အခြေခံ ကျမ်းစာ​သွန်သင်ချက်တွေ​ကနေ သင်ခန်းစာ​အသစ်တွေ ယူပါ

အခြေခံ ကျမ်းစာ​သွန်သင်ချက်တွေကြောင့် ကျွန်တော်တို့​အသက်တာ ပြောင်းလဲ​လာတာ။ ဥပမာ၊ ဘုရားသခင့်​နာမည် ယေဟောဝါ​ဆိုတာ သိ​လိုက်​ရချိန်မှာ ဘုရားသခင်နဲ့ စရင်းနှီးလာတယ်။ (ဟေရှာ. ၄၂:၈) လူသေတွေရဲ့ အခြေအနေမှန်​ကို သိ​လိုက်​ရချိန်မှာ သေဆုံးသွားတဲ့ ချစ်ရသူတွေ ဝေဒနာ​ခံစား​နေ​ရမှာ ကျွန်တော်တို့ စိတ်မပူ​တော့​ဘူး။ (ဒေ. ၉:၁၀) ပရဒိသု​ကမ္ဘာမြေ​အကြောင်း ဘုရားသခင့်​ကတိတော်ကို သိ​လိုက်​ရချိန်မှာ အနာဂတ်​အတွက် မစိုးရိမ်​တော့​ဘူး။ အနှစ် ၇၀၊ ၈၀ လောက် မဟုတ်ဘဲ ထာဝစဉ် အသက်​ရှင်နိုင်တယ်​ဆိုတာ စိတ်ချသွားတယ်။—ဆာ. ၃၇:၂၉။ ၉၀:၁၀။

^၂ အခြေခံ သွန်သင်ချက်တွေ​ရဲ့ တန်ဖိုးကို ဘယ်တော့မှ လျှော့မတွက်​ပါ​နဲ့။ ပေတရု​ဒုတိယစောင်​ကို ဘယ်သူတွေဆီ ရေး​သလဲ စဉ်းစားကြည့်ပါ။ “အမှန်တရားမှာ ခိုင်မြဲ​နေ” တဲ့ ခရစ်ယာန်တွေ​ဆီ တမန်တော် ပေတရု ရေးတာ။ (၂ ပေတရု ၁:၁၂၊ ၁၃ ကို ဖတ်ပါ။) သူတို့ အမှန်တရားမှာ ခိုင်မြဲ​နေပေမဲ့ လမ်းလွဲသွား​အောင် လုပ်ချင်​သူ​တွေ အသင်းတော်မှာ ရှိနေတယ်။ (၂ ပေ. ၂:၁-၃) ဒါကြောင့် ကိုယ့်ကိုယ်ကိုယ် ကာကွယ်​တတ်​ဖို့ ပေတရု ကူညီပေးချင်တယ်။ ကူညီပေးတဲ့​အနေနဲ့ သူတို့ သိပြီးသား ကျမ်းစာ​သွန်သင်ချက်​တချို့ကို ပြန်သတိပေးတယ်။ အဆုံးထိ သမာဓိ​စောင့်ထိန်းဖို့ အဲဒီ​သွန်သင်ချက်တွေ​က ကူညီပေးနိုင်​လို့​ပဲ။

^၃ ခရစ်ယာန်​တစ်ယောက် ရင့်ကျက်လာတာ​နဲ့​အမျှ အခြေခံ သွန်သင်ချက်တွေ​ကနေ သင်ခန်းစာ​အသစ်တွေ ယူ​တတ်​လာနိုင်တယ်။ ဥပမာ၊ စားဖိုမှူး​တစ်ယောက် ဟင်းချက်​သင်​ခါ​စ​အချိန်နဲ့ ဟင်းချက်​ကျွမ်းကျင်​လာတဲ့​အချိန်ကို နှိုင်းယှဉ်​ကြည့်ပါ။ သုံးတဲ့ ပါဝင်​ပစ္စည်းတွေ အတူတူပဲ ဖြစ်ပေမဲ့ အတွေ့အကြုံ ရှိလာတာ​နဲ့​အမျှ ပို​အရသာရှိတဲ့၊ ပို​ဆန်းသစ်တဲ့ ဟင်းတွေ ချက်​တတ်​လာနိုင်တယ်။ အဲဒီလိုပဲ အမှန်တရား​သက်တမ်း ကြာ​လာတဲ့​အခါ အခြေခံ သွန်သင်ချက်တွေကို မတူညီတဲ့ ရှုထောင့်​ကနေ ကြည့်တတ်​လာနိုင်တယ်။ နှစ်ခြင်းခံပြီးနောက် ဘဝ​အခြေအနေတွေ၊ အမှုဆောင်​အခွင့်ထူးတွေ ပြောင်းလဲသွားလို့ ဖြစ်နိုင်တယ်။ သိတာ​ကြာပြီ ဖြစ်တဲ့ သွန်သင်ချက်တွေကို လက်ရှိ​အခြေအနေနဲ့ ဆက်စပ်​စဉ်းစားလိုက်တဲ့​အခါ ကျင့်သုံးနိုင်​ပုံ နည်းလမ်း​အသစ်တွေ မြင်​လာနိုင်တယ်။ အခြေခံ သွန်သင်ချက် သုံးချက်​ကနေ ရင့်ကျက်တဲ့ ခရစ်ယာန်တွေ ဘာသင်ယူနိုင်ကြောင်း သုံးသပ်ကြည့်​ရအောင်။

ယေဟောဝါဟာ ဖန်ဆင်းရှင် ဖြစ်

^၄ “အရာခပ်သိမ်း​ကို တည်ဆောက်သူ​ကတော့ ဘုရားသခင်ပဲ” လို့ ကျမ်းစာ ဆိုတယ်။ (ဟီ. ၃:၄) ဒါကြောင့် ကမ္ဘာနဲ့ ကမ္ဘာပေါ်မှာ ရှိသမျှကို ဉာဏ်ပညာ၊ တန်ခိုး ကြီးမားတဲ့​အရှင် ဖန်ဆင်းထား​ကြောင်း ကျွန်တော်တို့ သိကြတယ်။ ဒီ​သွန်သင်ချက်ကနေ ထပ်​သိရတာ​တွေ ရှိသေးတယ်။ ယေဟောဝါဟာ ဖန်ဆင်းရှင် ဖြစ်လို့ ကျွန်တော်တို့ကို ကောင်းကောင်း​သိတယ်၊ ဂရုစိုက်​တယ်။ ကျွန်တော်တို့အတွက် ဘာက အကောင်းဆုံးလဲ​ဆိုတာ သိတယ်။ ယေဟောဝါဟာ ဖန်ဆင်းရှင် ဖြစ်တယ်​ဆိုတဲ့ အမှန်တရားဟာ ရိုးရှင်း​ပေမဲ့ ကျွန်တော်တို့အပေါ် အများကြီး သက်ရောက်မှု ရှိတယ်။ ဘဝအဓိပ္ပာယ် ရှိလာ​စေ​တယ်။

^၅ ယေဟောဝါဟာ ဖန်ဆင်းရှင် ဖြစ်တယ်​ဆိုတဲ့ အမှန်တရားက ကျွန်တော်တို့ကို နှိမ့်ချ​တတ်လာ​စေ​တယ်။ ဖန်ဆင်းရှင်​ထက် ပို​တတ်သိ​နားလည်တယ်​လို့ ဘယ်သူမှ မတွေး​သင့်​ဘူး။ (ဟေရှာယ ၄၅:၉-၁၂ ကို ဖတ်ပါ။) ယောဘ​အကြောင်း စဉ်းစားကြည့်ပါ။ ကိုယ့်ကိုယ်ကိုယ်​နဲ့ တခြားသူတွေရဲ့ အမြင်ကို ယောဘ အလွန်အမင်း အာရုံစိုက်မိ​လာတယ်။ အဲဒီအခါ မိမိဟာ တန်ခိုးကြီး ဖန်ဆင်းရှင် ဖြစ်ကြောင်း ယေဟောဝါ သတိပေးတယ်။ (ယောဘ ၃၈:၁-၄) ဒီလိုနဲ့ ယေဟောဝါရဲ့ နည်းလမ်းတွေ​ဟာ လူတွေရဲ့ နည်းလမ်း​ထက် အဆ​မတန် ပိုသာတယ်​ဆိုတာ ယောဘ သဘောပေါက်လာတယ်။

^၆ အမှန်တရား​သက်တမ်း ကြာ​လာတဲ့​အခါ လမ်းညွှန်မှု ရဖို့ ယေဟောဝါနဲ့ ကျမ်းစာကို အားမကိုးဘဲ ကိုယ့်​အမြင်ကို အားကိုး​မိ​လာ​တတ်တယ်။ (ယောဘ ၃၇:၂၃၊ ၂၄) ဒါပေမဲ့ ဖန်ဆင်းရှင် ယေဟောဝါ​မှာ အနှိုင်းမဲ့ ဉာဏ်ပညာနဲ့ တန်ခိုး ရှိတယ်​ဆိုတာ သတိရတာ ဘာအကျိုး​ရှိသလဲ။ (ဟေရှာ. ၄၀:၂၂။ ၅၅:၈၊ ၉) နှိမ့်ချမှု ဆက်​ရှိစေတယ်။ ကိုယ့်​အမြင်ကို အားမကိုး​မိ​ဖို့ ကူညီပေးတယ်။

^၇ ဆလိုဗေးနီးယား​နိုင်ငံက ညီအစ်မ ရာဟီလာ​အကြောင်း သုံးသပ်ကြည့်ပါ။ ယေဟောဝါဟာ ဖန်ဆင်းရှင် ဖြစ်တယ်​ဆိုတာ သတိရတာက အဖွဲ့အစည်းရဲ့ အပြောင်းအလဲ​တစ်ခုကို လက်ခံဖို့ ရာဟီလာ​ကို ကူညီပေးတယ်။ “ဦးဆောင်နေသူ​တွေ​ရဲ့ ဆုံးဖြတ်ချက်တွေကို လက်ခံရ​တာ တစ်ခါတလေ မလွယ်ဘူး။ ဥပမာ၊၂၀၂၃ အုပ်ချုပ်ရေး​အဖွဲ့ဆီက နောက်ဆုံးရ​သတင်း #၈ ကြည့်​ထားပြီး​တာ​တောင် မုတ်ဆိတ်​ထားတဲ့ ညီအစ်ကို​တစ်ယောက် ဟောပြောချက် ပေးတာကို ဦးဆုံး တွေ့​လိုက်​ရချိန်မှာ စိတ်ထဲ ဘယ်လိုမှ အဆင်မပြေ​ဘူး။ ဒီ​အပြောင်းအလဲကို လက်ခံနိုင်ဖို့ ကူညီပေးပါ​လို့ ဆုတောင်း​ရတယ်” လို့ ပြောတယ်။ ယေဟောဝါဟာ ဖန်ဆင်းရှင် ဖြစ်လို့ အဖွဲ့အစည်းကို ဘယ်လို အကောင်းဆုံး လမ်းညွှန်​ရမလဲ​ဆိုတာ အမြဲ​သိမှန်း ရာဟီလာ သဘောပေါက်တယ်။ သင်​ကော ကျမ်းစာ​ရှင်းပြချက်​အသစ်​တစ်ခု ဒါမှမဟုတ် လမ်းညွှန်ချက်​အသစ်​တစ်ခု လက်ခံဖို့ ခက်နေသလား။ ဖန်ဆင်းရှင် ယေဟောဝါဟာ ဉာဏ်ပညာ၊ တန်ခိုး ကြီးမား​တယ်​ဆိုတာ သတိရ​လိုက်ပါ။—ရော. ၁၁:၃၃-၃၆။

ဆင်းရဲဒုက္ခတွေကို ယေဟောဝါ ဖြစ်​ခွင့်ပြုရတဲ့ အကြောင်းရင်း

^၈ ဆင်းရဲဒုက္ခတွေ ဖြစ်ရတဲ့ အကြောင်းရင်းတွေကို မသိ​သူတချို့ ဘုရားကို စိတ်ဆိုး​ကြတယ် ဒါမှ​မဟုတ် ဘုရား မရှိဘူးလို့ ကောက်ချက်​ချကြတယ်။ (ပညာ. ၁၉:၃) တကယ်တော့ ဆင်းရဲဒုက္ခတွေ​ဟာ ယေဟောဝါ​ကြောင့် မဟုတ်ဘဲ လူတွေ အမွေ​ရထားတဲ့ အပြစ်နဲ့ မစုံလင်မှု​ကြောင့် ဖြစ်တယ်။ ဒါ့အပြင် ယေဟောဝါ စိတ်ရှည်​လို့သာ လူ​သန်းပေါင်း​များစွာ ယေဟောဝါအကြောင်း၊ ဆင်းရဲဒုက္ခတွေ ချုပ်ငြိမ်း​မယ့်​အကြောင်း သိလာကြတာ။ (၂ ပေ. ၃:၉၊ ၁၅) ဆင်းရဲဒုက္ခတွေကို ယေဟောဝါ ဖြစ်​ခွင့်ပြုရတဲ့ ဒီ​အကြောင်းရင်းတွေ သိတာက ကျွန်တော်တို့ကို နှစ်သိမ့်မှု ဖြစ်စေတယ်၊ ယေဟောဝါနဲ့ ပိုရင်းနှီးလာစေတယ်။

^၉ ဆင်းရဲဒုက္ခတွေ ယေဟောဝါ ချုပ်ငြိမ်း​စေ​မယ့်​အချိန်ကို စောင့်နေ​တုန်း စိတ်ရှည်ဖို့ လိုတယ်​ဆိုတာ ကျွန်တော်တို့ သိကြတယ်။ ဒါပေမဲ့ ချစ်ရသူ​တစ်ယောက် ဆုံးပါးသွားတဲ့​အခါ၊ ကိုယ်တိုင် ဒါမှမဟုတ် ကိုယ့်​မိသားစု ဒုက္ခရောက်တဲ့​အခါ၊ မတရား​ဆက်ဆံခံရတဲ့​အခါ ယေဟောဝါ ဘာကြောင့် ကြန့်ကြာ​နေသလဲ​လို့ တွေးမိ​လာနိုင်တယ်။ (ဟဗ. ၁:၂၊ ၃) အဲဒီလို​တွေးမိ​တဲ့အခါ ဆင်းရဲဒုက္ခတွေကို ယေဟောဝါ ဖြစ်​ခွင့်ပြုရတဲ့ အကြောင်းရင်းတွေ သတိရ​လိုက်ပါ။a (ဆာ. ၃၄:၁၉) ဆင်းရဲဒုက္ခတွေကို တစ်ကြိမ်တည်း​အပြီး ချုပ်ငြိမ်း​စေဖို့ ရည်ရွယ်​ထား​ကြောင်း​လည်း သတိရပါ။

^၁၀ ဆင်းရဲဒုက္ခတွေကို ယေဟောဝါ ဖြစ်​ခွင့်ပြုရတဲ့ အကြောင်းရင်းတွေ သိတာက ခံနိုင်ရည် ရှိလာ​စေ​တယ်။ အိန္ဒိယ​သမုဒ္ဒရာ​ထဲက မားယော့တ်​ကျွန်းမှာ နေတဲ့ ညီအစ်မ အန်း ဒီလို​ပြောတယ်– “အမေ ဆုံးသွားလို့ ကျွန်မ အခုထိ ဖြေ​မဆည်နိုင်​အောင် ဝမ်းနည်း​နေတုန်းပဲ။ ဒုက္ခတွေ ကြုံရတာ ယေဟောဝါ​ကြောင့် မဟုတ်ဘူး​ဆိုတာ ကိုယ့်ကိုယ်ကိုယ် မပြတ် သတိ​ပေးရတယ်။ ယေဟောဝါက ဒုက္ခ​အားလုံးကို သိပ်​အဆုံးတိုင်​ပေးချင်တယ်။ ချစ်ရသူတွေကို ပြန်ထမြောက်ပေးချင်တယ်။ ဒီအချက်တွေကို စဉ်းစားလိုက်တဲ့​အခါ အံ့ဩစရာ​ကောင်း​လောက်အောင် ကျွန်မ စိတ်​ငြိမ်သက်​သွားတယ်။”

^၁၁ ဆင်းရဲဒုက္ခတွေကို ယေဟောဝါ ဖြစ်​ခွင့်ပြုရတဲ့ အကြောင်းရင်းတွေ သိတာက ဆက်​ဟောပြောဖို့ လှုံ့ဆော်ပေးတယ်။ လူတွေကို နောင်တ​ရစေချင်လို့၊ ကယ်တင်​ချင်လို့ ယေဟောဝါ စိတ်ရှည်​နေတာ ဖြစ်ကြောင်း ပေတရု ရှင်းပြပြီး​နောက် “ဘယ်လို လူစားမျိုး ဖြစ်သင့်တယ်​ဆိုတာ စဉ်းစား​ဆင်ခြင်​ကြ​ပါ။ သန့်ရှင်းတဲ့​အမူအကျင့်​တွေ ကျင့်ကြံ​ပြီး ဘုရားတရား ကိုင်းရှိုင်း​ကြ​ပါ” လို့ ဆက်ပြောတယ်။ (၂ ပေ. ၃:၁၁) ဘုရားတရား ကိုင်းရှိုင်းခြင်း​မှာ ဟောပြောခြင်း ပါတယ်။ ယေဟောဝါ​လိုပဲ ကျွန်တော်တို့ လူတွေကို ချစ်တယ်။ ကမ္ဘာသစ်​မှာ အသက်ရှင်စေ​ချင်တယ်။ ယေဟောဝါကလည်း မိမိကို ဝတ်ပြုဖို့ သင့်​ဒေသက လူတွေကို အခွင့်အရေး ပေးနေတယ်။ ယေဟောဝါနဲ့ လုပ်ဖော်ဆောင်ဖက် ဖြစ်ရတာ၊ အဆုံး​မရောက်ခင် ယေဟောဝါ​အကြောင်း သိလာအောင် လူများနိုင်သမျှ​များများ​ကို ကူညီပေး​ရတာ အခွင့်ထူး​ပါပဲ။—၁ ကော. ၃:၉။

“နောက်ဆုံးကာလ” မှာ ကျွန်တော်တို့ အသက်ရှင်နေ

^၁၂ “နောက်ဆုံးကာလ” မှာ ဘယ်လို​လူတွေ များလာမယ်​ဆိုတာ ကျမ်းစာမှာ အတိအကျ ကြိုဟောထားတယ်။ (၂ တိ. ၃:၁-၅) ပတ်ဝန်းကျင်ကို ကြည့်လိုက်​ရုံ​နဲ့တင် ဒီ​ကြိုဟောချက် ပြည့်စုံ​နေမှန်း သိပ်ထင်ရှားတယ်။ လူတွေ ဆိုးသည်ထက် ဆိုးလာ​တာ​နဲ့အမျှ ကျမ်းစာဟာ ယုံကြည်ထိုက်​တယ်​ဆိုတာ ကျွန်တော်တို့ ပို​စိတ်ချလာကြတယ်။—၂ တိ. ၃:၁၃-၁၅။

^၁၃ နောက်ဆုံးကာလ​မှာ အသက်ရှင်နေတယ်​ဆိုတဲ့ အမှန်တရားက တကယ် အရေးကြီးတာကို ဦးစားထားဖို့ ကူညီပေးတယ်။ လုကာ ၁၂:၁၅-၂၁ မှာ ယေရှု ပြောတဲ့ ပုံဥပမာ​ကနေ သင်ခန်းစာ ယူနိုင်တယ်။ (ဖတ်ပါ။) ပုံဥပမာ​ထဲက သူဌေး​ကို “ဆင်ခြင်​ဉာဏ်​မဲ့​သူ” လို့ ဘာကြောင့် ခေါ်သလဲ။ စည်းစိမ်​ကြွယ်ဝ​လို့ မဟုတ်ဘဲ ဦးစားထားရာ​တွေ မှား​နေလို့ပဲ။ သူဌေး​က “ကိုယ့်အတွက် ဘဏ္ဍာ​စုဆောင်း​ထားပေမဲ့ ဘုရားသခင်ရှေ့​မှာ ဆင်းရဲ” နေတယ်။ “ဒီ​ညမှာ​ပဲ မင်းရဲ့​အသက်ကို ရုပ်သိမ်း​လိမ့်မယ်” လို့ သူဌေး​ကို ဘုရားသခင် ပြောတယ်။ အသက်ရှင်​ခွင့်​ရတဲ့ အချိန်​တိုတိုလေး​မှာ ဦးစားထား​သင့်​တာကို မထားတာက သူဌေး​ရဲ့​အမှား ဖြစ်သွားတယ်။ ဘာ​သင်ခန်းစာ ရသလဲ။ ဒီလောကစနစ် အဆုံးတိုင်​ဖို့ အချိန် သိပ်​မလိုတော့ဘူး။ ဒါကြောင့် ‘တကယ် အရေးကြီးတာကို ဦးစားထား​နေမှန်း ငါ့​ပန်းတိုင်တွေ​မှာ ပေါ်လွင်​ရဲ့​လား။ သားသမီးတွေ ဘယ်လို ပန်းတိုင်​ထားဖို့ ငါ အား​ပေးနေသလဲ။ ငါ့​အချိန်၊ ခွန်အား၊ ပိုင်ဆိုင်ရာတွေကို ဘာအတွက် အဓိက သုံး​နေသလဲ။ ငါ့အတွက် ဘဏ္ဍာ စုဆောင်း​ဖို့​လား။ ကောင်းကင်​ဘဏ္ဍာ စုဆောင်း​ဖို့​လား’ လို့ ဆန်းစစ်​နိုင်တယ်။

^၁၄ နောက်ဆုံးကာလ​မှာ အသက်ရှင်နေတယ်​ဆိုတဲ့ အမှန်တရားက ဘယ်လို ဆုံးဖြတ်ချက်တွေ ချသင့်သလဲ​ဆိုတာ သိလာစေတယ်။ မီကီ​လို့ ခေါ်တဲ့ ညီအစ်မ ဒီလို​ပြောတယ်– “အထက်တန်း​ကျောင်း ပြီးသွားတော့ တက္ကသိုလ် သိပ်​တက်ချင်​ခဲ့​တာ။ တိရစ္ဆာန်တွေ​အကြောင်း လေ့လာတဲ့ သတ္တဗေဒ​ဘာသာရပ် ဆည်းပူး​ဖို့​ပါ။ တစ်ဖက်​မှာ မှန်မှန်​ရှေ့ဆောင်​လည်း လုပ်ချင်​တယ်။ ဟောပြောသူ ပိုလိုအပ်တဲ့​ဒေသမှာ​လည်း သွား​အမှုဆောင်ချင်တယ်။ တက္ကသိုလ်​တက်​ရင်း မှန်မှန်​ရှေ့ဆောင် လုပ်ဖို့၊ ပိုလိုအပ်တဲ့​ဒေသမှာ သွား​အမှုဆောင်ဖို့ တကယ် ဖြစ်နိုင်​သလား​ဆိုတာ သေသေချာချာ စဉ်းစားကြည့်ပါ​လို့ ရင့်ကျက်တဲ့ ညီအစ်ကို/မတချို့ အကြံ​ပေးကြတယ်။ ဒီလောကစနစ် မကြာခင် အဆုံးတိုင်တော့မယ်​ဆိုတာ​လည်း သတိပေးကြတယ်။ ကမ္ဘာသစ် ရောက်ရင် တိရစ္ဆာန်တွေ​အကြောင်း ကျွန်မ ကြိုက်​သလောက် လေ့လာနိုင်​မှာ။ ဒါနဲ့ သက်မွေး​ပညာ​သင်တန်းတိုလေး​ပဲ ကျွန်မ တက်​လိုက်တယ်။ မှန်မှန်​ရှေ့ဆောင် လုပ်လို့​ရတဲ့ အလုပ်​လေး ရလာတယ်။ နောက်တော့ ဟောပြောသူ ပိုလိုအပ်တဲ့ အီကွေဒေါ​နိုင်ငံမှာ သွား​အမှုဆောင်တယ်။” အခုဆိုရင် ခင်ပွန်းနဲ့​အတူ အီကွေဒေါ တိုက်နယ်​လုပ်ငန်းမှာ မီကီ ပါဝင်နေတယ်။

^၁၅ သတင်းကောင်းကို လူတွေ လက်မခံ​တဲ့အခါ ကျွန်တော်တို့ စိတ်ဓာတ်​မကျ​သင့်​ဘူး။ လူတွေ ပြောင်းလဲ​လာနိုင်တယ်။ ယေရှုရဲ့ မိတူဖကွဲ​ညီ ယာကုပ်​အကြောင်း စဉ်းစားကြည့်ပါ။ ယေရှုရဲ့ အရည်အသွေးကောင်းတွေကို ငယ်ငယ်​ကတည်းက မြင်တယ်။ ယေရှုဟာ မေရှိယ ဖြစ်မှန်း၊ ဘယ်သူနဲ့​မှ မတူအောင် ဟောပြော​သွန်သင်နိုင်​မှန်း သိတယ်။ ဒါပေမဲ့ နှစ်​တော်တော် ကြာတဲ့​အထိ ယေရှုတပည့် ဖြစ်​မလာဘူး။ ယေရှု ရှင်ပြန်ထမြောက်ပြီးနောက်​မှ တပည့်​ဖြစ်လာတယ်။ သိပ်​ထက်သန်တဲ့ တပည့်​ဖြစ်လာတာ။b (ယော. ၇:၅။ ဂလ. ၂:၉) ဘာ​သင်ခန်းစာ ရသလဲ။ သတင်းကောင်းကို မိသားစု​ဆွေမျိုးတွေ စိတ်ဝင်စားကြောင်း မပြ​သေးရင် ဒါမှ​မဟုတ် နားမထောင်ချင်တဲ့ အိမ်ရှင်​တွေ​ကို ထပ်ခါ​ထပ်ခါ ဟောပြော​ရရင် လက်မလျှော့​လိုက်ပါ​နဲ့။ နောက်ဆုံးကာလ ဖြစ်လို့ ဟောပြောခြင်း​လုပ်ငန်း သိပ်​အရေးကြီး​နေတယ်​ဆိုတာ သတိရပါ။ ဒီနေ့ ကျွန်တော်တို့ ဟောပြောတဲ့ သတင်းတရားဟာ နောင်​တစ်ချိန် သူတို့​အသက်တာကို ပြောင်းလဲစေမယ့်​အရာ ဖြစ်လာနိုင်တယ်။ ကြီးစွာသောဒုက္ခ စပြီးနောက်​မှာ​တောင် သူတို့ ပြောင်းလဲ​ကောင်း ပြောင်းလဲ​လာနိုင်တယ်။c

ယေဟောဝါရဲ့ သတိပေးချက်တွေကို အမြဲ တန်ဖိုးထားပါ

^၁၆ လူထုဟောပြောချက်​တွေ၊ jw.org မှာ တင်ထားတဲ့ တချို့​ဆောင်းပါးတွေ၊ ဗီဒီယိုတွေ၊ လူထု​အတွက် စာစောင်တွေ​ဟာ သက်သေခံ မဟုတ်​သူ​တွေ​အတွက် အဓိက ရည်ရွယ်​ထားတာ​ပါ။ ဒါပေမဲ့ ကျွန်တော်တို့အတွက်လည်း သတိပေးချက်​လို​ပါပဲ။ အဲဒီ​သတိပေးချက်​တွေ​က ယေဟောဝါကို ပို​ချစ်တတ်လာဖို့၊ ကျမ်းစာကို ပိုယုံကြည်စိတ်ချလာဖို့၊ တခြားသူတွေကို သွန်သင်ပေး​ရာ​မှာ ပိုထိရောက်​လာဖို့ ကူညီပေးတယ်။—ဆာ. ၁၉:၇။

^၁၇ ကျမ်းစာ​ရှင်းပြချက်​အသစ် ကြားရတဲ့​အခါ ကျွန်တော်တို့ သိပ်​စိတ်​လှုပ်ရှား​ကြတယ်။ ဒါပေမဲ့ အမှန်တရားထဲ ရောက်လာဖို့ ကူညီပေး​ခဲ့​တဲ့ အခြေခံ သွန်သင်ချက်တွေကိုလည်း တန်ဖိုးထား​ကြ​ပါတယ်။ အဖွဲ့အစည်း​လမ်းညွှန်ချက်​ထက် ကိုယ့်​အမြင် ပို​မှန်တယ်လို့ တွေးမိ​နေ​ရင် အဖွဲ့အစည်းကို လမ်းညွှန်​နေ​သူဟာ ဉာဏ်ပညာ၊ တန်ခိုး ကြီးမားတဲ့ ဖန်ဆင်းရှင် ယေဟောဝါ ဖြစ်တယ်​ဆိုတာ သတိရ​လိုက်ပါ။ ကိုယ်တိုင် ဒါမှမဟုတ် ချစ်ခင်​ရသူ​တစ်ယောက် အခက်အခဲ ကြုံနေရရင် စိတ်ရှည်ပါ။ ဆင်းရဲဒုက္ခတွေကို ယေဟောဝါ ဖြစ်​ခွင့်ပြုရတဲ့ အကြောင်းရင်းတွေ ပြန်စဉ်းစားပါ။ ကိုယ့်​အချိန်၊ ပိုင်ဆိုင်ရာတွေကို ဘယ်လို သုံး​မလဲ ဆုံးဖြတ်တဲ့​အခါ နောက်ဆုံးကာလ​မှာ အသက်ရှင်နေတယ်​ဆိုတဲ့အချက်ကို သတိရပါ။ ယေဟောဝါရဲ့ သတိပေးချက်​တွေ​ကြောင့် အစွမ်း​ခွန်အား ပြည့်ပြီး ဉာဏ်ပညာ ဆက်​ရှိနိုင်​ကြ​ပါ​စေ။