Vey byen ki mannyer ou ekoute

1-2. (a) Ki mannyer Zeova i donn son pep manze spirityel ozordi? (Psonm 23:1, 2, 5) (b) Ki nou pou vwar konsernan nou bann renyon?

OZORDI, Zeova pe donn nou en kantite manze spirityel. San dout, nou dakor avek sa ki Lerwa David ti sante: “Zeova i mon Berze. Mon pa pou mank nanryen.”—Lir Psonm 23:1, 2, 5.

² En fason ki Zeova i donn nou manze spirityel ozordi, i atraver renyon dan kongregasyon. Pandan reyon, nou souvandfwa tann bann keksoz ki nou’n deza tande. Me menm si nou’n ‘byen etabli dan laverite,’ nou bezwen sa bann rapel. (2 Pyer 1:12) Me eski ou vwar li difisil pour konsantre ler sa progranm spirityel i enkli bann keksoz ki ou’n deza tande plizyer fwa? Si ou santi koumsa, sa lartik i kapab ed ou. Nou pou vwar akoz nou bezwen ekout atantivman pandan renyon. Nou pou osi vwar ki mannyer bann ki ansennyen dan kongregasyon i kapab fer li fasil pour lezot ekout zot. Nou pou vwar serten sizesyon ki kapab ed nou pli byen ekoute pandan renyon. Me premyerman, annou vwar lekel ki pe vreman ansenny nou pandan renyon.

GARD ANTET KI ZEOVA KI PE VREMAN ANSENNY NOU

3. Ki mannyer Zeova i koz avek nou e ki mannyer son bann serviter i servi byen son Parol?

³ Zeova i koz avek nou atraver son Parol Labib. (2 Tim. 3:16, 17) Zezi ti konpran sa. I ti servi Parol Bondye sitan byen ki bann ki ti ekout li ti demande: “Ki mannyer sa zonm i kapab annan en tel konnesans lo Lekritir vi ki i pa’n al etidye dan bann lekol?” (Zan 7:15) Bann ki ti annan leker senser ti kontan ler zot ti tann Zezi pe eksplik Parol Bondye. Bann Kretyen dan premye syek, parey zapot Pol ek Apolos ti souvandfwa servi Lekritir ler zot ti pe rezonn avek lezot. (Akt 17:2, 3; 18:24, 28) Konman Temwen Zeova nou konnen ki sa ki nou ansennyen dan nou bann lartik, progranm Televizyon JW, plan diskour ek video i sorti dan Labib. Bann dimoun ki asiste nou bann renyon pour premye fwa i enpresyonnen akoz nou servi Labib en kantite dan nou bann renyon. Bann ki annan partisipasyon dan renyon i servi Labib pour ansennyen. Zot pa zis lir Labib me zot ed tou dimoun pour konpran e aplik sa ki Labib i dir.—Lik 24:32.

4. Ki mannyer sa mo “tande” ek sa mo “ekoute” i ganny servi dan Labib?

⁴ Dan Labib, sa mo “tande” ek sa mo “ekoute” i vedir obeir en dimoun. Alor, ler Zeova i koz avek nou atraver son Parol pandan renyon e nou konpran sa ki i anvi nou fer, i pli fasil pour nou obeir li. Nou kapab annan konfyans ki Zeova i kontan ler nou ekout li e nou aplik sa ki nou tande.—Prov. 27:11.

AKOZ NOU DEVRET EKOUT ATANTIVMAN PANDAN RENYON?

5. Ki nou lanmour pour Zeova i motiv nou pour fer? (Zan 4:23, 24; 1 Zan 5:3)

⁵ Nou ekoute dan renyon akoz nou kontan Zeova. (Mat. 22:37) Pli nou aprann konsernan Zeova, pli nou kontan li. Sa lanmour i fer nou anvi ekout li, obeir li e ador li dan sa fason ki i’n dir nou dan son Parol.—Lir Zan 4:23, 24; 1 Zan 5:3.

6. Ki nou aprann konsernan ed lezot pandan nou bann renyon?

⁶ Nou ekoute pandan renyon akoz nou kontan lezot. (Mat. 22:39) Dan renyon, Zeova i ansenny nou ki mannyer pour ed nou bann frer ek ser ek bann ki pa ankor konn li. Par egzanp, sa brosir Kontan dimoun—Fer zot vin disip in ed nou pour demontre bann zoli kalite anver bann dimoun ki nou koz avek dan predikasyon. Eski ou vwar li difisil pour konmans en konversasyon? Si wi, ekout byen lafason ki ou bann frer ek ser i fer sa pandan sa seksyon prepar byen pour predikasyon dan renyon lasemenn.

7. Akoz i enportan ki nou kontinyen ekout Zeova?

⁷ Nou ekoute pandan renyon parski nou kontan lavi. Nou obeir Parol Bondye parski nou lavi i depan lo la, zis parey i ti leka pour bann serviter Bondye dan lepase. (Det. 32:44-47) Ler nou ekoute pandan renyon, nou ganny sa lankourazman ki nou bezwen pour kontinyen andire e esper avek pasyans ziska ki sa nouvo lemonn i vini. (Rom. 8:25) I vreman enportan ki nou ekout Zeova parski nou pe viv dan bann dernyen zour e nou bezwen reste bizi dan son servis.—Mat. 24:42-44; Rev. 1:3.

KI MANNYER NOU KAPAB ED LEZOT POUR EKOUTE PANDAN RENYON?

8. Akoz bann frer ki ansennyen pandan renyon i devret kontinyen amelyor lafason ki zot ansennyen?

⁸ Bann frer ki ansennyen pandan renyon, sirtou bann ki fer diskour piblik, i devret kontinyen amelyor lafason ki zot ansennyen. En diskour ki baze lo Labib e ki’n byen ganny prepare, i kapab atir bann nouvo ver laverite e ed bann frer ek ser pour reste dan laverite. Alor, bann ki annan en size dan renyon i devret gard antet ki zot partisipasyon i kapab ed lezot plis ki zot realize. Si ou annan en partisipasyon dan renyon, reflesir lo ki mannyer ou kapab aplik sa bann sizesyon swivan dan ou diskour. Menm si sa bann sizesyon i sirtou pour bann frer ki fer diskour piblik, tou dimoun ki annan en size oubyen partisipasyon dan renyon i kapab aplik sa bann prensip.—2 Tim. 4:2; Tit 1:9.

9. Ki ou kapab fer pour ki ou diskour i fasil pour konpran?

⁹ Met ou bann nide dan en lord ki fer sans. Ler ou pe fer en diskour, ou anvi ki ou lodyans i kapab fasilman konpran sa ki ou pe dir e ki zot kapab swiv bann nide anmezir ki ou pe fer ou diskour. Si sa ki ou pe dir i konplike, lodyans i kapab vwar li difisil pour port latansyon lo sa ki ou pe dir. Alor, ki mannyer ou kapab fer en diskour ki kler kot lodyans i kapab fasilman swiv bann nide? Annou vwar serten keksoz ki kapab ed ou: (1) Depi o konmansman diskour, fer ou lodyans konn ou bann pwen prensipal. (2) Koz lo sa bann pwen enn alafwa e fer en poz pour montre ki ou pe al koz lo en lot pwen. (3) Dan ou konklizyon, repet sa bann pwen prensipal.

10. Akoz i enportan pour kontan bann pwen ki ou pe al koz lo la?

¹⁰ Kontan bann pwen ki ou pe al koz lo la. Ou pou koz avek lantouzyazm si ou koz lo bann pwen ki ou kontan. (Prov. 2:4, 5; Akt 4:20) Pour ed ou kontan bann pwen ki ou pe al koz lo la, medit lo bann verse ek lenformasyon ki dan plan ou diskour. En frer ki sorti Leta-z-ini ki dan son bann 70 an, i rapel en diskour ki i ti tande ler i ti ankor adolesan. I dir: “Mon ankor rapel lafason ki sa orater ti ankouraz nou pour medite ler nou pe lir Parol Bondye. I ti koz avek konviksyon e i ti eksplike ki mannyer nou kapab fer sa. Sa diskour ti sanz mon lavi. I ti annan en lefe lo lafason ki mon lir Labib e osi lo mon lanmitye avek Zeova.”

11. Akoz i bon pour donn bann konsey pratik e spesifik pandan bann diskour? (1 Timote 4:13-16)

¹¹ Reflesir lo sa ki ou lodyans i bezwen e apre ofer bann sizesyon pratik. Olye koz an zeneral, servi bann verse Labib pour ankouraz ou lodyans e ed zot pour vwar ki mannyer zot kapab aplik sa ki Labib i dir dan zot lavi. Par egzanp, zapot Pol ti donn Timote plizyer sizesyon spesifik ki pou ed li reste pros avek Zeova pandan ki i ti pe servi dan lavil Efez. (Lir 1 Timote 4:13-16.) Reflesir lo sa ki pou vreman ed ou lodyans e ed zot vwar sa ki zot bezwen fer pour aplik sa lenformasyon dan zot lavi.

12. Akoz i bon pour koz dan en fason natirel ler ou fer en diskour?

¹² Praktis ou diskour aotvwa pour ou kapab koz dan en fason natirel. Olye ekrir ou diskour mo pour mo e apre lir li, esey koz dan en fason natirel. Koumsa i pou pli fasil pour ou lodyans ekoute e konpran sa ki ou pe dir. Sa brosir Amelyor ou abilite pour lir e ansennyen i dir: “Koz dan en fason natirel e senser parey dan en konversasyon. Sa pou montre ki mannyer ou santi anver sa size e anver ou lodyans.” Ler ou koz dan en fason natirel, ou diskour pou vivan, enteresan e i pou motiv ou lodyans pour aplik sa ki zot tande.

13. Akoz bann ki ansennyen dan kongregasyon i devret demann en orater eksperyanse konsey? (Vwar portre.)

¹³ Demann konsey avek en orater eksperyanse. Ki mannyer ou kapab fer sa? Avan ou fer ou diskour, ou kapab montre en orater eksperyanse ki ou pe plàn dir e apre, servi bann sizesyon ki i donn ou pour amelyor ou diskour. Osi demann li pour ekout ou fer ou diskour aotvwa pour li kapab donn ou bann sizesyon lo ki mannyer ou kapab vin en pli bon ansenyan. (Prov. 1:5) Nou pa toultan remarke kwa ki nou bezwen amelyore. I kapab ki nou pa remarke si nou pe fer bann pwen dan nou diskour kler e pratik. Nou anvi vin bann pli bon orater ek ansenyan pour nou kapab ed lezot pli byen konpran e aplik bann zoli laverite ki dan Parol Bondye.a

KI OU KAPAB FER POUR PLI BYEN EKOUTE PANDAN RENYON?

14. Akoz nou devret devlop menm latitid ki ekriven Psonm 119 ti annan? (Psonm 119:24, 111, 167)

¹⁴ Pour nou kapab pli byen ekoute pandan renyon, nou bezwen devlop plis lapresyasyon pour bann rapel ki Zeova i donn nou. Nou bezwen bann rapel ki Bondye i donn nou pour nou kapab fer fas avek bann problenm ki pe arive pandan sa “letan vreman difisil.” (2 Tim. 3:1) Alor, si parfwa nou santi ki nou pe tann bann lenformasyon ki nou’n deza tande plizyer fwa, i ti pou byen ki nou medit lo lafason ki ekriven Psonm 119 ti santi anver bann rapel ki Bondye i donnen.—Lir Psonm 119: 24, 111, 167.

15. Kwa ki kapab ed nou pour kontinyen annan lapresyasyon pour sa manze spirityel ki nou gannyen?

¹⁵ Nou bezwen kontinyen annan en bon pwennvi konsernan sa manze spirityel ki nou gannyen, zis parey bann Izraelit ti’n devret kontinyen annan en bon pwennvi konsernan lamann ki Zeova ti donn zot ler zot ti dan dezer. (Egz. 16:15, 31) San dout, o konmansman bann Izraelit ti apresye sa lamann ki zot ti gannyen. I ti sorti kot Zeova, i ti annan en bon gou e i ti ed zot reste vivan. Me avek letan, serten ti fatige manz lamann toulezour. (Nom. 21:5) Ki nou kapab aprann? Nou pa devret zanmen konsider bann manze spirityel ki nou gannyen konman zis bann lansennyman ki nou tande plizyer fwa oubyen konman nanryen ditou. O kontrer, nou bezwen rekonnet ki tousala i sorti kot Zeova. Nou bezwen gard antet ki sa manze spirityel in ganny byen prepare par lorganizasyon Zeova. Nou devret osi reflesir lo lefet ki sa ki nou tande, i ed nou pour fer bann desizyon saz e pour viv pour touzour.—Prov. 3:13, 16-18; Zan 17:3.

16. Kwa ki’n ed serten frer ek ser ki’n servi Zeova pour en kantite letan pour ekout atantivman pandan renyon? (Vwar bwat “Bann sizesyon ki kapab ed ou pour pli byen ekoute pandan renyon.”)

¹⁶ Nou pou pli byen kapab ekout atantivman pandan renyon si nou aplik sa bann sizesyon swivan. Annou vwar sa ki’n ed serten frer ek ser ki’n servi Zeova pour en kantite letan pour kontinyen ekout atantivman pandan renyon. En ser ki apel Ashley, ki’n servi Zeova pour plis ki 30 an, i dir: “Pour ou kapab port latansyon pandan renyon, i enportan ki ou prepare davans. Si mon pa’n prepare, mon vwar li difisil pour reponn e mon konmans mazin lezot keksoz.” En frer ki apel Joseph, ki’n servi Zeova pour 52 an, i dir: “Mon kontan tann konsernan bann topik ki mon’n deza tande oparavan. Ler mon tann bann diferan diskour e komanter lo en topik, sa i fer mwan konpran sa topik pli byen.” I ti osi dir: “Si en frer pa tro en bon orater, mon konsantre lo sa ki i pe dir parski i sorti dan Parol Bondye e mon pa konsantre lo lafason ki i pe koze.”

17. Ki ou kapab fer pour ekout atantivman pandan renyon? (Vwar portre.)

¹⁷ Annou vwar detrwa lezot sizesyon ki kapab ed ou ekout atantivman pandan renyon. (1) Si ou manze avan renyon, fer sir ki ou manz en pti manze leze pour ou pa dormi pandan renyon. (2) Ariv boner e rod en plas asize avan renyon i konmanse. (3) Met ou lekipman elektronik lo silans e pa les li distrer ou. (4) Reflesir lo sa ki pou ganny diskite dan renyon. (5) Konsantre lo sa orater. (6) Fer bann pti not oubyen bann pti desen baze lo bann pwen enportan. (7) Reflesir lo bann verse Labib e lo lafason ki zot relye avek kanmarad. (8) Demann ou lekor: ‘Ki mannyer mon kapab servi sa lenformasyon pour ed en dimoun dan kongregasyon oubyen dan predikasyon?’ (9) Avan lasanble, get progranm e lir verse tenm pour sa lazournen, lir tit bann diskour ek bann verse pour sak diskour. (10) Prepar ou leker par asiz trankil e port latansyon lo bann lanmizik ek video ki ganny zwe avan progranm lasanble i konmanse.

KONTINYEN EKOUT ZEOVA

18. Akoz nou devret kontinyen ekoute pandan renyon?

¹⁸ Nou devret kontinyen ekoute pandan renyon parski ler nou fer sa, nou les Zeova anmenn nou lo bann “semen ladrwatir.” (Ps. 23:3; 31:3) Nou bezwen bann konsey ki nou gannyen parski zot gid nou pour nou kapab reste lo sa semen. Si non, nou pou drive parey en bato dan divan. Alor, “vey byen ki mannyer [ou] ekoute” e aplik gidans ki ou gannyen pandan renyon. (Lik 8:18) Bann ki ekout Zeova pou annan en lavi ere la konmela e zot pou viv pour touzour dan lavenir.—Ps. 119:2, 14.