlam tam veipi hong lak khin hi. (Matthai 6:25-32) Tua ahih manin, i nasep dinmun koi bang hitaleh, Lai Siangtho manmana i sim ding, lungdamna thu taangkona le Khristian kikhopnate-ah i kihel ding thupi hi.—Matthai 24:14; Hebru 10:24, 25.

20. I nuntakna koi bangin tangzangsak thei ding i hiam?

²⁰ Khat bek mitsuan in. (Matthai 6:22, 23 sim in.) Khat bek mitsuan i cih ciang, Pasian na i sep theih nadinga i nuntakna tangzangsak i cihnopna hi. Pasian’ tawh i kizopna sanga sumlepai, nuntakzia nuam, a suakthak vanzatte thupi koih zawkna in pilvai het lo ahihlam i thei hi. Tua ahihleh, a thupizaw nate koih masa dingin bang in hong huh ding a hiam? Leiba nei lo dingin hanciam in. Leiba na neih khit a leh khiam ding, lohkik dingin hoih takin geel in. I kidop kei leh, neihlelamte hangin i hun le i thatang tampi bei ding a, thunget nading, Lai Siangtho sin nading le taangko nasep nadingin hun om nawn lo thei hi. Neihlelam hanga nuntakna i nawngkaisak sangin, “annek tuidawn, nikten puansilh” i neih teng tawh i lungkim nuamzaw hi. (1 Timoti 6:8) Koi bang dinmunah i om zongin, lungsim khempeuh tawh Jehovah’ na i sep theih dan i theih nadinga i kisittel zel ding kisam hi.

21. I thupi ngaihsut masak zawk dingte bang hang khensat ding i hiam?

²¹ Thupi ngaihsut dingte kiciansak in. I hun, i thatang le neihlelamte pen pilvang taka i zat ding kisam hi. I kidop kei leh pilna sinna le sumlepai cih bang a, a thupi khol lo nate tawh a manpha i hun neihte hong bei ding hi. Jesuh in: “Pasian’ ukna . . . thupi ngaihsut masazaw un,” ci hi. (Matthai 6:33) I deih teelnate, i gamtatnate, nisim i sep i bawlte le i tupnate in i lungsim sungah bang thupi ngaihsut masa zaw i hiam cih a lak hi.

I SEP THEIH NASEP THUPI PEN

22, 23. (a) Khristian te’n i sep dinga a thupi pen nasep in bang a hiam? (b) Nasep nuam i sak nadingin bang in hong huh ding a hiam?

²² I sep theih nasep thupi pen in Jehovah nasep hi a, i sep dan bulpi pen in midangte kianga lungdamna thu taangko ahi hi. (Matthai 24:14; 28:19, 20) Jesuh mah bangin, hih nasepna-ah i hihtheih zahin i sem nuam hi. Pawlkhatte pen thu taangko mite a kitangsap zawkna munah kisuan uh hi. Pawlkhatte leuleu in pau nam tuamtuam a zang mite kiang lungdamna thu a taangko theih nadingun kampau thak sin uh hi. Amau tawh kiho inla, tuate koi bangin semzo thei uh hiam cih dong in. Amau’ nuntakna in khiatna neizaw a, a nop semsem thu hong hilh ding uh hi.—Paunak 10:22 sim in.

²³ Tu hun ciang, innkuan sunga a kisampite panpih nadingin nai tampi na i sem a, ahih kei leh nasep a tuamtuam i sem hi. Tua pen Jehovah in thei a, innkuan kivak nadinga i sep khempeuh ama’n manphasa hi. Tua ahih manin bang nasep hitaleh kuhkal taka semin, Jehovah le Jesuh etteh ciat ni. A thupi pen nasep in Jehovah’ nasep hi a, i sep dan bulpi pen in Pasian’ Gam lungdamna thu taangkona ahihlam phawk ciat ni. Tua in lungnopna taktak hong ngahsak ding hi.