KHENPI 6
Ta Neih Ciang Nupa Kikalah Kikhelna Om Thei
“Tate pen Topa’ tung pana letsong hi.”—Late 127:3
Nupate in ta hong neih ciang lungsim a thalawpsak mah bangin lung zong hong gimsak thei hi. Nu le pa suah cilin nau kem a, i cin’na bangzah takin hun bei a, i lung a gim lam na theih ciang lamdangsa kha ding hi teh. Lungsim kikhelna le ihmut cimlohnate hangin nupa kikalah haksatna hong om thei hi. Ta na kep kawmun nupa kikal kizopna a kip na’ng na nupa un na kikup ding uh kul hi. Haksatnate phulzawh nading Lai Siangtho thuhilhnate in koi bangin hong huh thei ding hiam?
1 TA NEIH CIANG KIKHELNA OM THEI CIH THEISIAM IN
LAI SIANGTHO GENNA: “Itna neite a lungduai-in migi hi.” Tua ciang zong “itna neite a kilawm loin gamta lo, heh pakpak lo” uh hi. (1 Korin 13:4, 5) Nupi na suah cilin naungek’ kisapnate tawh na buai den pen a ngeina hi. Tua hun ciang na pasal in kei hong awlmawh nawn lo ci-in ngaihsun kha thei hi. Tua ahih manin amah zong na don in. Nau kep ciang na pasal in zong hong keppih ding tavuan aneih banah ama huhna kisam hi cih a theih nading itna tawh lungduai takin na gen in.
“Pasalte aw . . . na zite uh a thahat lo zawdeuh ahihna thu na phawk un.” (1 Peter 3:7) Na zi in nau tawh buai den ahih manin tawl ding hi cih na thei siam in. Na zi in tavuan a thak ngahta ahih manin lungbuai-in tawl ding a, zong lungneu thei ding hi. Na zi nang tungah khat veivei a lungkim kei leh “thahatna sangin lungduaina hoihzaw” hi cih Lai Siangtho thugen pen phawk inla na hehkhak loh nading hanciam in. (Paunak 16:32) Na zi kisapnate thei siam inla panpih in.—Paunak 14:29.
NA SEP THEIH DING:
Pate: Na zi na huh kawmin sun ahi zong zan ahi zong nau na keppih in. Na zi le na ta ading hun tampi na piak zawh nading nasep dangte-ah na hun ciangtan in
Nute: Na pasal in naungek hong keppih nop pen na mang in. Naungek ii kisapnate hoihtaka a kep theih kei leh zong na mawhsak kei inla nau kep dan ding lungduai takin hilh in.
2 NO NUPA KIZOPNA NA KIPSAK UN
LAI SIANGTHO GENNA: “Amau tegel pumkhat a bang uh hi.” (Piancilna 2:24) Ta na neih uh leh zong nang le na innkuanpih pen “pumkhat” mah hi lai cih na phawk in. No nupa kizopna a kip na’ng hanciam un.
Zite aw, na pasal hong huhna le hong panpihnate lungdam in. Na lungdamna na lahkhiatna kammal in no nupa ading damsakna hi ding hi. (Paunak 12:18) Pasalte aw, na zi bangzah takin it a, nang ading amah manpha hi cih gen in. Na zi in innkuan sung limtakin a donna na phat in.—Paunak 31:10, 28.
“A kuamahpeuh in note’ angsung ding bek zong kei un la, midangte’ phattuam nading zongzaw un.” (1 Korin 10:24) Na innkuanpih ading a hoih thei penin sem den in. Na nupa un kiho nading, kiphat nading le khat le khat thu na kingaihpih nading hun la un. Nupa lupkhopna-ah angsung bek en kei in. Na innkuanpih ii kisapnate ngaihsutsak in. Lai Siangtho in: “Tawlkhat sung tuam om ding thukim khawm masa lopi-in lupkhawp ding kinialkha kei un” na ci hi. (1 Korin 7:3-5) Tua ahih teh tua bang thute imm loin na nupa un kikum un. Na lungduaina uh le kitheihsiamna in no nupa kizopna hong kipsak ding hi.
NA SEP THEIH DING:
No nupa ading hun a tuam vilvelin koih un
Na innkuanpih na it lam na lahna-in lai tomno khat khak ahih kei leh letsong neu khat na pia in
3 NAUNGEKTE PANTAH IN
LAI SIANGTHO GENNA: “Hotkhiatna a hong ngahsak thei ding pilna a hong pia Lai Siangtho pen na neutung a kipanin a theisa na hihna thu zong na theihsa thu mah ahi hi.” (2 Timoti 3:15) Na ta koi bangin thu hilh ding cih gel khol in. Naungek in a nu gil sungah a om lai na ngawnin lamdang takin thu sintheihna nei hi. A nu gil sung mah panin na aw uh thei a, na ngaihsutnate hong thukkik thei hi. A neutunga kipan lai simpih in. Lai na simte a telzawh nai loh hang a gol ciangin lai simnopna lungsim hong nei ding hi.
Pasian thu na genpih ding na ta a kum tawmlua cih om lo hi. Tua ahih manin na ta’ zak dingin Jehovah kiang thu ngen in. (Thu Hilhkikna 11:19) Na ta tawh na kimawl ciang zong Pasian in a bawl nate’ thu genpih in. (Late 78:3, 4) Tua banga na sepna in na ta hong gol ciang Jehovah na itna hong thei in ama’n zong Pasian a it theih nading hong sin ding hi.
NA SEP THEIH DING:
Na ta na pattah theih nading pilna hong pia in ci-in thu ngen in
Na ta na theihsaknop thute hilh kikkik in. Tua hi leh na tate in a neu-a kipan thu sin thei ding hi