Meltheih Tanaute Tawh Kilem Theihna

Kitenna in innkuan thak khat kipan sak hi. Na nu le na pate uh a tawntungin it a, zahtak den ding ahih hang tu’n na innkuanpih pen leitungah nang ading a thupi pen mi khat hi ta hi. Tua pen sanggam unaupih te’n sanhak sa ding uh hi. Ahi zongin na innkuan thak hanciama na vak kawmin a langah na tanaute tawh na kilem theih nading Lai Siangtho thuhilhnate in hong huh thei ding hi.

1 TANAUTE TUNG LUNGSIM HOIH PUA IN

LAI SIANGTHO GENNA: “Na nu le na pa zahtak in.” (Efesa 6:2) Na kum tamta ahi zongin na nu le na pate a tawntungin pahtawi a, na zahtak ding kisam hi. Na innkuanpih zong ta mah ahih manin a nu le a pate thu a man’ ding kisam hi cih phawk in. “Itna neite in hazatna lungsim nei lo” uh hi. Tua ahih teh na innkuanpih in a nu le a pate tawh lungnuam taka a om pen cikmah hunin khasiat lawh kei in.—1 Korin 13:4; Galati 5:26.

NA SEP THEIH DING:

• “Na innkuanpih te’n hong en neu den” ahih kei leh “Na nu’n ka sep khempeuh cikmah hunin a hoihin hong gen ngei kei” cih kampaute na pelh in

• Na innkuanpih ii mun pan na muh theih nading hanciam in

2 A KISAP HUN CIANG NA KIP IN

LAI SIANGTHO GENNA: “Tua thu hangin pasal in a nu le a pa nusia-in a zi tawh kigawm a, amau tegel pum khat a bang uh hi.” (Piancilna 2:24) Zi ahih kei leh pasal na neih khit nangawnin zong na nu le na pa te’n nang tungah tavuan a nei lai-in kingaihsun khathei ding hi. Tua banah no innkuan vaite-ah zong a kisam sanga amau hong sai nuamzaw thei lai ding hi.

A lang nih a, nu le pate bangzah ciang no innkuan vai-ah kihel sak ding cih na nupa un khensatin itna tawh theisak un. Kam khauh pau loin siangtakin gen un. (Paunak 15:1) Kiniamkhiatna, dikna le lungduainate in tanaute tawh na kizopna hong hoihsak ding a, “khatlekhat kihuhna tawh na ki-it” suak ding uh hi.—Efesa 4:2.

NA SEP THEIH DING:

• Na innkuan vaite-ah tanaute hong kihel zelna nawngkai nasak leh dam takin na innkuanpih tawh kikum un

• Tua thu koi bangin siangsak ding cih no gel kithukimin khensat un