Ed lezot aprann konn Zeova

1. Ki mannyer ou santi ler ou vwar en etidyan Labib pe fer progre?

KI MANNYER ou santi ler en etidyan Labib i asiste renyon pour premye fwa, i konmans reponn, i konmans anons sa bon nouvel e pli tar i deside pour dedye son lavi avek Zeova? San dout ou vreman kontan. Byensir, Zeova i merit tou loner pour bann progre ki nou etidyan i fer. Nou loue Zeova ler nou vwar lafason ki i ed en dimoun pour fer progre spirityel.—1 Kor. 3:5-9; 3 Zan 3, 4.

2. Ki Zeova i anvi pour bann etidyan Labib? (1 Timote 2:3, 4)

² I lavolonte Bondye “ki tou sort kalite dimoun i ganny sove e ganny konnesans egzakt lo laverite.” (Lir 1 Timote 2:3, 4.) Zeova i anvi ki dimoun i aprann konn li ek bann keksoz merveye ki i’n fer e pou fer. (Zer. 9:24) Pour fer sa, sa dimoun i bezwen ganny konnesans egzakt. Sa mo Grek ki’n ganny tradwir “konnesans egzakt” pa pe refer avek ler en dimoun in konn bann lenformasyon lo Bondye me dapre en spesyalis Labib, sa mo pe refer avek konnesans ki “motiv en dimoun pour fer tou sa ki i kapab pour vin pros avek Bondye.” Alor, ler en etidyan Labib i aprann konn Zeova, sa konnesans i fer li sanz lafason ki i viv son lavi e i fer li ganny sa loportinite pour ganny “lavi eternel.”—Zan 17:3.

3. Ki nou pou vwar dan sa lartik?

³ Zeova in donn nou sa privilez pour ed lezot aprann konn li. Dan sa lartik, nou pou reponn sa bann kestyon swivan: Akoz bann etidyan Labib i bezwen aprann konn Zeova byen? Ki mannyer nou kapab ansenny bann etidyan Labib pour konn personnalite Zeova e ki mannyer nou kapab ed zot pour servi sa ki zot konnen lo Zeova?

ED SA ETIDYAN LABIB POUR APRANN KONN ZEOVA BYEN

4. An armoni avek Mark 12:30, ki nou lobzektif prensipal ler nou pe fer en letid Labib?

⁴ Zezi ti dir ki sa pli gran komannman i pour kontan Zeova avek tou nou leker, nanm, lespri ek lafors. (Lir Mark 12:30.) En etidyan Labib i bezwen aprann konn Zeova pour li kapab kontan li. Nou anvi ki nou etidyan Labib i dedye son lavi avek Zeova, pa avek nou, pa avek serten lansennyman Labib oubyen avek en lorganizasyon. Alor, ler nou pe fer en letid Labib, nou lobzektif prensipal i pour ed nou etidyan pour konn Zeova e kontan li.

5. Ki lanmour pour Zeova pou motiv en etidyan Labib pour fer?

⁵ Lanmour ek lobeisans i relye avek kanmarad. Ler en etidyan i aprann konn Zeova e i kontan li, i pou osi anvi obeir li. Zezi ti dir: “Pour ki lemonn i konnen ki mon kontan mon Papa, mon pe fer sa ki mon Papa in donn mwan lord pour fer.” (Zan 14:31) Dan menm fason, plis ki okenn lezot keksoz, i sa lanmour ki en etidyan Labib i annan pour Zeova ki pou motiv li pour obeir e reste fidel avek Zeova.—1 Zan 5:3.

6. Ki mannyer ler en etidyan Labib i aprann konn Zeova, sa pou ed li fer bann bon desizyon? Donn en legzanp.

⁶ I tre probab ki en etidyan Labib ki aprann konn Zeova byen pou fer bann desizyon ki saz. Annou vwar en legzanp. En pilot pa aprann pour anmenn en avyon zis par lir bann lareg konsernan anmenn avyon oubyen par fer en legzanmen. Me i osi bezwen anmenn en avyon plizyer fwa. Avek letan, i pou aprann ki mannyer pour anmenn en avyon dan diferan kondisyon letan e lefe ki son desizyon pou annan lo lafason ki sa avyon i anvole. Dan menm fason, en etidyan Labib pou aprann konn Zeova pa zis atraver son letid me osi ler i vwar sa ki arive ler i fer bann desizyon ki an armoni avek bann prensip Labib. Anmezir ki i aprann konsernan Zeova e i vwar ki mannyer son Papa ki dan lesyel i ed li, i pou kapab fer bann bon desizyon dan nenport sirkonstans.

7. Ki mannyer lefet ki Zozef ti konn Zeova byen, sa ti ed li pour fer en bon desizyon?

⁷ Zozef ti konn Zeova byen e sa ti ed li ler madanm Potifar ti esey sedwir li. San dout depi ler i ti ankor zanfan, Zozef ti’n tann zistwar konsernan Adan ek Ev e konsernan Abraam ek Sara. (Zen. 2:24; 20:3, 6) Sa bann zistwar ti ed Zozef konpran ki mannyer Zeova i vwar maryaz ek relasyon seksyel, ki en kado sorti kot Zeova. Zozef ti aprann konn Zeova sitan byen ki i ti refize dormi avek madanm Potifar e i ti dir li: “Ki mannyer mon kapab fer en keksoz sitan mal e fer pese kont Bondye?” (Zen. 39:7-9) Zozef ti konnen kwa ki byen e kwa ki mal dan lizye Bondye. I ti konpran kwa ki ti pou fer son Bondye sagren. Sa ti fer ki Zozef ti fer sa bon desizyon. Si nou ed nou etidyan Labib pour aprann konn Zeova byen e pour konn personnalite Zeova, zot osi zot pou fer bann desizyon ki fer li plezir.

ANSENNY LI KONSERNAN PERSONNALITE ZEOVA

8. Ki mannyer ou kapab servi liv Viv ere pour touzour! pour ed en etidyan Labib pour aprann konn Zeova?

⁸ Ki mannyer ou kapab ansenny en etidyan Labib pour konn personnalite Zeova? Zeova ti ed Zob pour aprann plis konsernan li par demann Zob plis ki 50 kestyon. (Zob 38:1–41:34) Nou osi nou kapab demann kestyon. Bann kestyon ki dan liv Viv ere pour touzour! in ganny mete pour ed en etidyan Labib pour ptitapti konn personnalite Zeova. (Vwar bwat “Bann kestyon ki ed nou pour ansennyen.”) Alor, servi sa bann kestyon pour ed ou etidyan aprann konn Li.

9-10. (a) Kwa ki pou ed bann etidyan Labib pour ganny byenfe avek zot lektir Labib? (Zak 5:11) (b) Donn en legzanp lo ki mannyer en resi i kapab montre sa ki fer Zeova plezir oubyen sa ki pa fer Zeova plezir.

⁹ Ler nou konmans etidye Labib avek en dimoun, nou ankouraz li pour lir Labib toulezour.a Ki mannyer nou kapab ed li pour ganny bann byenfe ler i lir Labib? Nou kapab sizere ki sak fwa ki zot lir en resi dan Labib, zot reflesir lo akoz Zeova in enkli sa resi dan son Parol e ki bann kalite ki Zeova i annan ki nou kapab vwar dan sa resi. Remarke ki mannyer disip Zak ti fer sa ler i ti refer avek zistwar Zob. Zak pa ti zis koz lo en kalite ki Zob ti annan setadir son landirans me i ti osi koz lo bann kalite ki Zeova i annan parey konpasyon ek pitye.—Lir Zak 5:11.

¹⁰ Nou anvi nou etidyan i konpran ki mannyer sak resi ki dan Labib i montre sa ki fer Zeova plezir oubyen sa ki pa fer li plezir. Par egzanp, petet nou etidyan Labib in get sa latab ki annan pour tit “Konmans lir Labib” ki dan liv Viv ere pour touzour! e i dir nou ki i’n swazir pour lir sa zistwar konsernan Danyel dan trou lyon. Nou kapab ankouraz li pour medit lo bann kestyon parey: ‘Akoz Zeova ti sov Danyel? Ki sa i ansenny mwan konsernan sa ki fer Zeova kontan?’ (Dan. 6:10, 22) I kapab osi demann son lekor: ‘Ki ti arive avek bann zonm ki ti akiz Danyel? Ki sa i ansenny mwan konsernan bann keksoz ki pa fer Zeova plezir?’ (Dan. 6:4, 5, 24) Apre sa, i kapab reflesir lo lezot kalite ki Zeova i annan ki i kapab vwar dan sa resi.—Dan. 6:26, 27.

11. Ki mannyer nou kapab ed nou etidyan Labib pour vwar son letid Labib konman en kado sorti kot Zeova?

¹¹ Nou kontan ler nou etidyan Labib i apresye bann byenfe ki i gannyen avek son letid Labib. Me nou devret ed li pour konpran ki sa bann byenfe ki i pe gannyen i sorti kot Zeova, ki sa Gran Ansenyan. (Iza. 30:20, 21) I kapab ki nou etidyan i remersye nou pour sa ki i pe aprann e zot menm kapab dir ki zot kontan lafason ki nou ansenny zot. Menm si i pa mal pour li dir sa, nou devret toultan fer li rapel ki i devret glorifye e remersye Zeova pour tou sa ki i pe aprann.

ED LI POUR SERVI SA KI I KONNEN LO ZEOVA

12-13. Ki mannyer ler en etidyan i aprann konn Zeova, sa i ed li ler i lir en resi ki i vwar difisil pour konpran? (Vwar portre.)

¹² Pour ganny bann byenfe avek konnesans egzakt, nou bezwen servi sa ki nou konnen lo Zeova. Alor ki mannyer ou kapab ed ou etidyan pour fer sa? En fason ki ou kapab fer sa i pour montre li ki mannyer pour reflesir lo sa ki i konnen lo Zeova ler i pe lir en resi Labib ki i vwar difisil pour konpran. Par egzanp, ler i pe lir lo lafason ki Zeova ti ziz bann dimoun dan lepase, i kapab mazinen akoz Zeova ti detrir serten dimoun me i ti les lezot viv. Ki mannyer ou kapab ed ou etidyan pour rezonn dan sa bon fason?

¹³ Ou kapab ankouraz ou etidyan pour reflesir lo sa ki i’n aprann lo Zeova. Par egzanp, ou kapab sizere ki i demann son lekor, ‘Ki kantite lavi i presye pour Zeova? (2 Pyer 3:9) Ki keksoz presye i’n fer pour sov nou menm si nou fer pese? (Efe. 2:4, 5) Eski Zeova i pini dimoun ki pa merite ganny pini? Me si en dimoun i merite ganny pini, eski i pa pou pini li?’ (Egz. 34:6, 7) Parfwa, en resi Labib pa donn bann detay ki pou ed nou konpran akoz Zeova in reazir dan en serten fason. Me nou pa bezwen sa bann detay. Nou konn nou Bondye e nou annan konfyans ki nou Bondye i toultan fer sa ki byen.

14. Ki mannyer ou kapab ed en etidyan si i vwar li difisil pour annan en bon lanmitye avek en dimoun dan kongregasyon?

¹⁴ Annou vwar en lot fason ki en etidyan Labib i kapab servi sa ki i konnen lo Zeova. Meton ou etidyan pe asiste renyon e i vwar li difisil pour annan en bon lanmitye avek en dimoun dan kongregasyon. Petet en frer oubyen en ser in ofans li. Ankouraz ou etidyan pour reflesir lo lafason ki Zeova i vwar nou bann frer ek ser. Par egzanp, i kapab demann son lekor: ‘Ki sakrifis Zeova in fer pour montre ki i kontan zot? (Zan 3:16) Ki kantite i enportan pour Zeova ki son bann serviter i ini ansanm? (Ps. 133:1) Ki mannyer i santi ler nou fer zefor pour gard sa linite?’ (2 Kor. 13:11) Ed ou etidyan pour konpran ki Zeova pou kontan ler nou konsantre lo bann bon kalite ki lezot i annan olye lo zot bann defo.

15-16. (a) Ler en etidyan Labib i annan en desizyon enportan pour fer, ki mannyer i kapab swiv legzanp Zezi? (Zan 8:29) (b) Ki mannyer Marianne ti ed son etidyan pour fer en bon desizyon? (Vwar portre.)

¹⁵ Ou osi kapab ed ou etidyan pour servi sa ki i konnen lo Zeova pour fer bann bon desizyon. Ou kapab premyerman montre li leson 35 dan liv Viv ere pour touzour! ki annan pour tit “Ki mannyer nou kapab fer bann bon desizyon?” Me ki ou pou fer si ou etidyan in priye e in fer resers me i ankor pa konnen ki pour fer? Petet i pa asire ki prensip Labib ki aplikab dan son sityasyon. Ou kapab sizere ki i medit lo legzanp Zezi. Ki mannyer Zezi ti fer bann desizyon? Zezi ti dir: “Mon toultan fer sa ki fer [mon Papa] plezir.” (Lir Zan 8:29.) Ankouraz ou etidyan pour demann son lekor: ‘Dapre sa ki mon’n vwar dan mon bann resers e dapre sa ki mon’n aprann lo Zeova, ki desizyon ki pou fer li plezir?’ Nenport desizyon ki fer Zeova plezir i en bon desizyon.

¹⁶ En madanm ki reste Chile ki ti pe etidye Labib ti bezwen fer en desizyon enportan. Son fanmir ti pe met presyon lo li pour aksepte en travay ki pey byen me ki ti pou fer li mank renyon. En ser ki apel Marianne ki ti pe fer letid avek li i dir: “Mon ti ankouraz li pour reflesir lo ki mannyer son desizyon ti pou fer Zeova santi. Eski i pou fer li zwaye oubyen sagren? Mon ti osi ankouraz li pour koz avek Zeova spesifikman lo sa sityasyon e pour vwar ki mannyer Zeova pou reponn son lapriyer. I pa ti aksepte sa travay e pli tar i ti vwar en lot louvraz ki ti pou permet li pour asiste tou son renyon.” Remarke ki Marianne pa ti dir son etidyan ki pou fer me i ti ed li pour medit lo sa ki i deza konnen lo Zeova. Sa ti fer ki sa leksperyans ti ed sa etidyan pour vin pli pros avek Marianne me osi avek Zeova. Marianne i dir sa konsernan son etidyan: “I’n aprann ki Zeova i pran swen avek nou si nou met son ladorasyon premye.”

ZEOVA I BENI BANN KI’N APRANN KONN LI BYEN

17. Kwa ki pli enportan pour nou etidyan Labib aprann?

¹⁷ Nou etidyan i aprann en kantite keksoz enportan pandan zot letid Labib. Bann etidyan i aprann bann lansennyman de baz parey sa ki arive avek bann dimoun ki’n mor, ranson e konsernan Rwayonm. Zot osi aprann konsernan lafason ki lorganizasyon i organize par egzanp, konsernan renyon, konsernan sa ki bann ansyen i fer e rol Konsey Direkter. Me nou anvi ki nou etidyan i aprann plis ki sa. Nou anvi ki zot aprann konn Zeova byen.

18. Ki benediksyon bann ki aprann konn Zeova pou gannyen?

¹⁸ I en privilez pour nou ansenny lezot pour aprann konn Zeova. Menm la konmela, bann ki aprann konn Zeova e ador li pe viv sa lavi pli ere ki zot kapab annan dan sa lemonn. (Ps. 25:12-15) Dan lavenir, tou bann ki “konn sa enn ki vre” setadir Zeova pou viv pour touzour. (1 Zan 5:20) Me i annan en lot benediksyon ki nou kapab gannyen la konmela. Labib i dir ki “Bondye i konn” bann ki fer zefor pour aprann konn li e kontan li. (1 Kor. 8:3) Nou Bondye tou pwisan i vwar nou e i konsider nou konman son zanmi. Sa i en zoli rekonpans pour bann ki aprann konn sa sel vre Bondye.