Nou group predikasyon i ed nou dan plizyer fason

1-2. Ki mannyer en kantite frer ek ser i santi konsernan sa laranzman pour annan en group predikasyon?

ESKI ou rapel sa zour ki ou ti aprann ki ou kapab konmans anons sa bon nouvel? I ti en zour zwaye parski aprezan ou ti form parti en gran group dimoun ki loue non Zeova. (Ps. 148:1, 2, 12, 13) Me sa zour i kapab ki ou ti osi konmans form parti en lot group, enn ki pli pti ki annan zis detrwa ou bann frer ek ser ladan e sa i ou group predikasyon. Nou group predikasyon i ed nou pour obeir sa lord pour anons sa bon nouvel lo Rwayonm “partou lo later.”—Mat. 24:14.

² Ki mannyer ou santi konsernan sa laranzman pour annan en group predikasyon? En ser ki apel Wendya i dir: “Mon group predikasyon in ed mwan dan plizyer fason. Gras a sa laranzman, mon’n aprann bann nouvo fason prese e ansennyen, bann frer ek ser in ed mwan pour met bann lobzektif spirityel e atenn zot e mon’n osi fer bann bon zanmi.” En frer ki apel Rich i dir: “Mon vwar sa responsabilite konman sirveyan group predikasyon konman en privilez ki vreman spesyal. Serten proklanmater i kapab ed en dimoun pour progrese ziska batenm me en sirveyan group i annan sa loportinite spesyal pour ed sa dimoun pour fer progre spirityel pour plizyer lannen apre.” En ser ki apel Dinah i dir: “Mon kontan form parti en group predikasyon. Mon konsider mon group predikasyon parey mon fanmir.”

3. Ki nou pou vwar dan sa lartik?

³ Dan sa lartik, nou pou premyerman vwar ki rol en sirveyan group ek son asistan i annan e ki mannyer zot pran swen avek bann frer ek ser dan zot group. Apre, nou pou vwar ki mannyer sakenn parmi nou i kapab siport nou group predikasyon. Finalman, nou pou vwar ki byenfe nou gannyen atraver sa laranzman.

SA SIRVEYAN GROUP EK SON ASISTAN

4. (a) Ki responsabilite prensipal en sirveyan group predikasyon i annan? (b) Ki mannyer en sirveyan group i pran swen avek bann proklanmater dan son group? (Vwar bwat “Serten sizesyon pour bann sirveyan group predikasyon.”)

⁴ En sirveyan group predikasyon i en ansyenb ki’n ganny apwente par konsey ansyen pour ed en group proklanmater pour fer progre spirityel. Ki mannyer i fer sa? Premyerman, i demontre lentere personnel dan sak proklanmater dan son group. (Prov. 27:23) I konn bann dan son group byen e i koz avek zot regilyerman pour fer sir ki i konnen ki mannyer zot ete. Sa i fer ki i kapab ankouraz zot, donn zot sipor emosyonnel ek led pratik. (Prov. 12:25; Iza. 32:2; Zak 2:15-17) Dezyenmman, i ed tou bann proklanmater dan son group pour reste okipe dan sa travay predikasyon. I montre legzanp dan predikasyon par fer son mye pour pres avek son group, sirtou dan wikenn. I osi pres avek sak proklanmater dan son group regilyerman pour ankouraz zot e ed zot pour vin bann pli bon proklanmater ek ansenyan. Si parfwa i pa kapab zwenn avek son group predikasyon, i fer sir ki son asistan oubyen en lot proklanmater kalifye i pran swen avek group. Trwazyenmman, i ed bann frer ki’n batize pour kalifye pour desarz bann responsabilite dan kongregasyon. (1 Tim. 3:1) I felisit zot, donn zot konsey ki sorti dan Labib e donn zot formasyon pour ed zot kalifye pour vin serviter kongregasyon ek ansyen. Vi ki rol en sirveyan group predikasyon i vreman enportan, konsey ansyen i apwent bann ansyen ki pli kalifye pour desarz sa responsabilite.

5. Ki serten problenm bann sirveyan group predikasyon i fer fas avek?

⁵ I annan en kantite keksoz ki kapab fer li difisil pour en sirveyan group pran swen avek bann proklanmater dan son group. Annou vwar legzanp Jörg ki reste Lalmanny e ki en sirveyan group. Parey plizyer lezot ansyen, Jörg i annan plizyer responsabilite dan kongregasyon. I dir: “I pa fasil pour desarz plizyer responsabilite an menm tan. Sa i fer li difisil pour mwan atenn mon lobzektif pour koz avek tou dimoun dan mon group.” En ansyen ki apel Abel, ki annan 70 an ki sorti Yougannda i dir: “I napa bokou ansyen ek serviter kongregasyon dan nou kongregasyon. Sa i fer ki nou bann group predikasyon i gran e sa i fer ki i difisil pour mwan travay ansanm avek sak proklanmater e ankouraz zot souvan, parey mon ti ava kontan.” En ansyen ki apel Obed ki sorti Sourinanm i dir: “Mon kontan form lezot. Me i pran letan ek lenerzi pour fer sa e ou pa toultan vwar rezilta deswit. Sa i fer ki souvandfwa mon pa form lezot akoz mon bizi pe fer lezot keksoz.” Kwa ki kapab ed bann ansyen ki pe fer fas avek bann problenm koumsa?

6. Ki mannyer ler bann group predikasyon i pti, sa i ed bann sirveyan group pour pran swen avek bann proklanmater dan zot group?

⁶ Ler i posib, bann group predikasyon i devret pti pour ki bann sirveyan group i kapab konn tou dimoun dan son group byen e ed zot pour reste for spirityelman. Me meton i napa bokou ansyen dan en kongregasyon, ki mannyer bann group predikasyon i kapab reste pti? Olye fer bann group predikasyon sitan gran ki sa sirveyan pa kapab fer tou sa ki i bezwen fer konman en sirveyan, konsey ansyen i kapab tanporerman apwent en serviter kongregasyon pour pran swen avek en group. Ler bann group i pli pti, bann sirveyan group i kapab desarz zot responsabilite pli enportan e sa i pour pran swen avek bann frer ek ser dan zot group.

7. Dan bann kongregasyon ki napa bokou ansyen, ki bann sirveyan group i kapab fer pour fer sir ki zot pran byen swen avek tou dimoun dan zot group? (1 Pyer 5:2) (Vwar portre.)

⁷ Si ou en sirveyan group dan en kongregasyon kot napa bokou ansyen, konsantre lo form ou asistan pour li kapab ed ou pran swen avek troupo Bondye. (Lir 1 Pyer 5:2.) Donn ou asistan serten keksoz pour fer. Par egzanp, tanzantan les li pran group predikasyon. Koz avek li konsernan lafason ki zot kapab ed bann proklanmater dan zot group pour reste pros avek Zeova e pour amelyor zot abilite dan predikasyon. Regilyerman anmenn ou asistan avek ou ler ou fer bann vizit lankourazman avek bann proklanmater dan group. Avan sa vizit koz avek li lo ki mannyer zot tou le de, zot kapab ankouraz sa proklanmater e apre sa vizit koz avek li lo kwa ki i’n fer byen e si i neseser, kwa ki i kapab amelyore. Avek letan, ou asistan i kapab kalifye pour vin en sirveyan group predikasyon. (2 Tim. 2:2) Ou kapab osi demann bann Kretyen matir dan ou group pour ede form lezot dan predikasyon. Par egzanp, bann pionye ek bann proklanmater eksperyanse i kapab travay avek bann ki nouvo e ki napa bokou leksperyans. Zot kapab ansenny lezot ki mannyer pour konmans bann konversasyon dan predikasyon, fer bann retourn vizit oubyen kondwir bann letid Labib. Aprezan, nou pou vwar trwa fason ki sakenn parmi nou i kapab siport nou group predikasyon pour fer ki i reisi.

KI MANNYER OU KAPAB SIPORT OU GROUP PREDIKASYON?

8. Ki mannyer nou kapab siport nou group predikasyon? (Romen 1:12)

⁸ Al predikasyon avek ou group. Ler ou al predikasyon avek ou group, sa i permet zot pour “ankouraz kanmarad.” (Lir Romen 1:12.) Ler zot pres ansanm, sa i kapab fer zot santi zot pli an sekirite e pli konfidan. Si ou travay i fer li difisil pour ou siport ou group predikasyon, eski ou kapab demann ou anplwayer pour aziste ou ler travay? Petet i kapab les ou sanz ou ler travay. (Nee. 2:4-6) Si ou lasante oubyen ou laz i fer li difisil pour ou zwenn ou group predikasyon, akoz ou pa koz avek ou sirveyan group lo sa size? Petet i pou kapab fer laranzman pour ou zwenn group atraver video konferans oubyen par fer temwannyaz par telefonn oubyen atraver let. Eski ou zenn e an bonn sante me ou vwar li difisil pour ou al predikasyon regilyerman? Si wi, akoz ou pa fer en plan pour travay avek en dimoun dan group tou le semenn? Petet ou pou bezwen revwar ou bann priyorite oubyen sanz lafason ki ou servi ou letan. (Rom. 12:11; Kol. 4:5) Tou zefor ki ou fer i vo lapenn. Priy Zeova. I kapab donn ou “sa dezir ek lafors pour azir.”—Fili. 2:13.

9. Ki mannyer nou kapab fer nou group predikasyon vin parey en fanmir ki pros avek kanmarad? (Romen 12:13)

⁹ Demontre lospitalite. Nou ede pour gard en bon latmosfer dan nou group predikasyon par annan sa “labitid pour demontre lospitalite.” (Lir Romen 12:13.) Eski nou kapab ofer pour fer renyon predikasyon dan nou lakour? Dan serten kongregasyon, bann diferan group predikasyon i demontre lospitalite sakenn son tour anver bann frer ki vin fer diskour dan zot kongregasyon. Ki swa sa orater i aksepte zot lospitalite oubyen non, sa zour ki sa group i sipoze akeyir sa orater, sa group i zwenn ansanm pour en repa e pour ankouraz kanmarad. En pionye spesyal ki apel Sarah i dir: “Mon enkyet ler mon envit lezot kot mwan alor mon fer en keksoz senp. Mon esey konsantre lo aprann konn lezot pli byen olye enkyet lo si manze pou vin bon.” Ler nou fer nou group predikasyon vin parey en fanmir kot nou demontre lospitalite, nou vin pli pros avek Zeova e avek kanmarad.—Nee. 8:10; Akt 20:35.

10. Ki nou kapab fer si nou anvi vin bann pli bon proklanmater ek ansenyan? (Proverb 1:5; 27:17) (Vwar portre.)

¹⁰ Fer zefor pour vin en pli bon proklanmater ek ansenyan. Pli nou vin bann pli bon proklanmater ek ansenyan, i tre probab ki nou pou pli anvi al predikasyon avek nou group. Eski i annan en keksoz ou kapab fer pour amelyore? Akoz ou pa pran linisyativ e demann en dimoun, petet en pionye oubyen en proklanmater eksperyanse dan ou group, pour ed ou? (Lir Proverb 1:5; 27:17.) Koz avek ou sirveyan group konsernan ou lobzektif. Petet i kapab ed ou atenn sa lobzektif. Ou kapab osi demann lezot proklanmater pour ed ou. I sanmenm ki en ser ki apel Heather ti fer. Heather i en dimoun timid me i dir: “Mon ti demann en pionye pour ed mwan fer retourn vizit. Sa ser ti demontre lanmour ek labonte anver mwan e i ti fer laranzman pour travay avek mwan dan predikasyon regilyerman. I ti menm ed mwan pour konmans en letid Labib avek enn mon retourn vizit. Mon vreman kontan ki mon ti demann led parski aprezan mon kontan partisip dan predikasyon ankor.” I kler ki i annan plizyer fason ki nou kapab siport nou group predikasyon pour fer ki i reisi.

KI MANNYER OU GROUP PREDIKASYON I KAPAB ED OU?

11-12. Ki mannyer ou group predikasyon in ed ou pour reste pros avek Zeova e vin en pli bon Kretyen? Donn en legzanp.

¹¹ Nou group predikasyon i kapab ed nou reste pros avek Zeova. Nou tou nou kapab ganny bann byenfe ler nou form parti en group predikasyon. Par egzanp, bann ki Zeova i kontan en kantite, parey bann vev, orfelen ek bann frer ek ser aze i ganny bann vizit lankourazman dan sa moman ki zot bezwen. (1 Tesa. 2:8; Zak 1:27) Nou osi ganny bann formasyon ki ed nou vin bann pli bon proklanmater ek ansenyan. Bann frer batize ki en bon legzanp, i ganny formasyon pour zot kapab kalifye pour fer plis dan kongregasyon.—1 Tim. 3:10.

¹² Annou vwar leksperyans Wendy, ki’n ganny mansyonnen pli boner e lafason ki son group predikasyon ti ed li. Wendy i dir: “Vi ki mon papa ti opoz laverite, souvandfwa i pa ti posib pour mon manman al predikasyon avek son group dan wikenn. Me mwan mon ti ganny permisyon pour ale alor mon ti ale. En ser aze ki ti en pionye ti vin mon zanmi e i ti ed mwan devlop bann abilite ki’n ed mwan dan predikasyon e dan kongregasyon. Mon sirveyan group ti donn mwan bann konsey sorti dan Labib plizyer fwa e sa bann konsey i ankor pe ed mwan ozordi.”

13. Ki mannyer nou group predikasyon i kapab ed nou pour annan bann bon zanmi ki kontan e siport nou? (Vwar portre.)

¹³ Nou group predikasyon i kapab ed nou pour annan bann zanmi ki kontan e siport nou. Anmezir nou travay “kotakot” avek bann proklanmater dan nou group, nou devlop bann bon lanmitye avek zot. (Fili. 1:27) Ler group predikasyon i pti, sa i fer li pli fasil pour bann ki timid oubyen ki pa santi zot konfortab dan bann gran group, pour devlop bann bon lanmitye avek lezot. (2 Kor. 6:13) Nou kapab depan lo sa bann zanmi ler nou pas dan bann moman difisil, par egzanp ler nou malad, santi nou sagren oubyen enkyet ouswa ler en dimoun ki nou kontan i mor. (1 Tesa. 5:14) San dout, dan lavenir nou pou bezwen bann bon zanmi plis ankor. (Mat. 24:21) Petet nou pa pou ganny en solisyon pour nou bann problenm me i pou pli fasil pour nou andire ler nou konnen ki nou kapab kont lo bann frer ek ser ki kontan e siport nou.—Prov. 17:17.

14. Ki mannyer nou group predikasyon i ed ou pandan bann moman dezas oubyen dirzans?

¹⁴ Nou group predikasyon i kapab ed nou ler i annan en dezas oubyen dan moman dirzans. Nou ganny led avek nou group predikasyon ler i annan en lepidemi, dezas natirel, kriz ekonomik, ler nou ganny persekite e ler nou bezwen swen medikal irzan. Par egzanp, ler en keksoz koumsa i arive, Komite Servis Kongregasyon ansanm avek bann sirveyan group, i organize pour donn led bann ki bezwen bann keksoz spesifik. Bann sirveyan group i kontakte tou fanmir dan zot group e i gete ki zot bezwen. Sa sirveyan i gete si zot bezwen swen medikal, manze, delo, landrwa reste ek lenz, koumsa i kapab fer zot ganny sa led ki zot bezwen. Nou group predikasyon i vreman ed nou ler i annan en dezas oubyen dan en moman dirzans.

15. Ki tou bann ki ador Zeova i anvi?

¹⁵ Parey nou’n vwar, lorganizasyon Zeova i vreman gran. Dan sa parti ki dan lesyel, i annan plizyer santenn milyon, petet menm bilyon, lanz fidel. Tandis ki lo later, i annan plis ki nef milyon dimoun ki pe ador Zeova e sa lakantite pe kontinyen ogmante. (Zek. 8:23; Rev. 5:11) Ki swa dan lesyel oubyen lo later, tou bann ki ador Zeova i travay ansanm pour anons sa bon nouvel konsernan Rwayonm Bondye. (Rev. 14:6, 7) Nou tou nou anvi fer tou sa ki nou kapab pour siport nou group predikasyon. Nou group predikasyon i ed nou dan en kantite fason e i sirtou ed nou pour loue Zeova avek tou nou leker.—Ps. 111:1.