Pawi Bawlna Khempeuh Pasian In A Sang Hiam?

1. I biakna Jehovah in a san nading bang i sep ding kisam hiam? Bang hang hiam?

JESUH in hih bangin gen hi: “Pasian a bia taktakte in Pasian’ Kha’ lamlahna le thuman taktak tawh a biak hun hong tung ding a, . . . Pa Pasian in tu-a bangin amah i biak ding a hong deih ahi hi.” (Johan 4:23; 6:44) Tua ahih manin, eite khat ciat in, “bangteng in Topa lungkimsak ahi hiam, ci-in [i] kan” ding kisam hi. (Efesa 5:10) Hih pen baih den lo hi. Bang hang hiam cih leh, Jehovah deih loh nate sem dingin Satan in a hong khem den hang ahi hi.—Maangmuhna 12:9.

2. Sinai Mual gei-a thupiang genkik in.

² Ei hong khem dingin Satan in koi bangin hanciam a hiam? Nam khat pen a man le a man lo khensat theihlohna tawh ahi hi. Israel mite Sinai Mual gei-ah giahphual a sat lai-a thupiang pen phawkkik in. Mual tung a kahto Moses pen, giahphualah a hong tunsukkik hun mi te’n a ngak uh hi. A tawpna ciang, ngak zo nawn lo uh ahih manin amau’ ading pasian khat bawlsak dingin Aaron kiangah a gen uh hi. Aaron in zong kham bawngno lim khat bawlsak hi. Tua ciang pawi thupi a bawl uh hi. Bawngno lim kimkotah lam a, a mai-ah kunin a bia uh hi. Tua banga, kunin a biak uh pen Jehovah a bia bangin a kingaihsun uh hi. Ahih hang “Topa ading pawi” hi ci-a ngaihsut bek tawh a sanhuai hi het lo hi. Jehovah in tua pen milim biakna-in ngaihsun a, mi tampi in sihlawh uh hi. (Paikhiatna 32:1-6, 10, 28) Hih pan bang thu sin thei i hiam? Nang le nang kikhem kei in. ‘A nin nate lawng kei in.’ A man le a man lo tawh kisai Jehovah hong hilhte bek sang in.—Isaiah 52:11; Ezekiel 44:23; Galati 5:9.

3, 4. A minthang mahmah pawi pawlkhatte hong piankhiatna bul, bang hang i kantel ding kisam a hiam?

³ Jesuh leitungah a nuntak lai-in, biakna siangtho adinga etteh ding lim hoih koih dingin a sawltakte na pantah hi. Jesuh a sih khit ciang, sawltakte in nungzui hong suak thakte tungah Jehovah’ thubulte hilhsawn uh hi. Ahih hang sawltakte a sih khit uh ciang, a kineihkhem siate in a man lo upnate, lawki ngeinate, le pawi tuamtuamte pawlpi sungah hong kizeelsak uh hi. Tua banah lawkite ii pawi pawlkhat pen Khristiante’ san theih dingin a min khel uh hi. (2 Thesalonika 2:7, 10; 2 Johan 6, 7) Tua bang pawi bawlna a tamzaw pen tu ni ciang dongin minthang mahmah a, hih pawite in a man lo upnate, le dawi biaknate nangawn khangsak lai hi.a—Maangmuhna 18:2-4, 23.

⁴ Tu hunin, leitung bupah pawi bawlnate le tawlngak nite pen mihingte nuntakna-ah a thupi khat hong suakta hi. Ahih hang, thu khat peuh tungah Jehovah’ muhdan i theih semsem teh, tua pawite tawh kisai i ngaihsut zia khel ding a kisap lam i theikhia hi. Hih pen baih khol lo ding ahih hang, Jehovah in hong huh ding hi cih i muang thei hi. Pawi bawlna tawh kisai Jehovah’ muhdan i theihtel nadingin a minthang mahmah pawi pawlkhat hong piankhiatna bul kantel ni.

CHRISTMAS PAWI KOICI HONG KIPAN A HIAM?

5. December 25 ni-in Jesuh suak lo hi cih bang in lak a hiam?

⁵ Gam tampi-ah, Jesuh suah ni hi ci-a a ngaihsut uh December 25 ni-in Christmas pawi bawl uh hi. Jesuh pen bang ni, bang kha-in suak hiam cih Lai Siangtho-in gen lo hi. Ahih hang, kum khat sunga bang hun pawlin a suak hiam cih na gen hi. Bethlehem khua-ah Jesuh a suah lai-in, “gamlakah a tuuhonte a giahpih tuucing pawlkhat a om uh hi,” ci-in Luka in na at hi. (Luka 2:8-11) December kha pen Bethlehem khua-ah khua hun vot mahmah a, guahciin-in, vuk zong a kia hi. Tua ahih manin tuucingte in zanin gamlakah a tuute uh cing lo ding hi. Hih pan bang thei i hiam? Jesuh pen December kha-ah hi loin, khua hun a nop laitak hunin suak hi cih hong theisak hi. September kha le October kha sung hun khat teitei-ah suak hi, cih Lai Siangtho sunga thupiangte in hong theisak hi.

6, 7. (a) Mi tampite ii deih le san ahi Christmas pawi ngeinate koici hong kipan a hiam? (b) Letsong i kipiakna ahang in bang ahih ding kisam a hiam?

⁶ Tua ahih leh Christmas pawi koici hong kipan a hiam? Lokhawh dawi pasian Saturn ading pawi a bawlsak uh ahi, Rom Saturnalia pawi cih banga Pasian a um lote’ pawi bawlna pan hong kipan hi. Namkim bu, The Encyclopedia Americana in: “December kha lang kima a kibawl Rom Saturnalia pawi pen Christmas pawi ngeinate’ etsakna ahi hi. Gentehna-in, nekkhop dawnkhopna, letsong kipiakna le khuaimeivaknate pen hih pawi pan hong kipankhia hi,” ci-in gen hi. Persia-te ii ni-pasian Mithra ii suah ni pawi zong December 25 ni-in bawl uh hi.

⁷ Ahih hang, tu huna Christmas pawi a bawl mi a tamzawte in pawi hong kipatna bulpi ngaihsun kha lo uh hi. Innkuanpihte tawh kimuh khop hun, nuam taka nekkhop dawnkhop hun le letsong kipiak huna ngaihsunin Christmas pawi pen ngaklah mahmah uh hi. A manin cileng, i innkuanpihte le i lawmlegualte i it hi. Jehovah in zong ama nasemte khatlekhat na i kipiak ding deih hi. 2 Korin 9:7 sunga a gen mah bangin, ‘Pasian in piaknopna lungsim tawh a pia mite bek deih hi.’ Ni thupi hun a tun ciang bek a, letsong kipiak cih bang pen Jehovah in a deih hi lo hi. Jehovah’ nasemte in ngahkik ding lamen loin kum khat sunga bang hun hita leh innkuanpihte le lawmlegualte tawh kikhawl khawm a, letsong kipiak pen nuamsa uh hi. Midangte it uh ahih manin na piakhia uh hi.—Luka 14:12-14.

8. Aksi thu lamsang a siam mite in a suaktung naungek Jesuh kiang letsong a pia uh hiam? Hilhcian in.

⁸ Mipil thumte in zong gan annekna kuang sunga a kisial a suaktung naungek Jesuh adingin letsong pia uh hi lo maw, ci-in mi tampi te’n Christmas hun ciang letsong kipiak ding cih ngaihsutna pen hong sang uh hi. Tua mipilte Jesuh kiangah hawh a, letsong pia uh cih pen a man mah hi. Lai Siangtho hun lai-in, mi thupi deuh khat kiang hawh a, letsong piak pen a ngeina uh ahi hi. (1 Kumpi 10:1, 2, 10, 13) Ahih hang amaute pen aksi thu lamsang a siam mite, dawi siam mite, le Jehovah a bia lo mite ahi uh hi, cih Lai Siangtho gen pen na thei kha hiam? Tua banah ganbuka om a suaktung naungek, Jesuh kiang a hawh uh hi lo hi. Inn sunga a om “naupangno” a hita Jesuh kiang a hawh uh ahi hi.—Matthai 2:1, 2, 11, ZSV.

SUAH NI PAWITE TAWH KISAI LAI SIANGTHO IN BANG GEN A HIAM?

9. Lai Siangtho in kuate ii suah ni pawi thu pawi thu na gen a hiam?

⁹ Nau suah ni pen lungdamhuai mahmah hi. (Late 127:3) Ahih hang suah ni pawi bawl ding cihna bel hi lo hi. Ngaihsun dih lecin: Lai Siangtho sungah suah ni pawi a kibawl nih bek om hi. A khat pen Egypt Kumpi Faro’ suah ni hi a, adang khat pen Kumpi Herod Antipas’ suah ni ahi hi. (Piancilna 40:20-22; Marka 6:21-29 sim in.) Tua kumpite a nihun Jehovah’ nasem ahi kei uh hi. A taktakin cileng, Jehovah a bia mite in suah ni pawi a bawlna thu Lai Siangtho sungah kimu lo hi.

10. Suah ni pawi pen Khristian masa te’n bangci ngaihsut uh hiam?

¹⁰ Khristian masate in, “khat peuhpeuh in suah ni pawi a bawl leh tua pen Pasian a um lote’ pawi-in ngaihsun uh hi,” ci-in namkim bu, The World Book Encyclopedia in gen hi. Tua bang ngeinate pen a man lo upnate tung a kibulphuh ahi hi. Gentehna-in, mi khempeuh pen a suah ni-a a hong pai dawi khat in kemin cing den hi ci-in tanglai Greek mite in ngaihsun uh hi. Tua dawi le a cin mihing suah ni-a a suak pasian in kizopna nei uh hi, ci-in zong ngaihsun uh hi. Suah ni pawi le hih banga Pasian a um lo mite’ upna a kizop banah, aksi om dan tawh mai lam hun theih sawmna astrology le horoscope tawh zong kizom hi.

11. Citna tawh kisai Jehovah in bangci ngaihsut a hiam?

¹¹ Mi tampi te’n a suah ni uh pen amau’ tung lungdampihna le itna a kilah hun hi ci-in ngaihsun uh hi. Ahih hang innkuanpihte le lawmlegualte pen a thupi diak ni bekah hi loin, kum khat sung tawntungin i itlam i lak thei hi. Jehovah in eite pen hun simin migi ihih ding le citna i neih ding hong deih hi. (Sawltak 20:35 sim in.) Suah ni a tun ciang bek hi loin, ni simin a manpha mahmah nuntakna letsong ading Pasian tung i lungdam ciat hi.—Late 8:3, 4; 36:9.

12. I suah ni sangin i sih ni pen koici hoihzaw thei a hiam?

¹² Thuhilhna 7:1-ah: “A manpha paknamtui sangin minpha hoihzaw a, i suah ni sangin i sih ni hoihzaw hi,” ci-in gen hi. I suah ni sangin i sih ni pen koici hoihzaw thei a hiam? I suah lai-in i nuntakna-ah a sia a pha bangmah kisem nai lo hi. Ahih hang i nuntakna pen Jehovah nasepna-ah i zat ciang, le midangte ading phattuam nadinga i zat ciang, “minpha” a bawl ihi a, i sih lezong Jehovah in hong phawk ding hi. (Job 14:14, 15) Jehovah’ nasemte in amau suah ni ahi a, Jesuh’ suah ni ahi zong pawi bawl lo uh hi. Bawl dinga a hong kivaikhak pawi khat bek pen Jesuh’ sih phawkna pawi ahi hi.—Luka 22:17-20; Hebru 1:3, 4.

EASTER PAWI HONG KIPATKHIATNA

13, 14. Easter pawi pen bang tawh kizom a hiam?

¹³ Easter pawi bawlna pen Jesuh’ thawhkikna pawi a kibawl hi ci-in mi tampi te’n um uh hi. Ahih hang, Easter pawi pen Anglo-Saxon minamte ii phalvak le khua khal dawi nusian Eostre tawh kizom hi. Eostre pen ciphatna dawi nusian hi, ci-in tongdot laibu khat, The Dictionary of Mythology in hilhcian hi. Easter pawi ngeina pawlkhat pen Eostre tawh kizom hi. Gentehna, na tui khat peuhpeuh in “nuntak kipatna le thawhkikna ii ciaptehna-in kithei hi,” ci-in namkim bu, Encyclopædia Britannica in gen hi. Pasian a um lo mite’ biakna-ah ciphatna cih ciaptehna-in bilpi pen hun sawtpi pek a kipan a zang uh hi. Easter pawi pen Jesuh ii thawhkikna tawh kisai lo hi cih pen kician mahmah hi.

¹⁴ Jehovah in a tapa ii thawhkikna pen biakna man lo ngeinate tawh mi te’n a zatkhop uh a muh ciang a lungkim ding hiam? Lungkim het lo hi. (2 Korin 6:17, 18) Jehovah in Jesuh ii thawhkikna pawi bawl dingin cikmah hunin gen lo hi.

HALLOWEEN PAWI CIH IN BANG A HIAM?

15. Halloween pawi hong kipatna koi bang a hiam?

¹⁵ Mi siangthote’ ni ma dawnna pawi a kici Halloween pawi pen dawi numeite, dawi kheltatte le sikhate tawh kizom hi. Hih pawi pen a omthak pawi hi lo hi. Britain le Ireland gam a om tanglai Celt minamte in November ni 1, tawh a kinai pen khalik ni-in Samhain pawi a bawl uh hi. Pawi sungin, misite kha leitungah hong kumsuk hi cih um uh hi. Sikhate in a khem loh nadingin mite in nekledawn ding a siah uh hi. Tu huna naupangte in puantual silhin inn khat khit inn khat pai a, “Nek ding nong pia ding uh hiam? Kong khem ding uh hiam?” a cih uh ciang, tanglai dawi ngeina zui ahihlam uh pen kithei lo uh hi.

PASIAN A LUNGKIMSAK MOPAWITE

16, 17. Kiten ding i geel hun ciang, bang i ngaihsut ding kisam a hiam?

¹⁶ Mopawi pen a nuam mahmah hun ahi hi. Leitung buppi-ah mopawi pen a tuamtuamin bawl uh hi. Mite in mopawi ngeinate koi pan hong kipan khia hiam cih ngaihsun kha lo uh hi. Tua ahih manin, ngeina pawlkhatte pen Pasian a um lo biakna ii thu upna pan hong pai ahihlam thei lo uh hi. Ahih hang, kiten ding a vaihawm Khristian tegel in Jehovah a lungkimsak ding mopawi a bawlnuam uh hi. Mopawi ngeinate hong kipatkhiatna thei lehang, khensatna hoih i bawl thei ding hi.—Marka 10:6-9.

¹⁷ Mopawi ngeina pawlkhat in a kitengtung nupate tungah “Gad,” ahih kei leh kamphatna omsak hi ci-in um uh hi. (Isaiah 65:11) Gentehna, mun pawlkhatah monu le mopa’ lutungah antang ahih kei leh na khat peuhpeuh theh uh hi. Tua hileh, tate hong nei ding, lungnuam ding, a khan uh sau ding, dawite’ bawlsiatna pan hutna ngah ding cih um uh hi. Ahih hang, a man lo biakna tawh a kizom ngeinate pen Khristian te’n pilvang takin a pelh uh hi.—2 Korin 6:14-18 sim in.

18. Mopawi tawh kisai Lai Siangtho thubulte in bang a hiam?

¹⁸ A kiteng ding Khristian tegel in a mopawi uh pen a nuam mahmah, a zahtak huai, le mopawi-a hong pai khempeuh te’n nuam a sak mahmah pawi ahih ding deih uh hi. Mopawi-a hong pai zinleleengte in monu, mopa le midangte tungah hehpihna a nei lo kampauna, nulepa vai a zumhuai thu genna, le zahtak lohna kampau zang lo ding uh hi. (Paunak 26:18, 19; Luka 6:31; 10:27) Khristian mopawi pen “mite’ kisaktheihpih nate ahi leitung nate” a kilah nading hun hi lo hi. (1 Johan 2:16) Kiten ding na sawma leh na ngaihsutkik cianga na lung a kim mahmah nadingin lim takin geel in.—Ciaptehna 28 en in.

ZU HAI LAAMTO-A THUPHA NGETNA’ HONG KIPATNA BULPI

19, 20. Zu hai laamto-a thupha ngetna’ hong kipatna bulpi in bang a hiam?

¹⁹ Mopawi le nekkhop pawite-ah a kihel thei zel ngeina khat pen zu hai laamto-a thupha ngetna ahi hi. Mi khat in thupha ngen a, midangte in zu hai laamto uh hi. Tua pen Khristian te’n bangci ngaihsut ding i hiam?

²⁰ Zu hai laamto-a thupha ngetna pen “dawi pasiante kiang zu tawh a kithoih” tanglai-a Pasian a um lote’ ngeina pan hong kipan hi, ci-in zu le ngeina tungtang laibu, International Handbook on Alcohol and Culture in gen hi. Hih pen, “‘Na khansau tahen!’ ahih kei leh ‘Na ci dam tahen!’” ci-a thu a kingetsak mihing ngeina ahi hi.” Tanglai-in, mite in dawi pasiante kiangah zu hai laamto-in thu ngen thei zel uh hi. Ahih hang tua pen Jehovah in thupha a piak dan hi lo hi.—Johan 14:6; 16:23.

‘JEHOVAH A ITTE IN GITLOHNA MUDAH UN’

21. Koi bang pawite Khristian te’n pelh ding kisam a hiam?

²¹ Pawi khat peuhpeuhah kihel ding, kihel lo ding cih na khensat teh, hih pawi in koi bang ngaihsutna le gamtatnate hanthawn a hiam cih ngaihsun in. Gentehna-in, pawi pawlkhat le gualnopnate-ah nulepa lunggulhna a piangsak laamte, zu ut bangbanga dawnna, gamtatsiatnate dongin kihel thei hi. Hih bang pawite in gay a cih uh, pasal numei banga omte, numei le numei, pasal le pasal a kilunggulh mite’ nuntakzia hanthawn a, minam itna lungsim nei dingin zong hanthawn hi. Hih bang pawi-a i kihel leh Jehovah muhdahte ka mudah hi, i ci thei ding hiam?—Late 1:1, 2; 97:10; 119:37.

22. Khristian khat in pawi khatah kihel ding, kihel lo ding cih a khensat ciang bang in huh ding a hiam?

²² Khristian te’n Pasian a pahtawi lo pawi khempeuh pel dingin a pilvan mahmah ding kisam hi. Sawltak Paul in: “Na hihna khempeuh uh, nekna dawnna-ah ahi zongin Pasian’ minthan nadingin na hih un,” a ci hi. (1 Korin 10:31; Ciaptehna 29 en in.) Pawi khempeuh pen gamtatsiatna, biakna man lo, le minam vaite tawh a kizom khin bel hi lo hi. Pawi khat pen Lai Siangtho thubulte a palsat ahih kei leh tua pawi-ah kihel ding, kihel lo ding cih pen ei mahmah in i khensat ding kisam hi. I khensatna in midangte koi bangin sukha ding hiam cih zong i ngaihsun nuam hi.

KAMPAU LE GAMTATNA TAWH JEHOVAH PAHTAWI IN

23, 24. Pawite tawh kisai i khensatna pen Jehovah’ Teci ahi lo i innkuanpihte kiang koi bangin hilhcian thei i hiam?

²³ Jehovah a pahtawi lo pawite-ah a kihel nawn lo na hithei hi. Tua ahih manin Jehovah’ Teci ahi lo na innkuanpih pawlkhat in amau it nawn lo, kikholhpih nuam nawn loin kingaihsun khathei uh hi. Amau’ tawlngak nite pen innkuan kikholhkhop nading hunpha hi, ci-in a ngaihsun hithei hi. Tua hileh bang hih thei na hiam? Amau na itlam, nang ading thupi ahihlam uh na lah theih dan nam tampi om hi. (Paunak 11:25; Thuhilhna 3:12, 13) A ni dang ciang kikhawl khawm dingin amaute na sam thei hi.

²⁴ Tawlngak ni pawlkhatte na san nawnlohna ahang, na meltheih te’n a theihnop uh leh tua thu na hilhcian theih nadinga a hong huh thei thute pen Lai Siangtho bulphuh laibute le jw.org-ah na kan thei hi. Nial zawh sawm le na san banga sansak sawm teitei tawh a kibang dingin om kei in. Thu tampi na ngaihsut khit cianga na khensat ahihlam na innkuanpih te’n a theih nadingin huh in. Dai takin om hithiat inla, ‘kam na pau ciangin mi’ zaknop, mi’ ngaihnop dingin na pau in.’—Kolose 4:6.

25, 26. Ta te’n Jehovah’ tehnate a it theih nadingun nu le pate in koi ci huh thei a hiam?

²⁵ Pawite-ah i kihel lohna ahang pen mi khat ciat in kician taka i theihtel ding thupi hi. (Hebru 5:14) I ngimna in Jehovah lungkimsak nading ahi hi. Nu le pa ihih leh ta te’n Lai Siangtho thubul a tel nading le a it nadingun hun pia-a i huh ding kisam hi. Jehovah pen tate ading a nungta takpi Pasian a hong hih ciang, amau in zong Jehovah lungkimsak nuam ding uh hi.—Isaiah 48:17, 18; 1 Peter 3:15.

²⁶ Jehovah in siangtho taka le thuman taka amah bia dinga i hanciamnate a muh ciang a lungdam hi. (Johan 4:23) Ahih hang thumanna a om lo hih leitungah thuman ding pen hithei lo hi, ci-in mi tampi te’n ngaihsun uh hi. Tua pen a man hiam? Hih thu pen a zom khenpi-ah kikum ni.