KHENPI 7
Tate Thu Hilh A, Pattah Dan Ding
“Tuni-a no kong piak hih thute na lungsim uhah om ding hi. Na tate uh tungah limtakin na hilh ding uh hi.”—Thu Hilhkikna 6:6, 7
Innkuan a kipan sak Jehovah Pasian in tate a uk dingin nu le pate tavuan na pia hi. (Kolose 3:20) Tate in Jehovah a it theih nading le tavuan a la thei a picing mi khat a suah nading na pattah ding uh no nu le pate tavuan hi. (2 Timoti 1:5; 3:15) Tua banah na tate’ lungsim sungah bang om hiam cih theih sawm in. Na kampau uh le na sepnate uh tate ading thupi mahmah hi. Pasian’ Kammalte na lungsim uhah na koih masak uh leh na tate a hoihpenin thu na hilh thei ding uh hi.—Late 40:8.
1 NA TATE’N HONG HOPIH NOP NADINGIN OM IN
LAI SIANGTHO GENNA: “Thu kigen khempeuh hoihtakin ngai pahpah un. Ahi zongin pau pahpah kei un.” (James 1:19) Na tate in a lungsim sunga om thute no kiangah ol taka gen thei hi cih theisak nuam ding hi teh. Na tate’n a lungsim sunga om thute hong gennop ciang nangh lam pan na ngaihnop lam a theih ding uh kisam hi. Hong paupih nop theihtheih na’ng na bawl leh bek amau lam pan im loin thu hong gen ding uh hi. (James 3:18) Kam khauh tawh pau a, mawhna zong den na hih leh na tate’n a ngaihsutnate uh a mantakin hong gen ngam nawn lo ding uh hi. Tua ahih ciang tate tungah na lungduai inla it takpi na hih lam gen zel in.—Matthai 3:17; 1 Korin 8:1.
NA SEP THEIH DING
Na tate’n hong hopih nop ciang thu na ngaihpih theih nading kiging den in
Haksatna a tuak uh ciang bek hi loin manmanin hopih den in
2 A GENNOP TAKPI UH BANG HIAM CIH NATHEIH NADING HANCIAM IN
LAI SIANGTHO GENNA: “Thuhilhna a mang mite a maa vang ding.” (Paunak 16:20) Khat veivei na tate’n thu hong gen ciang a lungsim sunga om thute mantakin natheih nading hanciam in. Ahang pen khangno a tamzaw in uanggen thei uh a, mantakin gennuam nawn lo uh hi. “A thu za khin nai lopi-in dawnkikna pen haina le maizumna ahi hi.” (Paunak 18:13) Tua ahih manin heh pah kei in.—Paunak 19:11.
NA SEP THEIH DING:
Na tate gen khempeuh hehsuaka dawnpahna le a thugen laitak na paukhak loh ding khensat in
Amau kumzah ka phak lai-in ke’n bang ngaihsutna nei a, kei ading a thupi penin ka ngaihsut bang teng hiam cih na phawk in
3 TATE MAI-AH KITHUTUAK UN
LAI SIANGTHO GENNA: “Ka ta aw, na pa’ hong thuhilhna hoihtakin zui inla, na nu’ hong thugente ngai in.” (Paunak 1:8) Jehovah in tate a uk dingin nu le pate tavuan pia hi. Thu manga hong zahtak nading na tate thu na hilh ding uh kul hi. (Efesa 6:1-3) Nu le pate in “kithutuak” lohna le “lungsim, na ngaihsutna uh le na ngimna uh na kikhatsak” lohnate na tate’n ciamteh kha thei uh hi. (1 Korin 1:10) Tua ahih manin kithutuak lo na hih uh leh zong naupangte thei sak kei un. Tua hileh note hong zahtak suak ding uh hi.
NA SEP THEIH DING:
Naupangte koi bangin thuhilh ding cih kikumin thukimkhol un
Tate thuhilh ding tawh kisai na ngaihsutna uh a kibat kei leh na innkuanpih ii ngaihsutna na theih nading hanciam in
4 THU GEL IN
LAI SIANGTHO GENNA: “Na tate . . . Khristiante ngeina tawh kituakin taii-in hilhin pantah un.” (Efesa 6:4) Na tate amau thu-in hong pil tawm lo ding hi. Limtaka hun gelin pattah ding kisam a, tua sungah thu hilhin taii ding zong kihel hi. (Late 127:4; Paunak 29:17) Thu hilhin taii ding cihna in dan piak bek hi loin ba’hang tua bangin thu kikham hiam cih a theih nading genna zong kihel hi. (Paunak 28:7) Tua banah na tate’n Jehovah’ Kammal a it nading le Lai Siangtho thuhilhte a teltheih nading na hilh in. (Late 1:2) Tua hileh a sia le a pha a khentheihna uh hong khang semsem ding hi.—Hebru 5:14.
NA SEP THEIH DING:
Pasian pen kimuang thei a, a nungta Pasian hi cih na tate’n a theih ding kiciansak in
Na tate’n Internet le Social Network-te pan lawm nei a, gamtat siat ding a hanthawn thute thei-in a pelh theih nading hilh in. Nulepa mawhna a gamta nuam dingin hong bawlsia nuamte gal pan koici pelh ding cih a tel nading hoihtakin hilh in
“Naupang khat a neulai-in lampi man tawnsak in”