Eski ou pe aprann konn Zeova pli byen?

1. Ki mannyer nou santi ler nou reflesir lo konnesans, lasazes ek bann keksoz ki Zeova in fer?

ESKI ou’n deza reflesir lo sa kantite konnesans ki Zeova i annan, lo ki degre saz i saz oubyen lo sa kantite keksoz ki i’n fer? Ler nou mazin nou Kreater, nou vreman emerveye. Petet ou kapab santi parey zapot Pol ki ti ekri: “Pa larises, lasazes ek konnesans Bondye i vreman gran! Lekel ki kapab konpletman konpran bann desizyon Bondye e ki sennla ki kapab vreman konpran sa ki i fer?”—Rom. 11:33, 34, not.

2. Akoz nou asire ki nou kapab aprann konn Zeova?

² Menm si nou pa pou zanmen konn tou keksoz konsernan Zeova, i posib pour konn serten keksoz lo li. Lerwa David ti dir son garson, Salomon: “Aprann konn Bondye ou papa. Servi li avek tou ou leker . . . Si ou rod li, i pou les ou vwar li.” (1 Kron. 28:9) Plizyer santenn lannen pli tar, zapot Zan ti fer bann Kretyen rapel ki zot annan sa abilite pour “konn sa enn ki vre.” (1 Zan 5:20) Osi, Zezi ti dir ki konnesans lo Zeova i disponib pour “bann ki Garson i anvi ansenny zot lo son Papa.”—Mat. 11:27.

3. Ki nou pou vwar dan sa lartik?

³ Tou bann ki’n dedye zot lavi avek Zeova i deza konn en kantite keksoz lo li. Kantmenm sa, nou pa zanmen aret “aprann konn” Zeova. (Zan 17:3; vwar not letid.) Nou kapab toultan aprann plis konsernan sa ki fer li zwaye e lo lafason ki nou kapab devlop plis konfyans dan li. Aprezan, annou vwar trwa kestyon ki nou tou nou devret reflesir lo la nenport ki kantite letan ki nou’n servi Zeova: Ki i vedir pour aprann konn Zeova? Akoz nou devret kontinyen aprann konn li pli byen? Ki mannyer nou kapab aprann konn li pli byen?

KI I VEDIR POUR APRANN KONN ZEOVA?

4. Ki i enplike pour aprann konn Zeova?

⁴ Nou aprann ki i enplike pour aprann konn Zeova par reflesir lo sa ki i ti dir konsernan bann Zwif ki ti pou retournen sorti Babilonn. Zeova ti promet: “Mon pou donn zot en leker pour ki zot konnen ki mwan mon Zeova.” (Zer. 24:7) Sa bann Zwif ti deza konn serten keksoz lo Zeova. Me bann zefor ki zot ti pou fer pour aprann konn Zeova ti pou bezwen enplik zot leker enkli zot santiman ek motivasyon. En liv resers ti dir ki “i annan en gran diferans ant konn konsernan Bondye e konn Bondye. Nou kapab konpar sa avek sa diferans ki i annan ant lir konsernan lanmour e tonm anmoure avek en dimoun.” I pa ase pour zis konnen ki Zeova i annan en non e ki i Bondye. Nou anvi konn sa Personnaz ki annan sa non.

5. Ki nou kapab aprann avek Lerwa Zosya konsernan ki i vedir pour aprann konn Zeova?

⁵ Anmezir nou aprann konn Zeova, nou aprann kwa ki i kontan e kwa ki i pa kontan. Pour nou konpran sa, annou vwar legzanp Lerwa Zosya. Labib i dir: “Dan wityenm lannen ki i ti lerwa, ler i ti ankor en zenn garson, i ti konmans rod Bondye David son zanset.” (2 Kron. 34:3) Me Zosya pa ti zis etidye. I ti osi aplik sa ki i ti aprann. Atraver profet Zeremi, Zeova ti dir ki Zosya ti “defann lazistis ek ladrwatir” e ki i ti defann bann dimoun ki ti pe soufer ek bann pov. Apre Zeova ti osi dir: “Pa sanmenm ki en dimoun i fer ler i konn mwan?”—Zer. 22:15, 16.

6. Dapre Psonm 9:10, ler nou aprann konn Zeova, ki lefe sa pou annan lo nou?

⁶ Lir Psonm 9:10. Pli nou aprann konn Zeova, pli nou pou annan konfyans dan li. I sanmenm ki ti arive avek zapot Pol. Pandan ki i ti dan prizon pour sa dernyen fwa e pa bokou letan avan i ganny touye, i ti ekri: “Mon pa onte. Parski mwan mon konn sa Enn ki mon krwar ladan.” (2 Tim. 1:12) Sa ki Pol ti’n aprann e eksperyanse dan son lavi, ti fer li annan konfyans total dan Bondye. En not letid pour sa verse i dir: “Pol . . . ti annan konfyans ki Zeova pa pou oubliy li ek lefet ki i ti’n reste fidel ziska ‘sa zour’ ki i pou resisit li.”

AKOZ NOU DEVRET KONTINYEN APRANN KONN ZEOVA?

7. Ki i kapab arive apre ki nou’n servi Zeova pour plizyer lannen?

⁷ Anmezir letan i pase, i kapab ki nou pa fer otan zefor pour aprann konn Zeova parey ler nou ti fek aprann konsernan li. Akoz? Ler nou lir Labib lo nou menm oubyen avek lezot pandan renyon, i kapab ki nou tant pour konsantre lo lafason ki sa lenformasyon i kapab ed nou dan bann fason pratik oubyen ki mannyer nou kapab servi sa lenformasyon pour ed lezot. Sa i byen parski Labib i ankouraz nou pour fer sa. (2 Tim. 3:16, 17) Me Labib i osi ansenny nou konsernan son Loter. (Ps. 25:8-10) Nou pa devret sitan pe konsantre lo ki mannyer sa mesaz ki dan Labib i kapab ed nou oubyen lezot, ki nou pa demann nou lekor, ‘Ki sa lenformasyon i ansenny mwan konsernan Zeova?’a

8. Ler nou aprann konn Zeova pli byen, ki lefe sa i annan lo nou lanmitye avek li? (Psonm 73:24-28)

⁸ Anmezir nou aprann konn Zeova pli byen, nou lanmitye avek li pou vin pli for. Par egzanp, ki mannyer ou santi anver Zeova apre ki ou’n fer ou lektir Labib pour lazournen, get en progranm Televizyon JW oubyen asiste en lasanble? Souvandfwa, nou santi nou pli pros avek nou Papa ki dan lesyel. Akoz? Parski nou’n aprann plis keksoz lo li. Sa i fer nou loue li e remersye li. Nou santi parey sa psalmis ki ti medit lo lafason ki Zeova i pran swen avek li e ki apre i ti dir: “Bondye i redonn mwan lafors e i mon par pour touzour.” (Lir Psonm 73:24-28.) Tou sa ki nou fer pour aprann konn Zeova, i fer nou pli rekonesan pour sa lanmitye presye ki nou annan avek li.

9. Ler nou “depan lo” Zeova, ki lefe sa pou annan lo nou desizyon? Donn en legzanp.

⁹ Labib i dir nou “depan lo” Zeova. (Prov. 3:5, 6) Sa i vedir ki nou reflesir lo sa ki nou’n aprann lo li e lo lefe ki nou aksyon i annan lo li. Sa pou ed nou fer bann pli bon desizyon. Annou vwar en legzanp ki pou ed nou konpran sa. En kantite frer ek ser i gard portre zot konzwen lo zot biro, dan zot pers oubyen lo zot telefonn. Sa i ed zot pour mazin zot konzwen souvan e i fer zot rapel ki zot kontan zot konzwen en kantite. I osi ed zot pour fer bann desizyon ki zot konnen pou fer zot konzwen plezir e pour pa fer nanryen ki pou bles li. Dan menm fason, pli nou mazin Zeova souvan, pli nou pou fer bann desizyon ki fer li plezir.—Ps. 19:13, 14.

10. Anmezir nou aprann konsernan Zeova, ki nou pou kapab fer?

¹⁰ Nou’n ganny kree dan resanblans Zeova e sa i fer ki nou annan sa abilite pour demontre bann kalite ki i annan. (Zen. 1:26) Pli nou aprann lo bann kalite ki Zeova i annan, sa pou ed nou pour pli byen konpran ki mannyer nou kapab swiv son legzanp. Zezi ti dir ki bann profeser lalwa ek Farizyen, pa ti pe demontre bann kalite ki Bondye i annan e sa ti en keksoz vreman mal. Menm si sa bann profeser lalwa ek Farizyen ti port atansyon lo bann pti detay dan Lalwa, zot ti “inyor bann pwen pli enportan dan Lalwa, tel ki lazistis, konpasyon ek fidelite.” (Mat. 23:23) Nou pa anvi parey bann sef relizye. O kontrer, annou fer nou mye pour konpran ki mannyer bann Lalwa ek prensip i ed nou konn bann kalite ki Zeova i annan. Koumsa nou pou kapab demontre bann kalite ki Zeova i annan.—1 Zan 4:8, 11.

KI MANNYER NOU APRANN KONN ZEOVA PLI BYEN?

11. Lekel ki ti entrodwir ou avek Zeova?

¹¹ Lekel ki ti entrodwir ou avek Zeova? Petet ou’n ganny elve par bann paran Kretyen. I tre probab ki zot ti koz avek ou lo bann resi Labib ki ti ansenny ou konsernan bann kalite ki Zeova i annan e lafason ki bann keksoz ki i’n kree i reflekte son personnalite. Oubyen i kapab ki ou ti aksepte en letid Labib avek en Temwen Zeova. I kapab ki sa dimoun ki ti fer letid avek ou ti servi en liv parey Viv ere pour touzour!, pour ed ou reflesir lo bann resi Labib e pour aprann konsernan bann zoli kalite ki Zeova i annan par etidye kreasyon.b (Nee. 8:8; Akt 14:17) Annou vwar ki mannyer nou kapab kontinyen aprann konsernan Zeova.

12-13. Ki nou kapab aprann konsernan Zeova ler nou lir Labib? Donn en legzanp. (Zeremi 39:15-18) (Vwar portre.)

¹² En premye fason ki nou kapab aprann plis konsernan Zeova i par lir e etidye son Parol. Parfwa Labib i koz spesifikman lo bann kalite ki Bondye i annan. (Egz. 34:6, 7) Me souvandfwa, Labib i koz lo bann dimoun ek bann desizyon ki zot in fer. Ler ou lir bann resi koumsa, reflesir lo sa ki ou kapab aprann lo Zeova.

¹³ Annou vwar en legzanp. Pandan ki ou pe lir Zeremi 38:6-13, ou aprann konsernan en Etyopyen ki apel Ebed-Melek ki ti sov profet Zeremi. San dout, deswit ou vwar bann fason ki ou kapab swiv legzanp Ebed-Melek. Par egzanp, i ti ed Zeremi menm ler i pa ti fasil, i ti demontre kouraz ek lanmour. Me eski ou osi vwar bann kalite ki Zeova in demontre? (Lir Zeremi 39:15-18.) Par egzanp, ki verse ki montre ki Zeova i apresye sa ki lezot i fer, ki i annan lazistis e ki i pa fer lapreferans? Ki lezot keksoz ou aprann konsernan personnalite Zeova dan sa resi? Sak fwa ki ou lir en resi dan Parol Bondye, idantifye bann kalite ki Zeova pe demontre e apre remersye li e loue li pour sa bann kalite.

14. Ki nou kapab fer pour nou aprann avek sa ki nou obzerve dan kreasyon?

¹⁴ En dezyenm fason ki nou kapab aprann plis konsernan Zeova i par medit lo bann keksoz ki i’n kree. (Ps. 145:9, 10) Byensir, i pa ase zis pour obzerv kreasyon. Serten dimoun i pas tou zot lavi pe etidye lanatir me zot pa zanmen rekonnet bann kalite ki Bondye i annan oubyen ki i menm egziste. Zapot Pol ti dir ki “menm si Bondye i envizib, depi kreasyon lemonn, i’n posib pour imen konn son bann kalite, . . . atraver bann keksoz ki i’n fer.” (Rom. 1:20) Dan en tradiksyon Labib, sa verse i dir ki “en dimoun ki reflesir byen, i kapab vwar bann kalite ki Bondye i annan.” Alor nou bezwen reflesir e rezonn lo sa ki nou vwar pour nou kapab konn bann kalite ki nou Kreater i annan.

15. Ki Patrick in fer pour aprann konn Zeova pli byen e ki mannyer nou kapab fer parey li? (Vwar portre.)

¹⁵ En kantite parmi nou i reste dan bann lavil kot i napa bokou plant ek zannimo. Si ou reste dan en landrwa koumsa, eski malgre sa ou kapab aprann avek kreasyon? Annou vwar leksperyans Patrick, ki reste Kongo dan en gran lavil ki apel Brazavil. I dir: “Mon fer zefor pour obzerv kreasyon ler mon lo mon balkon. Souvan, mon vwar bann pti zensek oubyen bann pti zwazo pe rod manze ouswa pe rod en landrwa reste. En fwa, mon ti vwar serten zwazo pe fer zot nik. Zot ti trouv bann keksoz dan vwazinaz ki zot ti kapab servi e ki ti zis bon pour fer zot nik pour zot piti.” Me Patrick ti fer plis ki sa. I ti reflesir lo Kreater. I dir: “Mon ti aprann ki Zeova i enterese avek byennet son bann kreatir menm bann ki paret pa enportan. Sa i fer mwan asire ki i osi enterese avek mwan e i pou toultan donn mwan sa ki mon bezwen.”

16. Kwa ki ti ed Mari, manman Zezi pour aprann konn Zeova pli byen e ki mannyer nou kapab swiv son legzanp? (Vwar portre.)

¹⁶ En trwazyenm fason ki nou kapab aprann konn Zeova pli byen i par medit lo nou prop leksperyans. I sanmenm ki Mari, manman Zezi ti fer. I ti deza konn Zeova byen e i ti “fer [Li] plezir.” (Lik 1:30) Me apre, i ti ganny donnen en responsabilite vreman enportan e difisil, setadir pour vin manman Garson Bondye. Atraver lanz Gabriyel ek Elizabet, Zeova ti ankouraz e reasir Mari ki i ti pou ed li. Pli tar, Mari ti medit lo sa ki son leksperyans ti’n ansenny li lo Zeova, enkli son pwisans, konpasyon, lefet ki i pa fer lapreferans e ki i enterese avek bann ki lezot pa vwar konman enportan. (Lik 1:46-55) Zis parey Mari ti rekonesan pour sa led ki Bondye ti’n donn li, nou rekonesan ler Zeova i ed nou “dan sa moman apropriye.” (Ebr. 4:16) Ler Zeova i ed ou, demann ou lekor: ‘Ki sa i ansenny mwan konsernan Zeova? Ki bann kalite ki Bondye i annan ki mon’n vwar dan sa sityasyon?’

NOU PA POU ZANMEN ARET APRANN

17-18. Akoz nou kapab dir ki nou pa pou zanmen aret aprann konsernan Zeova?

¹⁷ Mazin lo sa kantite keksoz ki nou pou aprann konsernan Zeova dan nouvo lemonn. Nou pou ganny bann nouvo roulo ki pou ansenny nou sa ki Zeova i anvi nou fer. (Rev. 20:12) Nou pou osi aprann bokou plis konsernan li ler nou pou vreman kapab apresye tou sa ki i’n kree. (Iza. 11:6-9) Anmezir nou eksperyans bann nouvo keksoz, par egzanp ler bann dimoun ki nou kontan i ganny resisite e ler ptitapti nou vin parfe, nou pou konpran nou Papa pli byen.

¹⁸ Nou pa pou zanmen aret aprann konn Zeova. Zeova in toultan egziste alor “son lentelizans napa limit.” (Ps. 90:2; 147:5) Nou “pa pou zanmen konn tou sa ki sa vre Bondye in fer depi konmansman ziska finisyon.” (Ekle. 3:11) Alor, nenport kantite letan ki nou’n dan laverite, annou servi tou loportinite pour aprann plis konsernan nou Papa ki kontan nou.