“ရောင့်ရဲ​တတ်တဲ့ လျှို့ဝှက်ချက်ကို” သင်ယူ​ထားသလား

သင်ဟာ ရောင့်ရဲ​တတ်​သူလား။ ရောင့်ရဲ​တတ်​သူဟာ ယေဟောဝါ​ဘုရား ပေးထားတဲ့ ကောင်းချီးတွေကို အာရုံစိုက်လို့ စိတ်​အေးချမ်း​ပျော်ရွှင်တယ်။ မပိုင်ဆိုင်​တာ​တွေ ရှိလို့​ဆိုပြီး အလိုမကျ ဖြစ်​မနေဘူး။ ဒါပေမဲ့ ရောင့်ရဲတယ်​ဆိုတာ ကြိုးစားချင်စိတ်၊ တိုး​တက်ချင်​စိတ် မရှိတာကို မဆိုလိုဘူး။ ဥပမာ၊ ခရစ်ယာန်​တစ်ယောက်​ဟာ အမှုတော်မှာ ကြိုးစား​တက်လှမ်း​သင့်​တယ်။ (ရော. ၁၂:၁။ ၁ တိ. ၃:၁) ဒါပေမဲ့ ရောင့်ရဲ​တတ်​မယ်​ဆိုရင် မျှော်လင့်​ထားတဲ့​အချိန်မှာ အခွင့်ထူးတွေ ရ​မလာ​ရင်တောင် စိတ်ပျက်မှာ မဟုတ်ဘူး။

^၂ ရောင့်ရဲ​မှု မရှိတာ အန္တရာယ် သိပ်များတယ်။ ရှိတာနဲ့ မရောင့်ရဲ​သူဟာ တကယ် မလိုအပ်တဲ့​အရာတွေ ပိုင်ဆိုင်ဖို့ အချိန်​အများကြီး ပေးပြီး အလုပ်လုပ်​လာနိုင်တယ်။ စိတ်မကောင်း​စရာ​က ခရစ်ယာန်​တချို့​တောင် ငွေနဲ့ တခြားအရာတွေ ခိုးမိ​သွားကြတယ်။ ‘ရသင့်​ရထိုက်​လို့ ယူတာ၊’ ‘စောင့်သင့်​သလောက် စောင့်​ပြီးပြီ၊’ ‘နောက်မှ ပြန်ပေး​ရင် ရတာပဲ’ လို့ စဉ်းစား​ကြ​တာ ဖြစ်နိုင်တယ်။ ဒါပေမဲ့ ခိုးဝှက်​တာကို ယေဟောဝါ မနှစ်သက်ဘူး။ နာမတော် ကဲ့ရဲ့စရာ ဖြစ်စေ​လို့​ပဲ။ (ပညာ. ၃၀:၉) တချို့​ကျတော့ အမှုဆောင်​အခွင့်ထူးတွေ မရလို့ စိတ်ဓာတ်​ကျပြီး ယေဟောဝါကို ဝတ်မပြုတော့တဲ့​အထိ​တောင် ဖြစ်သွားတယ်။ (ဂလ. ၆:၉) ယေဟောဝါရဲ့ ကျေးကျွန်တွေ ဖြစ်လျက်နဲ့ ဘာကြောင့် ဒီလို​ဖြစ်သွား​ကြ​သလဲ။ ရောင့်ရဲ​မှု မရှိတော့လို့ ဖြစ်နိုင်တယ်။

^၃ “ကျွန်တော်ဟာ ဘယ်အခြေအနေမှာ​မဆို ရောင့်ရဲ​တတ်” တယ်လို့ တမန်တော် ပေါလု ပြောတယ်။ (ဖိလိပ္ပိ ၄:၁၁၊ ၁၂ ကို ဖတ်ပါ။) တကယ်​ဆိုရင် အဲဒီ​အချိန်မှာ ပေါလု ထောင်ကျနေတာ။ ဒါတောင် စိတ်မပျက်​ဘူး။ “ရောင့်ရဲ​တတ်တဲ့ လျှို့ဝှက်ချက်ကို သင်ယူ​ထား” လို့​ပဲ။ ကျွန်တော်တို့လည်း ဘယ်အခြေအနေမှာ​မဆို ရောင့်ရဲ​တတ်​လာနိုင်တယ်​ဆိုတာ ပေါလုရဲ့​စကားနဲ့ အတွေ့အကြုံ​ကနေ သိရတယ်။ အလိုလို​တော့ ရောင့်ရဲ​တတ်လာ​မှာ မဟုတ်ဘူး။ သင်ယူဖို့ လိုတယ်။ ဘယ်လို သင်ယူ​နိုင်​မလဲ။ ရောင့်ရဲ​တတ်လာဖို့ ကူညီပေးမယ့် အရည်အသွေးတွေ​အကြောင်း ဆွေးနွေး​ကြရအောင်။

ကျေးဇူးတင်စိတ်​ရှိပါ

^၄ ကျေးဇူးတင်စိတ်​ရှိတာက ရောင့်ရဲ​တတ်လာ​စေ​တယ်။ (၁ သက်သာလောနိတ် ၅:၁၈ ကို ဖတ်ပါ။) ရောင့်ရဲ​သူဟာ အသက်​ဆက်ရှင်​ဖို့ လိုအပ်တာတွေ ရှိနေရင်​ပဲ ကျေးဇူးတင်​ပြီ။ လို​ချင်ပေမဲ့ မပိုင်ဆိုင်​ရတဲ့​အရာတွေကို အလွန်​အမင်း အာရုံ​မစိုက်​ဘူး။ ရထားတဲ့ အမှုဆောင် အခွင့်ထူးတွေ​အတွက် ယေဟောဝါကို ကျေးဇူးတင်​မယ်​ဆိုရင် လက်ရှိ တာဝန်မှာ အကောင်းဆုံး အမှုဆောင်ဖို့​ပဲ အာရုံစိုက်​မှာ ဖြစ်တယ်။ နောက်ထပ် အခွင့်ထူးတွေ ရလာဖို့ အလွန်​အမင်း အာရုံစိုက်​မှာ မဟုတ်ဘူး။ ဒါကြောင့်​လည်း ဆုတောင်းတဲ့​အခါ ကျေးဇူးတော်​ကို ချီးမွမ်းဖို့ ကျမ်းစာမှာ တိုက်တွန်း​ထားတာ။ ကျေးဇူးတင်စိတ်​ရှိရင် “လူ့ဉာဏ်နဲ့ မမီနိုင်တဲ့ ဘုရားသခင့်​ငြိမ်သက်ခြင်း” ခံစားရမယ်။—ဖိ. ၄:၆၊ ၇။

^၅ အစ္စရေးတွေ​အကြောင်း စဉ်းစားကြည့်ပါ။ အီဂျစ်ပြည်​မှာ စားခဲ့ရတဲ့ စားစရာတွေ မရှိလို့​ဆိုပြီး ယေဟောဝါကို ခဏ​ခဏ ပြစ်တင်​ညည်းညူ​ကြတယ်။ (တော. ၁၁:၄-၆) တောကန္တာရမှာ အနေ​အစား ခက်​တာ​တော့ မှန်ပါတယ်။ ဒါပေမဲ့ သူတို့​အတွက် ယေဟောဝါ လုပ်ပေးတာ​တွေ​ကို ပြန်စဉ်းစားပြီး ကျေးဇူးတင်​သင့်​တာ။ အီဂျစ်ပြည်​မှာ ကျွန်​အဖြစ် မညှာ​မတာ ခိုင်းစေ​ခံရလို့ အီဂျစ်​တွေ​အပေါ် ကပ်ဘေး​ဆယ်ခု ကျရောက်​စေ​ပြီး သူတို့ကို ယေဟောဝါ ကယ်လွှတ်ပေး​တယ်။ အီဂျစ်ပြည်​ကနေ ထွက်လာတော့ “အီဂျစ်​တွေ​ဆီ​က ရွှေထည်​ငွေထည်​နဲ့ အဝတ်အစားတွေ” ရလာကြတယ်။ (ထွ. ၁၂:၃၅၊ ၃၆) ဖာရော​စစ်တပ်​နဲ့ ပင်လယ်နီ​ကြား ပိတ်မိ​သွားတော့ ယေဟောဝါ အံ့ဖွယ်နည်း​နဲ့ ပင်လယ်​ကို နှစ်ခြမ်း​ကွဲ​စေ​ပြီး လွတ်မြောက်ရာလမ်း ပြင်ဆင်​ပေးတယ်။ တောကန္တာရ​ထဲ လှည့်လည်​သွား​လာစဉ်​မှာ​လည်း နေ့တိုင်း မန္န​မုန့် ချပေးတယ်။ ဒါနဲ့တောင် ဘာကြောင့် မရောင့်​မရဲ ဖြစ်နေကြ​သလဲ။ စားစရာ မရှိလို့ မဟုတ်ဘဲ ယေဟောဝါ ပေးထားတာ​အတွက် ကျေးဇူးတင်စိတ်​မရှိလို့ပဲ။

^၆ ကျေးဇူးတင်စိတ် ဘယ်လို ရှိလာနိုင်သလဲ။ ပထမ၊ ဘဝမှာ ကျေးဇူးတင်​စရာ​ကောင်းတဲ့​ကိစ္စ ဘာတွေ ရှိသလဲ​လို့ နေ့တိုင်း အချိန်ယူ​စဉ်းစားပါ။ စဉ်းစားမိ​တဲ့​အချက် နှစ်ချက်၊ သုံးချက် ချ​ရေး​ထားနိုင်တယ်။ (မြည်. ၃:၂၂၊ ၂၃) ဒုတိယ၊ သင့်​အတွက် တခြားသူတွေ တစ်ခုခု လုပ်ပေးတဲ့​အခါ ကျေးဇူးတင်​စကား ပြောပါ။ အထူးသဖြင့် ယေဟောဝါကို နေ့တိုင်း ကျေးဇူးတင်ပါ။ (ဆာ. ၇၅:၁) တတိယ၊ ကျေးဇူး​သိတတ်​သူ​တွေ​နဲ့ ပေါင်းပါ။ ကျေးဇူး​သိတတ်​သူ​တွေ​နဲ့ ပေါင်းရင် ကျေးဇူး​သိ​တတ်လာမယ်။ မရောင့်ရဲ​သူ​တွေ​နဲ့ ပေါင်းရင် မရောင့်ရဲ​တဲ့ သဘောထား ဝင်လာမယ်။ (တရား. ၁:၂၆-၂၈။ ၂ တိ. ၃:၁၊ ၂၊ ၅) ကျေးဇူးတင်ဖို့ အခွင့်အရေး ရှာ​တဲ့အခါ မရောင့်ရဲ​တဲ့ သဘောထား ဝင်လာ​ဖို့ အခွင့်​အလမ်း နည်း​သွားမယ်။

^၇ အင်ဒိုနီးရှား​နိုင်ငံမှာ နေတဲ့ ညီအစ်မ အာချီ​အကြောင်း စဉ်းစားကြည့်ပါ။ “ကိုဗစ်-၁၉ ကပ်ရောဂါ​ကာလတုန်းက ကိုယ့်​အခြေအနေနဲ့ တခြား​ညီအစ်ကို/မတွေရဲ့ အခြေအနေကို စပြီး နှိုင်းယှဉ်​လာ​မိ​လို့ မကျေမနပ် ဖြစ်လာတယ်” လို့ ပြောတယ်။ (ဂလ. ၆:၄) ဒါနဲ့ ညီအစ်မ အာချီ ဘာလုပ်သလဲ။ “နေ့တိုင်း ခံစားနေရတဲ့ ကောင်းချီးတွေ၊ ဘုရား​အဖွဲ့အစည်း​ထဲ ရှိနေလို့ ရတဲ့ အကျိုးကျေးဇူးတွေကို စဉ်းစား​လိုက်တယ်။ ယေဟောဝါကို ကျေးဇူးတင်ကြောင်း ဆုတောင်း​ပြောပြတယ်။ ဒီလိုနဲ့ ကျေနပ်​ရောင့်ရဲတတ်လာတယ်” လို့ ပြောတယ်။ သင်လည်း သင့်​အခြေအနေကို မကျေမနပ် ဖြစ်နေရင် ညီအစ်မ အာချီ​လို လုပ်​ကြည့်ပါ။

ယေဟောဝါ လုပ်စေချင်တာကို အာရုံစိုက်ပါ၊ နှိမ့်ချမှု ရှိပါ

^၈ ပရောဖက် ယေရမိရဲ့ အတွင်းရေးမှူး ဗာရုတ်​အကြောင်း စဉ်းစားကြည့်ပါ။ ဗာရုတ် ရထားတဲ့ တာဝန်က ခက်တယ်။ ယေဟောဝါအပေါ် ကျေးဇူး​မသိတတ်တဲ့ အစ္စရေး​လူမျိုးကို တရား​စီရင်ချက်​သတင်း ယေရမိ ကြေညာ​ရာ​မှာ ကူညီ​ပေးရမယ့်​တာဝန်။ ဒါပေမဲ့ ယေဟောဝါ လုပ်စေချင်တာကို မဟုတ်ဘဲ ကိုယ့်​အကြောင်း၊ ကိုယ်​လုပ်ချင်တာတွေ​အကြောင်း ဗာရုတ် အာရုံစိုက်​လာတယ်။ ကိုယ့်​ဘဝ​အခြေအနေကို မကျေမနပ် ဖြစ်လာတယ်။ ဒါကြောင့် “မင်းက ကြီးမြတ်တဲ့​အရာတွေကို ရှာ​နေတယ်။ အဲဒါတွေကို ဆက်​မရှာပါ​နဲ့​တော့” ဆိုပြီး ယေရမိ​က​တစ်ဆင့် ယေဟောဝါ ပြောတယ်။ (ယေ. ၄၅:၃-၅) တစ်နည်း​အားဖြင့် “လက်ရှိ အခြေအနေနဲ့ ကျေနပ်​ရောင့်ရဲ​ပါ” လို့ ပြောလိုက်တာပဲ။ ယေဟောဝါ တည့်မတ်ပေး​တာကို ဗာရုတ် လက်ခံတဲ့​အတွက် မျက်နှာသာတော် ဆက်​ခံစားရတယ်။

^၉ ခရစ်ယာန်​တစ်ယောက်ဟာ ပင်ကိုစွမ်းရည်​ရှိသူ၊ အလုပ်​ကြိုးစားသူ၊ အမှန်တရား​သက်တမ်း​ကြာသူ ဖြစ်လို့ ဘယ်အခွင့်ထူး​ကိုတော့ ရထိုက်တယ်​ဆိုပြီး တွေး​လာနိုင်တယ်။ ဒါပေမဲ့ သူ လိုချင်တဲ့ အခွင့်ထူး​ကို​မှ တခြား​တစ်ယောက် ရသွားတာမျိုး ဖြစ်နိုင်တယ်။ မကျေမနပ် မဖြစ်ဖို့ ဘာက ကူညီပေးနိုင်သလဲ။ ၁ ကောရိန္သု ၄:၆၊ ၇ မှာ ပါတဲ့ တမန်တော် ပေါလုရဲ့ စကားတွေကို စဉ်းစား​ကြည့်​နိုင်တယ်။ (ဖတ်ပါ။) ဘယ်အခွင့်ထူး၊ ဘယ်​စွမ်းရည်​မဆို​ဟာ ယေဟောဝါ ပေးထားတာ ဖြစ်တယ်။ ကျွန်တော်တို့ ရထိုက်​လို့ မဟုတ်ဘဲ မဟာကရုဏာတော် ရှိလို့ ပေးထားတာ​ပါ။—ရော. ၁၂:၃၊ ၆။ ဧ. ၂:၈၊ ၉။

^၁၀ ယေရှုရဲ့ စံနမူနာကို အလေးအနက် စဉ်းစားပြီး အတုယူမယ်​ဆိုရင် ကျွန်တော်တို့ နှိမ့်ချ​တတ်​လာနိုင်တယ်။ တမန်တော်တွေကို ယေရှု ခြေဆေး​ပေးတဲ့​ညတုန်းက အဖြစ်အပျက်​ကို သုံးသပ်ကြည့်ပါ။ “ယေရှုက အရာ​ခပ်သိမ်း​ကို မိမိ​လက်ထဲ အဖ​ဘုရား အပ်​ထားတယ်၊ ဘုရားသခင်ဆီ​ကနေ သူ ရောက်လာပြီးနောက် ဘုရားသခင်ဆီ ပြန်​သွားရမယ်​ဆိုတာ” သိလျက်နဲ့​တောင် “တပည့်တွေ​ရဲ့​ခြေကို ဆေး​ပေးတယ်” လို့ တမန်တော် ယောဟန် မှတ်တမ်း​တင်ထားတယ်။ (ယော. ၁၃:၃-၅) တပည့်တွေ​ကသာ မိမိကို ခြေဆေး​ပေး​သင့်​တာ​လို့ ယေရှု တွေး​ချင်ရင် တွေး​လို့​ရတယ်။ ဒါပေမဲ့ အဲဒီလို​မတွေးဘူး။ ယေရှုဟာ နှိမ့်ချ​တယ်၊ ကျေနပ်​ရောင့်ရဲ​တယ်။ ဘုရားသခင့်​သားတော် ဖြစ်လို့ မြေကြီးပေါ်မှာ လိုလေသေး​မရှိ ပြည့်စုံတဲ့​ဘဝနဲ့ နေ​ရ​သင့်​တယ်လို့ တစ်ခါမှ မတွေးဘူး။ (လု. ၉:၅၈) ကျွန်တော်တို့အတွက် စံနမူနာ​ပါပဲ။—ယော. ၁၃:၁၅။

^၁၁ နယ်သာလန်​နိုင်ငံက ညီအစ်ကို ဒန်းနစ်​ဟာ ယေရှုလို နှိမ့်ချ​တတ်​ဖို့ ကြိုးစားပေမဲ့ မလွယ်ဘူး​လို့ ပြောတယ်။ “ကိုယ်လိုချင်တဲ့ အမှုဆောင်​အခွင့်ထူး​တစ်ခု တခြား​တစ်ယောက် ရ​သွားတဲ့အခါ​မျိုး​မှာ မာန​ထိခိုက်​သလိုလို၊ မကျေနပ်​သလိုလို ဖြစ်လာတတ်တယ်။ အဲဒီလို​ဖြစ်​လာပြီ​ဆိုရင် နှိမ့်ချမှု​အကြောင်း ကျွန်တော် ကိုယ်ပိုင်​လေ့လာမှု လုပ်တယ်။ နှိမ့်ချမှု​အကြောင်း ဖော်ပြထားတဲ့ ကျမ်းပိုဒ်တွေ အလွယ်တကူ ပြန်​ရှာပြီး ဖတ်​နိုင်အောင် JW Library^® app မှာ စု​ပြီး သိမ်းထားတယ်။ နှိမ့်ချမှု​အကြောင်း ဟောပြောချက်တွေ ဖုန်း​မှာ ဒေါင်းလုတ်​လုပ်ထားပြီး မကြာခဏ ပြန်​နားထောင်တယ်။a ဘာပဲလုပ်လုပ် ကိုယ့်ကိုယ်ကိုယ် မဟုတ်ဘဲ ယေဟောဝါကို ဂုဏ်တင်ဖို့ ဖြစ်သင့်တယ်​ဆိုတာ သဘောပေါက်လာတယ်။ ယေဟောဝါက ကျွန်တော်တို့ကို တစ်ထောင့်​တစ်နေရာကနေ ပါဝင်ခွင့်​ပေးထားတာ။ တကယ်တမ်း အောင်မြင်စေ​တာ ယေဟောဝါ​ပဲ” လို့ ညီအစ်ကို ဒန်းနစ် ပြောတယ်။ သင်လည်း အမှုဆောင်​အခွင့်ထူး​တစ်ခု မရလို့ စိတ်ဓာတ်ကျ​လာပြီ​ဆိုရင် ပို​နှိမ့်ချ​တတ်လာဖို့ ကြိုးစားပါ။ ဒါဆိုရင် ယေဟောဝါနဲ့ ပိုရင်းနှီး​လာမယ်။ ကျေနပ်​ရောင့်ရဲ​တတ်လာမယ်။—ယာ. ၄:၆၊ ၈။

အနာဂတ်​မျှော်လင့်ချက်​အကြောင်း တွေးတောပါ

^၁၂ အနာဂတ်​မျှော်လင့်ချက်​အကြောင်း တွေးတောတာက ကျေနပ်​ရောင့်ရဲ​တတ်လာ​စေ​တယ်။ ကျွန်တော်တို့ အခက်အခဲတွေ ဘယ်လောက် များတယ်​ဆိုတာ ယေဟောဝါ နားလည်တယ်၊ အခက်အခဲ​အားလုံးကို မကြာခင် အဆုံးတိုင်​ပေးမယ်။ (ဟေရှာယ ၆၅:၂၁-၂၅ ကို ဖတ်ပါ။) ကမ္ဘာသစ်​ရောက်ရင် နေချင့်စဖွယ်​အိမ်မှာ ကျွန်တော်တို့ ဘေးကင်းကင်း နေ​ရမယ်။ ပျော်ရွှင်​ကျေနပ်စရာ​ကောင်းတဲ့​အလုပ်တွေ လုပ်ရမယ်။ အာဟာရ​ရှိတဲ့၊ အရသာ​ရှိတဲ့ အစားအစာတွေ စား​ရမယ်။ ကိုယ်တိုင်နဲ့ သားသမီးတွေ ဘေးဆိုး​ကြုံ​မှာ စိတ်မပူ​ရတော့ဘူး။ (ဟေရှာ. ၃၂:၁၇၊ ၁၈။ ယေဇ. ၃၄:၂၅) အနာဂတ်​မျှော်လင့်ချက်​ဟာ စိတ်​ချမ်းမြေ့​စရာ​ကောင်း​သလို ပြည့်စုံလာမယ်​ဆိုတာ စိတ်ချနိုင်တယ်။

^၁၃ အခု​အချိန်မှာ အနာဂတ်​မျှော်လင့်ချက်ကို အာရုံစိုက်ဖို့ ပို​လို​လာတယ်။ ဘာကြောင့်လဲ။ “အလွန် ခက်ခဲ​ကျပ်တည်း” တဲ့ “နောက်ဆုံး​ကာလ” မှာ အသက်ရှင်နေ​ရလို့ပါ​ပဲ။ (၂ တိ. ၃:၁) ယေဟောဝါ ပေးတဲ့ လမ်းညွှန်မှု၊ ထောက်မမှု၊ အစွမ်း​ခွန်အားကြောင့် ကျွန်တော်တို့ နေ့တိုင်း ခံရပ်​နေနိုင်​တာ။ (ဆာ. ၁၄၅:၁၄) ဒါ့အပြင် ခက်ခဲချိန်တွေမှာ မျှော်လင့်ချက်က​လည်း ခံနိုင်ရည် ရှိနေစေတယ်။ ဥပမာ၊ မိသားစု စားဝတ်နေရေး​အတွက် သင် ရုန်းကန်​နေ​ရတာ ဖြစ်နိုင်တယ်။ အမြဲ ရုန်းကန်​နေ​ရတော့​မလား။ မဟုတ်ပါဘူး။ ပရဒိသု ရောက်ရင် လိုအပ်တာ​ထက်မက ဖြည့်ဆည်းပေးမယ်လို့ ယေဟောဝါ ကတိ​ပေးထားတယ်။ (ဆာ. ၉:၁၈။ ၇၂:၁၂-၁၄) နေ့တိုင်း နာကျင်​ကိုက်ခဲ​တာ၊ စိတ်ဓာတ်ကျတာ၊ ကျန်းမာရေး မကောင်းတာ ဖြစ်နိုင်တယ်။ အမြဲ ဝေဒနာ​ခံစား​နေ​ရတော့​မလား။ မဟုတ်ပါဘူး။ ကမ္ဘာသစ်​မှာ ဖျားနာခြင်း၊ သေခြင်း ရှိတော့မှာ မဟုတ်ဘူး။ (ဗျာ. ၂၁:၃၊ ၄) လက်ရှိ​အခြေအနေမှာ ပျော်ရွှင်​ကျေနပ်​နေဖို့၊ စိတ်ပျက်လက်ပျက် ဖြစ်​မနေဖို့ မျှော်လင့်ချက်က ကူညီပေးတယ်။ အခက်အခဲတွေ​ဟာ “ခဏတာ” ပဲ ဖြစ်တယ်၊ ကမ္ဘာသစ်​မှာ အခက်အခဲ​အားလုံး ပပျောက်သွားမယ်​ဆိုတာ ကျွန်တော်တို့ သိထားကြတယ်။ (၂ ကော. ၄:၁၇၊ ၁၈) ဒါကြောင့် လောလောဆယ် မတရားမှု ကြုံနေ​ရင်၊ ကျန်းမာရေး ပြဿနာ ရှိနေရင်၊ ချစ်ရသူတွေ ဆုံးပါး​သွား​ရင်၊ တခြား​ပြဿနာတွေ ရှိနေရင်တောင် ပျော်ရွှင်​ကျေနပ်​နိုင်ဆဲပါပဲ။

^၁၄ မျှော်လင့်ချက်က ကျေနပ်​ရောင့်ရဲတတ်ဖို့ အများကြီး ကူညီပေးတယ်။ ဒါဆိုရင် မျှော်လင့်ချက်ကို ဘယ်လို တောက်ပ​စေ​နိုင်သလဲ။ အမှောင်​ထဲ​မှာ လမ်းကို ရှင်းရှင်း​လင်းလင်း မြင်ရဖို့ ဓာတ်​မီး​နဲ့ ကြည့်ရမယ်။ အဲဒီလိုပဲ အခက်အခဲတွေ သိပ်​များတဲ့ မှောင်မိုက်​လောက​မှာ အသက်ရှင်နေ​ပေမဲ့ ကမ္ဘာသစ်​မြင်ကွင်းကို ရှင်းရှင်း​လင်းလင်း မြင်ရဖို့ ဘာလုပ်ရမလဲ။ ကမ္ဘာသစ် ရောက်နေတယ်လို့ တွေးတော​မြင်ယောင်​ကြည့်ရမယ်။ ဥပမာ၊ ငွေရေးကြေးရေး ပူပန်​နေ​သလား။ ငွေကြေး​ပြဿနာ၊ အကြွေး၊ ဆင်းရဲ​ချမ်းသာ ကွာဟမှု မရှိတော့မယ့်​အချိန်ကို မြင်ယောင်​ကြည့်လိုက်ပါ။ သိပ်​မျှော်လင့်​နေတဲ့ အမှုဆောင်​အခွင့်ထူး မရလို့ စိတ်ဓာတ်ကျ​နေ​သလား။ ကမ္ဘာသစ်​မှာ ယေဟောဝါ​အတွက် စုံလင်တဲ့ အသက်တာနဲ့ ထာဝစဉ် အမှုဆောင်​ရမှာ​ကို မြင်ယောင်​ကြည့်လိုက်ပါ။ အခု​အချိန်​အကြောင်း ပြန်စဉ်းစားတဲ့​အခါ ဘာ​မဟုတ်တာ​လေး​အတွက် စိတ်ဓာတ်ကျ​နေခဲ့တာ​ပဲ​လို့ တွေး​နိုင်​သွားမှာ။—၁ တိ. ၆:၁၉။

^၁၅ အစောပိုင်းမှာ ဖော်ပြခဲ့တဲ့ ဒန်းနစ်​ရဲ့ ဇနီး ခရစ္စ​တာ​အကြောင်း စဉ်းစားကြည့်ပါ။ “ကျွန်မ​မှာ ကြွက်သား​အားနည်းတဲ့​ရောဂါ ရှိတယ်။ လူက ပျော့ခွေ​လာပြီး လမ်း​တောင် မလျှောက်​နိုင်​လို့ ဘီးတပ်​ကုလားထိုင်​ပဲ အားကိုး​နေ​ရတယ်။ အချိန်ပြည့်​နီးပါး အိပ်ရာထဲ လှဲနေ​ရတယ်။ တစ်နေ့​တစ်နေ့ နာကျင်​ကိုက်ခဲ​လိုက်တာ​မှ ပြော​မနေ​နဲ့။ အခြေအနေ ပြန်ကောင်း​မလာနိုင်​တော့​ဘူး​လို့ သိပ်မကြာခင်​က​ပဲ ဆရာဝန် ပြောတယ်။ ‘အော်၊ အနာဂတ်မှာ ငါ ပြန်ကောင်း​လာမယ်​ဆိုတာ ဆရာ မသိဘူး​ပဲ’ လို့ ချက်ချင်း တွေးမိတယ်။ မျှော်လင့်ချက်ကို အာရုံစိုက်​ထားလို့ ကျွန်မ စိတ်​အေးချမ်း​နေတယ်။ လက်ရှိ​အသက်တာကို ကျွန်မ အံကြိတ်​ပြီး ဖြတ်သန်း​နေ​ရပေမဲ့ ကမ္ဘာသစ်​အသက်တာကို​တော့ ပျော်ပျော်​ကြီး ဖြတ်သန်း​ရမှာ” လို့ ခရစ္စ​တာ ပြောတယ်။

“ဘုရားကို ကြောက်ရွံ့​သူ​တွေ​ဟာ​လိုလေသေးမရှိ ပြည့်စုံ​တယ်”

^၁၆ ကျွန်တော်တို့ ဘယ်လောက်ပဲ ကျေနပ်​ရောင့်ရဲ​တတ်​ပါ​စေ အခက်အခဲတွေ​ကတော့ ကြုံရမှာပဲ။ ဘုရင်​ဒါဝိဒ်​ဆိုရင် သား​သုံးယောက် သေဆုံးသွား​လို့ စိတ်ထိခိုက်​ရတယ်။ မဟုတ်မမှန် စွပ်စွဲခံရတယ်။ သစ္စာဖောက်​ခံရတယ်။ ဝရမ်းပြေး​အဖြစ် နှစ်ပေါင်း​များစွာ ထွက်ပြေး​ရတယ်။ ဒါတောင် “ဘုရားကို ကြောက်ရွံ့​သူ​တွေ​ဟာ လိုလေသေးမရှိ ပြည့်စုံ​တယ်” လို့ ပြောတယ်။ (ဆာ. ၃၄:၉၊ ၁၀) ဘာကြောင့်လဲ။ ယေဟောဝါကို ဝတ်ပြုလို့ ဘဝမှာ ပြဿနာတွေ ကင်း​နေဖို့ ဒါဝိဒ် မမျှော်လင့်ဘူး။ ဒါပေမဲ့ တကယ် လိုအပ်တာတွေကို ယေဟောဝါ ဖြည့်ဆည်း​မပေးဘဲ မနေဘူး​ဆိုတာ စိတ်ချတယ်။ (ဆာ. ၁၄၅:၁၆) ကျွန်တော်တို့လည်း ဘာအခက်အခဲ​ပဲ ကြုံရပါစေ ခံရပ်နိုင်ဖို့ ယေဟောဝါ ကူညီပေးမယ်​ဆိုတာ စိတ်ချနိုင်တယ်။ ဘယ်အခြေအနေမှာ​မဆို ကျေနပ်​ရောင့်ရဲ​နေနိုင်ပါတယ်။

^၁၇ ယေဟောဝါက ကျွန်တော်တို့ကို ကျေနပ်​ရောင့်ရဲ​တတ်​စေချင်တယ်။ (ဆာ. ၁၃၁:၁၊ ၂) ဒါကြောင့် ရောင့်ရဲ​တတ်တဲ့ လျှို့ဝှက်ချက်ကို သင်ယူ​ကြရအောင်။ ကျေးဇူးတင်စိတ်​ရှိရင်၊ ယေဟောဝါ လုပ်စေချင်တာကို အာရုံစိုက်​ရင်၊ နှိမ့်ချမှု ရှိရင်၊ မျှော်လင့်ချက်ကို တောက်ပ​နေ​စေ​ရင် “ကျွန်တော် ကျေနပ်​နေပါတယ်” လို့ ပြောနိုင်ပါလိမ့်မယ်။—ဆာ. ၁၆:၅၊ ၆။