“A Kimang Kam Hoihte Bek Na Pau Un”

1-3. (a) Pasian hong piak a hoih letsong khat in bang a hiam? Koi bangin zang khial khathei i hiam? (b) Kampau theihna letsong pen koi banga zat ding ahi hiam?

PA KHAT in kum sawm gual a pha, a tapa kiang siksakol khat pia hi. Hih banga a thupi diak letsong a tapa pia thei ahih manin a pa a lungdam hi. Ahih hang a tapa in tua siksakol pen kidawm takin tuang lo ahih manin mi khat phulkha-in liamsak hileh e? A pa in bangci ngaihsut ding a hiam?

² Jehovah pen “a hoih le a cingtak letsong” a hong pia pa ahi hi. (James 1:17, ZSV) A hoih letsong khat pen kampau theihna ahi hi. Kampau theihna letsong hangin i ngaihsutna le i lungsim ngimnate i genkhia thei hi. Mite a huh thei le lungsim a nuamsak thei kammalte i pau thei hi. Ahih hang i kampau in midangte sukha-in a nasak zong hithei hi.

³ I kampau in nakpi taka nasem thei ahih manin Jehovah in kaupau theihna letsong pen hoih taka i zat theih dan hong hilh hi. “Na kiho uh ciang kamguh zang kei unla, na pauna uh a za mite in phattuamna a ngah theih nadingin na-in a kimang kam hoihte bek na pau un,” ci-in Jehovah in hong gen hi. (Efesa 4:29) Hih kampau theihna letsong pen Pasian lungkimna bang le midangte thapiak theihna dinga i zat theih dan ding kikum ni.

NA KAMPAU KIDAWM IN

4, 5. Kampau theihna tawh kisai Lai Siangtho sunga a pilhuai thu panin bang sin thei i hiam?

⁴ I kammal zatte in nakpi taka nasem thei ahih manin i thu gen le i gen dan i kidop ding kisam hi. Paunak 15:4 ah hih bangin gen hi: “Kam khum in nuntakna piangsak a, kam sia in lung gimsak hi.” A hoih mahmah singkung in nuntakna le lungnopna hong piak mah bangin kam khum in a za mite’ lungnuamsak hi. Kam khauh in midangte lungsim nasak hi.—Paunak 18:21.

⁵ ‘Ngaihsun lo-a kampauna in tem hiam bangin mi liamsak thei hi,’ ci-in Paunak 12:18-ah gen hi. Hehpihna nei lo-a kampauna in lungsim nasak thei a, kizopna zong siasak thei hi. Mi khat peuhpeuh in hehpihna nei lo-a a kampauna hangin na lungsim a nat mahmah hun pen na phawkkik thei hi. “Mipilte’ kampauna in tua bang liamna damsak thei hi,” ci-in Paunak sungah gen zom hi. Limtaka ngaihsut khit ciang a kigen kampau in lungsim liamma damsak thei a, kitheihkhialhnate hanga kizopna a siate zong hoihkiksak thei hi. (Paunak 16:24 sim in.) I kampau in midangte lungsim nasak thei ahih manin thu i gen ciangin i kidawm ding hi.

6. I kampau i kidop ding bang hang haksa a hiam?

⁶ I kampau i kidop ding a kisapna ahang adang khat in, i vekpi-in a cingtaak lo mi ihih hang hi. “Mihing’ lungsim ngaihsutna pen . . . gi lo hi.” I thugente in i lungsim sunga omte lakkhia zel hi. (Piancilna 8:21; Luka 6:45) Kampau i kidop ding haksa thei hi. (James 3:2-4 sim in.) Ahih hang midangte tawh i kihopih dan a khantoh nadingin i sep ding kisam hi.

7, 8. I kampau in Jehovah tawh i kizopna koi bangin sukha thei a hiam?

⁷ I kampau le i thugen dan ading Jehovah mai-ah pulakkik ding ihih manin zong kampau i kidop ding kisam hi. James 1:26-ah hih bangin gen hi: “Mi khatpeuh in Khristian ka hi hi, ci napi-in kampau a kidopzawh kei leh amahmah a kikhemtawm hi lel a, ama biakna neih a mawkna ahi hi.” “A mawkna” ci-a a kiteikhia a kipatcil kammal in “kimanna nei lo” ci-in zong khiatna nei hi. (1 Korin 15:17) Tua ahih manin kampau i kidop kei leh siatna i tuak thei hi. Jehovah tawh i kizopna zong siasak thei hi.—James 3:8-10.

⁸ I kampau le i thugen dan kidop nading ahang hoih om hi cih kician hi. Jehovah deihdan bangin kampau theihna letsong pen i zat theih nading koi bang kampaute pel ding i hiam cih i theih ding kisam hi.

SIATNA A TUNGSAK THEI KAMPAU

9, 10. (a) Tu hun leitungah koi bang kampau dante kiza a hiam? (b) A kihhuai kampaute bang hang pel ihi hiam?

⁹ Tu hun ciang, a siangtho lo, le kampau hoih lote kiza den hi. Mi tampi te’n amau gennop a suhkhak nadingin kampau hoih lo zat ding hi ci-in ngaihsun uh hi. Ciamnuih bawlsiamte in zong a siangtho lo kampau le a kihhuai zawlthu kampaunate tawh ciamnuih bawl uh hi. Ahih hang sawltak Paul in: “Ahi zongin tu-in hehna, thangpaihna, muhdahna, gensiatna, kam hoih lo pauna cihte nei nawn kei un,” a ci hi. (Kolose 3:8) Khristian mante sungah “ciamnuih hoih lo cihte” pen ‘gena zong nei vet lo’ dingin na gen lai hi.—Efesa 5:3, 4.

¹⁰ A kihhuai kampauna pen Jehovah in mudah a, amah a it mite’n zong mudah uh hi. Tua pen siangtho lo hi. Lai Siangtho sunga a kigen, “mawhdim pianngei gamtatna” sungah “siantho-lohna” kihel hi. (Galati 5:19-21, ZIV) “Siantho-lohna” sungah mawhna a tuamtuam kihel thei hi. A siangtho lo gamtatna khat pen adang khat tawh kizomto thei hi. Mi khat in a kihhuai mahmah kampau hoih lo zang den a, a kikhel kei leh pawlpi sung pan kihawlkhia thei hi.—2 Korin 12:21; Efesa 4:19; Ciaptehna 23 en in.

11, 12. (a) Siatna a tungsak thei kamtamna cih in bang a hiam? (b) Bang hangin mi gensia lo ding i hiam?

¹¹ Siatna a tungsak thei kamtamna zong i pelh ding kisam hi. Midangte’ thu lunglut a, lawmte le innkuanpihte kianga thu le la i gensawn pen a ngeina mah hi. Kum zalom khat lai-in zong Khristian masa te’n unaute’ dinmun le a panpih theih dan ding theinuam uh hi. (Efesa 6:21, 22; Kolose 4:8, 9) Ahih hang midangte’ thu i genna pen siatna a tungsak thei kamtamna lamah hong kihei thei hi. Mi thugente i gensawn ciang, thuman lo le midangte ii thu hoihlo kigen khathei hi. I kidop kei leh kamtamna pan a man lopi-a ngawhna le mi gensiatna hong suak thei hi. Farisi te’n Jesuh’ sep het loh nate a semin ngawh uh a, a gensia uh hi. (Matthai 9:32-34; 12:22-24) Mi gensiatna in mi khat ii min pha neih siasak a, kitotna le lungsim natna a piansak banah, lawmta kizopna zong siasak hi.—Paunak 26:20.

¹² Jehovah in i kampaute pen lawmta kikhen nading hi loin, midangte panpih nading le hanthot nadinga zang dingin hong deih hi. Amah in “kitotna a piangsakte” mudah hi. (Paunak 6:16-19) Mi a gensia masapen in, Pasian a gensiapa, Dawimangpa Satan ahi hi. (Maangmuhna 12:9, 10) Tu hun leitungah mi khatlekhat tunga zuauthu gen pen ngeina khatin nei uh hi. Ahih hang Khristian pawlpi sungah tua bang a om ding hi lo hi. (Galati 5:19-21) Tua ahih manin i kampau i kidop ding le thu i gen ma-in i ngaihsut masak den ding kisam hi. Mi dang khat peuhpeuh ii thu na gensawn ma-in, hih bangin kidong in: ‘Ka thugen ding pen a man mah hiam? Hih thu gen leng mi a hehpih ka suak diam? Phattuamna a om ding hiam? Ka thugen pen, a tungtang ka gen pa ka zasak nuam hiam? Kei’ thu khat peuhpeuh in hih bangin hong gen leh nuam ka sa ding hiam?’—1 Thesalonika 4:11 sim in.

13, 14. (a) Kikona in mi tungah bang siatna piangsak a hiam? (b) Kizahkona in bang a hiam? Khristian te’n bang hangin i pelh ding kisam a hiam?

¹³ A nung cianga i kisikkik nading thu i gen khathei zel hi. Ahih hangin midangte ii thu hoihlo gen le hehpihna nei lo-a thugente i ciing nuam kei hi. I nuntakna-ah kikona kampau ading mun om lo hi. Paul in: “Kimuhdahna, hehna, thangpaihna, kitotna, kikona, kilungsim neihna khempeuh beisak un,” a ci hi. (Efesa 4:31) Lai Siangtho dangte-ah “kikona” pen “kampau hoih lo,” “mi a nasak thei kampau,” le “zahkona kampau” ci-in teikhia uh hi. Kikona in midang khat ii minpha siasak a, kimanna nei loin kitheisak hi. Naupangte pen a lungsim uh na baih mahmah ahih manin, a lungkiat nading thu i gen khak loh nadingin, a diakin i kidawm nuam hi.—Kolose 3:21.

¹⁴ Lai Siangtho in kikona kampau khauhpen ahi, kizahkona zang lo dingin thu hong hilh hi. Kizahkona cih in midang natsak nopna lungsim tawh phinna ahi hi. Mi khat peuhpeuh in a zi, a pasal le a tate tungah kizahkona kampau zang hileh bangzah takin dahhuai ding a hiam? Kisik lo-a tua bang kam a zat zel leh pawlpi sungah om thei lo ding hi. (1 Korin 5:11-13; 6:9, 10) I sinsa mah bangin a siangtho lo, a man lo le mi hehpihna a om lo kampaute i pau leh Jehovah tawh i kizopna le midang tawh i kizopna sia ding hi.

A KIMANG KAM HOIHTE

15. Koi bang kampau in kizopna hoihsak semsem a hiam?

¹⁵ Jehovah’ deihdan bangin kampautheihna letsong koici zang thei i hiam? Gen ding a kilawm le a kilawm lo kampaute ci-in Lai Siangtho sungah kician takin a ki-at loh hang, “a kimang kam hoihte bek na pau un,” ci-in gen hi. (Efesa 4:29) A kimang kam hoihte in siangtho-in, hehpihna nei-in, zong man hi. Jehovah in midangte thapia-a huh nading kampautheihna i zat ding deih hi. Tua pen haksa thei ding hi. Hehpihna nei lo kampau le thu hoihlo gen sangin, thu hoih gen ding pen haksazaw hi. (Titus 2:8) I kampau tawh midangte tha i piak theih dan pawlkhat kikum ni.

16, 17. (a) Midangte i phat ding bang hang kisam a hiam? (b) Kuate phat thei i hiam?

¹⁶ Jehovah le Jesuh in phatna thu gen pahpah uh hi. En’ zong amau i etteh nuam hi. (Matthai 3:17; 25:19-23; Johan 1:47) Tha hong pia thei takpi phatna kammal genna-ah limtaka ngaihsutsakna le mimal khat tung lunglutna lahna kihel hi. ‘A hun mahin dawnpah theihna lungkimhuai hi,’ ci-in Paunak 15:23 ah gen hi. Mi khat peuhpeuh in i hanciamna hangin lungsim takpi tawh a hong phat ciang, i sepna khat peuhpeuh hangin a lungdam thu a hong gen ciang tha i ngah hi.—Matthai 7:12 sim in; Ciaptehna 27 en in.

¹⁷ Midangte’ hoihna zong thei zel leng, lungsim takpi tawh i phat ding hong baih ding hi. Gentehna-in, a thugen ding hoih taka a kithawikhol, ahih kei leh kikhopna-ah dawn ding a hanciam pawlpi sunga mi khat peuhpeuh thei kha ni teh. Khangno khat in sanginnah thuman lampi kip taka zui, ahih kei leh khangham khat taangko nasepna-ah manmanin a hong kihel hi. Amau kisap in a hahkatna tunga lungdam thugen hithei hi. Pasal in a zi kiangah a itlam le a lungdam lam a gen ding thupi mahmah hi. (Paunak 31:10, 28) Singkung khat a hin nading nitaang le tui a kisap mah bangin, mihing te’n zong mi’n hong thupi sim hi ci-a a kitheih ding kisam hi. Naupangte adingin kisam diak hi. Amaute ii pianzia hoihte le a hanciamnate hangin phat nading hunpha zong in. Phatna kampau in tate tha pia a, kimuanna zong neisak thei hi. A mana gamta dinga hanciam nopna lungsim zong neisak semsem thei hi.

18, 19. Midangte a hithei zahin tha pia-a i hehnep ding bang hang kisam a hiam? Koi bangin tha pia-a hehnem thei i hiam?

¹⁸ Midangte tha pia-a i hehnep ciang, Jehovah a etteh ihi hi. Pasian in “a kiniamkhiat mite” le “a kisik mite” thudon mahmah hi. (Isaiah 57:15) Jehovah in “khatlekhat kihanthawnin kihuh ciat” ding le “a zawngkhal mite huh” ding deih hi. (1 Thesalonika 5:11, 14) Tha pia-a hehnep ding i hanciam ciang, Pasian in hong thei a, thupi sa hi.

¹⁹ Pawlpi sunga mi khat peuhpeuh lungkia, ahih kei leh khasia ahihlam na thei khathei hi. Amau a huh thei ding, bang thu gen thei na hiam? Amau’ buaina na siansak theih loh hang, thudon na hihlam na theisak thei hi. Gentehna-in, amah tawh kikhawl dingin hun na geel thei hi. Tha a pia thei Lai Siangtho mun khat zong na simsak thei hi. Thu zong na ngetsak thei hi. (Late 34:18; Matthai 10:29-31) Pawlpi sunga unau te’n amau a itlam uh theisak in. (1 Korin 12:12-26; James 5:14, 15) Na lungsim sunga om bang lianin gen in.—Paunak 12:25 sim in.

20, 21. Thu hilhna bang in san baihsak a hiam?

²⁰ Thu hilhna hoih i piak ciang midang te’n tha ngah hi. A cingtaak lo mi khempeuh in thu hilhna kisam thei zel hi. Paunak 19:20-ah: “Thu kigente ngai-in hong kihilhte mang lecin mai lamah na pil ding hi,” ci-in gen hi. Pawlpi upate bek in thu hilhna a pia thei hi lo hi. Nu le pate in tate a lamlah ding uh kisam hi. (Efesa 6:4) Unaunute in zong khatlekhat thu hilhna hoih kipia thei hi. (Titus 2:3-5) Unaupihte i it manin, thu i hilh ciang lungnopna a omsak hi cih i cian nuam hi. Bang in hong huh thei ding a hiam?

²¹ A san baih mahmah dinga mi khat in thu hong hilh hun phawkkik in. Bang in a thu bunsak a hiam? Amah in hong thudon takpi a, hehpihna nei taka hong hilh hang ahi hi. (Kolose 4:6) A diakin, Lai Siangtho bulphuh a, a hong hilh hang zong ahi hi. (2 Timoti 3:16) Lai Siangtho pan i laksawn ahi a, ahi kei zongin, thu i hilh ciangin Lai Siangtho i bulphuh ding kisam hi. A kuamah peuh in ama muhdan banga mu dingin midangte sawl tentan ding hi lo a, ama ngaihsut dan sang dingin zong Lai Siangtho munte a deihkaih ding hi lo hi. Na ngah ngei hong kithuhilh dan phawkna in midangte thu na hilh ciang a hong huh ding hi.

22. Kampautheihna letsong pen koi bangin zangnuam na hiam?

²² Kampautheihna pen Pasian kiang pan letsong ahi hi. Pasian i itna in tua letsong hoih taka zang dingin hong hanthawn hi. Kampau in lungsim nasak thei a, tha zong pia thei hi cih phawk den in. Tua ahih manin, midangte tha a pia thei le a hatsak thei a kimang kammalte bek zat sawm ciat ni.