SIN DING THU 15
Jesuh Kua A Hiam?
Jesuh pen mihing tangthu-ah a minthangpen khat ahi hi. Jesuh cih min pen mi tampi in a theih uh hang, ama thu tam theih khol lo uh hi. Jesuh tawh kisai-in san dan a tuamtuam nei uh hi. Lai Siangtho in Jesuh’ thu bang gen a hiam?
1. Jesuh kua a hiam?
Jesuh pen vantunga om a vanglian kha mi khat ahi hi. Jehovah in bangmah a bawl ma-in Jesuh piangsak hi. Tua ahih manin Pasian in “a kipiangsak khempeuh lakah tapa upa pen,” ci-in sam hi. (Kolose 1:15) Jehovah in a piansak ngiat ahih manin, amah bek Pasian’ “Tapa neihsun,” ci-in Lai Siangtho in gen hi. (Johan 3:16) Jehovah in adang na khempeuh a piansak ciangin Jesuh in a Pa Jehovah huh hi. (Paunak 8:30 sim in.) Jesuh in Jehovah tawh kizopna hoih nei den hi. “Thu,” ahih kei leh Pasian tanga thugenpa-in cihtakna tawh na sem a, Pasian’ thu le a lamlahnate gensawn hi.—Johan 1:14.
2. Leitungah Jesuh bang hang hong pai a hiam?
A beisa kum 2,000 kiim lai-in, Jehovah in a kha siangtho zangin vantunga om Jesuh’ nuntakna pen nungak siangtho Mary’ gil sungah tuah hi. Tua hangin Jesuh pen mihing khatin hong piang hi. (Luka 1:34, 35 sim in.) Jesuh in kamciam Messiah, ahih kei leh Khrih hi-in mihingte a honkhia dingin leitungah hong pai hi.a Messiah tawh kisai genkholhna khempeuh Jesuh tungah tangtung hi. Tua in Jesuh pen “a nungta Pasian’ Tapa, Khrih” ahihlam kiciansak hi.—Matthai 16:16.
3. Tu’n Jesuh koi-ah om a hiam?
Jesuh a sih khit ciangin kha mi-in thokik a, vantungah kahto kik hi. Tua munah “Pasian in a lianpenin amah koih a, min lian dang khempeuh sangin a min lianzaw-in a koih hi.” (Filippi 2:9) Tu’n, Jesuh pen Jehovah khit ciang a thuneipen ahi hi.
ZON BEH INLA, MUH BEH IN
Jesuh kua hi takpi cih thu le ama thu kan ding a thupina a hang zon beh in.
4. Jesuh pen a Vanglianpen Pasian hi lo
Jesuh pen vantungah a vanglian kha mi khat ahih hang, a Pa le a Pasian ahi, Jehovah’ thu a manna thu Lai Siangtho in hong hilh hi. Bang hangin tua bangin gen thei ihi hiam? Jesuh le vanglianpen Pasian a kibat lohlam Lai Siangtho’ gen na theih nadingin VIDEO hong in.
A nuai-a Lai Siangtho munte in Jehovah le Jesuh a kibat lohlam hong theisak hi. Lai Siangtho munte sim in. Tua khit teh a nuai-a dotnate kikum un.
Luka 1:30-32 sim in.
Jesuh le “a Lianpen” ahi, Jehovah Pasian a kibat lohna vantungmi in koi bangin gen cian a hiam?
Matthai 3:16, 17 sim in.
Jesuh a kituiphum lai-in vantung pana aw in bang thu gen a hiam?
Kua’ aw hi dingin um na hiam?
Johan 14:28 sim in.
A kumham zaw le a thunei zaw pen in kua a hiam? Tapa maw, a pa?
Jesuh in Jehovah pen Pa, ci-in sam hi. Tua in bang hong theisak a hiam?
Johan 12:49 sim in.
Jesuh in amah le a Pa pen mi khat bek bangin a ngaihsun hiam? Nangh bangci ngaihsut na hiam?
5. Jesuh pen Messiah ahihlam a kiciatna
Mihingte a honkhia dinga Pasian’ teel Messiah ahihlam a hong theisak genkholhna tampi Lai Siangtho sungah om hi. Leitunga Jesuh a om lai-a a tangtung genkholhna pawlkhat na theih nadingin VIDEO hong in.
Hih Lai Siangtho genkholhnate sim inla, a nuai-a dotnate kikum un:
Messiah koi-ah suak ding cih na theih nadingin Mikah 5:2 sim in.b
Jesuh suahna in hih genkholhna thu a tangtungsak hiam?—Matthai 2:1.
Messiah’ sihna tawh kisai a neng a tawnga genkholhnate pen Late 34:20 le Zekhariah 12:10 ah sim in.
Hih genkholhnate a tangtung hiam?—Johan 19:33-37.
Hih genkholhnate Jesuh in tangtungsak thei dingin na um hiam?
Tua in Jesuh tawh kisai bang kiciansak a hiam?
6. Jesuh’ thu i sinna panin hamphatna i ngah hi
Lai Siangtho in Jesuh le ama nasepte i kan ding thupi cih gen hi. Johan 14:6 le 17:3 sim in. Tua khit teh hih dotna kikum un:
Jesuh’ thu i kan ding bang hangin thupi mahmah a hiam?
Pasian’ lawm i suah theih nadingin Jesuh in lampi hong honsak hi. Jehovah tawh kisai thuman zong hong hilh a, ama hangin eite in tawntung nuntakna ngah thei
MI PAWLKHATTE’ GEN: “Jehovah Teci te’n Jesuh um kei uh.”
Nangh bangci dawng ding?
TOMLAKNA
Jesuh pen a vanglian kha mi hi a, Pasian’ Tapa le Messiah zong ahi hi.
Kikupkikna
Jesuh pen “a kipiangsak khempeuh lakah tapa upa pen,” ci-in bang hangin kisam a hiam?
Leitungah hong pai ma-in, Jesuh in bang sem a hiam?
Jesuh pen Messiah ahihlam koici theih i hiam?
THEIH BEH NADING
Jesuh pen Messiah ahihlam i theihtheih dan kan beh in.
“Messiah Tawh Kisai Genkholhnate In Jesuh Pen Messiah Ahihlam A Kiciansak Hiam?” (Website-a thu)
Lai Siangtho in mihingte’ ta neih dan banga Pasian in zong Jesuh a nei danin a gen hiam?
“Jesuh Pen Bang Hangin Pasian Tapa Kici A Hiam?” (Website-a thu)
Thum Gawm Pasian cih pen Lai Siangtho thuhilhna ahih loh dan kan in.
Jesuh’ thu Lai Siangtho-ah a kan khit cianga numei khat nuntakna a kikhel dan sim in.
“Jew Numei Khat In Ama Upna Bang Hang Sittel Kik A Hiam?” (Khanghlo In!, May 2013)
a Messiah, ahih kei leh Khrih cih in mihingte a honkhia dinga Pasian’ teel cihna ahi hi. Mihingte hotkhiat ding a kisapna a hang le Jesuh’ hong hotkhiat dan thu pen sin ding thu 26 le 27-ah kikum ding hi hang.
b Jesuh hih leitungah hong pai ding hun kician taka a genkholhna pen Hilhcianna 2 ah en in.