အကြံဉာဏ် ဘယ်လို တောင်းသင့်သလဲ

ကျွန်တော်တို့​အားလုံး ဆုံးဖြတ်ချက်ကောင်းတွေ ချချင်​ကြတယ်။ အစီအစဉ်တွေ အောင်မြင်ချင်​ကြတယ်။ ဆုံးဖြတ်ချက်ကောင်း ချပြီး အစီအစဉ်တွေ အောင်မြင်ဖို့​ဆိုရင် အကြံဉာဏ် တောင်းခံရမယ်​လို့ ကျမ်းစာ ဆိုတယ်။—ပညာအလိမ္မာ ၁၃:၁၀။ ၁၅:၂၂ ကို ဖတ်ပါ။

^၂ ကျွန်တော်တို့ကို အကောင်းဆုံး အကြံဉာဏ် ပေးနိုင်သူ​ကတော့ အဖ​ယေဟောဝါ​ပါပဲ။ “မင်းကို ငါ . . . မပြတ်​ကြည့်ရှု​ပြီး အကြံဉာဏ် ပေးမယ်” လို့ ယေဟောဝါ ကတိ​ပေးထားတယ်။ (ဆာ. ၃၂:၈) ဒီကျမ်းပိုဒ်​အရ ယေဟောဝါက အကြံဉာဏ် ပေးရုံ​ပေးတာ မဟုတ်ဘဲ ကျွန်တော်တို့ကို စိတ်ဝင်တစား ကြည့်ရှု​တယ်။ မိမိ​ပေးတဲ့ အကြံဉာဏ်ကို လိုက်နာနိုင်​ဖို့ ကူညီပေးတယ်။

^၃ (၁) အကြံ​ပေးခံရတဲ့​အခါ အကျိုး​ရဖို့ ဘာအရည်အသွေးတွေ ရှိရမလဲ။ (၂) ဘယ်သူတွေက အကြံဉာဏ်ကောင်း ပေးနိုင်သလဲ။ (၃) ကိုယ့်​အတွေးအမြင်ကိုပဲ ဆုပ်ကိုင်​မထား​ကြောင်း ဘယ်လို ပြနိုင်သလဲ။ (၄) ကိုယ့်အတွက် တခြားသူတွေကို ဘာကြောင့် မဆုံးဖြတ်ခိုင်း​သင့်​သလဲ။ ဒီ​မေးခွန်း​လေးခုကို ဒီဆောင်းပါးမှာ သုံးသပ်​သွားပါမယ်။

ဘာအရည်အသွေးတွေ ရှိရမလဲ

^၄ အကြံ​ပေးခံရတဲ့​အခါ အကျိုး​ရဖို့ နှိမ့်ချမှု၊ ကျိုးနွံမှု ရှိရမယ်။ ကိုယ် တစ်ခါမှ မကြုံဖူး​တဲ့ အခြေအနေမှာ ဆုံးဖြတ်ချက်ကောင်း ချနိုင်ဖို့​ဆိုရင် တခြားသူတွေရဲ့ အကူအညီ လိုအပ်တယ်​ဆိုတာ အသိအမှတ်​ပြု​ရမယ်။ ကျွန်တော်တို့ မသိတာ​တွေ ရှိတယ်​ဆိုတာလည်း အသိအမှတ်​ပြု​ရမယ်။ ကျွန်တော်တို့မှာ နှိမ့်ချမှု၊ ကျိုးနွံမှု မရှိရင် ယေဟောဝါ ကူညီပေးလို့ မရဘဲ ဖြစ်သွားမယ်။ ကျမ်းစာ​ဖတ်ရင်း သိလာတဲ့ အကြံဉာဏ်တွေ​ဟာ ပိန်းကြာရွက်​ပေါ် ရေ​မတင်​သလို ဖြစ်သွားမယ်။ (မိ. ၆:၈။ ၁ ပေ. ၅:၅) နှိမ့်ချမှု၊ ကျိုးနွံမှု ရှိရင်တော့ ကျမ်းစာ​အကြံဉာဏ်တွေ စိတ်နှလုံးထဲ မြန်မြန်ဆန်ဆန် စိမ့်ဝင်​ပြီး လိုက်နာနိုင်​မယ်။

^၅ ဘုရင်​ဒါဝိဒ်​ဆီကနေ ဘာသင်ယူနိုင်​သလဲ သုံးသပ်ကြည့်ပါ။ ဘုရင် မဖြစ်ခင် နှစ်များစွာ​ကတည်းက ဂီတ​ကျွမ်းကျင်သူ​အဖြစ် နာမည်​ရထားတယ်။ ဘုရင်​ဆီ အခစား​ဝင်ပြီး​တော့​တောင် စောင်းတီး​ပေးရတယ်။ (၁ ရှ. ၁၆:၁၈၊ ၁၉) နောက်တက်မယ့် ဘုရင်​အဖြစ် ဘိသိက်​ပေးခံရပြီး​နောက် ယေဟောဝါဆီက သန့်ရှင်းသော စွမ်းအားတော် ရပြီး ခွန်အား​ရှိလာ​တယ်။ (၁ ရှ. ၁၆:၁၁-၁၃) ဖိလိတိ လူထွားကြီး ဂေါလျတ် အပါအဝင် ရန်သူ​အများကြီးကို ချေမှုန်း​နိုင်​လို့ ဂုဏ်ပြု​ချီးမွမ်း​ခံရတယ်။ (၁ ရှ. ၁၇:၃၇၊ ၅၀။ ၁၈:၇) ဒီလို​အောင်မြင်မှုတွေ​ကြောင့် ဒါဝိဒ် မာနကြီး​ချင်ရင် ကြီးမိ​နိုင်တယ်။ တခြားသူတွေ​ဆီက ဘာ​အကြံဉာဏ်​မှ တောင်း​စရာ မလိုဘူးလို့ ထင်မိ​နိုင်တယ်။ ဒါပေမဲ့ ဒါဝိဒ် မာန​မကြီးဘူး။

^၆ ဒါဝိဒ် ဘုရင်​ဖြစ်လာ​ပြီးနောက် အတိုင်ပင်ခံ​တွေ ရွေးချယ်တယ်။ (၁ ရာ. ၂၇:၃၂-၃၄) ဒါ အံ့ဩစရာ​တော့ မဟုတ်ပါဘူး။ ဒါဝိဒ်ဟာ ဘုရင် မဖြစ်ခင်​ကတည်းက တခြားသူတွေ အကြံဉာဏ်ကောင်း ပေးတဲ့​အခါ လိုလို​လားလား နားထောင်​တတ်​သူ ဖြစ်လို့ပဲ။ အမျိုးသားတွေရဲ့ အကြံဉာဏ်ကို​သာမက အမျိုးသမီးတွေရဲ့ အကြံဉာဏ်ကိုလည်း နားထောင်တယ်။ ဥပမာ၊ အဘိဂဲလ​လို့ ခေါ်တဲ့ အမျိုးသမီးရဲ့ အကြံဉာဏ်ကို နားထောင်​ခဲ့တယ်။ အဘိဂဲလရဲ့ ခင်ပွန်း နာဗလဟာ မောက်မာ​တယ်၊ ကျေးဇူးကန်း​တယ်၊ အတ္တကြီး​တယ်။ ဒါဝိဒ်က​တော့ နှိမ့်ချမှု ရှိလို့ အဘိဂဲလရဲ့ အကြံပေး​စကားကို နားထောင်တယ်။ ဒါကြောင့်​လည်း လူသတ်​မိ​မယ့်​အဖြစ်ကို ရှောင်နိုင်​တာ။—၁ ရှ. ၂၅:၂၊ ၃၊ ၂၁-၂၅၊ ၃၂-၃၄။

^၇ ဒါဝိဒ်​ဆီကနေ ဘာသင်ယူနိုင်သလဲ။ ကျွန်တော်တို့​ဆီ​မှာ စွမ်းရည်​တချို့ ရှိနိုင်တယ်။ ဒါမှမဟုတ် အခွင့်​အာဏာ အတော်အတန် ရှိနိုင်တယ်။ ဒါပေမဲ့ အကုန်သိ အကုန်တတ်တယ်၊ တခြားသူတွေ​ဆီ​က အကြံဉာဏ် မလိုအပ်ဘူးလို့ ဘယ်တော့မှ မတွေး​သင့်​ဘူး။ အကြံ​ပေးသူ​ဟာ ဘယ်သူပဲ ဖြစ်ပါစေ အကြံဉာဏ်ကောင်း​ဆိုရင် ဒါဝိဒ်လိုပဲ လိုလို​လားလား နားထောင်သင့်​တယ်။ (ဒေသနာ ၄:၁၃ ကို ဖတ်ပါ။) ဒါဆိုရင် ကိုယ်တိုင်နဲ့ တခြားသူတွေကို ထိခိုက်စေနိုင်တဲ့ အမှားမျိုး ရှောင်နိုင်မယ်။

ဘယ်သူတွေက အကြံဉာဏ်ကောင်း ပေးနိုင်သလဲ

^၈ ဒါဝိဒ်​ဆီ​က ရတဲ့ သင်ခန်းစာ နောက်တစ်ခုကို သုံးသပ်ကြည့်ပါ။ ဘယ်သူတွေဆီ​ကနေ ဒါဝိဒ် အကြံဉာဏ် တောင်း​လေ့ရှိ​သလဲ။ ယေဟောဝါနဲ့ ဆက်ဆံရေးကောင်း ရှိတဲ့​အပြင် မိမိ​ကြုံနေတဲ့ အခြေအနေကို ကောင်းကောင်း​သိ​သူ​တွေ​ဆီကနေ အကြံဉာဏ် တောင်း​လေ့ရှိတယ်။ ဥပမာ၊ မိမိကို ဘုရင်​ရှောလု အမျက်ပြေ​မပြေ သိချင်တဲ့​အခါ ရှောလုရဲ့​သား ယောနသန်​ကို အကြံဉာဏ် တောင်းတယ်။ ယောနသန်​ကို​မှ ဘာကြောင့် အကြံဉာဏ် တောင်း​သလဲ။ ယောနသန်ဟာ ယေဟောဝါနဲ့ ဆက်ဆံရေးကောင်း ရှိတဲ့​အပြင် ရှောလု​အကြောင်း ကောင်းကောင်း​သိသူ ဖြစ်လို့ပဲ။ (၁ ရှ. ၂၀:၉-၁၃) ဒီကနေ ဘာသင်ယူနိုင်သလဲ။

^၉ ကျွန်တော်တို့လည်း အကြံဉာဏ် လိုအပ်တဲ့​အခါ ဘယ်သူတွေနဲ့ တိုင်ပင်​သင့်​သလဲ။ ယေဟောဝါနဲ့ ဆက်ဆံရေးကောင်း ရှိတဲ့​အပြင် ကိုယ် အကူအညီ လိုအပ်နေတဲ့ ကိစ္စနဲ့​ပတ်သက်ပြီး ကောင်းကောင်း​သိ​သူ​တွေ​နဲ့ တိုင်ပင်​ရမယ်။a (ပညာအလိမ္မာ ၁၃:၂၀ ကို ဖတ်ပါ။) ဥပမာ၊ ညီအစ်ကိုငယ်​တစ်ယောက် အိမ်ထောင်ဖက် ရှာ​နေတယ် ဆိုပါစို့။ ဘယ်သူတွေနဲ့ တိုင်ပင်​နိုင်သလဲ။ သူ တိုင်ပင်​တဲ့သူ​ဟာ အိမ်ထောင်သည် မဟုတ်ပေမဲ့ ကျမ်းစာမူတွေကို အခြေခံပြီး အကြံ​ပေးနိုင်သူ​ဆိုရင်တော့ အကူအညီ ဖြစ်နိုင်ပါတယ်။ ဒါပေမဲ့ သူ့​အကြောင်း ကောင်းကောင်း​သိတဲ့၊ ဘုရားရေးရာမှာ ရင့်ကျက်တဲ့၊ အိမ်ထောင်​သာယာတဲ့ မောင်နှံ​နဲ့ တိုင်ပင်​မယ်​ဆိုရင် ပို​လက်တွေ့​ကျတဲ့ သတ်သတ်​မှတ်မှတ် အကြံဉာဏ်တွေ ရလာနိုင်တယ်။

^၁၀ ကျွန်တော်တို့မှာ ရှိ​ရမယ့် အရည်အသွေး​နှစ်ခု​က ဘာလဲ၊ ဘယ်သူတွေ အကြံဉာဏ်ကောင်း ပေးနိုင်သလဲ​ဆိုတာ ဆွေးနွေးခဲ့ကြပြီ။ ကိုယ့်​အတွေးအမြင်​ကို ဘာကြောင့် ဆုပ်ကိုင်​မထားသင့်သလဲ၊ ကိုယ့်​အတွက် တခြားသူတွေကို ဆုံးဖြတ်​ခိုင်း​သင့်​သလား​ဆိုတာ ဆက်​ဆွေးနွေး​ကြရအောင်။

ကိုယ့်​အတွေးအမြင်​ကို ဆုပ်ကိုင်​မထား​ကြောင်း ဘယ်လို ပြနိုင်သလဲ

^၁၁ တစ်ခါတလေ လူတစ်ယောက် အကြံဉာဏ် တောင်းနေ​ပုံ​ပေါက်ပေမဲ့ တကယ်တော့ ဘာလုပ်မယ်​ဆိုတာ ဆုံးဖြတ်ထား​ပြီး​သား။ သူ့​ဆုံးဖြတ်ချက်ကို တခြားသူတွေ သဘောတူ​မတူ သိချင်လို့​သာ လိုက်​မေးတာ။ အကြံဉာဏ် တကယ် ရှာဖွေ​နေတာ မဟုတ်ဘူး။ အဲဒီလို​လူတွေဟာ ဘုရင်​ရောဗောင်​အဖြစ်​ကနေ သင်ခန်းစာ ယူ​သင့်​တယ်။

^၁၂ ခမည်းတော် ရှောလမုန် ကွယ်လွန်ပြီးနောက် ရောဗောင်​ဟာ အစ္စရေး​ဘုရင် ဖြစ်လာတယ်။ စည်ပင်​ဖွံ့ဖြိုး​နေတဲ့ တိုင်းပြည်ကို ရောဗောင် အုပ်ချုပ်​ရတာ။ ဒါပေမဲ့ ရှောလမုန်​လက်ထက်မှာ ပင်ပင်​ပန်းပန်း အမှုထမ်းခဲ့​ရတယ်လို့ ပြည်သူ​ပြည်သား​တချို့ ထင်​နေကြတယ်။ ဒါကြောင့် သက်သာအောင် လျှော့ပေါ့​ပေးဖို့ ရောဗောင်​ဆီ လာ​တောင်းဆိုကြတယ်။ ဆုံးဖြတ်ဖို့ အချိန်ပေးပါ​လို့ သူတို့ကို ရောဗောင် ပြောလိုက်တယ်။ အဲဒီနောက် ခမည်းတော်​ဆီ ခစား​ခဲ့​တဲ့ အသက်ကြီးသူတွေ​နဲ့ တိုင်ပင်​တယ်။ ဒီလို​တိုင်ပင်တာ သိပ်ကောင်းတယ်။ (၁ ဘု. ၁၂:၂-၇) ဒါပေမဲ့ အသက်ကြီးသူတွေ​ရဲ့ အကြံပေးချက်ကို ရောဗောင် လက်မခံဘူး။ ဘာကြောင့်လဲ။ ဘာလုပ်မယ်ဆိုတာ ဆုံးဖြတ်ထား​ပြီး​သား ဖြစ်ပုံရတယ်။ သူ့​ဆုံးဖြတ်ချက်ကို အသက်ကြီးသူတွေ သဘောတူ​မတူ သိချင်လို့​သာ တိုင်ပင်​ကြည့်​တာ ဖြစ်နိုင်တယ်။ ဒါနဲ့ ငယ်ပေါင်း​ကြီးဖော် လူငယ်တွေကို တိုင်ပင်​တော့ သူတို့ ပေးတဲ့ အကြံ​က သူ ဆုံးဖြတ်ထား​တာ​နဲ့ တူ​နေ​လို့ သဘောကျသွားတယ်။ (၁ ဘု. ၁၂:၈-၁၄) ငယ်ပေါင်း​ကြီးဖော်တွေ အကြံ​ပေးတဲ့​အတိုင်း ပြည်သူ​ပြည်သားတွေကို ပြောလိုက်တယ်။ ဒီလိုနဲ့ နိုင်ငံ နှစ်ခြမ်း​ကွဲသွားပြီး နန်းသက်​တစ်လျှောက် တိုင်းပြည် မအေးချမ်း​တော့​ဘူး။—၁ ဘု. ၁၂:၁၆-၁၉။

^၁၃ ရောဗောင်​အဖြစ်​ကနေ ဘာသင်ယူနိုင်သလဲ။ အကြံဉာဏ် တောင်းတဲ့​အခါ ကိုယ့်​အတွေး​အမြင်​ကို ဆုပ်ကိုင်​မထားရဘူး။ ကိုယ့်​အတွေး​အမြင်​ကို ဆုပ်ကိုင်​ထား​မထား ဘယ်လို သိနိုင်သလဲ။ ‘အကြံဉာဏ် တောင်းတဲ့​အခါ ငါ ကြားချင်​တဲ့​စကား မဟုတ်တာ​နဲ့ ချက်ချင်း ငြင်းပယ်​တတ်​သလား’ လို့ ဆန်းစစ်​ကြည့်​နိုင်တယ်။

^၁၄ ညီအစ်ကို​တစ်ယောက် မက်လောက်​စရာ​အလုပ် ကမ်းလှမ်း​ခံရတယ် ဆိုပါစို့။ အလုပ် လက်မခံခင်​မှာ အကြီးအကဲ​တစ်ယောက်နဲ့ တိုင်ပင်​တယ်။ ဒီ​အလုပ်​လုပ်​ရင် မိသားစုနဲ့ ခွဲပြီး အပတ်နဲ့ချီ ခဏ​ခဏ ခရီးသွား​ရမယ့်​အကြောင်း အကြီးအကဲကို ပြောပြတယ်။ အိမ်ထောင်ဦးစီး​ရဲ့ အဓိက​တာဝန်ဟာ မိသားစုကို ဘုရားရေးရာပိုင်း ထောက်မပေးဖို့ ဖြစ်တယ်​ဆိုတဲ့ ကျမ်းစာမူကို အကြီးအကဲ သတိပေးတယ်။ (ဧ. ၆:၄။ ၁ တိ. ၅:၈) ဒါပေမဲ့ အကြီးအကဲ အကြံ​ပေးတာကို လက်မခံဘူး။ ‘အလုပ်​လက်ခံ​လိုက်’ ဆိုတဲ့ သူ ကြားချင်​နေတဲ့​စကား မကြားရ​မချင်း အသင်းတော်မှာ ရှိတဲ့သူ တစ်ယောက်​ပြီး တစ်ယောက်ကို လိုက်​မေးတယ်။ ဒီညီအစ်ကိုဟာ အကြံဉာဏ် တကယ် ရှာဖွေ​နေတာလား ဒါမှမဟုတ် သူ ဆုံးဖြတ်ထား​တာကို သဘောတူ​မယ့်​သူ ရှာဖွေ​နေတာလား။ စိတ်နှလုံး​ဟာ စဉ်းလဲ​တယ်​ဆိုတာ ကျွန်တော်တို့ သတိရရမယ်။ (ယေ. ၁၇:၉) တစ်ခါတလေ ကိုယ် မကြားချင်​ဆုံး အကြံဉာဏ်ဟာ အလိုအပ်ဆုံး အကြံဉာဏ် ဖြစ်နေနိုင်တယ်။

ကိုယ့်အတွက် တခြားသူတွေကို ဆုံးဖြတ်​ခိုင်း​သင့်​သလား

^၁၅ ကျွန်တော်တို့​အားလုံး ဆုံးဖြတ်ချက်တွေ ကိုယ်တိုင် ချ​ရမယ့်​တာဝန် ရှိတယ်။ (ဂလ. ၆:၄၊ ၅) ဆုံးဖြတ်ချက် မချခင် ကျမ်းစာ​အကြံဉာဏ်၊ ရင့်ကျက်တဲ့ ခရစ်ယာန်တွေရဲ့ အကြံဉာဏ်ကို ရှာဖွေဖို့ သိပ်အရေးကြီးတယ်​ဆိုတာ ဆွေးနွေးခဲ့ကြပြီ။ ဒါပေမဲ့ ကိုယ့်​အတွက် တခြားသူတွေကို မဆုံးဖြတ်​ခိုင်း​မိ​ဖို့ သတိထားရမယ်။ တချို့က “ညီအစ်ကို/မ​သာ ကျွန်တော်/မ​နေရာမှာ​ဆိုရင် ဘာလုပ်မလဲ” ဆိုပြီး ကိုယ် လေးစား​အားကိုးရသူ​ကို မေးတတ်ကြ​တယ်။ ဒါက တခြားသူကို တိုက်ရိုက် ဆုံးဖြတ်​ခိုင်း​တာ ဖြစ်တယ်။ တချို့ကျတော့ အခြေအနေကို ကိုယ်တိုင် မသုံးသပ်​ဘဲ တခြားသူ ဆုံးဖြတ်​သလို လိုက်​ဆုံးဖြတ်ကြတယ်။ ဒါက တခြားသူကို သွယ်ဝိုက်​ပြီး ဆုံးဖြတ်​ခိုင်းတာနဲ့ တူတယ်။

^၁၆ ပထမရာစု ကောရိန္သု​အသင်းတော်က ခရစ်ယာန်တွေ​အကြောင်း စဉ်းစားကြည့်ပါ။ ရုပ်တု​ရှေ့ ပူဇော်​ထားတာ ဖြစ်ကောင်း​ဖြစ်နိုင်တဲ့ အသားကို စားသင့်​မစားသင့် သူတို့ ဆုံးဖြတ်ဖို့ လို​လာတယ်။ “ရုပ်တုဟာ အချည်းနှီး​ဖြစ်မှန်း၊ စစ်မှန်တဲ့ ဘုရားသခင်က​လွဲလို့ တခြား​ဘုရား မရှိမှန်း ကျွန်တော်တို့ သိတယ်” လို့ သူတို့ကို ပေါလု ပြောတယ်။ (၁ ကော. ၈:၄) ဒါကြောင့် ရုပ်တု​ရှေ့ ပူဇော်​ထားတာ ဖြစ်ကောင်း​ဖြစ်နိုင်တဲ့ အသားကို အသားဈေး​မှာ ရောင်းတဲ့​အခါ စားလို့​ရတယ်လို့ ခရစ်ယာန်​တချို့ ဆုံးဖြတ်ကြတယ်။ တချို့ကျတော့ အမှားအမှန်​သိစိတ် အနှောင့်​အယှက်​ဖြစ်လို့ မစားဖို့ ဆုံးဖြတ်ကြတယ်။ (၁ ကောရိန္သု ၈:၇။ ၁၀:၂၅၊ ၂၆ ကို ဖတ်ပါ။) ဒါ ကိုယ်တိုင် ဆုံးဖြတ်​ရမယ့်​ကိစ္စ ဖြစ်တယ်။ တခြားသူတွေ​အတွက် ဆုံးဖြတ်​ပေးဖို့ သူတို့ကို ပေါလု အကြံ​မပေး​သလို တခြားသူတွေ ဆုံးဖြတ်​သလို လိုက်​ဆုံးဖြတ်ဖို့​လည်း အကြံ​မပေးဘူး။ တစ်ယောက်ချင်းစီ​ဟာ “ကိုယ့်လုပ်ရပ်​နဲ့ပတ်သက်ပြီး” ယေဟောဝါဆီ ဖြေရှင်းချက် ပေး​ကြရမယ်။—ရော. ၁၄:၁၀-၁၂။

^၁၇ အလားတူ အခြေအနေမျိုး ဒီနေ့​အချိန်မှာ ဘယ်လို ကြုံ​လာနိုင်သလဲ။ သွေး​အပိုင်းအစ​တွေ​နဲ့​ပတ်သက်တဲ့ ကိစ္စကို စဉ်းစားကြည့်ပါ။ သွေး​အပိုင်းအစတွေကို လက်ခံမယ်၊ လက်မခံဘူး​ဆိုတာ ကျမ်းစာနဲ့ လေ့ကျင့်​ထားတဲ့ အမှားအမှန်​သိစိတ်ကို အခြေခံပြီး ခရစ်ယာန်​တစ်ယောက်ချင်းစီ ဆုံးဖြတ်ရမယ်။b အပြည့်အဝ နားလည်ဖို့ မလွယ်တဲ့​ကိစ္စ​ဆိုတာ မှန်ပါတယ်။ ဒါပေမဲ့ ကိုယ်တိုင် ဆုံးဖြတ်ရမယ်။ (ရော. ၁၄:၄) တခြားသူ ဆုံးဖြတ်​သလို လိုက်​ဆုံးဖြတ်ရင် ကိုယ့်​အမှားအမှန်​သိစိတ် အားနည်း​လာမယ်။ ကျမ်းစာကို အခြေခံပြီး ကိုယ်တိုင် ဆုံးဖြတ်​မှ အမှားအမှန်​သိစိတ်ကို လေ့ကျင့်ပေး​ရာ​ရောက်မယ်။ (ဟီ. ၅:၁၄) ဒါဆိုရင် ဘယ်အချိန်မှာ ရင့်ကျက်တဲ့ ခရစ်ယာန်တွေ​ဆီ​က အကြံဉာဏ် တောင်း​သင့်သလဲ။ ကိုယ့်​ဘာသာ ရှာဖွေ​လေ့လာပြီး​ပေမဲ့ ကိုယ့်​အခြေအနေနဲ့ ကျမ်းစာမူတွေ ဘယ်လို သက်ဆိုင်ကြောင်း နားလည်ဖို့ အကူအညီ လို​နေတုန်းပဲ​ဆိုရင် အကြံဉာဏ် တောင်းနိုင်ပါတယ်။

အကြံဉာဏ် ဆက်​တောင်းခံပါ

^၁၈ ဆုံးဖြတ်ချက်တွေ ကိုယ်တိုင် ချ​ခွင့်​ပေးခြင်း​အားဖြင့် ကျွန်တော်တို့ကို ယေဟောဝါ စိတ်ချကြောင်း ပြတယ်။ ဆုံးဖြတ်ချက် ချရာမှာ အကူအညီ ဖြစ်စေဖို့ ကျမ်းစာ ပေးထားတယ်။ ကျမ်းစာမူတွေကို ကျိုးကြောင်းဆင်ခြင်​တတ်​အောင် ကူညီပေးနိုင်တဲ့ ရင့်ကျက်တဲ့ မိတ်ဆွေတွေ ပေးထားတယ်။ ယေဟောဝါဟာ ဖခင်​ဝတ္တရား တကယ် ကျေပွန်ပါတယ်။ (ပညာ. ၃:၂၁-၂၃) ကျွန်တော်တို့ ဘယ်လို ကျေးဇူး​တုံ့ပြန်​နိုင်သလဲ။

^၁၉ သားသမီးတွေ ရင့်ကျက်လာတာ၊ တွေးခေါ်​တတ်လာ​တာ၊ အမြော်အမြင်​ရှိလာတာ မြင်တဲ့​အခါ မိဘတွေ သိပ်ဝမ်းသာတယ်။ အဲဒီလိုပဲ ကျွန်တော်တို့ ဘုရားရေးရာမှာ ပိုရင့်ကျက်လာ​တာ၊ တခြားသူတွေ​ဆီ​က အကြံဉာဏ် တောင်းတာ၊ ဆုံးဖြတ်ချက်ကောင်းတွေ ချ​တာ မြင်တဲ့​အခါ အဖ​ယေဟောဝါ စိတ်​ရွှင်လန်းတယ်။