Mon’n servi Zeova pour plis ki 70 an Kiba

Nou ti anpe dan nou pti vilaz. Nou pa ti reste tro lwen avek serten nou bann fanmir, par egzanp nou bann tantin, tonton ek granparan. Nou ti annan ase manze pour manze e nou ti ere.

Ler mon ti annan apepre senk an, mon paran ti konmans etidye Labib avek Walton Jones. Frer Jones ti vreman devoue dan sa travay predikasyon e ti mars apepre dis erdtan pour ariv dan nou vilaz. Sak fwa i ti vini, en kantite parmi mon bann fanmir ti zwenn ansanm kot lakaz mon granparan pour koz lo Labib pour plizyer erdtan. Mon paran, mon tonton Pedro ek mon tantin Ela, ti kontan sa ki zot ti pe aprann alor i pa ti pran bokou letan pour zot batize e vin en Temwen Zeova. Ozordi, Ela i annan preski 100 an e i pe kontinyen servi konman en pionye Kiba.

Sa letan, bann Temwen Zeova Kiba ti lib pour ador Zeova. Dimoun ti konn nou konman bann dimoun ki anons sa bon nouvel kazankaz, ki mars avek bann sak ki ranpli avek bann piblikasyon baze lo Labib e nou ti mars en kantite. Mon kontan pour mazin lafason ki nou ti servi Zeova pandan sa “letan favorab” dan mon lanfans. Me bann “letan difisil” ti pou vini apre.—2 Tim. 4:2.

BANN LETAN DIFISIL TI KONMANSE

Ler mon ti annan senk an, mon papa ek mon tonton ti al en lasanble ki ti pe ganny fer lo en lot bout zil. Malerezman pandan sa vwayaz, zot ti ganny lafyev tifoid parski zot ti’n bwar delo kontaminen. Ler zot ti retourn dan lakour, seve mon tonton ti grennen me i pa ti mor. Me malerezman, mon papa ti mor. I ti annan zis 32 an.

Apre lanmor mon papa, mon manman ti deside pour fer nou fanmir al reste avek son frer ki ti reste dan en vilaz ki apel Lombillo. Sa ti vedir ki nou ti bezwen kit nou fanmir, enkli nou granparan ki nou ti kontan en kantite. Malgre sa, nou ti kontinyen servi Zeova konman en fanmir.

Le 26 Out 1957, mon ti batize dan en rezervwar pa tro lwen avek Lombillo. Mon ti annan di-z-an. Me mon pa ti konnen ki dan mwens ki de-z-an, keksoz ti pou sanze pour tou Temwen Zeova Kiba. An 1959, i ti annan en koudeta e en gouvernman kominis ti vin o pouvwar.

Sa nouvo gouvernman ti met bokou lanfaz lo servis militer. Sa ti afekte Temwen Zeova parski Temwen Zeova partou dan lemonn pa pran kote dan bann zafer politik e zot pa antre dan larme. Sa ti fer ki ptitapti nou ti nepli annan sa liberte pour ador Zeova parey nou ti fer avan. A en serten moman, gouvernman ti enterdi nou bann aktivite Kretyen e plizyer santenn frer ti ganny met dan prizon. Serten ti souvan ganny bate e pa ganny donnen manze. Parfwa, dan sa bann manze ti annan disan, en keksoz ki Labib i dir en Kretyen pa devret manze.

Menm si i ti annan tou sa bann problenm, nou ti kontinyen zwenn ansanm pour ador Zeova. (Ebr. 10:25) Nou ti menm fer bann lasanble lo bann laferm oubyen dan bann lezot landrwa dan pei. En fwa en frer ti les nou fer en lasanble dan en gran stor ki i ti servi pour met son bann mouton ladan. Nou pa ti kapab netway sa stor e ni menm tir bann mouton ladan avan lasanble. Alor, nou ti fer nou lasanble ansanm avek bann mouton.—Mik. 2:12.

Nou apresye bann frer ki ti travay dir pour ed nou ganny manze spirityel sa letan. Par egzanp, bann frer ti rikord bann diskour lasanble lo bann kaset e apre zot ti anvoy sa bann kaset pour bann Temwen partou dan pei. Parfwa, i ti annan zis de frer ki ti ganny sa responsabilite pour prepar, fer e rikord tou bann diskour pour en lasanble. Vi ki bann frer ti rikord sa bann diskour an sekre, parfwa nou ti tann bann kok pe sante ek lezot tapaz enteresan dan sa recording. Si i ti napa elektrisite dan sa landrwa kot nou ti pe fer lasanble, en frer ti pou pedal en bisiklet ki ti annan en dinamo ki ti prodwi elektrisite. Koumsa, nou ti ganny kouran pour zwe sa kaset e tann lasanble. Menm si nou sirkonstans pa ti ideal oubyen nou ti napa sa kantite piblikasyon ki bann Kretyen dan lezot pei ti annan, nou pa ti zanmen mank manze spirityel e nou ti kontan pour servi Zeova ansanm.—Nee. 8:10.

MWAN EK MON MADANM, NOU TI VIN BANN PIONYE E APRE BANN PARAN

Ler mon ti ganny 18 an, mon ti konmans servi konman en pionye ordiner dan en lavil apel Florida, Kiba. Apepre enn an apre, mon ti ganny apwente pionye spesyal dan lavil Camagüey, sa lavil pli enportan dan sa rezyon Kiba. Ler mon ti laba, mon ti zwenn en zoli ser ki apel Emilia ki ti sorti Santiago de Cuba. Nou ti konmans pwente e dan mwens ki enn an, nou ti marye.

Mon ti konmans travay a plen tan dan en lizin ki fer disik ki ti pour gouvernman. Menm si nou de Emilia, nou pa ti kapab kontinyen fer pionye, nou ti anvi pas maksimonm letan posib dan bann aktivite spirityel. Mon ti fer laranzman pour mwan travay depi 3 er bomaten ziska 11 er bomaten. Mon pa ti kontan lev sa ler me sa ti permet mwan partisip dan predikasyon regilyerman e pour al tou mon bann renyon avek Emilia.

An 1969, nou premye garson, Gustavo ti ne. Mon ti’n ganny demande pour rekonmans fer servis a plen tan konman sirveyan rezyonal. Sa letan, i ti normal pour bann sirveyan rezyonal Kiba annan zanfan. Pandan sa bann lannen, nou ti vreman bizi me nou ti osi vreman zwaye. Nou de Emilia, nou ti santi ki i en privilez pour ganny donnen sa loportinite pour ed nou bann frer ek ser dan sa fason. Pandan sa letan ki mon ti sirveyan rezyonal, nou garson Obed ti ne, apre sa nou ti ganny Abner e detrwa lannen pli tar nou fiy Mahely.

Ler mon mazin bann lannen ki mon’n servi konman sirveyan rezyonal, mon zwaye pour vwar lafason ki Zeova in beni son pep Kiba. I’n osi beni nou zefor pour ed nou zanfan pour kontan li. Les mwan rakont zot lafason ki lavi ti ete pour nou de Emilia pandan sa letan ki mon ti sirveyan rezyonal.

MON TI EN SIRVEYAN REZYONAL PANDAN KI TEMWEN ZEOVA TI’N GANNY ENTERDI KIBA

Dan bann lannen 1960 ek 1970, keksoz ti konmans vin difisil. Bann Lasal Rwayonm ti ganny fermen. Bann misyonner ti ganny pouse dan pei. En kantite zenn frer ti ganny arete e ganny met dan prizon. Biro brans ki ti sitye Havana ti ganny fermen.

Sa lenterdiksyon ti fer ki nou ti kapab vizit bann kongregasyon zis dan wikenn. Alor nou ti vizit en kongregasyon pandan de wikenn konsekitif. Nou pa ti anmenn bokou keksoz avek nou e souvandfwa nou ti al lo en bisiklet, parski sa pa ti atir latansyon lezot. Byensir, nou bann vizit ti ganny fer an sekre. Nou ti bezwen fer konmsi nou ti pe al vizit nou fanmir. I pa ti difisil pour fer sa. Anfet, nou ti sitan santi konmsi nou ti pe al vizit fanmir ki parfwa nou ti oubliye ki nou ti’n vin vizit zot akoz mon ti zot sirveyan rezyonal e ki mon ti la pour ankouraz zot. (Mark 10:29, 30) Me kantmenm sa, nou ti bezwen fer atansyon. Souvandfwa lapolis ti swiv nou e kestyonn nou. Si gard ti konnen ki nou ti pe fer, bann frer kot nou ti reste ti kapab ganny met dan kaso.—Rom. 16:4.

Pandan sa menm letan, nou ti zwenn en kantite frer ek ser ki ti demontre zenerozite anver nou menm si zot ti napa bokou keksoz. I ti annan en kantite moustik dan serten landrwa me nou bann zanmi ti donn nou zot sel moustiker ki zot ti annan pour nou kapab dormi byen aswar. Lezot frer ek ser ti les nou reste avek zot menm si zot ti napa bokou manze. Anfet, parfwa nou ti anmenn nou prop manze ki nou ti partaz avek zot.

Ler nou ti al vizit bann kongregasyon, nou pa ti kapab anmenn tou nou zanfan avek nou. Alor nou ti al avek zis en zanfan pandan ki mon manman ek mon ser ti pran swen avek lezot dan lakour. Anfet, ler nou ti vwayaz avek en pti baba, sa ti en proteksyon pour nou. Parfwa, lapolis ti fouy lo nou me nou ti kasyet bann piblikasyon dan sak ki ti annan bann napi sal ladan e lapolis pa ti fouy dan sa sak.

Mon vreman apresye Emilia en kantite pour tou sa ki i’n fer pour pran swen avek nou bann zanfan e an menm tan siport mwan pandan ki nou ti dan servis a plen tan. Tandis ki mwan, mon ti kapab travay dan lizin e an menm tan servi konman en sirveyan rezyonal. Parfwa mon ti travay plis erdtan, enn oubyen de fwa par semenn pour mwan pa travay dan wikenn. Me pli tar, mon travay ti sanze. Mon ti vin en soupervayzer e mon ti bezwen travay set zour par semenn. Mon pa ti kapab sanz mon ler travay. Me mon ti vwar ki tan ki mon ti donn mon tim ase travay pour fer dan wikenn, zot pa ti dir personn ki mon pa ti la pandan ki mon ti’n al vizit bann kongregasyon. Mon pa krwar ki mon bann sef in zanmen remarke ki mon pa’n vin travay dan wikenn.

MON TI ESEY RESTE ZWAYE LER MON SERVIS TI SANZE

En zour an 1994, bann frer ki ti diriz sa travay predikasyon Kiba ti apel tou bann sirveyan rezyonal pour vin en miting spesyal Havana. I ti annan 80 nou an tou. Nou ti vreman kontan pour nou finalman zwenn kanmarad apre tou sa lannen. Dan sa miting, nou ti premyerman diskit lo bann sanzman ki lorganizasyon ti pe fer. Apre zot ti fer en lanons ki ti sok nou. Bann frer ti dir ki zot ti pe plàn donn lotorite nou non. Akoz zot ti pe fer sa?

Zot ti eksplike ki zot ti’n annan bann miting avek gouvernman parski zot ti anvi amelyor sa relasyon ki gouvernman ti annan avek bann Temwen Zeova. Gouvernman ti’n demann non tou sirveyan rezyonal e nou tou nou ti dakor pour donn nou non. Depi sa letan, nou relasyon avek gouvernman in amelyore.

Menm si nou pa ti ankor kapab legalman anrezistre konman en larelizyon, avek letan nou ti lib pour fer nou bann renyon e fer predikasyon. Pli tar, nou ti aprann ki gouvernman ti deza konn non detrwa sirveyan rezyonal me zot ti anvi ki nou dir zot nou menm.

An Septanm 1994, nou ti ganny permisyon pour reouver en biro brans. Nou ti menm kapab servi sa menm batiman ki nou ti servi 20 an pli boner.

An 1996, en frer dan Betel ti telefonn nou e envit nou de Emilia pour vin servi dan Betel. Nou ti vreman sirprann e mon ti dir bann frer ki mon ti annan de zanfan ki ti ankor pe reste avek nou e zot ti mon priyorite. Bann frer ti reflesir lo mon sityasyon e apre zot ti dir ki zot ankor anvi nou servi dan Betel. Nou ti aksepte e konmans fer plan pour al reste Havana ansanm avek nou zanfan.

Fransman, o konmansman mon pa ti kontan servis Betel. Mon ti’n pas plizyer lannen konman en sirveyan rezyonal e mon lespri ek leker ti ankor dan sa servis. I ti difisil pour mwan travay dan en lofis me bann lezot Betelit e sirtou mon madanm Emilia, ti ed mwan pour sanz mon pwennvi. Apre en serten letan, mon ti reganny mon lazwa e aprezan mon kontan pour servi dan Betel.

Nou de Emilia, nou nepli zenn. Nou kontan ler nou mazin tou bann frer ek ser ki nou’n annan sa privilez pour konnen e travay ansanm avek pandan bann lannen ki’n pase. Nou sirtou vreman kontan pour vwar nou bann zanfan ek pti zanfan pe servi Zeova. Nou santi parey zapot Zan, ki ti dir: “Napa en pli gran lazwa ki ler mon tande ki mon bann zanfan pe kontinyen reste dan laverite.”—3 Zan 4.

Nou de Emilia, nou’n servi dan Betel preski 30 an e nou fer nou mye pour fer nou servis menm si nou rankontre problenm akoz kanser ek lavyeyes. Pandan sa bann lannen ki nou’n servi Zeova, nou’n fer fas avek bann problenm me nou zwaye ki nou’n kapab servi “sa Bondye ki ere” pour preski 70 an isi lo zil Kiba.—1 Tim. 1:11; Ps. 97:1.