SIN DING THU 37
Nasep le Sumlepai Tawh Kisai Lai Siangtho’ Gen
Nasep ding le sumlepai adingin na lungkham ngei hiam? Nekledawn ading hanciam kawmin Jehovah biak ding cih pen haksa thei ding hi. Ahih hangin Lai Siangtho in i zat theih ding lamlahna hong pia hi.
1. Nasep tawh kisai Lai Siangtho in bang gen a hiam?
Nasepna-ah nuam i sak ding Pasian in deih hi. Lai Siangtho in, “nasepna thamanin an ne tui dawnin nuamsa-in a om sangin a hoihzaw bangmah dang om lo hi,” ci-in gen hi. (Thuhilhna 2:24) Jehovah pen nasep kuhkal mahmah hi. Eite in zong Pasian ettehin nasep kuhkal leng Pasian lungdamin, ei mahmah in zong nuamsa ding hi hang.
Nasep pen thupi mahmah hi. Ahih hangin Jehovah i biakna sangin a thupizaw a i koih ding hi lo hi. (Johan 6:27) Pasian in amah i thupi ngaihsut zawk leh i kisapnate khempeuh hong pia dingin hong kamciam hi.
2. Sumlepai tungah a kilawm a kituaka muhna cih in bang a hiam?
“Sum in hong lungmuangsak hi,” ci-in Lai Siangtho in gen hi. Ahih hangin sum neih bek tawh kilungnuam thei lo ahihlam zong hong hilh hi. (Thuhilhna 7:12) Sum deihlua lo dingin le ‘neihzah tawh lungkim’ dingin hong hanthawn hi. (Hebru 13:5 sim in.) Neihzah tawh lungkim ihih manin, neih beh nopna hanga lungkhamna kinei lo hi. A kisam lopi-in leiba zong kinei lo hi. (Paunak 22:7) Tua banah, sum kikhaama kimawlna le a baih no khata hauhpah nading ngimnate hangin a lauhuai dinmunte zong kituak kha lo hi.
3. Sumlepai pen angsung ading hi lo-in, koi bangin zang thei i hiam?
Jehovah pen a cingh mahmah Pasian hi. Eite in zong, ‘citna lungsim nei-in midangte hopnopna’ tawh Pasian i etteh hi. (1 Timoti 6:18) Pawlpi le a cihmawh mite, a diakin thu uppih mite huh nadingin i sum neihte phal takin kipia thei hi. I piakzah tungah hi lo-in lungsim takpi tawh i piak pen Jehovah in thupi ngaihsut zaw hi. Piaknopna lungsim tawh i piak ciangin ei mahmah zong i lungdam a, Jehovah zong i lungdamsak hi.—Sawltak 20:35 sim in.
ZON BEH INLA, MUH BEH IN
Nasep tawh kisai a kilawm a kituaka muhna le neihzah tawh lungkimna hanga a kingah hamphatnate kan in.
4. Na nasep dan tawh Jehovah pahtawi in
Jehovah tawh i kilawmtatna in nasep tawh kisai-a i ngaihsutna a thuzawh ding kisam hi. VIDEO hong in. Tua khit teh a nuai-a dotnate kikum un.
Hih video sungah, a nasepna tungah Jason’ ngaihsut dan le a sep dan tawh kisai bang hoihsa na hiam?
Nasep pen a kilawm a kituaka sem dingin Jason in bang hih a hiam?
Kolose 3:23, 24 sim in. Tua khit teh hih dotna kikum un:
Nasep tawh kisai-a i ngaihsut dan pen bang hangin thupi a hiam?
Nasep pen a thupi mahmah hang, Jehovah biak ding pen a thupizaw a i ngaihsut ding kisam
5. Neihzah tawh lungkimna in hamphatna hong ngahsak
Mi a tamzaw in sum tampi ngah nadingin nasia takin zong uh hi. Lai Siangtho in hi bangin hong hilhzaw hi. Timoti Masa 6:6-8 sim in. Tua khit teh hih dotna kikum un:
Lai Siangtho in koi bangin hong hanthawn a hiam?
Sum tampi i neih kei leh zong, i lungnuam thei hi. VIDEO hong in. Tua khit teh a nuai-a dotna kikum un.
Hih innkuante in a hauh loh uh hang, bang hang lungnuam uh a hiam?
Ngah semsemin, deih semsem hi leng bang cih ding? Tua tawh kisai a lauhuaina thu Jesuh in gen hi. Luka 12:15-21 sim in. Tua khit teh hih dotna kikum un:
Jesuh’ thugentehna pan bang sin i hiam?—A neu 15-na en in.
Paunak 10:22 le 1 Timoti 6:10 sim inla, tehkak in. Tua khit teh hih dotnate kikum un:
Bang pen a thupi penin ngaihsun na hiam? Jehovah tawh kilawmtatna maw, ahih kei leh sum tampi neih ding? Bang hang hiam?
Sum deih luatna hangin bang buainate piang a hiam?
6. Jehovah in i kisapnate hong pia ding
Sum ngah nading le nasep ngah nading a haksat hun ciangin Jehovah tungah upna i neih le i neih loh hong kilang ding hi. Tua hun cianga i sep theihte i theih nadingin VIDEO hong in. Tua khit teh a nuai-a dotnate kikum un.
Video sunga unaupa in bang haksatnate tuakkha a hiam?
Haksatnate a nawkzawh nadingin amah in bang sem a hiam?
Matthai 6:25-34 sim in. Tua khit teh hih dotna kikum un:
Jehovah in amah a thupi ngaihsutte adingin bang kamciam pia a hiam?
MI PAWLKHATTE’ GEN: “Ka innkuanpihte ka vak zawh nadingin nasep hanciam kul ding. Kalsimin kikhawm thei kei ning.”
Jehovah biak ding thupi ngaihsutna in a hoihpen khensatna ahihlam bang Lai Siangtho mun in nang hong theisak a hiam?
TOMLAKNA
Nasep i neih ding le sum i neih ding a kisap hang, Jehovah’ na sepna pen i mitsuan den ding kisam hi.
Kikupkikna
Nasep tawh kisai a kilawm a kituaka muhna na neih nadingin bang in hong huh thei a hiam?
Neihzah tawh lungkimna in koi bangin hamphatna hong ngahsak a hiam?
A mite’ kisapna pia ding cih Jehovah’ kamciamna na muanlam koici lak thei ding na hiam?
THEIH BEH NADING
Sum pen hoih lo hi, ci-in Lai Siangtho in a gen hiam, cih thu sim in.
“Sum Pen Siatna Nam Khempeuhte’ Bulpi Ahi Hiam?” (Website-a thu)
Koi bang piakkhiatna Pasian in deih a hiam, cih thu kan in.
“Piakkhiatna Tawh Kisai Lai Siangtho In Bang Gen A Hiam?” (Website-a thu)
Sum kikhaama kimawlna pen siatna a piang thei lo kimawlna ahi hiam?
“Sum Kikhaama Kimawlna—Lai Siangtho’ Muh Dan” (Khanghlo In!, March 2015)
Sum kikhaama kimawlin, inn zong a buluh mi khat hong kikhelna a hang sim in.
“Sakol Tai Kidemsakna Pawite Uuk Mahmah Ing” (Vilnatausang, November 1, 2011)