အကြံဉာဏ် ဘယ်လို ပေးသင့်သလဲ

တခြားသူတွေကို အကြံ​ပေး​ရတာ သင် ကြိုက်သလား။ တချို့က ကြိုက်တယ်။ တချို့ကျတော့ အကြံ​ပေးရမှာ ဝန်လေးတယ်။ အကြံ​ပေးတဲ့​အခါ မရဲ​တရဲ ဖြစ်​နေတတ်တယ်။ ဒါပေမဲ့ ကျွန်တော်တို့​အားလုံး အခါအားလျော်စွာ အကြံ​ပေးရမယ့်​တာဝန် ရှိတယ်။ ဘာကြောင့်လဲ။ အချင်းချင်း​ကို ချစ်တဲ့​မေတ္တာဟာ နောက်လိုက်စစ်​တွေ​ရဲ့ ထင်ရှားတဲ့ အမှတ်အသား ဖြစ်မယ်လို့ ယေရှု ပြော​ထားလို့ပါ​ပဲ။ (ယော. ၁၃:၃၅) ချစ်ကြောင်း ပြနိုင်တဲ့ တစ်နည်း​ကတော့ လိုအပ်တဲ့​အခါ ညီအစ်ကို/မတွေကို အကြံ​ပေးခြင်း​ပါပဲ။ “စိတ်ရင်းမှန်နဲ့ အကြံ​ပေး​တတ်တဲ့ မိတ်ဆွေကလည်း စိတ်ကို ရွှင်လန်းစေ​တယ်” လို့ ကျမ်းစာ ဆိုတယ်။—ပညာ. ၂၇:၉။

^၂ အထူးသဖြင့် အကြီးအကဲတွေဟာ ထိထိ​ရောက်ရောက် အကြံ​ပေး​တတ်​ဖို့ လိုတယ်။ သိုးတော်စုကို ထိန်းကျောင်းဖို့ သူတို့ကို ယေဟောဝါနဲ့ ယေရှု ခန့်အပ်ထား​တယ်။ (၁ ပေ. ၅:၂၊ ၃) သိုးတော်စုကို အကြီးအကဲတွေ ထိန်းကျောင်းတဲ့ တစ်နည်း​ကတော့ ကျမ်းစာ​အကြံဉာဏ်ကို အခြေခံပြီး အသင်းတော်မှာ ဟောပြောချက်တွေ ပေးတာ​ပါ။ ဒါ့အပြင် သိုးတော်စု​ကနေ လမ်းလွဲသွား​သူ​တွေ အပါအဝင် သိုး​တစ်ကောင်ချင်းစီ​ကို လိုအပ်သလို အကြံ​ပေးကြတယ်။ အကြီးအကဲတွေ​ကော ကျွန်တော်တို့​အားလုံး​ပါ အကြံဉာဏ်ကောင်း ဘယ်လို ပေးနိုင်သလဲ။

^၃ အကြံဉာဏ်ကောင်း ပေး​တတ်​ဖို့ ကျမ်းစာ​ဇာတ်ကောင်​တချို့​ရဲ့ အကြံ​ပေး​ပုံ​ကို လေ့လာနိုင်တယ်။ အထူးသဖြင့် ယေရှုရဲ့ အကြံ​ပေး​ပုံ​ကို လေ့လာနိုင်တယ်။ ယေရှုရဲ့ ဘွဲ့​နာမ​တစ်ခု​ဟာ “အကောင်းဆုံး အတိုင်ပင်ခံ” ဖြစ်တယ်။ (ဟေရှာယ ၉:၆ ကို ဖတ်ပါ။) အကြံဉာဏ် တောင်းဆိုခံရတဲ့​အခါ ဘာလုပ်နိုင်သလဲ၊ တောင်းဆို​မခံရ​ဘဲ အကြံ​ပေးဖို့ လိုလာတဲ့​အခါ ဘာလုပ်နိုင်သလဲ၊ သင့်တော်တဲ့​အချိန်မှာ သင့်တော်တဲ့​နည်းနဲ့ အကြံ​ပေးဖို့ ဘာကြောင့် အရေးကြီးသလဲ​ဆိုတာ ဒီဆောင်းပါးမှာ ဆွေးနွေး​သွားပါမယ်။

အကြံဉာဏ် တောင်းဆိုခံရတဲ့အခါ

^၄ တစ်ယောက်ယောက် အကြံ​တောင်းတဲ့​အခါ အားကိုး​ခံရတယ်​ဆိုပြီး ကျွန်တော်တို့ ဝမ်းသာ​သွားနိုင်တယ်။ ချက်ချင်း အကြံ​ပေးချင်​မိ​နိုင်တယ်။ ဒါပေမဲ့ ‘ငါ တကယ် အကြံ​ပေးနိုင်တဲ့​ကိစ္စ ဟုတ်​သလား’ ဆိုပြီး အရင်ဆုံး စဉ်းစားသင့်​တယ်။ တစ်ခါတလေ​ကျတော့ ကိုယ်တိုင် အကြံ​မပေးဘဲ တကယ် အကြံဉာဏ်ကောင်း ပေးနိုင်​မယ့်​သူ​ဆီ လမ်းညွှန်ပေး​တာ ကူညီရာ​ပို​ရောက်တယ်။

^၅ ဥပမာ၊ မိတ်ဆွေ​တစ်ယောက် အကြီးအကျယ် မကျန်းမမာ ဖြစ်နေတယ် ဆိုပါစို့။ ကုသနည်းတွေ ရှာ​ထားတယ်၊ ဘယ်​ကုသနည်း ပိုကောင်းမယ် ထင်သလဲ​ဆိုပြီး သင့်ကို မေးတယ်။ ကုသနည်း​တစ်နည်းကို ရွေးဖို့ အကြံ​ပေးချင်​မိ​နိုင်ပေမဲ့ သင်က ဆရာဝန် မဟုတ်​သလို ဆေးပညာ တတ်ကျွမ်း​နားလည်​သူလည်း မဟုတ်ဘူး။ ဒီလို​ကိစ္စမှာ တကယ် တတ်ကျွမ်း​နားလည်​သူ​ဆီ လမ်းညွှန်ပေး​တာ အကူအညီ ပို​ဖြစ်နိုင်တယ်။

^၆ ကိုယ် အကြံ​ပေးနိုင်တဲ့​ကိစ္စ​လို့ ထင်ရင်တောင် ချက်ချင်း အကြံ​မပေးတာ ကောင်းတယ်။ “ဖြောင့်မတ်သူ​က စိတ်ထဲမှာ အရင် စဉ်းစားပြီးမှ ပြန်​ပြောတတ်တယ်” လို့ ပညာအလိမ္မာ ၁၅:၂၈ မှာ ဆိုထားတယ်။ ဒါကြောင့် ဘာ​ပြန်ပြော​ရမလဲ သိတယ်လို့ ထင်ရင်တောင် ရှာဖွေ​လေ့လာဖို့၊ ဆုတောင်းဖို့၊ စဉ်းစား​သုံးသပ်ဖို့ ခဏလောက် အချိန်ယူပါ။ ဒါဆိုရင် ကိုယ်​ပေးမယ့် အကြံဉာဏ်ဟာ ယေဟောဝါရဲ့ အတွေးအခေါ်နဲ့ ကိုက်ညီတယ်​ဆိုတာ ပို​သေချာ​သွားနိုင်တယ်။ ပရောဖက် နာသန်​အဖြစ်ကို သုံးသပ်ကြည့်ပါ။

^၇ ယေဟောဝါ​အတွက် ဗိမာန်တော် ဆောက်​ချင်​တဲ့​အကြောင်း ပရောဖက် နာသန်​ကို ဘုရင်​ဒါဝိဒ် ပြောတယ်။ ဆောက်​ပါ​လို့ နာသန် ချက်ချင်း အကြံ​ပေးလိုက်တယ်။ တကယ်တော့ ယေဟောဝါက ဒါဝိဒ်​ကို ဗိမာန်တော် မဆောက်​စေချင်​ဘူး။ ဒါဝိဒ်​ကို အကြံ​မပေးခင် ယေဟောဝါဆီ နာသန် အရင်ဆုံး မေးမြန်းခဲ့​သင့်​တာ။ (၁ ရာ. ၁၇:၁-၄) “မစဉ်းစား​မဆင်ခြင်ဘဲ” အကြံ​မပေး​မိ​ဖို့ ဒီ​အဖြစ်​ကနေ သင်ခန်းစာ ရတယ်။—ယာ. ၁:၁၉။

^၈ တခြားသူတွေကို အကြံ​မပေးခင် သေသေ​ချာချာ စဉ်းစားသင့်​တဲ့ အကြောင်းရင်း နောက်တစ်ခု ရှိတယ်။ ကိုယ်​ပေးတဲ့ အကြံ​ကြောင့် တစ်ဖက်သား ဆုံးဖြတ်ချက် မှားသွား​ရင် ကိုယ်လည်း တာဝန်​မကင်း​လို့​ပဲ။

တောင်းဆို​မခံရ​ဘဲ အကြံ​ပေးဖို့ လိုလာတဲ့အခါ

^၉ ညီအစ်ကို/မ​တစ်ယောက် “ခြေလှမ်း​မှား​သွား” တဲ့အခါ အကြီးအကဲတွေ အစပြုပြီး အကြံ​ပေး​တည့်မတ်​ရ​တတ်တယ်။ (ဂလာတိ ၆:၁ ကို ဖတ်ပါ။) ခြေလှမ်း​မှား​သူ​ဆိုတာ “အမှား​ကြီးကြီးမားမား မလုပ်​သေး​ပေမဲ့ လမ်းမှား​ကို ဦးတည်​နေ​သူ” ကို ဆိုလိုတယ်လို့ အဲဒီ​ကျမ်းပိုဒ်​အတွက် လေ့လာမှု​မှတ်စု​မှာ ဖော်ပြထားတယ်။ သူ ထာဝရ​အသက်​လမ်းမှာ ဆက်ရှိနေအောင် ကူညီပေးဖို့​ဟာ အကြီးအကဲတွေရဲ့ ပန်းတိုင် ဖြစ်တယ်။ (ယာ. ၅:၁၉၊ ၂၀) ဒါပေမဲ့ ပေးတဲ့ အကြံဉာဏ် ထိရောက်ဖို့​ဆိုရင် သူ တကယ် ခြေလှမ်း​မှား​နေတာ ဟုတ်​မဟုတ် အကြီးအကဲတွေ​ဘက်​က သေချာ​ရမယ်။ ယောက်တိုင်း ကိုယ့်​အမှားအမှန်​သိစိတ်ကို အခြေခံပြီး ဆုံးဖြတ်ချက်တွေ ချဖို့ ယေဟောဝါ ခွင့်ပြုထားတယ်။ ဒါကြောင့် ကိုယ်​နဲ့ ဆုံးဖြတ်​ပုံ​ချင်း မတူတာ​နဲ့​ပဲ ခြေလှမ်း​မှားနေတယ်လို့ ပြောလို့​မရမှန်း အကြီးအကဲတွေ အသိအမှတ်​ပြုကြတယ်။ (ရော. ၁၄:၁-၄) ဒါပေမဲ့ ခြေလှမ်း​မှား​နေတာ သေချာ​ရင် အကြီးအကဲတွေ ဘယ်လို အစပြုပြီး အကြံ​ပေး​တည့်မတ်​နိုင်သလဲ။

^၁၀ တောင်းဆို​မခံရ​ဘဲ အကြီးအကဲတွေ အကြံ​ပေး​တည့်မတ်​ရတာ လွယ်တော့ မလွယ်ဘူး။ ဘာကြောင့်လဲ။ တမန်တော် ပေါလု ပြောသလို​ပဲ ခြေလှမ်း​မှား​သူဟာ ကိုယ်​မှား​လို့ မှား​နေမှန်း သတိ​မထား​မိ​တဲ့အတွက် အကြီးအကဲ ဘာကြောင့် အကြံ​ပေး​တည့်မတ်​နေမှန်း နားမလည်ဘဲ ဖြစ်နေနိုင်တယ်။ ဒါကြောင့် အကြံ​ပေး​တည့်မတ်​တာကို သူ လက်ခံရ​လွယ်အောင် အကြီးအကဲတွေ အရင်ဆုံး လုပ်​သင့်​တယ်။

^၁၁ တောင်းဆို​မခံရ​ဘဲ အကြံ​ပေး​တည့်မတ်​တာဟာ မြေမာ​မှာ အပင်​စိုက်တာ​နဲ့ တူတယ်။ လယ်သမား​က မျိုးစေ့​မချခင် မြေ​ကို အရင်ဆုံး ထွန်ယက်​တူးဆွ​တယ်။ မြေသား​ပျော့သွား​မှ မျိုးစေ့​ချတယ်။ အဲဒီနောက် မျိုးစေ့​ကနေ အပင်ပေါက်​လာဖို့ ရေလောင်းတယ်။ အဲဒီလိုပဲ တောင်းဆို​မခံရ​ဘဲ အကြီးအကဲ​တစ်ယောက် အကြံ​ပေး​တည့်မတ်ဖို့ လိုလာတဲ့​အခါ ခြေလှမ်း​မှား​သူရဲ့ နှလုံးသား​မြေ ပျော့ပျောင်း​လာအောင် အရင်ဆုံး လုပ်တယ်။ ဥပမာ၊ သင့်တော်တဲ့​အချိန်ကို ရွေးချယ်တယ်။ သူ့အတွက် စိုးရိမ်မကင်း​ဖြစ်လို့ ပြော​မှန်း သိစေတယ်။ အကြံ​ပေး​တည့်မတ်​သူဟာ မေတ္တာရှိ​တယ်၊ ကြင်နာတယ်​ဆိုတဲ့ နာမည်ကောင်း ရှိ​ထား​ရင် သူ ပြောတာကို တစ်ဖက်သား အလွယ်တကူ လက်ခံနိုင်တယ်။

^၁၂ စကားပြော​ရင်း​နဲ့​လည်း ခြေလှမ်း​မှား​သူရဲ့ နှလုံးသား​မြေ ပျော့ပျောင်း​လာအောင် အကြီးအကဲ ဘယ်လို ဆက်​လုပ်နိုင်သလဲ။ လူတိုင်း အမှား​မကင်း​ကြောင်း၊ တစ်ချိန်​မဟုတ် တစ်ချိန် အကြံ​ပေး​တည့်မတ်​ခံရနိုင်​ကြောင်း ပြော​နိုင်တယ်။ (ရော. ၃:၂၃) သူ ဘယ်လို ခြေလှမ်း​မှား​သွားတယ်​ဆိုတာ ကျမ်းပိုဒ်တွေ သုံးပြီး လေသံ​မမာ​ဘဲ၊ အထက်စီး​မဆန်​ဘဲ ရှင်းပြနိုင်တယ်။ ခြေလှမ်း​မှား​သွား​ကြောင်း သူ အသိအမှတ်​ပြု​ပြီ​ဆိုမှ ဘာ​အပြောင်းအလဲတွေ လုပ်ရမယ်​ဆိုတာ ရှင်းရှင်း​လင်းလင်း ပြောပြနိုင်တယ်။ ဒါက “မျိုးစေ့​ချ​တာ” နဲ့​တူတယ်။ အဲဒီနောက် သူ့​ကောင်းကွက်တွေ​ကို စိတ်ရင်းမှန်နဲ့ ချီးမွမ်း​ပေးနိုင်တယ်။ သူနဲ့အတူ ဆုတောင်းနိုင်တယ်။ ဒါက မျိုးစေ့​ကနေ အပင်​ပေါက်​လာအောင် “ရေလောင်း​ပေးတာ” ပဲ။—ယာ. ၅:၁၅။

^၁၃ တစ်ခါတလေ​ကျတော့ ပြောလိုက်တာ​တစ်ခု နားလည်​သွားတာ​တစ်ခု ဖြစ်တတ်တယ်။ အဲဒီလို​မဖြစ်အောင် အကြီးအကဲတွေ ဘာလုပ်နိုင်သလဲ။ ဘာလုပ်ဖို့ အကြံ​ပေး​နေသလဲ​ဆိုတာ တစ်ဖက်သား တကယ် နားလည်​မလည် သိဖို့ မေးခွန်းတွေ ပါးပါး​နပ်နပ် မေးနိုင်တယ်။—ဒေ. ၁၂:၁၁။

သင့်တော်တဲ့​အချိန်မှာ သင့်တော်တဲ့​နည်းနဲ့ အကြံ​ပေးပါ

^၁၄ ကျွန်တော်တို့​အားလုံး မစုံလင်လို့ အချင်းချင်း စိတ်ထိခိုက်အောင် ပြောမိ​လုပ်မိ​တတ်​ကြတယ်။ (ကော. ၃:၁၃) ဒေါသ​ထွက်တဲ့​အထိ​တောင် ဖြစ်သွား​တတ်တယ်​လို့ ကျမ်းစာ ဆိုတယ်။ (ဧ. ၄:၂၆) ဒါပေမဲ့ “လူတစ်ယောက်ရဲ့ ဒေါသ​က ဘုရားသခင်ရဲ့ ဖြောင့်မတ်ခြင်းကို မဖြစ်ပေါ်စေဘူး။” (ယာ. ၁:၂၀) ဒါကြောင့် ဒေါသ​ထွက်​နေတုန်း အကြံ​မပေးသင့်ဘူး။ ဒေါသ​ထွက်​နေတုန်း အကြံ​ပေး​လိုက်ရင် စေတနာ​က ဝေဒနာ ဖြစ်သွား​ဖို့​များတယ်။ ဒေါသ​ထွက်အောင် လုပ်​သူကို ကိုယ် ဘယ်လို ခံစားနေရတယ်၊ တွေး​နေတယ်​ဆိုတာ ဘယ်တော့မှ မပြောရဘူး​လို့ မဆိုလိုပါဘူး။ စိတ်​အေး​သွား​မှ ပြောတာ ပို​ထိရောက်နိုင်တယ်​လို့ ဆိုလိုတာ​ပါ။ ယောဘကို အကြံဉာဏ်ကောင်း​တွေ ပေးခဲ့တဲ့ မိတ်ဆွေ ဧလိဟု​အကြောင်း စဉ်းစားကြည့်ပါ။

^၁၅ မိတ်ဆွေ​အတုအယောင်​တွေ မဟုတ်မမှန် စွပ်စွဲ​လို့ ယောဘ မခံမရပ်​နိုင် ဖြစ်ပြီး ခုခံ​ပြောဆိုတာကို ဧလိဟု စိတ်ရှည်ရှည် နားထောင်တယ်။ ယောဘကို စာနာ​တယ်။ ဒါပေမဲ့ နားထောင်​ရင်း တအား​ဒေါသ​ထွက်လာတယ်။ ယေဟောဝါ​ထက် ပို​ဖြောင့်မှန်တယ်​ဆိုတာ ပြဖို့ ယောဘ ကြိုးစား​နေ​လို့၊ ကိုယ့်ကိုယ်ကိုယ် အရမ်း​အာရုံစိုက်​နေလို့ပဲ။ ဧလိဟု ဒေါသ​ထွက်​ပေမဲ့ မိမိ စကားပြော​ရမယ့်​အလှည့် စောင့်​ပြီးမှ ယောဘကို ကြင်ကြင်​နာနာ၊ လေးလေး​စားစား အကြံပေးတယ်။ (ယောဘ ၃၂:၂။ ၃၃:၁-၇) သင့်တော်တဲ့​အချိန်မှာ သင့်တော်တဲ့​နည်းနဲ့ အကြံ​ပေးတာ အကောင်းဆုံး ဖြစ်တယ်လို့ ပြောတဲ့​အခါ စိတ်​အေး​သွား​မှ လေးလေး​စားစား၊ မေတ္တာနဲ့ အကြံ​ပေးတာကို ဆိုလိုမှန်း ဧလိဟု​အဖြစ်​ကနေ သင်ယူ​ရတယ်။—ဒေ. ၃:၁၊ ၇။

ဆက်ပြီး အကြံဉာဏ် တောင်းခံပါ၊ အကြံဉာဏ် ပေးပါ

^၁၆ ယေဟောဝါ “မပြတ်​ကြည့်ရှု​ပြီး အကြံဉာဏ် ပေးမယ်” လို့ ဒီဆောင်းပါးရဲ့ အဓိက​ကျမ်းချက်မှာ ဖော်ပြထားတယ်။ (ဆာလံ ၃၂:၈ ကို ဖတ်ပါ။) ကျွန်တော်တို့ကို တောက်လျှောက် ကူညီပေးမယ်​ဆိုတဲ့ သဘောပါပဲ။ ယေဟောဝါက အကြံဉာဏ် ပေးရုံ​ပေးတာ မဟုတ်ဘဲ အကြံဉာဏ်ကို လိုက်နာနိုင်​ဖို့ ကူညီပေးတယ်။ သိပ်ကောင်းတဲ့ စံနမူနာ​ပါပဲ။ ကျွန်တော်တို့လည်း တခြားသူတွေကို အကြံ​ပေး​ခွင့် ရတဲ့​အခါ သူတို့ ဆုံးဖြတ်ချက်ကောင်း ချနိုင်အောင် တတ်နိုင်တဲ့​အပိုင်း​ကနေ ဆက်​ကူညီပေးခြင်း​အားဖြင့် ယေဟောဝါကို အတုယူနိုင်တယ်။

^၁၇ အကြံဉာဏ်ကောင်း​တွေ ပေးဖို့၊ တောင်းခံဖို့ အခု​အချိန်မှာ အရင်ကထက် ပို​လိုအပ်​လာတယ်။ (၂ တိ. ၃:၁) ကျမ်းစာကို အခြေခံပြီး သတ်သတ်မှတ်မှတ် အကြံ​ပေး​တတ်တဲ့ အကြီးအကဲတွေဟာ “ရေ​မရှိတဲ့​မြေမှာ စီးဆင်း​နေတဲ့ စမ်းချောင်းတွေလို” ကျွန်တော်တို့ကို လန်းဆန်းစေ​တယ်။ (ဟေရှာယ ၃၂:၁၊ ၂ ကို ဖတ်ပါ။) ကျွန်တော်တို့ ဘာ​ကြားချင်​သလဲ သိပေမဲ့ ကြားဖို့ လိုနေတဲ့ အကြံဉာဏ်​မျိုး ပေးတဲ့ မိတ်ဆွေတွေ ရှိတာ ကျေးဇူးတင်စရာပါပဲ။ သူတို့ရဲ့ အကြံ​ပေး​စကားဟာ “ငွေ​လင်ပန်း​ထဲက ရွှေ​ပန်းသီး​တွေ​နဲ့ တူတယ်။” (ပညာ. ၂၅:၁၁) အကြံဉာဏ်ကောင်း​တွေ ဘယ်လို ပေးရမယ်၊ တောင်းခံရမယ်​ဆိုတာ ကျွန်တော်တို့​အားလုံး ဆက်သင်ယူနေကြရအောင်။