Mon ti les Zeova form mwan

Mon ti remark en kantite keksoz me sa ki ti enpresyonn mwan plis i bann dimoun. Bann zenn frer ek ser isi ti pe fer bann travay ki serten dimoun ti pou konsider konman pa enteresan. Zot pa ti pe ganny en kantite latansyon e ganny felisite me kantmenm sa, zot ti zwaye e satisfe. Zot legzanp ti ansenny mwan ki savedir pour servi Zeova avek limilite.

Pour plizyer lannen, Zeova in form mwan pour vin en pli bon serviter pour li. Me premyerman, les mwan rakont zot ki mannyer mon ti rod laverite ler mon ti en Boudis.

MON TI ROD SA VRE BONDYE LER MON TI ANKOR BYEN ZENN

Mon ti ne e grandi Chicago, Illinois, Leta-z-ini e mon ti premye parmi kat zanfan. Mon paran ti’n kit Zapon e al reste Chicago parski zot ti krwar ki lavi ti pou pli meyer dan Leta-z-ini. Zot ti anvi ki zot zanfan i ganny sa meyer ledikasyon e reisi dan lavi.

Mon paran ti fidel dan zot larelizyon Boudis. Mon manman ti’n grandi dan en lakour ki ti annan en tanp Boudis. Son papa ek son de frer ti bann mwann (monks) Boudis. Alor, larelizyon Boudis ti vreman enportan dan nou fanmir ler mon ti pe grandi. Konman mon ti ariv dan lakour apre lekol mon ti bril lansan e ofer diri ek delo avek nou stati Boudis. Dan Dimans nou ti al kot en tanp Boudis kot nou ti sant bann kantik avek en stati ki ti parey sa enn kot nou me i ti pli gro e i ti kouver avek lor.

Mon rapel ler mon ti annan apepre set an, mon ti pe get sa stati ki nou ti annan dan lakour e mon ti mazinen, ‘Ki pou arive avek mwan ler mon mor?’ Dan larelizyon Boudis, mon ti’n aprann ki mon ti pou vin en lespri ler mon mor. Mon ti realize ki en zour mon ti pou mor. Mon ti pou kapab egziste konman en lespri me mon pa ti pou rezouir lavi konman en imen. Sa ti fer mwan vreman sagren. En sel kou mon ti santi mwan vreman dekouraze.

Ler mon ti annan apepre 15 an, mon ti konmans santi ki bann rityel Boudis ki mon ti pratike pa ti fer sans. I ti annan en keksoz ki ti manke dan mon lavi. (Mat. 5:3) Mon ti asire ki i ti bezwen annan en Bondye tou pwisan ki vivan. Mon ti anvi konn li. Mon ti mazinen ki petet Labib ti pou kapab reponn mon bann kestyon alor mon ti aste en Labib King James Version ki ti dezyenmmen dan en lafet Boudis, ki ti en landrwa drol pour aste en Labib.

Ler mon ti annan 17 an, en frer ki apel Wilson Bashou ti apros mwan ler mon ti pe marse avek mon lisyen. I ti demann mwan: “Eski ou konnen ki Bondye in promet pour lavenir?” Sa kestyon ti fer nou fer en gran diskisyon lo Labib. Wilson ti lir Revelasyon 17:1 e apre i ti demande, “Ki sa ‘bokou delo’ ki sa prostitye pe asiz lo la i reprezante?” Mon pa ti konn larepons. I ti montre mwan verse 15, ki dir ki sa bann delo i reprezant bann dimoun. Mon ti enpresyonnen pour aprann ki bann Temwen Zeova i servi Labib antye pour ed zot konpran bann parti dan Labib ki ti difisil pour konpran. Avan i ti ale, Wilson ti donn mwan en liv ki apel The Truth That Leads to Eternal Life. Sa pti liv ble ti sanz mon lavi.

Dis zour pli tar, mon ti asiste mon premye renyon kot Lasal Rwayonm. Mon pa pou zanmen oubliy sa bon lakey ki mon ti gannyen. Depi sa zour mon’n asiste tou renyon. Apre sa, Wilson ti konmans fer letid Labib avek mwan. Mon ti sitan kontan pour aprann konn plis lo Labib ki parfwa nou letid ti dire pour wit erdtan. Mon paran ti enkyet e zot ti opoz mon letid en kantite. Me pli mon ti etidye, pli mon ti asire ki sa ti laverite. Mon ti batize an 1983.

MON TI KIT LINIVERSITE POUR VIN EN PIONYE

Ler mon ti pe al batize, mon ti pe etidye kot en liniversite renonmen pour annan en karyer dan domenn medsin. Mon paran ti’n fer en kantite sakrifis pour mwan kapab ganny sa ledikasyon. Mon ti’n kapab kontinyen mon letid liniversite me mon ti anvi donn Zeova mon meyer e servi li a plen tan.

Mon papa ti dir mwan: “Si ou kit liniversite, ou pa pou kapab kontinyen reste isi!” Mon ti sagren e konfize. Mon ti kontan mon paran e mon pa ti anvi dezapwent zot. Alor, souvan mon ti al deor dan lakour lekol tar aswar e mon ti priye. Mon ti dir: “Silvouple Zeova, ed mwan pour mwan kapab fer sa desizyon.” Ler mon ti finalman deside pour mwan kit liniversite, mon papa ti pous mwan. Mon ti telefonn Wilson pour dir li ki ti’n arive. I ti envit mwan pour vin reste kot li. Mon ti pran en bis pour al kot li e tou mon bann keksoz ti dan zis en sak. Mon rapel ki en sel kou, mon ti santi mwan vreman kalm. Mon ti konnen ki mon ti’n fer sa bon desizyon.

Mon ti santi parey en zwazo ki ti’n ganny libere dan en kazo. Mon ti finalman lib pour konsantre dan sa travay predikasyon. Mon ti konmans fer pionye an 1984.

Pandan bann lannen ki mon ti fer pionye ordiner, Zeova ti ed mwan devlop bann kalite, parey perseverans. Mon rapel en zour, mon ti santi ki mon ti annan bann bon rezon pour pa al predikasyon. Mon ti dekouraze parski mon pa ti’n ganny personn pour al predikasyon avek mwan son apremidi. Me kantmenm sa, mon ti ale. Apre apepre de erdtan, mon ti fer en dernyen lakaz dan en batiman ki annan apartman. Mon ti fatige e mon ti santi mwan tousel e i paret ki lapli ti pe al tonbe. Mon ti mazin dan mwan menm, ‘Eski mon devret arete?’ Ler mon ti pe mont peron pour al lo trwazyenm letaz, mon ti vwar en zenn msye Filipino pe debout devan mwan. Mon ti mazinen, ‘I definitivman pa enterese.’ Me i ti enterese! Mon ti konmans en letid Labib avek sa msye e i ti vin mon frer spirityel.

MON TI APRANN BANN LESON ENPORTAN DAN BETEL BROOKLYN

Apre ki mon ti’n reste avek Wilson pour de-z-an, mon ti ganny envite pour al dan Betel Brooklyn an 1985. Parey mon ti dir o konmansman, mon ti ganny mete dan seksyon Bindery. En zour ler mon ti pe travay lo en masin ki enprim tit lo kouvertir bann liv, mon ti fer en fot e mon ti gat plizyer santenn kouvertir liv par aksidan. Bann frer ti dir mwan dir sirveyan sa ki ti’n arive. Mon ti donn li tou bann rezon akoz mon ti’n fer sa fot me i ti annan en keksoz enportan ki mon pa ti dir. Sa sirveyan ti dir mwan byen zantiman: “I toultan bon pour demann leskiz.” Dan sa moman, mon ti aprann ki i enportan pour admet ki mon’n fer en fot e pour dir, “Eskiz mwan.”

Mon ti osi aprann ki mannyer pour ed lezot pli byen par obzerv bann frer ek ser fidel ki ti pli aze dan lafanmir Betel. En fwa, Frer Milton Henschel, ki ti en manm Konsey Direkter, ti pe asiz lo nou latab pour dezennen. Sa zour i ti annan plis dimoun dan lasal-a-manze ki bann frer ti pe ekspekte e bann ki ti pe servi manze ti anba presyon pour distribye manze. Nou, ki ti pli zenn lo latab, nou ti konmans konplent ki manze ti pe ganny anmennen tro dousman. San dir nanryen Frer Milton Henschel ti leve e ansanm avek bann ki ti pe servi manze ti konmans met bann brok delo ek bann lasyet dipen ek diber lo latab. Sa aksyon ki ti’n ganny fer avek limilite ti fer mwan rapel ki mannyer Zezi ti servi son bann zapot e mon pa pou zanmen oubliy sa.—Zan 13:3-5.

“OU DEVRET APRANN KOZ LANGAZ ZAPONNEN!”

An 1987, mon ti al Zapon e mon ti enpresyonnen ler mon ti vwar devouman ek limilite bann proklanmater. Mon ti anvi ed zot me mon pa ti’n aprann ki mannyer pour koz langaz Zaponnen. En ser ki ti dan Betel ki ti apel Michiko Oda ti get mwan drwat dan mon lizye e dir: “Ou devret aprann koz langaz Zaponnen.” Sanmenm ki mon ti fer. Mon pa ti realize ki konsey sa ser ti pou sanz mon lavi.

Detrwa mwan pli tar, mon ti ganny anvoye dan en kongregasyon Zaponnen ki New York. Lefet ki mon ti’n aprann koz langaz Zaponnen, sa ti donn mwan bokou loportinite pour servi Zeova. An 1989, mon ti asiste mon premye lasanble an Zaponnen ki ti ganny fer Los Angeles, Kaliforni. En ser ki ti apel Miwako Onami, ki ti en pionye e ki ti zwe en rol dan en dram ti kaptir mon latansyon.

An 1992, nou de Miwako, nou ti marye e nou ti ganny sa privilez pour servi ansanm konman en koup dan Betel Brooklyn. Miwako ti toultan mazin lezot, enterese avek zot e toultan pare pour ede. Son legzanp in ed mwan pour tret lezot pli byen. I en kado sorti kot Zeova. I en sours lazwa ek rekonfor pour mwan.

BIRO BRANS ZAPON EK SA TRAVAY PREDIKASYON

Pli tar, tou le de paran Miwako ki ti reste Zapon, ti tonm malad. Alor nou ti ganny transfer dan biro brans Zapon pour ki nou pli pre avek zot pour pran swen avek zot. Nou ti al reste laba an 1999.

Lafanmir Betel Zapon ti byen akey nou e nou ti adapte byen dan nou nouvo lakour. Mon ti ganny formen plis ankor par imit bann kalite pozitif ki bann frer ek ser Zaponnen ti annan, par egzanp zot gran zenerozite ek lospitalite. Bann frer ek ser ti serye dan zot travay. Zot ti osi travay byen konman en group. Akoz sa? Dapre kiltir Zaponnen, i pli enportan pour travay ansanm avek lezot dan larmoni ki pour travay ou tousel pour akonpli en keksoz. Zot bon legzanp ti ankouraz mwan pour demontre limilite e travay avek lezot e pour apresye ki mannyer en pti travay ki mon fer i kontribye dan plan Zeova.

Me vi ki kiltir ti diferan, parfwa i ti difisil pour mwan konpran akoz bann frer Zaponnen ti fer keksoz dan en serten fason. Mon ti bezwen aprann pour demontre pasyans e pour pa tro reakte. Avek letan, mon ti aranz mon fason panse e mon ti realize ki Zeova i kapab beni okenn desizyon tan ki nou swiv gidans ki i donn nou atraver son lorganizasyon. A lafen dizour, Zeova i sa enn ki fer nou travay reisi.

Mon souvan konpar sa formasyon ki mon’n gannyen avek sa formasyon ki Moiz ti gannyen. Pandan sa 40 an ki Moiz ti en berze, Zeova ti ed li devlop limilite. Parey Moiz, mon ti’n ganny en bon ledikasyon. Mon ti’n les sa ledikasyon fer mwan vin orgeye e mon ti depan lo mon prop lekor. Betel in ansenny mwan pour annan limilite e pour depan lo Zeova. Zis parey Zeova ti pran letan pour form Moiz, pandan plizyer lannen, Zeova in fer menm parey avek mwan.

Nou ti pran swen avek paran Miwako pour apepre 24 an ziska ler zot ti mor. Nou ti bezwen telefonn zot ek zot dokter souvan. I ti annan bann moman kot nou ti enkyet en kantite e nou ti al lopital en kantite fwa. Lasante Masako, manman Miwako ti deteryore e avek letan i pa ti kapab tro marse. I pa ti fasil pour Masako asiste renyon dan Lasal Rwayonm e pour al predikasyon. Pandan bann dernyen semenn avan i mor, i ti bezwen servi en wiltyer. Me malgre tousala, i pa ti zanmen aret kontan Zeova. I ti toultan pe sourir ler i ti koz lo laverite. Nenport keksoz ki i ti pas ladan, Masako ti kontinyen servi Bondye e reste zwaye. Sa i en legzanp pour mwan e mon anvi fer parey li.

An 2024, nou ti eksperyans en gran sanzman. Apre ki nou ti’n servi dan Betel pour plis ki 30 an, nou ti ganny demande pour al servi konman pionye. Ozordi, nou pe servi konman bann pionye spesyal lo zil Okinawa e nou annan sa privilez pour anons sa bon nouvel avek bann fanmir ki reste lo en baz militer ki pa tro lwen avek nou. Sa bon formasyon ki nou’n gannyen Betel in ed nou pour adapte pli byen dan nou nouvo servis. Nou esey gard en bon routin e servi byen nou letan par reste konsantre dan predikasyon e travay dir. Zeova in beni nou avek bann etidyan Labib ki’n vin parey en fanmir pour nou. Deplizanpli nou pe vwar akoz i enportan pour kontan dimoun. Nou de Miwako, nou remersye Zeova toulezour pour sa zoli servis.

MON DETERMINEN POUR KONTINYEN GANNY FORMEN PAR ZEOVA

Menm si mon fanmir i nepli opoz mwan, zot pa ankor zwenn ansanm avek mwan dan ladorasyon pir. Kantmenm sa, Zezi ti promet ki bann ki kit zot fanmir pour vin son disip pou ganny 100 fwa plis frer ek ser la konmela ki parey en fanmir. (Mark 10:29, 30) I sanmenm ki’n arive avek mwan. Tou bann fanmir partou dan lemonn ki’n kontan mwan e ki’n pran swen avek mwan konmsi mon form parti zot fanmir i tro bokou pour konte.

Mon ankor annan sa menm liv Truth ki Wilson ti donn mwan. Sa liv ble i fer mwan rapel ki mannyer Zeova in demontre konpasyon anver mwan e les mwan trouv li. (1 Kron. 28:9) Mon determinen pour kontinyen les li form mwan e pour ed lezot aprann laverite ki anmenn ver lavi eternel.